Shipeʼeruʼujee: tü wawaikat Ian (Florida, Estados Unidos), settienpüroʼu 2022 (Sean Rayford/Getty Images); pasanain: Wanee wayuu sümaa süchon ojuʼitinnüshii naya noumainpaʼajee (Donetsk, Ucrania), juulioʼu 2022 (Alex Chan Tsz Yuk/SOPA Images/LightRocket via Getty Images); shikialuʼujee: aainjünüsü wainma prueba süpüla sütüjaanüin aaʼu sünainre wayuu COVID (Pekín, China), aaʼuriiroʼu 2022 (Kevin Frayer/Getty Images).
¡EEJA MAʼIN PAAʼIN!
2022: Wanee juya alataka oʼu wainma kasa mojusü | ¿Jamüsüche sünüiki tü Bibliakat süchiki tia?
Soʼunnaa tü juyakat 2022 wainma maʼin atkawaa, aisü maʼin shiiʼiree nneerü otta asetüsü wüin, akutkujaasü mma jee waneirua kasa. ¿Jamüsüche sülataka tia? Aküjünüsü shia suluʼu tü Bibliakat.
¿Jamüsüche sülataka wainma kasa soʼu juyakat 2022?
Maʼaka süküjain tü Bibliakat alüʼütsü «sükalia süpüla sajaʼttüin kasa mojusü», watüja aaʼulu tia sutuma süpüshuaʼale tü kasa alatakat soʼu juyakat tüü (2 Timoteo 3:1, TNM). Oʼttusü shia soʼu tü juyakat 1914. Jülüja paaʼin wanaawain tü alatakat maaʼulu sümaa tü süküjatüjütkalia tü Bibliakat sünain sülatüinjatüin maaʼulu:
«Atkawaa» (Mateo 24:6, TNM).
«Soʼu juyakat 2022 oʼttusü süchikuaʼa tü atkawaakat chaa Europa».a
Paashajeʼera tü pütchikat: «Rusia invade Ucrania».
«Aijeerü jamü» (Mateo 24:7, TNM).
«Soʼu juyakat 2022 wainmaleeshiʼiya maʼin na wayuu müliakana aaʼin sutuma jamü».b
Paashajeʼera tü pütchikat: «Aisü maʼin jamü sainküin mmaka sutuma tü atkawaa chakat Ucrania».
«Jouleerü ayuulii sainküin mma» (Lucas 21:11, TNM).
«Eesü süchikuaʼaya tü ayuuliikat polio münakat, wainmaleesia na wayuu kanainkana tü kanüliakat viruela del mono otta wainma maʼin na outakana sutuma COVID-19. Ayaawatüna aaʼulu sutuma tia keemain maʼin tü ayuulii alataakat sünainmüin wayuu otta eein süpüla suʼttamaatüin nünain wanee wayuu tia ayuuliikat».c
Paashajeʼera tü pütchikat: «Outushii 6 miyoone wayuu sutuma COVID-19».
‹Kasa mmoleetka eema wayuu› (Lucas 21:11, TNM).
«Keemasü maʼin tü mmakat soʼu juyakat 2022 soʼunnaa joutaleʼu. Jaʼishi maʼin chi kaʼikai, aisü maʼin wüñaasü, aʼajaasü wunuʼulia, miyoʼu maʼin juya jee waneirua kasa. Wainmaleesia kasa ajaʼttaka sutuma, wainma maʼin na outakana otta wainma na wayuu akolojookana».d
Paashajeʼera tü pütchikat: «Jaʼishi maʼin chi kaʼikai suluʼu mmakat süpüshuaʼa».
«Kasachiki» (Lucas 21:9, TNM).
«Jashichishi maʼin na wayuukana sutuma kojutuin maʼin tü kasakalüirua. Müsüjeseʼe wainmain maʼin na aainjakat protesta soʼu juyakat tüü namüin na sülaülashiikana mma».e
Paashajeʼera tü pütchikat: «Kojutusü maʼin kasa süpüshuaʼa sainküin mma».
¿Kaseetka alatüin juyakat tüseena?
Nnojotsü jaralüin atüjaain saaʼu tü alatüinjatkat soʼu juyakat 2023. Watüjaapejeʼe saaʼu sunoutaajeerüin tü mmapaʼakat nüikaleʼerapa Maleiwa wanee Aluwatawaa saaʼu tü Mmakat (Daniel 2:44). Sükajee tia Aluwatawaakat, ajaʼttatajatü süpüshuaʼa tü müliakalü atuma waaʼin otta suunteerü wayuu saainjain tü nüchekakat Maleiwa (Mateo 6:9, 10, TNM).
Watütüleʼerüin paaʼin süpüla jülüjain paaʼin tü nümakat Jesús otta eejüin paaʼin sünain tü kasa alatakat, tü wayaawatakalü anainjee shikeraajüin tü sümakat tü Bibliakat (Marcos 13:37). Pütüjeere sooʼomüin süchiki tü sümakat tü Bibliakat, püshaja wamüin süpüla pütüjaain saaʼu tü kasa anasü eejeetkat mapeena püpüleerua jee napüleerua na püpüshikana.
a Jill Lawless: «2022 Was Year the Horror of War Returned to Europe,» AP News, tisienpüroʼu 8 soʼu 2022.
b «Una crisis alimentaria mundial», Programa Mundial de Alimentos.
c Lawrence O. Gostin, JD: «Living in an Age of Pandemics—From COVID-19 to Monkeypox, Polio, and Disease X», JAMA Health Forum, settienpüroʼu 22 soʼu 2022.
d Martina Igini: «Whatʼs Behind the Record-Breaking Extreme Weather Events of Summer 2022?», Earth.Org. oʼutuupüroʼu 24 soʼu 2022.
e Thomas Carothers otta Benjamin Feldman: «Economic Anger Dominated Global Protests in 2022», Carnegie Endowment for International Peace, tisienpüroʼu 8 soʼu 2022.