Akooʼomüinraajeerü tü jamükat sainküin mmakat sutuma tü atkawaakat otta tü kanüliakat cambio climático | ¿Jamüsüche sünüiki tü Bibliakat süchiki tia?

Aisü shiiʼiree eküülü sainküin mmakat sutuma tü atkawaa chakat Ucrania otta sutuma tü kanüliakat cambio climático. Suluʼu mma eere wainmain maʼin konpainñiia wainma na wayuu kapüleekana amüin nousütüin tü neküinjatkat.

• «Kapüleesü maʼin apünajaa jee aisü shiiʼiree eküülü sutuma tü atkawaakat, sutuma tü kanüliakat cambio climático otta sutuma kojutuin maʼin tü luusakat jee waneirua kasa» (António Guterres, wanee secretario general suluʼu Naciones Unidas, juulioʼu 17 soʼu 2023).

• «Saʼalijirüin Rusia süjütünüin eküülü sutuma Ucrania. Naashin na atüjakana süpüleerua tia, kapüleejeerü maʼin ousütaa sünain eküülü sainküin mmakat otta kojuteerü maʼin shia suluʼu waneirua mma eere maʼletsein na wayuukana maʼaka saaʼin chaa palaajeeruʼu sünain África otta Oriente Medio» (Atalayar.com, juulioʼu 23 soʼu 2023).

Anuu tü aküjünakat suluʼu tü Bibliakat süchiki alinjatüin shiiʼiree eküülü otta tü alatüinjatkat mapeena.

Süküjatüjülia tü Bibliakat alinjatüin jamü

• Anuu tü nümatüjütkalia Jesús: «Atkaajiraajeerü wayuu suluʼujeejatü wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya, aijeerü jamü» (Mateo 24:7).

• Aküjünüsü suluʼu tü karaloʼutakat Apocalipsis nachiki pienchishii amaajuna. Naʼakajee naya amaajunakana eeshi chi shiyaawasekai tü atkawaakat. Chi nüchikijeejachikai shiyaawaseshi tü jamükat, eere palitchoinjatüin shia otta kojutuinjatü maʼin. «Teʼrakalaka wanee ama mütsiiyatai, eejatkalaka wanee pesa najapuluʼu chi naajuchikai. Taapakalaka wanee pütchi [...] sünain maa: ‹Wanee denario sülia tü waneekat kilo trigo jee tü apünüinkat kilo cebada, wanee denarioa sülia›» (Apocalipsis 6:5, 6).

Tü aküjünatüjütkalia suluʼu tü Bibliakat süchiki aijeerüin jamü ekeraajüsü maaʼulu yaa süka «sülüʼülüin sükalia süpüla sajaʼttüin kasa mojusü» (2 Timoteo 3:1). Pütüjeere sooʼomüin süchiki tia kaʼikat otta nachiki na pienchishii amaajuna aküjünaka achiki suluʼu Apocalipsis, pünaja tü videokot Aʼwanajaasü maʼin sukuwaʼipa tü Mmapaʼakat soʼujee tü juyakat 1914 otta paashajeʼera tü pütchikat «¿Jaralii na pienchishiikana amaajuna?».

Piyaawateerü aaʼu tü paaʼinrajatkat sünainjee tü sümakat tü Bibliakat

• Aküjünüsü suluʼu tü Bibliakat waneirua pütchi anakat maʼin akaalinjeenaka waya kapüleepa maʼin tü kasa alatakat maaʼulu, maʼaka saaʼin kojutupa maʼin tü eküütkat jee aipa maʼin shiiʼiree. Paashajeʼera sooʼomüin süchiki tia sünain tü pütchikat «Cómo vivir con menos».

• Süküjainña tü Bibliakat anoutaajeerü mapeena tü kasa alatakat maaʼulu. «Jouleerü maʼin pünajüt saaʼu tü mmakat» otta nnojoleerü jaralüin outuin jamü (Salmo 76:12). Pütüjeere sooʼomüin süchiki tia alatüinjatkat mapeena otta jamüshii eeka süpüla wanoujain sünain tü sümakat tü Bibliakat, paashajeʼera tü pütchikat «La esperanza real de un mañana mejor».