Nnojotsü lotuin sukuwaʼipa wanee kasa natuma na políticokana | ¿Kaseerü naainjaka Maleiwa Nuluwataapa?

Nnojoluitpa anain naaʼin na wayuukana namaa na aluwataakana saaʼu mma süka nnojoluin lotuin sukuwaʼipa wanee kasa natuma otta nnojoluin nanoujain sünain tü namakat. Soʼu 2023 asakinnüshii waneinnua wayuu sainküin mmakat süchiki tü jülüjakat naaʼin nachiki na políticokana, naküjaka nnojoluitpain nanoujain sünain nanüiki.a

Süküjain tü Bibliakat eejeechi wanee Aluwataashi anakai süpüla wanoujain anain anüiki, matüjainsai aküjaa naʼalain otta lotusü sukuwaʼipa süpüshuaʼa tü kasa naainjakat. Chia aluwataashikai nia Jesús otta aluwataajeechi nia nutuma Maleiwa (Isaías 9:7).

Jaʼyasü saaʼu nukuwaʼipa Jesús alin wayuu nüpüla sutuma tü naainjakat napüleerua (Mateo 9:35, 36). Süka niainjachin aluwataain Jesús nutuma Maleiwa, loteerü sukuwaʼipa kasa nutuma otta jimateerü naaʼin napüshuaʼa na wayuu anashiikana amüin niain aluwataain (Salmo 72:12-14).