¿Jara akaalinjeenaka na wayuu nnojoliikana sünainpünaain atkawaa? | ¿Jamüsüche sünüiki tü Bibliakat süchiki tia?

Anuu tü sümakat Naciones Unidas:

Soʼujee oʼutuupüroʼu 7 sünainmüin 23 soʼu 2023, alanaʼaleesia suulia 6.400 na wayuu outakana sutuma tü atkawaa eekat chaa Gaza sümaa Israel otta eeshii 15.200 na mayeinkana maʼin. Wainma maʼin na wayuu apütakana nepia.
Settienpüroʼu 24 soʼu 2023, outushii 9.701 wayuu sutuma tü atkawaa eejatkat chaa Rusia sümaa Ucrania otta 17.748 na mayeinkana maʼin chaa Ucrania.

¿Süküjainche tü Bibliakat wanee pütchi aneetka atuma naaʼin na müliakana sutuma tü atkawaakat?

Tü amülialakat waaʼin

Aküjünüsü suluʼu tü Bibliakat najaʼttireerüin Maleiwa tü atkawaakat sainküin tü mmakat (Salmo 46:9). Süpüla nuuntuin tia, niʼitaajeerü Maleiwa wanee sukuwaʼipa aluwatawaa chaa iipünaa ajaʼttirüinjatka sukuwaʼipa aluwatawaa natuma na wayuukana (Daniel 2:44). Aneerü nakuwaʼipa na wayuukana Nuluwataapa Maleiwa.

Anuu tü naaʼinrajatkat Jesús chi aluwataainjachikai nutuma Maleiwa:

«Nükaalinjeechi chi wayuu eʼrakai müliaa achuntakai kaalinwaa, chi wayuu mojukai aaʼin jee chi nnojoikai jaralin akaalinjain. Amülialaajeerü naaʼin naalin chi maʼletsekai jee naalin chi mojushikai, nükaalinjeena naya. Nükaalinjeena naya suulia müliain naya atumawaa jee noulia na mojulaashiikana» (Salmo 72:12-14).

Nuluwataapa Maleiwa, najaʼttireerü tü müliaakalü atuma saaʼin wayuu, tü atkawaakat otta tü mojulawaakat.

«Meerü nülaʼajaakai saaʼin Maleiwa naʼwüira naya wayuukana, nnojoleerü outaa, nnojoleerü mojuu aaʼin, nnojoleerü aʼyalajaa jee nnojoleerü saalin wanee kasa. Alatüitpa tü kasa müliapuʼukalü atuma waaʼin» (Apocalipsis 21:4).

Wainma kasa anasü weʼreetka Nuluwataapa Maleiwa saaʼu tü mmakat. ¿Jamüsü watüjaaka saaʼu tia? Shia sünainjee tü sümakat tü Bibliakat süchiki eeinjatüin atkawaa maaʼulu suluʼu mma pejepünaa jee suluʼu mma wattapünaa (Mateo 24:6). Wayaawata aaʼu sünainjee tü alatakat maaʼulu, sülüʼülüin sükalia süpüla sajaʼttinnüin sukuwaʼipa aluwatawaa natuma na sülaülashiikana mma (2 Timoteo 3:1).