¿Jarai chi wanoujainjachikai anain anüiki? | ¿Jamüsüche sünüiki tü Bibliakat süchiki tia?

Mojusü naaʼin na wayuukana süküjünüle namüin wanee kasa jee nnojorüle shikeerajüin tü münakat.namüin. ¿Jamüsüche kapüleeka namüin nanoujain sünain tü münakat namüin?

• Na políticokana kapülasü naaʼin nakuwaʼipa neʼe namüiwaʼa.

• Na wayuu aküjakana notiisia suluʼu radio jee telewisoot nnojotsü pansaain tü naküjakalü achiki.

• Na científicokana nnojotsü nachajaain sukuwaʼipa süpüla anainjatüin nakuwaʼipa na wayuukana.

• Na shikiipüʼükana tü iküleesiakat paaʼinwashii namaa na políticokana jee nnojoishii naya ekirajüin nüchiki Maleiwa.

Müsüjeseʼe nnojoluin nanoujain na wayuukana sünain tü münakat namüin. Anuu tü sümakat tü Bibliakat:

• «Nnojo punoujain tü namakat na aluwataaliikana otta nnojo punoujain sünain tü sümakat wayuu süka isain nachiki oʼtteʼeraa wayuu» (Salmo 146:3).

¿Jarai chi wanoujainjachikai anüiki?

Aküjünüsü suluʼu tü Bibliakat anain maʼin wanoujale nünain Jesucristo. Nnojoishi niain neʼe wanee wayuu anamia kepiapuʼukai saaʼu tü mmakat. Nüneeküin Jehová Jesús süpüla nuluwataainjachin otta nnojoleechi ooʼulaain suulia aluwatawaa (Lucas 1:32, 33). Nia Jesús aluwataaka saaʼu nuluwataaya Maleiwa chaʼaya sirumatuʼujee (Mateo 6:10).

• Pütüjaweere saaʼu jamüin wanouja sünain tü nümakat Jesús paashajeʼera tü pütchikat «¿Jarai chi aneekünakai süpüla aluwatawaa?» otta «¿Jameerü sukuwaʼipa wayuu nuluwataapeena Maleiwa saaʼu tü Mmakat?».