¿Eesüche wanee aluwataaya eejeetka waneepia? | ¿Kasa süküjaka tü Bibliakat süchiki tia?

Sainküin tü mmakat nnojotsü anain naluwataaya na süʼlaülashiikana mma. Süka natkaajiraain eesü protesta jee nnojoishii paaʼinwain na políticokana jaʼitairü suluʼu mma eere anajiraain wayuu.

Süküjain tü Bibliakat süchiki wanee aluwataaya eejeetka waneepia. Eesüjaʼa paapüirüle süchiki, shia tü nikirajakalü anain Jesús.

• «Müinjatü jünüiki juʼuraajapa: »‹Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin. Wachuntuin pümüin puluwataainjachin saaʼu tü mmakat. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa» (Mateo 6:9, 10).

¿Kasa süküjaka tü Bibliakat süchiki tü aluwataayakat?

Wanee aluwataaya eejeetka waneepia

Tia aluwataayakat chasü chaa iipünaa.

• Aluwataaya chejeʼewatka iipünaajee müshi Jesús süchiki tia aluwataayakat (Mateo 4:17; 5:3, 10, 19, 20). Anuu sooʼomüin nünüiki: «Nnojoipejeʼe taya shiʼinaajalain wayuu süpüla taluwataainjachin» (Juan 18:36).

Aluwataajeechi Maleiwa jee najaʼttireerü naluwataaya na wayuukana.

• Müsü tü Bibliakat: «Soʼunnaa naluwataain naya wayuukana, nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa eeinjatka süpüla kaʼikat süpüshuaʼa. Nnojoleerü jaralüin alaülaajaain saaʼu. Sükajee tia sukuwaʼipakat aluwatawaa, najaʼttireerü Maleiwa süpüshuaʼa sukuwaʼipa aluwatawaa sutuma wayuu, shieetkalaka eein waneepia tü sukuwaʼipakat aluwatawaa nutuma» (Daniel 2:44).

Nnojoleerü jaralüin ajaʼttirüin tia aluwataayakat otta niainjachi Jesús aluwataaka.

• Anuu tü sümakat tü Bibliakat: «Aluwataajeechi nia süpüla kaʼikat süpüshuaʼa otta nnojoleechi jaralin ooʼuleʼerüin nia» (Daniel 7:13, 14).

Jimatuulinjatü tü maapakat sutuma nuluwataaya Maleiwa.

• Müsü tü Bibliakat: «Shiimain maʼin nojoyoloweenain suupünaa suuʼulia uuwa otta higuera, nnojoleena eimmolojunuin; süka nüküjaitpain shia Jehová chi laülaashikai naaʼu na aapiee chakana iipünaa» (Miqueas 4:4).

Pikirajaa sooʼomüin süchiki nuluwataaya Maleiwa

Soʼu yaajachin Jesús mmapaʼa «aküjashi nia pütchi anasü süchiki niainjachin aluwataain Maleiwa» (Mateo 9:35). Nüküjainña süchiki waneirua kasa:

• «Aküjüneerü sainküin mma tü pütchi anakat maʼin süchiki nuluwataainjachin Maleiwa süpüla saapüinjatüin shia wayuu maʼleekalia. Kettaapa tia, anteerü sükalia süpüla sajaʼlajaainjatüin tü kasa alatakat sainküin mma» (Mateo 24:14).

Maaʼutpünaa yaa aküjünüsü süchiki tü pütchi anakat maʼin suluʼu 240 mma jee pueulo. ¿Kasa anasü eejeeka sutuma tü nuluwataayakat Maleiwa? ¿Kasa paaʼinrajatka süpüla anain pukuwaʼipa sutuma?. Anashii pikirajaale süchiki nuluwataaya Maleiwa.

Pünaja tü videokot ¿Paapüirü süchiki Nuluwataainjachin Maleiwa?