¿Nukumalache Maleiwa chi Yolujaakai?

Susoutaka eʼipajee tü Bibliakat

Nnojoishi nukumalain Maleiwa chi Yolujaakai, aapieepuʼu anashi paala, mojulaajaaka nia saashin tü Bibliakat, müichika nia Yolujaain. Müsü Deuteronomio 32:3-5 nüchiki Maleiwa: «Lotusü sukuwaʼipa süpüshuaʼa tü kasa naainjakat Jehová otta ayatüsia nikeraajüin tü nümakat; matüjainsai nia aainjaa kasa mojusü, lotusü nukuwaʼipa». Wayaawata aaʼuchi chi Yolujaakai niapuʼuin paala wanee aapiee anamia jee aaʼinrapuʼuka kasa anasü, wanee aapiee nüchon Maleiwa.

Naashin Jesús suluʼu Juan 8:44, chi Yolujaakai «nia kanainjeejachikaʼaya tü alawaakat». Suluʼujee tia, wayaawata aaʼu lotopuʼuin nukuwaʼipa paala chi Yolujaakai.

Nukumajüin Jehová na aapieekana süpüla naneeküin süka naaʼin namüiwaʼa tü anakat jee tü mojukat. Majatia nukuwaʼipa chia aapieekai. Wanaa sümaa niʼrüijaain wayumüin chi aapieekai nümüin Maleiwa otta nimeʼejüin naaʼin Adán sümaa Eva süpüla paaʼinwain naya nümaa, Satanás münüshi nia yalejeechiki. «Nüʼünüü Maleiwa» maluʼulu tia anülieekat (Génesis 3:1-5; Alateetkat Mapeena [Apocalipsis] 12:9).