¿Jamüsü nnojotka eein kuruusa namaʼana na aküjaliikana pütchi nüchiki Jehová?

Wainma anoujakana nünain Cristo aʼwaajakana kuruusa. Mayaainjeʼe nanoujain nünain Cristo na aküjaliikana pütchi nüchiki Jehová, nnojoishii aʼwaajüin naya kuruusa. ¿Jamüsüche makaʼa shia?

Palajana shia süka nnojoliin outuin Jesús sünain wanee kuruusa saashin tü Bibliakat, akachennüshi nia sünain wanee wunuʼu neʼe otta aküjünüsü pütchikat tüü namüin na anoujakana nünain Cristo: «Juuʼulaa suulia jüüjüüin sümüin tü namaleiwaseyaasükalüirua na manoujainsaliikana» (1 Corinto 10:14; 1 Juan 5:21).

Otta müsia nüküjain Jesús nayaawatüneenain na anoujakana nünain sükajee pütchikat tüü: «Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:34, 35). Tü ayaawatünajatkat anainjee na anoujashii shiimainshiikana nünain Cristo nnojotsü sükajeejatüin naʼwaajüin kuruusa otta ayaakuaairua, sükajeejatü alin napüla wayuu.