Video aainjünaka süpüla tü Outkajawaakat miyoʼu apünüinka kaʼi 2020: ¡Talata maʼin jaaʼin waneepia!

Atanalaasü waaʼin sutuma tü video wanajawaikat sünain tü outkajawaakat miyoʼu apünüinka kaʼi jee wayaawatüin maʼin saaʼu tü shikirajakat tü Wiwüliakat sutuma. Eesü 114 video sünain tü Outkajawaakat miyoʼu apünüinka kaʼi 2020: ¡Talata maʼin jaaʼin waneepia! Saʼakajee tia, pienchisü shikii apünüinmüin tü video neʼiyataakalü aluʼu na laülaashii jülüjakana aaʼin na aküjaliikana pütchi namaa na neʼipajanakana sünain ekirajaa. «Wainmakajasaʼa aʼyatawaa jee nneerü oʼunaka sünain aainjaa tia videokalüirua», eesüjaʼa maa sümüle paaʼin.

Eestaashii maʼaka 900 wawalayuu akaalinjakana sünain akumajaa sukuwaʼipa tü ekirajaanajatkalü anain sünain outkajawaakat tüü. Eesü maʼaka saaʼin 100 miit oora nalatiraka na wawalayuukana sünain aʼyatawaakat tüü soʼu piama juya. Saʼakajee tia, 70 miit oora nalatitka na wawalayuukana sünain aainjaa tü peliikulakat, Nehemías: «Katsüinsü jaaʼin sünainjee talatüin jaaʼin nutuma Jeʼwaa», eerejeʼe neʼe 76 minuutoin tia peliikulakat.

Wainma nneerü oʼunaka sünain tü kasa choʼujaakat namüin na wawalayuu akaalinjakana sünain aʼyatawaakat tüü, maʼaka saaʼin soporte técnico, akürawaajia otta sünain tü piichi eejatüle saainjünüin tia aʼyatawaakat.

«Keeʼireesü maʼin naaʼin na wawalayuu aʼyataakana suluʼu Comité de Enseñanza saainjünüin video sainküinjee mmakat süpüshuaʼa süchiki nakuwaʼipa wainma wawalayuu, süpüla shiyaawatünüin sükajee tü videokalüirua eein wawalayuu sainküinpünaa mmaka süpüshuaʼa. Süpüla wountuin tia, eejatü piama shikii pienchimüin neʼipaʼa na wawalayuu aʼyataakana sünain aainjaa video suluʼu 11 mma. Wainma aʼyatawaa jee nneerü oʼunaka sünain akumajaa jee oʼuniraa sukuwaʼipa naʼyataain napüshuaʼa na wawalayuukana», müsü nünüiki Jared Gossman, aʼyataashi nia sünain Servicios de Audio y Video.

Wainma tü kasa choʼujaakat süpüla saainjünüin tü videokalüirua. Jamüsüjaʼa süpüla saainjünüin tü peliikulakat Nehemías: «Katsüinsü jaaʼin sünainjee talatüin jaaʼin nutuma Jeʼwaa», akumajünüsü wanee süpülajana suluʼu Mount Ebo peje sünain Patterson, chaa Nueva York. Süpüla anainjatüin jee pansaainjatüin tü ojuʼitakat suluʼu tü peliikulakat sümaa anain sukuwaʼipa tü nneerü eʼitaanakat süpüla, nashatüin na wawalayuukana sukuwaʼipa süsepü tü Jerusalén sümaiwajatkat süka wunuʼu sümaa kachepain shia natuma süpüla müinjatüin aka saaʼin ipa otta aipirua meetüro sajaʼapüin iipünaamüin. Atüjasü ansünnaa tia süsepüyaakat süpüla wainmain sukuwaʼipa atumawaa, nnojolü müsia choʼujaain sukumajünüin wainma süpülajana. Ayatapejeʼe oʼunüin maʼaka 100 miit dólares sünain akümajaa tü kasa choʼujaakat süpüla tia peliikulakat.a

Kojutuleeitpa wamüin tü outkajawaakat miyoʼu apünüinka kaʼi süpülajatka juyakat tüü, süka watüjaaitpain saaʼu süpüshuaʼa tü aainjünakat süpüla eeinjatüin shia. Watüjaa aaʼulu sünain nuʼwaajüneechin maʼin Jeʼwaa suluʼu mmakat süpüshuaʼa sünainjee tü aainjünakat süpüla outkajawaakat tüü. Waapüinjeseʼe tü analuʼutkat jümüin saaʼu tü nneerü jüsülajakat otta saaʼu tü nneerü juluwataakat suluʼupünaa donate.jw.org süpüla tü aʼyatawaa aainjünakat sainküin mmaka süpüshuaʼa.