Nnojotsü eein wanee karaloʼuta eekai müin aka saaʼin

«¡Shiaʼaya taʼatapajaka tüü soʼunnaa 19 juya!». ¿Kasa saʼatapajaka maʼin tia wawalakat? Shia shiʼipa tü Bibliakat Traducción del Nuevo Mundo suluʼu anüikii saashajaakalü aluʼu tü kanüliakat bengalí. Müsia sünüiki watta saalii wayuu süshajünüle tü Bibliakat Traducción del Nuevo Mundo suluʼu tü anüikii naashajaakat. ¿Kasache aainjünajatka süpüla süshajünüin otta sukumajünüin wanee Biblia suluʼu wanee anüikii naata?

Palajana, aneekünüshii waneinnua wawalayuu süpüla nayainjanain ashajüin tü Bibliakat suluʼu wane naata anüikii. Jülüjasü saaʼin tia aʼyatawaakat, Comité de Redacción. ¿Jeʼrache kaʼi nalatitka sünain tia aʼyatawaakat? Anuu tü nümakat chi wawalakai Nicholas Ahladis, aʼyataashi nia suluʼu Servicios de Traducción chaa Warwick (Nueva York): «Oʼunusü süchiirua wainma kasa, maʼaka saaʼin jeʼrain na wawalayuu eekana süpüla naʼyataain sünain tia. Kapüleere maʼin süshajia tü nanüikikat, shiʼraajüle wayuu tü sümakat tü Bibliakat otta waneejatuwaire sünüiki wayuu eere saashajaanüin tia anüikiikat. Eeshii wawalayuu ashajakana tü Bibliakat sünainjee Mateo sünainmüinreʼeya Alateetkat Mapeena soʼunnaa waneesia jee apünüinre juya otta eesü süshajünüle süpüshuaʼa tü Bibliakat suluʼu wanee naata anüikii soʼunnaa pienchi juya jee sülataleere suulia tia. Wainmaleepejeʼe juya choʼujaakat süpüla sukumajünüin tü Bibliakat napülajatka na moʼusaliikana».

Choʼujaasü nakaaliinjünüin na wawalayuu ashajakana wanee Biblia suluʼu wanee naata anüikii. Eeshii na naneekünüle waneinnua wawalayuu naatakana akuwaʼipa jee naatale noumain süpüla naküjain nayaawatüle saaʼu tü pütchikat jee mapüleere saashajeʼerian, naaʼinrüin tia masaloui. Sutuma naaʼinrüin tia na wawalayuukana, pansaasü tü pütchikat, mapüleesat shia otta shiyaawatamaata aaʼu wayuu. Naashin wanee wawala ekirajakai na wawalayuu ashajakana tü Bibliakat suluʼu wanee naata anüikii chaa Sudáfrica, jülüjasü maʼin naaʼin na wawalayuukana tü naʼyataainkat süpüla anainjatüin shia noʼuluʼu Jeʼwaa otta süpüla mapüleeinjatüin shia sümüin wayuu.

Süshajünapa tü Bibliakat eʼinpürimiijünajatü shia süpüshuaʼa otta katainjatü shia atumawaa. Süpüla shiʼinpürimiijünüin tü Bibliakat choʼujaasü maʼaka saaʼin poloo kasa: karaloʼuta, tinta, sütainjatka tü Bibliakat, pegante, forros para cubrirlas, hojas de plata, cintas, süchechejia süsapü tü karaloʼutakat otta wanee kasa süpüla nnojoluinjatüin suʼwalakajaain süpana tü Bibliakat. Soʼunnaa juyakat 2019 alatüsü suulia 20 miyoone dólares tü akataajünakat süpüla shiʼinprimiijünüin Biblia otta alatüsü suulia 300.000 oora nalatitka na wawalayuukana sünain akumajaa otta aluwatawaa tü Bibliakat namüin na wawalayuukana.

¿Jamüshii nalatitka na wawalayuukana wainma kaʼi sünain tia aʼyatawaakat otta nakataajaka watta saalii nneerü sünain? Anuu tü nümakat Joel Blue, aʼyataashi nia suluʼu Departamento Internacional de Impresión: «Shia alanaʼaleeka tü Bibliakat suluʼu anain suulia tü waneirua karaloʼuta weʼinpürimiijaka. Müsüjeseʼe aneein maʼin sukuwaʼipa watuma süpüla nuʼwaajünüin Maleiwa sutuma otta anainjatüin sümüin wayuu tü pütchi waküjakat sümüin».

Nnojotsü shiain neʼe wakumajüin tü Bibliakat saashajeʼeraka wayuu. Jamüsüjaʼa tü Biblia napülajatka na moʼusaliikana, tü kanüliakat braille, suluʼusü shia poloo anüikii. Eesü suʼunule maʼaka mekiisat oora süpüla sukumajünüin wanee Biblia suluʼu braille. Süka sukumajünüin shia shiʼipawai sümaa muloʼuin maʼin shia, alatüinjatü suulia piama meetüro tü süpüleeinjatkat paaʼuwale shia atumawaa. Eesü sukumajünüle wanee Biblia eekai karaloʼutain neʼe, namüinjatü na püreesashiikana süka shiain ekerotinnüin suluʼu waneinnua kaatset.

Aʼwanajaasü nakuwaʼipa na wayuukana sutuma tü Bibliakat Traducción del Nuevo Mundo. Jülüja waaʼin tü alatakat namüin na wawalayuu aashajaakana tü anüikiikat kiluba. Outkajaashii naya suluʼu wanee pueulo kanüliakat Tombe, suluʼu tü mmakat República Democrática del Congo. Wattasü tü mmakat Tombe. Alatüsü suulia 1.700 kiloometüro oʼunushi süpüla süntajatüin wayuu chamüin chejee Kinsasa. Waneesia neʼe tü Biblia eepuʼukat namaʼana na wawalayuukana, nnojotpejeʼe ayaawatünüin maʼin tü pütchi suluʼukat süka shiain saashajaaya wayuu sümaiwa. Pachikuatuwaishii na wawalayuukana sümaa tü Bibliakat süpüla yapainjatüin natuma tü nekirajaainjatkalü anain sünain tü outkajawaakat otta süpüla tü pütchi nekirajüinjatkalü anain. Shiasaʼa soʼujee akoosütoʼu soʼu juyakat 2018, aapünüsü namüin napüshuaʼa na wawalayuukana tü Bibliakat Traducción del Nuevo Mundo suluʼu kiluba otta anaʼleesia maʼin süshajia.

Anuu tü sümakat wanee wawala aashajaaka suluʼu alemán süchiki tü Bibliakat Traducción del Nuevo Mundo jeketkalü ojuʼitüin: «Kamalainsü maʼin tamüin aashajeʼeraa tü Bibliakat. ¿Joujaleetche taashajeʼeraka shia tachikuaʼa, maʼwaisü taya?». Anuu tü nümakat wanee wayuu püreesakai: «Aapünüsü tamüin wanee Biblia Traducción del Nuevo Mundo. Anoutaasü takuwaʼipa shiʼipaʼaya sutuma taashajeʼerüin shia. Nnojotpuʼusü tayaawatüin saaʼu tü pütchi suluʼukat tü Bibliakat. Mapüleepejeʼe maʼin ayaawataa saaʼu tüü. Ekirajaweeshi taya sooʼomüin nachiki na aküjaliikana pütchi nüchiki Jeʼwaa, süpüla taʼwaajüin Maleiwa wanaa namaa».

Napüshuaʼa na wayuu aashajeʼerakana tü Bibliakat Traducción del Nuevo Mundo kojutusü maʼin namüin tü naaʼinrakat na wayuu asülajakana nneerü süpüla ayatüinjatüin sukumajünüin sooʼomüin Biblia. Tü nneerü süpülajatkat tia, sünainjeejatü tü nneerü asülajünakat süpüla süküjünüinjatüin tü pütchi sainküin mmakat süpüshuaʼa, asülajünawaisü shia suluʼupünaa donate.jw.org. Waapüin analuʼutkat jümüin süka jüsülajüliin maʼin.