Tü nüshajalakat Juan
9 Wanaa sümaa waraittüin Jesús, niʼrakalaka wanee wayuu eweeniraakai sümaa moʼupaʼain nia. 2 Anuujeseʼe nanüiki na nikirajüinkana Jesús nümüin: «Ekirajüikalee, ¿jamüshi moʼupaʼakaʼa wayuukai chii? ¿Shiache sutuma kaainjalain nia? ¿Nayataapa kaainjalain na wayuu kachooinkana nia?». 3 Nusoutakalaka Jesús namüin: «Nnojoishi süsirüin kaainjalaa otta nnojoishii nayain kaainjalain na wayuu kachooinkana nia. Alatapejeʼe tia nümüin süpüla sütüjaanüin aaʼu tü eekat süpüla naaʼinrüin chi Maleiwakai. 4 Waaʼinrajatü tü nuluwataakalü anain waya chi Kajünalakai taya eeiwaʼaya kaʼikat. Aipaʼapeena nnojotsü jaralüin aʼyataain. 5 Müshi taya maʼaka saaʼin wanee luusa sümüin wayuu yaaiwaʼaya taya saʼaka». 6 Süchikijee nüküjain tia, nejetakalaka mmoluʼu süpüla naainjaain wanee pootshi. Nushuletka tü pootshikat sünain noʼu chi wayuukai. 7 Anuujeseʼe nünüiki Jesús nümüin: «Puʼuna puʼlojooi poʼu süka tü wüin chakat Siloam», «aluwataaushi» maluʼulu tia pütchikat. Oʼunushijeseʼe wayuukai jee nuʼlojookoloko noʼu, koʼukalaka nia nüleʼejapa.
8 Anuujeseʼe nanüiki na wayuu kepiakana nüʼütpaʼa chia wayuukai jee na eʼrapuʼukana nia sünain ojulijaa: «¿Aashin niayaain chi wayuu ojulijapuʼukai chii?». 9 «Niaʼayan», eeshii na makana. «Nnojoishi niain, meematüshi aka neʼe naaʼin», eeshii na makanaya. «Tayaʼayan», nümakalaka chi wayuukai namüin. 10 Anuujeseʼe nanüiki na wayuukana nümüin: «¿Jamakuwaʼipaika süpüla koʼuinjachin pia?». 11 Nusoutakalaka chi wayuukai namüin: «Chi wayuu kanüliakai Jesús naainjaain wanee pootshi, nushuletkalaka shia sünain toʼu jee nümakalaka tamüin: ‹Puʼuna puʼlojooi poʼu süka tü wüin chakat Siloam›. Toʼunakalaka sünain toʼlojooin toʼu, koʼukalaka taya». 12 «¿Jalakaʼa chia wayuukai?», namaka nümüin. «Jamüin, nnojoishi tatüjaain aaʼu», nümakalaka namüin.
13 Niʼikajaanaka chi wayuu moʼupaʼakai paala namaʼanamüin na fariseokana. 14 Sükalioʼujatü eemerawaa tü kaʼi nushuletkalü oʼu Jesús tü pootshikat sünain noʼu chi wayuukai. 15 Nüsakinnaka joo chi wayuukai natuma na fariseokana sünain jamakuwaʼipalin maʼin nia süpüla koʼuinjachin nia. Anuujeseʼe nünüiki wayuukai namüin: «Nushulerüin pootshi sünain toʼu jee toʼlojooko shia süchikijee, koʼuichika taya». 16 Anuujeseʼe nanüiki noʼutku na fariseokana: «Chia wayuukai nnojoishi nümaʼanajeejachin Maleiwa, ¿jamakaʼa nnojotka kojutuin nümüin tü sükaliakalü eemerawaa?». Anuujeseʼe nanüiki waneinnua: «¿Jamakaʼa naainjaka kasa pülasü kaainjarairejeʼe nia?». Nnojoishii paaʼinwain naya sünain tü namakat. 17 Anuujeseʼe nanüiki nümüin chi wayuu moʼupaʼakai paala: «¿Jarai maʼin saaʼin pümüin chia wayuukai, jama piaichipain koʼuin nutuma?». Nusoutakalaka chi wayuukai namüin: «Nünüikimaajachi nia Maleiwa».
18 Nnojotsü nanoujain na judíokana moʼupaʼain paala chia wayuukai. Neenajinnaka natuma na judíokana na wayuu kachooinkana chia wayuukai. 19 Anuujeseʼe nanüiki na judíokana namüin: «¿Jüchon wayuukai chii, chi eweeniraakai sümaa moʼupaʼain nia jaashin? ¿Jamakaʼa koʼuichipaka nia?». 20 Nasoutakalaka na wayuu kachooinkana chia wayuukai: «Shiimainsaʼaya wachoin wayuukai chii otta eweeniraashi sümaa moʼupaʼain nia. 21 Nnojotpejeʼe watüjaain saaʼu jamakuwaʼipalin süpüla koʼuinjachin nia jee nnojoishi watüjaain aaʼu jaralin koʼuin atuma nia. Jüsakirapan, wayuule joʼuuchon joo nia, nnaweerüjaʼa nünüiki jümüin». 22 Müsü nanüiki na wayuu kachooinkana nia süka mmoluin naya neema na judíokana, jama keraatüjülüin nanüiki na judíokana sünain najünajaainjachin* suluʼujee tü ekirajüleekat nüchiki Maleiwa, chi wayuu anoujakai sünain niain Jesús chi Cristokai. 23 «Wayuule joʼuuchon joo nia, nnaweerüjaʼa nünüiki jümüin», müshiijeseʼe namüin na wayuu kachooinkana nia.
24 Neenajinnaka nüchikuaʼa chi wayuu moʼupaʼakai paala jee namakalaka na judíokana nümüin: «Niainjachi puʼwaajaka Maleiwa, watüjaa aaʼuchisa wayuuin kaainjarai chi koʼukai atuma pia». 25 Anuujeseʼe nünüiki namüin: «Nnojoishi tatüjaain aaʼu wayuule kaainjarai nia, shiainjaʼa tatüjaain aaʼu koʼuichipain taya nutuma». 26 Anuujeseʼe nanüiki nümüin: «¿Jamüsü pukuwaʼipa nutuma? ¿Kasa naainjaka süpüla koʼuinjachin pia nutuma?». 27 Nusoutaka namüin: «Mataasü taküjayütkai shia jümüin, nnojotpejeʼe kasajatüin jümüin tanüiki. ¿Jamakaʼa jaapajeeka joo shia süchikuaʼa? ¿Jikirajüneetaapa neʼe nutuma?». 28 Airuʼutsüjeseʼe maʼin nanüiki nümüin sünain maa: «Piataa neʼe shikirajalaka wayuuwaʼatakat tia, eekajasaʼa wayakana nikirajala Moisés. 29 Watüjaa aaʼu naashajaain chi Maleiwakai nümaa Moisés, nnojotpejeʼe watüjaain saaʼu jalejeekuwalüin wayuuwaʼatakat tüü». 30 Nusoutakalaka chi wayuukai namüin: «Alawaʼaleeitpainjaʼa jutuma, ¿jamüshii nnojoliika jütüjaain saaʼu jalejeekuwalin chi wayuu koʼukai atuma taya? 31 Watüjaa aaʼu nnojoluin jamajatüin nümüin Maleiwa nanüiki na kaainjaraliikana, kapülapejeʼe naaʼin nanüiki na kojutukana atuma nia jee na aaʼinrakana tü nuluwataakalü anain. 32 Nnojoishi aapünüichin achiki wanee wayuu, koʼukai atuma wanee wayuu eweeniraakai sümaa moʼupaʼain nia. 33 Nnojoire nümaʼanajeejachin Maleiwa wayuukai chii, isasüjeʼe nüchiki naaʼinrüin wanee kasa». 34 Anuujeseʼe nanüiki nümüin: «¿Jamakuwaʼipaliinjana süpüla pikirajüin waya, wayuule kaainjarai pia?». Najünajaaka nia.
35 Naapaka Jesús süchiki nüjünajaanüin chia wayuukai. Nümakalaka nümüin nüntiraapa nümaa: «¿Kanoulashi pia nünain chi Süchonkai Wayuu?».* 36 Nusoutakalaka nümüin Jesús chi wayuu moʼukai paala: «¿Jaraikai nia Señotkalee? Püküja tamüin jaralin nia kanouleechikalaka taya nünain». 37 Anuujeseʼe nünüiki Jesús nümüin: «Taya tayakai, aniisa pia aashajaain tamaa». 38 Nusoutakalaka chi wayuukai nümüin: «Señotkalee, kanoulashiaʼaya taya pünain», nüsapainkaka nia nümülatuʼu. 39 Anuujeseʼe nünüiki Jesús: «Antüshi taya saʼakamüin wayuu süpüla süsalainjatüin saainjala tatuma. Koʼujeechikalaka chi eekai moʼupaʼain, eekajasaʼa na koʼukana, moʼupaʼajeena». 40 Aapünüsüjeseʼe nünüiki Jesús natuma na fariseo yalajanakana nüʼütpaʼa jee namakalaka nümüin: «Nnojoishiisaʼa moʼupaʼain waya, ¿aashi müin?». 41 Nusoutakalaka Jesús namüin: «Wayuule moʼupaʼasalii jia, nnojoishiijeʼe süsalain jia jaainjala. Ayatapejeʼe jia kaainjalain süka ‹Koʼushii waya› jümüin».