EKIRAJAAYA 35
¿Kasa taaʼinrajatka süpüla aleewain taya nümaa Maleiwa?
Niyaawata aaʼulu Gabriel anain nukuwaʼipa wanaa sümaa aleewain nia nümaa Maleiwa soʼunnaa sülatüin kasa mojusü nümüin. Anuu nünüiki: «Wanaa sümaa 12 juya taya, oʼunushi chi tashikai woulia. Sotusü taaʼin soʼu wanee ai tachuntashaatain nümüin Jeʼwaa nüleʼejüinjachin nüchikuaʼa».
Sutuma mojushaatain naaʼin Gabriel, naashajeʼerüin tü Bibliakat. Nüntaka sünain wanee wetsiikulo, nünüiki chi salmistakai nümüin Jeʼwaa. Tü makat mayaa: «Chi mojukai aaʼin jee chi eekai mmoluin nüchajaajeechi pia sümaa niʼitaain naaʼin pünain, pükaaliijechikalaka nia» (Salmo 10:14). Naashin Gabriel antüsü tia pütchikat suluʼumüin naaʼin. Anuu nünüiki: «Wanaa sümaa taashajeʼerüin tia, sotusü taaʼin nükaalinjeein taya Jeʼwaa otta müin aka nia wanee tashi tamüin. Nnojoishi eein wanee washi anaʼleekai nuulia Jeʼwaa».
¿MÜITCHE pukuwaʼipa maʼaka naaʼin Gabriel? Eesüjaʼa süpüla müin shia jee nnojoluin müin shia. Eepejeʼe wanee kasa anaka maʼin: shia aleeweein Jeʼwaa pümaa. Anuu tü sümakat tü Bibliakat süchiki tia: «Je müleka jürütkaale nünainmüin Maleiwa, arütkaajeechi nia jünainmüin» (Santiago 4:8). ¿Piyaawatüinche saaʼu tia? Jaʼitaichi nnojoluin weʼrüin nia jee wayuuin neʼe waya, keeʼireesü naaʼin Jeʼwaa aleewain waya nümaa.
Nnojoishii süpüla aleewainjanain waya nümaa Maleiwa süpaʼa mma neʼe. Eesü wanee kasa waaʼinrajatka. Jülüjataa paaʼin püpünajüle wanee maatachon. Keeʼireere paaʼin miyoʼumaatüinjatüin shia sümaa anain, anasü püpünajüle eere anainjatüin shia otta piʼyotowalinjatüin wüin saaʼu. Nnojoluinjatü motuin paaʼin shia. Müsia neʼe sukuwaʼipa tü aleewaakat nümaa Maleiwa. ¿Kasa paaʼinrajatka süpüla aleewain maʼin pia nümaa?
Choʼujaasü wekirajaain
Süpüla aleewainjanain maʼin piamashii wayuu, yootojiraainjana jee naapajiraainjatü nanüiki waneʼewai nakua. Müinjatia nukuwaʼipa wanee wayuu eekai aleeweein nümaa Maleiwa. ¿Jamüsü süpüla waapajüin nünüiki Jeʼwaa? Shia waashajeʼerüle jee wekirajaale sünain tü Nünüikikat (Salmo 1:2, 3).
Eesüjaʼa nnojorüle pücheküin pikirajaain sünain tü Bibliakat jee shiale kamalain pümüin eʼrajaa telewisoot, ashaitaa videojuegos jee namaain pia paʼaleewainyuu. Aleeweere pia nümaa Maleiwa, acheküsü paapajüin tü nümakat sükajee tü Bibliakat.
Nnojo jülüjain paaʼin mamalainjeerüin pümüin ekirajawaa sünain tü Bibliakat. Eesü süpüla kamalain shia pümüin mayaainjeʼe nnojoluin pücheküin aashajeʼeraa karaloʼuta. Pukumajeein sukuwaʼipa süpüla paashajeʼerüin shia. ¿Kasa paaʼinrajatka süpüla tia? Eesü süpüla paaʼinrüin tü sümakat wanee majayüt kanüliaka Lais. Anuu sünüiki: «Teʼitaain wanee oora taashajeʼerüinjatka oʼu wanee kapiitulo suluʼu tü Bibliakat tatamaapa wattaʼa maalü». Anuu tü saaʼinrakat María, 15 suuyase: «Taashajeʼerawalin tü Bibliakat aipaʼa süpülapünaa teisalaain», müsü shia.
¿Kasa tü paaʼinrajatkat süpüla pikirajaain sünain tü Bibliakat? Palajana piirakaa sümüin tü suluʼukat süpana 292. Süchikijee, püshajeerü yaʼayaa tü oora anakalü oʼu pikirajaain sünain tü Bibliakat.
․․․․․
Anuu sooʼomüin tü paaʼinrajatkat süpüla pikirajaain sünain tü Bibliakat süka eejeerüin pütchi kapüleejeetka piyaawatüin saaʼu. Eesüjaʼa süpüla sülatüin pümüin tü alatakat nümüin Jezreel, wanee jintüi 11 nuuyase, müshi nia: «Eeshi tantawaire sünain pütchi kapüleʼewaika tamüin». Sülatüle tia pümüin, nnojo puuʼulaain suulia ekirajawaa. Soto paaʼin paapajeerüin nünüiki Jeʼwaa, chi anakai maʼin süpüla paʼaleewain pikirajaale sünain tü Bibliakat. Paaʼinrüle tia, kamalainjeerü pümüin. Anasü maʼin paaʼinmaale tia süpüla anain pukuwaʼipa jee talatüin paaʼin.
Paaʼinmaa oʼuraajaa waneepia
Eesü wanee kasa anashaatasü naapaka wamüin Maleiwa: shia eein süpüla woʼuraajüin nümüin. Eeshi süpüla paashajaain nümaa soʼu tü oora püchekakat, shiale kaleʼu jee saʼwai. Jülüjashi pia naaʼin Jeʼwaa waneepia otta naapajeein maʼin pünüiki. Müsüjeseʼe süküjain pümüin tü Bibliakat puchuntajatüin nümüin Maleiwa sooʼopünaa kasa süpüshuaʼa jee süchiki tü shapaakalü atuma paaʼin otta nnojo motuin paaʼin aapaa analuʼut nümüin saaʼu tü kasa anasü naaʼinrakat pümüin (Filipos 4:6).
Makalaka eein süpüla püküjain nümüin Jeʼwaa süpüshuaʼale tü kasa alatakat pümüin jee tü shapaakalü atuma paaʼin otta anasü paapüle tü analuʼutkat nümüin waneepia maʼaka paapüin analuʼut nümüin wanee paʼaleewain aaʼinrakai kasa anasü pümüin. Nnojoishi eeichin wanee paʼaleewain aaʼinrakai kasa anasü püpüleerua nuulialeʼeya Jeʼwaa (Salmo 106:1).
Püshaja süchiki waneirua kasa paapüinjatka aaʼu analuʼut nümüin Jeʼwaa.
․․․․․
¿Kasa eeka süpüla paaʼinrüin mmorüle pia jee shapaale maʼin paaʼin? Anuu tü eekat süpüla paaʼinrüin: «Püküja nümüin Jeʼwaa tü alatakat pümüin, jee nükaalinjeechikalaka pia. Nnojoleechi niyüülajüin wanee wayuu eekai lotuin akuwaʼipa» (Salmo 55:22).
Püshaja yaʼayaa süpüshi tü shapaakalü atuma paaʼin, püküjeekalü achiki nümüin Jeʼwaa puʼuraajapa.
․․․․․
Pütüja sünainjee tü alatüitkat pümüin
Eesü wanee kasa jülüjainjatka paaʼin süpüla aleewain pia nümaa Jeʼwaa. Müsü nünüiki David suluʼu wanee Salmo: «Jiyaawata saaʼu süka jukuwaʼipa jümüiwaʼa anamiain Jeʼwaa» (Salmo 34:8). Alatüsü wanee kasa mojusü nümüin David wanaa sümaa nüshajüin tia pütchikat. Oʼutunataaichijeʼe aaʼin nia nutuma chi Aluwataaikai Saúl soʼu tia, müshijeseʼe nuunjulaain naʼaka na Filisteokana, nüʼünüü naya wayuukana. Nayaawatakalaka nia mapa. Eeshijeʼe süpüla outuin nia atumawaa, nnojotpejeʼe alatüin tia nümüin. ¿Kasa naaʼinraka suulia nuʼutunuin aaʼin? Mamainnayaashi nia (1 Samuel 21:10-15).
Nnojotpejeʼe jülüjain naaʼin David katüin noʼu sükajee kekiin nia. Suluʼu tia pütchi nüshajakat, niyaawata aaʼu niain Maleiwa akaaliijaka nia. Anuu nünüiki süchiki tia: «Achuntushi taya nümüin Jeʼwaa jee nükaalinjaka taya, wainma kasa mojusü nuʼtteʼeraka achikumüin taya» (Salmo 34:4). Anuu nünüiki David sünainjee tü alatakat nümüin: «Jiyaawata saaʼu süka jukuwaʼipa jümüiwaʼa anamiain Jeʼwaa».a
Soto paaʼin süchiki wanee kasa nükaalinjaka anain pia Jeʼwaa otta püshaja süchiki tia alatakat. Nnojotsü maʼin shiainjatüin süchiki wanee kasa nnojotka kachipünaain waaʼin jee shiale süchiki wanee kasa nnojotka maʼin kojutuin wamüin.
․․․․․
Wachajaa maʼin sukuwaʼipa waneʼewai wakua süpüla aleewainjanain maʼin waya nümaa Maleiwa. Müinjatü shia watuma jaʼitaina nekirajüin waya sünain tü Bibliakat na wayuu kachooinkana waya. ¿Müsüchejeʼe sukuwaʼipa putuma, nnojottaapa müin shia putuma? Tü pikirajaakalü anain, sükaaliijeechi pia sünain tü paaʼinrajatkat. Aneerü pukuwaʼipa nutuma Jeʼwaa jülüjale paaʼin tia. Müsü sünüiki tü Bibliakat süchiki tia: «Anakaja müleka juchuntüle nümüin Maleiwa waneepia süka süpüshua jaaʼin. Maa aka wane wayuu nuchuntüle, aapüna amüinchi. Maa aka wane wayuu mekeerüle, nünta anainrü tü nüchajaakat achiki» (Mateo 7:7).
SULUʼU TÜ KARALOʼUTAKAT LO QUE LOS JÓVENES PREGUNTAN RESPUESTAS PRÁCTICAS VOLUMEN 1, EKIRAJAAYA 38 OTTA 39, PÜNTEERÜ ANAIN SOOʼOMÜIN SÜCHIKI TÜ WEKIRAJAAINJATKALÜ ANAIN
ANUU TÜ EEJEETKAT SULUʼU TÜ WANE EKIRAJAAYAKAT
¿Kapüleesüche pümüin aashajawaa namaa na wayuukana nüchiki Maleiwa? ¿Kasa paaʼinrajatka süpüla pusoutuin saaʼu punoula?
[Pütchi]
a Anuu süshajia sutuma wanee Bibliairüa tü pütchi «jiyaawata saaʼu» makat: «juuʼulaka shia jiʼraiwa», «jiʼra sukuwaʼipa sünainjee tü alatakat jümüin» (Nueva Versión Internacional; La Nueva Biblia Latinoamérica, 1992; La Sagrada Escritura, noota).
PÜTCHI SULUʼUJEEJATKA TÜ BIBLIAKAT
«Anataʼaleeshiijaʼa na wayuu eʼrakana choʼujaain Maleiwa namüin» (Mateo 5:3).
TÜ EEKAT SÜPÜLA PAAʼINRÜIN
Paashajeʼerüle pienchisü süpana tü Bibliakat soʼukaiwai, kettaajeerü putuma soʼu wanee juya.
¿PÜTÜJAA AAʼU TÜÜ?
Suluʼu karaloʼutakat tüü eesü pütchi suluʼujeejatka tü Bibliakat. Paashajeʼerüle shia jee poonoole sümaa tü sümakat, aleeweechi pia nümaa Jeʼwaa. Tia shia tü keeʼireekat naaʼin püpüleerua (Juan 6:44).
PAAʼINRAMAATA SHIA
Tü taaʼinrajatkat süpüla anain takuwaʼipa tekirajaapa sünain tü Bibliakat: ․․․․․
Tü taaʼinrajatkat süpüla toʼuraajawalin weinshi nümüin Maleiwa: ․․․․․
Tü tasakireekat anain na wayuu kachonniikana taya ․․․․․
¿JAMÜSÜ SAAʼIN PÜMÜIN?
● ¿Kasache paaʼinrajatka süpüla kamalain maʼin pümüin pikirajaain sünain tü Bibliakat?
● Mayaainjeʼe waleʼeruʼuin tü kaainjalaakat, ¿jamüsü naapajeeka Jeʼwaa wanüiki?
● ¿Kasa paaʼinrajatka süpüla anainjatüin maʼin pünüiki puʼuraajapa nümüin Jeʼwaa?
[Komentaario]
«Anuu sünüiki Eva: «Jintuluiwaʼaya taya teiteʼerawaipuʼuin neʼe tanüiki toʼuraajapa nümüin Jeʼwaa. Jooluʼu taashajaa achikit tü kasa anasü jee tü kasa mojusü alatawaikat tamüin. Süka naatawalin tü alatawaikat tamüin soʼukaiwai nnojotsü teiteʼerakuʼu tamüin tanüiki».
[Pütchi otta Ayaakuaa]
Pikirajaa sünain tü Bibliakat
1. Püneeka süchiki wanee kasa kamalainka pümüin suluʼujee tü Bibliakat. Puchunta kekiiwaa nümüin Jeʼwaa süpüla piyaawatüin saaʼu.
2. Jülüja maʼin paaʼin tü paashajeʼerakat. Nnojoluinjachi pia ashapajaain sünain aashajeʼeraa. Müinjatü piʼrakai saaʼin tü paashajeʼerakat achiki. Müinjachi piʼrakai saaʼin tü alatakat, paapakai saaʼin nanüiki na wayuukana, paatüin seejüü kasa otta puuʼulaküin seʼejü eküülü. Müle shia putuma, meerü shiimainkai saaʼin pümüin tü paashajeʼerakat achiki.
3. Püsakireʼera paaʼin. Sajaʼttapa tü paashajeʼerakat achiki, püsakireʼera paaʼin:
● ¿Jamüsüche nüshajiraka Jeʼwaa suluʼu tü Bibliakat tü taashajeʼerakat achiki?
● ¿Jaraliiche na anakana süpüla tashatüin akuwaʼipa jee na nnojoliikana anain süpüla tashatüin akuwaʼipa?
● ¿Kasa tatüjaka sünainjee süpüla anain takuwaʼipa?
● ¿Kasa tatüjaka nüchiki Jeʼwaa jee süchiki sukuwaʼipa wanee kasa nutuma?
4. Puʼuraajawai motsoʼo süchikijee pikirajaain. Püküja nümüin Jeʼwaa süchiki tü pütüjakat sünainjee tü pikirajaakat anain otta jamüinjatüin sukuwaʼipa putuma süpüla paaʼinrüin shia. Jalia motojoyaai paaʼin paapüin analuʼut nümüin saaʼu tü Nünüikikat.
[Ayaakuaa]
Tü pünüikikat müsü aka saaʼin wanee anakia süpüleerua tooʼui otta müsü aka saaʼin wanee luusa suluʼu tü tapünakat» (Salmo 119:105).
[Pütchi otta Ayaakuaa]
Paaʼinmaa tü aʼwaajaakat Maleiwa
¿Nnojotsüche apütaain kaʼi püpüla süpüla puʼuraajüin nümüin Maleiwa jee süpüla paashajeʼerüin tü Bibliakat? Sülatüle pümüin tia, jülüjeesü paaʼin kasain paaʼinmaainjatüin.
Tü eekat süpüla paaʼinrüin: Püchajaa wanee waatte otta piʼitaa ipa miyoʼuyuu suluʼu. Süchikijee pijita mma suluʼu pirataleepa shia. ¿Kaseerü alataka? Pirateerü tü waattekat sümaa ipa otta mma.
Piyuʼrule tü jasaikat jee tü ipakalüirua otta shiale pijitüin jooluʼu palajana tü mmakat jee piʼitaain tü ipakalüirua süchikijee, ¿kaseerü alataka? Nnojoleerü ekeroluin süpüshuaʼa tü ipakalüirua ¿aashi müin? Alatüsü tia süka pijitüin palajana tü jasaikat.
¿Kasa watüjaka sünainjee tia? Müleka palajanale putuma tü kasa nnojotkat maʼin choʼujaain maʼaka saaʼin tü ashaitaakat, nnojoleerü apütaain kaʼi süpüla puʼwaajüin Maleiwa. Müsüjeseʼe sümüin tü Bibliakat namüin na anoujashiikana naaʼinmaainjatüin «maʼin tü kasa alanaʼaleekat suluʼu anain» (Filipos 1:10, TNM). Paaʼinrüle tia, eejeerü kaʼi süpüla puʼwaajüin Maleiwa jee müsia apütaajeerü kaʼi süpüla püshaitüin. Soto paaʼin shiainjatüin paaʼinmaʼaleein tü kasa alanaʼaleekat suluʼu anain.
[Ayaakuaa]
Süpüla aleewain maʼin waya nümaa Maleiwa, ekirajaainjana waya waneepia, maʼaka shiʼyotunüin wüin waneepia saaʼu wanee maatachon süpüla miyoʼuinjatüin shia