Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
MAATSOʼU 2-8
KOROLO KOJUTUSÜ SULUʼUKA TÜ WIWÜLIAKAT | GÉNESIS 22, 23
«Ooʼulaküna aaʼinchi Abraham nütüma Maleiwa»
w12-S 1/1 23 püt. 4-6
¿Jamüsü nuchuntaka Jeʼwaa nümüin Abraham nuʼutajachin naaʼin Isaac?
Anuu nünüiki Jeʼwaa nümüin Abraham: «Je müshia Isaac, chi püchon waneeshikai, aishikai maʼi püpüla, anakaja jooluʼu pümaale nia [...] saaʼu wane uuchi teeʼiyateetkat pümüin, puʼuteechi aaʼin sünain naʼajünüin süpüla piiʼiyatüinjatüin tojut tamüin» (Génesis 22:2). Nütüjaa aaʼu Jeʼwaa alin maʼin Isaac nüpüla Abraham müshijeseʼe nümüin Jeʼwaa mayaa: «Chi püchon waneeshikai, aishikai maʼi püpüla». Akaataajaʼa neʼe naalin Jesuu nüpüla Jeʼwaa, piantua nümüin nümüin: «Pia chi Tachonkai aishikai tapüla» (Marcos 1:11; 9:7).
«Anakaja jooluʼu» wanaa sümaa nümüin Jeʼwaa nümüin Abraham, naashin wanee ekirajaai süchiirua tü sümakat tü Wiwüliakat, tü nüküjeekat shia kojutuin maʼin tü nuchuntakat Jeʼwaa nümüin Abraham. Mojukajasaʼa maʼin naaʼin Abraham wanaa sümaa suchuntunuin nümüin tia. Müsia neʼe naaʼin Jeʼwaa wanaa sümaa müliain atumawaa chi Nüchon aishikai nüpüla otta nuʼutunuin aaʼin. Aishaatasü tia nümüin Jeʼwaa.
Eesüjaʼa nnojorüle anain wamüin tü nuchuntakat Jeʼwaa nümüin Abraham, nnojoipejeʼe nuuʼulaain Jeʼwaa nuʼutuin naaʼin Abraham Isaac. Nnojotsü nuuʼulaain niʼrüinjachin Abraham nümüliala outule chi nüchonkai. Mayaapejeʼe nnojoluin nuuʼulaain Jeʼwaa nuʼutunajachin aaʼin Isaac, nuuʼulaain nuʼutunajachin aaʼin Jesuu, chi Nüchonkai. Naapüin nia «süpüla ouktaa saaʼu waainjala» (Roma 8:32). ¿Jamüsüche naainjaka tia? Süpülajatü katüin woʼu suluʼu kaʼikat süpüshuaʼa (1 Juan 4:9, TNM). Sutumajee müitpain waalin nüpüla Jeʼwaa, ¿aashin jaʼyainjatüin saaʼu wakuwaʼipa alin nia wapüla?
w12-S 15/10 23 püt. 6
Poonoo sümaa nünüiki Maleiwa, piʼreetka shikeraajüin tü nümakat
6 Süpüla wanoujain sünain tü nüpansaajakat Jeʼwaa, anuu nünüiki: «Maʼaka shiimainjaʼa eein taya, shiimain tü tamakat jümüin, nümakalaka Jeʼwaa chi Laülaashikai saaʼu kasa süpüshuaʼa» (Ezeq. 17:16). Suluʼu tü Wiwüliakat alatüsü suulia 40 sukua nüpansaajüin Jeʼwaa nünüiki, tü eʼraajünakat maʼin shia tü nüpansaajakat nümüin Abraham. Wainmatua nüpansaajüin Jeʼwaa nünüiki nümüin Abraham. Suluʼujee tia, wayaawata aaʼu niweetajachin Jesuu sünainjee nuuʼuliwoʼu Isaac (Gén. 12:1-3, 7; 13:14-17; 15:5, 18; Gén. 21:12, TNM). Soʼu wanee kaʼi, nuuʼulaküin Jeʼwaa naaʼin Abraham süpüla nuʼutajachin naaʼin Isaac. Jaa müshi Abraham sümüin tü nümakat Jeʼwaa nümüin jee wanaa sümaa naaʼinrüinjatüin tia, nnojoishi nia nuuʼulaain wanee aapiee. Anuukalaka nünüiki Jeʼwaa nümüin: «Tamüshi paala pia sümaa pansaain tanüiki pümüin. Teeʼiyateerü joo taʼanasia pümüin saaʼujee yapain pia süpüla puʼutüinjachin naaʼin chi püchonkai tamüin, chi waneeshikai püchoin. Pansaatüjülia tanüiki pümüin sünain watteerüin saalii puuʼuliwoʼu tatüma. Iseerü achiki ayaawajünaa, süka wainmeerüin maʼi shia. Mayaawajuweerü maa aka tü shüliwalakalüirua chakat iipünaa je tü jasai sotpünaakat palaa. Je nayamüleerü tü naʼünüükalüirua. Je saaʼujee paaʼinrüin tü taluwataakat anain pia, süchunteerü tamüin wayuu sainküin mmakat süpüla anakuaippalüinjatüin shia tatüma maa aka anakuaippain na puuʼuliwoʼukana tatüma» (Gén. 22:1-3, 9-12, 15-18).
MAATSOʼU 9-15
KOROLO KOJUTUSÜ SULUʼUKA TÜ WIWÜLIAKAT | GÉNESIS 24
«Wanee jierü nuʼwayuuseinjatka Isaac»
wp16.3-S 14 püt. 3
«Aa, tacheküin»
«Anakaja pansaale pünüiki jooluʼu tamüin nuʼupala Jehová», müshi Abraham nümüin Eliezer wanaa sümaa nuluwataain nia sünain asaajaa wanee jierü nuʼwayuuseinjatka Isaac. Nnojotpejeʼe chejeʼewalüinjatüin shia Canaán, süka jamüin, tü wayuu chejeʼewatkalüirua nnojoishi naʼwaajüin Jeʼwaa otta mojutusai nia namüin. Nütüjaa aaʼu Abraham süsalainjanain nutuma Jeʼwaa naya wayuukana sünainjee tü kasa mojusü naainjakat, müsüjeseʼe nnojoluin nücheküin sünainpünaainjachin Isaac tia wayuukalüirua. Otta nütüjaa aaʼu Abraham shikeraajüinjatüin tü keeʼireekat naaʼin Jeʼwaa nükajee Isaac (Génesis 15:16; 17:19; 24:2-4).
wp16.3-S 14 püt. 4
«Aa, tacheküin»
Nukuentajüin Eliezer namüin na wayuu nüntakana amaʼanamüin, nuchuntuin nümüin Jeʼwaa wanaa sümaa nüntüin eemüin tü ishikat. «Püneeka tü jierü anakat süpüla nuʼwayuusein Isaac» müshi nümüin Jeʼwaa. ¿Jamüsü süpüla nütüjaain saaʼu Eliezer jaralüin tü jiet nüneekakat Jeʼwaa? Shiainjatü tü asireechikai nia wüin sümaa tü camellokalüirua (Génesis 24:12-14). ¿Jarat tü jierü asiraka wüin nia? Shia Rebeca. Saapajüle Rebeca tü nukuentajakat Eliezer namüin na süpüshikana, talatakajasaʼa maʼin saaʼin.
wp16.3-S 14 püt. 6, 7
«Aa, tacheküin»
«¿Kaseerü taaʼinraka müleka shiyouktüle tü jietkat antaa tamaa yaamüin yaa suluʼumüin tü mmakat?», müsü nünüiki Eliezer nümüin Abraham. Anuukalaka nünüiki Abraham: «Ekeraajeerü tü pükuaippakat suulia achajawaa jierü sükajee tia» (Génesis 24:39, 41). Chaa nipialuʼu Betuel kojutusü atumawaa tü sümakat tü jietkat. ¿Jamüsü watüjaaka saaʼu tia? Shia saaʼujee tü alatakat soʼu kaʼikat tia. Talatüsü maʼin naaʼin Eliezer sutuma eein tü aluwataanakalü anain nia. Waneemüin kaʼi süchikijee tia, achuntushi Eliezer oʼunaa sümaa Rebeca chaa Canaánmüin. Nnojotpejeʼe shiawalain nacheküin tia na süpüshikana tü jietkat, tü nachekakat shia makatajatüin namaa shia poloo kaʼi sooʼomüin. Anuukalaka nanüiki: «Joʼu weenajiraiwa watüjaajeetka aaʼu jamüin sünüiki» (Génesis 24:57, Dios habla hoy).
Tü alatakat sümüin Rebeca suʼwanajeʼereerü sukuwaʼipa. ¿Jameetkajasaʼa sünüiki? «Nnojo juluwataain taya suluʼumüin wanee mma nnojotka teʼraajüin», ¿meetche eera shia? ¿Oʼunataajeetpa shia süka sütüjaain saaʼu niain Jeʼwaa oʼunirüin sukuwaʼipa tia alatakat? Anuu sünüiki Rebeca mayaapejeʼe eʼiwalajatüin sülatüin sümüin wanee kasa makat aka tia: «Aa, tacheküin» (Génesis 24:58).
Püchajaa süchiki kaaʼürüi suluʼu tü Wiwüliakat
wp16.3-S 12 püt. 6, 7
«Aa, tacheküin»
Süchikijee shipirajüin tü sümüchikat, awataashi wanee laülaa süʼütpaʼamüin sünain maa sümüin: «Kamanee pia tamüin, püshakatira paala pümüchi püsülajaiwa tasüin wüin». Tü nuchuntakat sümüin mataasü aka saaʼin ekaa roo, nnojotsü kapüleein maʼin otta kamaneeshi maʼin nia. Shiʼrüinjaʼa mapa tü jietkat nnojoluin yalejeʼewalin chi wayuukai suluʼu tia mmakat, süshakatiramaataka sümüchi, süsitkalaka nia wüin, eeyaai yootchonkai saaʼin. Shiʼrüin Rebeca nüntüin chi wayuukai sümaa poloosü camello otta shiʼrüin maluʼuin tü anuwa süsülekat mürüt. Shiʼrüin sünain nünanajüin shia chi wayuukai otta sükaalinjakalaka nia. «Ajaʼiteerü taya tachikua sooʼomüin süpüla süsüinjatüin tü peʼejenakalüiruaya», müsü nümüin (Génesis 24:17-19).
Ajaʼitüsü wüin nasüin na camellokana, nnojotpejeʼe yootchon wüin nasüin sutuma, asüshii wüin emiraleepa naya. Süpüla emirain wüin wanee camello asüinjachi 95 liitüro wüin. Watta aʼyatawaa süpüla Rebeca, malaaka joo tia. Nnojotpejeʼe wüinyaasüin maʼin tü camellokalüirua, emiramaatsü neʼe. Mayaapejeʼe nnojoluin sütüjaain aaʼu Rebeca müin tia, shiʼyonooin wüin nasüin na camellokana. Shia suluʼuka saaʼin sükaalinjainjachin chia wayuu wattajeʼewaikai. Chaataa shia, iseeta shia majüsü Rebeca sünain oʼyonowaa wüin süsüin tü mürütkalüirua, nünajaa nümüsü chi laülaakai (Génesis 24:20, 21).
wp16.3-S 13, noota.
«Aa, tacheküin»
Epiyuʼlaasü mmapaʼakat soʼu tia. Nnojotsü eein wanee pütchi suluʼu tü Wiwüliakat aküjaka kamaʼain maʼin Rebeca chaa eekai tü ishikat otta natunkajüin na süpüshikana süpüla. Otta nnojotsü eein wanee pütchi aküjaka süsaajünüin Rebeca nutuma wanee kasa sünain sutuma kamaʼain maʼin shia.
wp16.3-S 15 püt. 2
«Aa, tacheküin»
Jej, anuu joo süchikuaʼa tü pütchi wekirajaayütkalü anain suʼttiajee ekirajaayakat tüü. Koutapüittaalüsü wayuukalüirua chaa eeʼwarüle shiairua, epiyuʼulaasü mmakat naaʼu chaa Négueb. Shiʼrüin Rebeca wanee wayuu warai mataalain süpaʼapünaa wanee anooi, müshijaʼa nüsakireʼetkai naaʼin. Ashakatatüjülia Rebeca süpülapünaa nujoyolooin camellokai mmaluʼu. Anuukalaka sünüiki nümüin chi laülaakai: «¿Jarai chi wayuu arütkaakai wanainmüin süpaʼajee tü anooikat?», müsü. «Nia Isaac, chi talaamainkai» nümapa sümüin, «saapaainjeseʼe joo tü süpainyeerasekat sünain shiʼitaain sünain suʼupünaa» (Génesis 24:62-65). ¿Jamüsü saainjaka Rebeca tia? Saainjain tia süpüla shiiʼiyatüin nujutü chi suʼwayuuseinjachikai. Maaʼulu yaa, nnojoluitpa müin sukuwaʼipa wayuu. Mayaapejeʼe müin tia, eesü tü watüjakat wapüshuaʼa sünainjee nnojoluin yaletüin saaʼin Rebeca.
MAATSOʼU 16-22
KOROLO KOJUTUSÜ SULUʼUKA TÜ WIWÜLIAKAT | GÉNESIS 25, 26
«Naapüin Esaú sujutu eʼirumaa nümaʼanajatka»
it-2-S 717 püt. 1
Eʼirumaakai
Sümaiwa paala, kojutushi maʼin atumawaa chi eʼirumaakai saʼakajee nüpüshi. Nia laülaaka saaʼu nüpüshi nüchikijee chi kachonkai nia otta aapünüsü nümüin piantua tü kasa eekai nümaʼana chi nüshikai, tü apaalaa niʼipünaainjatkat nüpüla (Dt 21:17). Jamüshijaʼa Rubén aikaleʼenüshi nia nutuma José eeinjatüle nüpülee chi epayaakai (Gé 43:33). Suluʼu tü Wiwüliakat, eeshi nnojoire niain palajanain atumawaa chi epayaakai, chi palajanakai atumaa nia chi kojutukai amüinyüü jee niale chi jaa makai waneepia sümüin pütchi anasü (Gé 6:9, 10; 1Cr 1:28; anasü paashajeʼerüle Gé 11:26, 32; 12:4, 5; paashajeʼera HERENCIA; PRIMOGENITURA).
Püchajaa süchiki kaaʼürüi suluʼu tü Wiwüliakat
w17.12-S 15 püt. 4-6
Süsakiraka anain wayuu
Jülüja waaʼin süchikuaʼa tü sümakat Hebreokana 12:16, müsü mayaa: «Anakaja müleka jüchiaajiraale suulia aʼluwajirawaa akuaippaa sümaa wayuu jierü otta wane jierü nümaa wane toolo suulia kiʼrajüin jia sünain tia. Otta chi eekai nnojolüin jamajatüin nümüin tü nüchekakat chi Maleiwakai nüpüleerua, anakaja müleka jimeʼejüle naaʼin süpüla kojutüinjachin Maleiwakai nütüma nüchikua, suulia majüin aka naaʼin Esaú paala sümaiwa sünain nuikküin sujut eʼirumaa saaʼu eküülü neʼe». ¿Kasa nikirajeeka anain Pablo?
Nnojotsü shiain nikirajeein anain Pablo jaralin kooʼuliwoʼuin chi Mesíaskai. Tü nikirajeekalü achiki shia lotuinjatüin nakuwaʼipa na anoujashiikana süpüla nümülialaainjachin Maleiwa naalin. Nnojoleechi amülialaain Maleiwa naalin müleka naʼluwajiraale nakuwaʼipa (Heb. 12:12-15, TNM; Heb. 12:16). Mojule nakuwaʼipa, nnojoleerü jamajatüin namüin «tü nüchekakat chi Maleiwakai nüpüleerua» maʼaka naaʼin Esaú, «mojutusat nümüin tü kasa wulesükat» (Kingdom Interlinear).
Eeshijaʼa süpüla nuʼutapuʼui saaʼin mürüt Esaú nümüin Maleiwa otta naʼajüin shia nümüin maʼaka wanee sacerdoote. Eesü naaʼinrüle tia napüleerua na nüpüshikana (Gén. 8:20, 21; 12:7, 8; Job 1:4, 5). Sutuma nnojoluin jamajatüin nümüin tü sujutukat eʼirumaa, nuʼwanajaain shia saaʼu eküülü neʼe. Eesü naainjüle tia Esaú süka nütüjaain saaʼu niʼrüinjachin müliaa chi nuuʼuliwoʼukai Abraham (Gén. 15:13). Jaʼyasü naaʼu Esaú mojutuin nümüin tü «nüchekakat Maleiwa nüpüleerua», kaʼwayuuseshi nia jieyuu nnojotkat aʼwaajüin Jeʼwaa. Mojushaatasü naaʼin na wayuu kachonkana nia sutuma müin nukuwaʼipa (Gén. 26:34, 35). Aluʼuinjaʼa Jacob kaʼwayuuseshi wanee jierü aʼwaajaka Jeʼwaa (Gén. 28:6, 7; 29:10-12, 18).
it-2-S 368 püt. 6
Alawaa
Aküjünüsü suluʼu tü Wiwüliakat mojuin tü alawaakat, mayaapejeʼe müin tia nnojotsü choʼujaain waküjainjatüin tü shiimainkat sümüin wayuu aainjeeka kasa mojusü wamüin. Anuu nünüiki Jesuu: «Tü kasa anasü akatannakat süpüla saapünüinjatüin nümüin Maleiwa, nnojo jujutüin shia sümüin wane erü [...] Otta tü kasa anasükat, nnojo jojotüin shiaʼaya sümüin püülükü» (Mt 7:6). Saaʼujee tia, nnojotsü nüküjain Jesuu süpüshuaʼa tü asakinnakalü anain nia. Nüküjüle Jesuu tü asakinnakalü anain nia, eesüje kasachiki suluʼujee (Mt 15:1-6; 21:23-27; Jn 7:3-10). Eeshii waneinnua wayuu nnojoliikana aküjain süpüshuaʼa tü asakinnakalü anain naya otta nounjulajüin süchiki waneirua kasa. Naya wayuukana naya: Abraham, Isaac, Rahab otta Eliseo. Naainjain tia süka nnojoluin naʼwaajüin Jeʼwaa na wayuu asakitkana naya (Gé 12:10-19; kapiitulo 20; 26:1-10; Jos 2:1-6; Snt 2:25; 2Re 6:11-23).
MAATSOʼU 23-29
KOROLO KOJUTUSÜ SULUʼUKA TÜ WIWÜLIAKAT | GÉNESIS 27, 28
«Aapünüsü nümüin Jacob tü pütchi nüpütaayakat Isaac»
w04-S 15/4 11 püt. 4, 5
Rebeca, wanee jierü tütüsü maʼin
Nnojotsü eein wanee pütchi suluʼu tü Wiwüliakat aküjaka süchiki nütüjaain saaʼu Isaac achepchieeinjachin Esaú nutuma Jacob. Tü sütüjaakalü aaʼu Rebeca otta Jacob shia saapünajatüin nümüin Jacob tü pütchi nüpütaayakat Isaac. Saapapa Rebeca nünüiki Isaac sünain naapüinjatüin nümüin Esaú tü pütchi nüpütaayakat, süchajaamaatüin sukuwaʼipa Rebeca süpüla nnojoluinjatüin sülatüin tia. Ayatüsia yalayalüin maʼin saaʼin maʼakaapuʼu majayülüiwaʼaya shia. Suluwataamaatüin Rebeca Jacob sünain asaajaa piamasü kaaʼulacheein süpüla süʼlakajaain shia nümüin Isaac, tü eküülü nikaajakat maʼin. Naainjale Jacob tü makalü yaa, naapeerü Isaac nümüin tü pütchi nüpütaayakat. Mmotshi Jacob, jama nütüjaʼaleereʼe saaʼu Isaac nnojoluin niain Esaú. Anuukalaka sünüiki Rebeca nümüin: «Tachee, müleka sülatüle tia, tü wayuu oʼulejüneetkat nütüma, nnojoleechi piain piakai aluʼujasa tayeerü tayakat». Yapasü tü eküütkat sutuma, shiʼitaain sütakat kaaʼula nünain Jacob otta süjütüin nia nümaʼanamüin Isaac (Génesis 27:1-17).
Nnojotsü aküjünüin jamüin makaʼa sukuwaʼipa Rebeca. Wainma na wayuu nnojoliikana anain amüin tü saainjakat Rebeca, mayaapejeʼe müin tia nnojotsü eein wanee pütchi suluʼu tü Wiwüliakat aküjaka jashichin Jeʼwaa sümüin Rebeca, nnojoishi jashichin Isaac nütüjaapa saaʼu tia. Tü naainjakat shia nuchuntuin nümüin Maleiwa niiʼiyatüinjatüin naʼanasia nümüin Jacob (Génesis 27:29; 28:3, 4). Sütüjaa aaʼu Rebeca tü pütchi alatajatkat namüin na süchonniikana, tü pütchi nüpansaajatüjütkalia paala Jeʼwaa. Müsüjeseʼe süchajaain sukuwaʼipa süpüla saapünajatüin nümüin Jacob tü pütchi nüpütaayainjatkat Isaac. Tia makat, shiajaʼa tü keeʼireekat naaʼin Jeʼwaa (Roma 9:6-13).
w07-S 1/10 31 püt. 2, 3
Süsakiraka anain wayuu
Nnojotsü süküjain tü Wiwüliakat jamüin saainjaka Rebeca nümaa Jacob tia, tü süküjakat shia sülatalaa sümüin. Nnojotsü aküjünüin suluʼu tü Wiwüliakat mojule jee anale tü naainjakat. Sutumajee tia naainjakat, nnojoishii süpüla wamüin anain waküjale alawaa jee wemeejüle wayuu. Ashajünüsü suluʼu tü Wiwüliakat waneirua kasa süchiki tia alatakat.
Süküjain tü Wiwüliakat niain Jacob aapünajachikai amüin tü pütchi nüpütaayainjatkat Isaac, nnojotsü nümüinjatüin shia Esaú. Kakalia süpülapünaa tia, naapüin Esaú nümüin Jacob sujutu eʼirumaa, mojutusat nümüin Esaú tia, nuʼwanajaain tia saaʼu wanee eküülü neʼe (Génesis 25:29-34). Tü nuʼunakalü anain Jacob eemüin Isaac shia süpüla naapüinjatüin nümüin tü nüpütaayainjatkat. Nümüinjatia neʼe tia Jacob.
it-1-S 311 püt. 2
Nüküjain nümüin pütchi analuʼulu
Na wekiipüʼü paalajamaʼakana, naküjain wanee pütchi analuʼulu namüin na nüchonniikana süpülapünaa outuin naya, kojutusü maʼin tia atumawaa. Jamüshijaʼa Isaac, naapüin nümüin Jacob tü pütchi nüpütaayainjatkat, tü nümüinjatiaakat paala Esaú. Anaʼaleesia maʼin tü nuchuntakat Isaac nümüin Jeʼwaa süka niayaain naaʼinruʼu Esaú. Nuchuntuin tia nümüin Jeʼwaa süka moʼupaaʼichin nia otta laülaaichin nia (Gé 27:1-4, 23-29; 28:1, 6; Heb 11:20; 12:16, 17). Süchikijee tia, nüküjain Isaac süchikuaʼa nümüin Jacob tü pütchi nüpütaayainjatkat. Soʼu kaʼikat tia, niyaawata aaʼu niain Jacob chi nüküjakai amüin tia pütchikat (Gé 28:1-4). Süpülapünaa outuin Jacob, nüküjain tü pütchi nüpütaayainjatkat namüin na piamashiikana nüchonnii José, mapa nüküjain shia namüin na nüchonniikana (Gé 48:9, 20; 49:1-28; Heb 11:21). Müsia neʼe sukuwaʼipa nutuma Moisés süpülapünaa outuin nia, nüküjain wanee pütchi analuʼulu namüin na israeliitakana (Dt 33:1). Ekeraajüsü süpüshuaʼa tia süka nüküjatüjülin Maleiwa sünain müinjatüin shia. Naapüinjachire wanee wayuu tü pütchi analuʼutkat nümüin wanee yalejee, niʼitaapuʼuin najapü saaʼu nikii (Gé 48:13, 14).
Püchajaa süchiki kaaʼürüi suluʼu tü Wiwüliakat
w06-S 15/4 6 püt. 3, 4
Tü aneetkalü atuma nukuwaʼipa wanee wayuu yootopa nia sümaa nuʼwayuuse
Yootopa Rebeca nümaa Isaac, ¿jamüsü sukuwaʼipa natuma süpüla paaʼinwain naya? Kasaatpa Esaú namaa na nüchonniikana Het, alatüsü wanee kasachiki suluʼujee tia. Anuu sünüiki Rebeca nümüin Isaac: «Nnojotsü pansaain taaʼin sütüma tü nuʼwayuusekalüirua Esaú, tü wayuu naatajatkalüirua. Müleka naapaaleje joo Jacob wane naatajatüya naʼaka na nuuʼuliwoʼukana Het, ouktaʼaleerü neʼe taya sütüma mojuu aaʼin saaliijee tia» (Génesis 26:34; 27:46). Lotoleesü sünüiki Rebeca süküjapa tü shapaakalü atuma saaʼin.
Nüküjain Isaac nümüin Jacob nnojoluinjachin nüneeküin wanee jierü chejeʼewatka suluʼu tü mmakat Canaán (Génesis 28:1, 2). Niyaawata aaʼu Isaac tü süküjeekat Rebeca. Mayaapejeʼe kapüleein maʼin tü niʼrakat Isaac sümaa Rebeca, nountuin nakumajüin sukuwaʼipa. Anasü maʼin süpüla washatüin nakuwaʼipa. ¿Kasa naaʼinrajatka na kasaatshiikana nnojorüle paaʼinwain naya sünain wanee kasa?
w04-S 15/1 28 püt. 6
Pütchi anaka maʼin sünainjee tü karaloʼutakat Génesis (shiʼipa 2)
28:12, 13. ¿Jamaluʼulu tü nüʼlapüinkat Jacob wanaa sümaa niʼrüin «wane kaleera»? Tü kaleera niʼrakat Jacob, eesü süpüla müin shia aka saaʼin wanee karateerü katuʼushii maʼin aainjuushika süka ipa. Wayaawata aaʼu sükajee tia niʼrakat, shiʼyataajiraain tü kasa chakat iipünaa sümaa tü kasa yaakat mmapaʼa. Aʼyataashii maʼin na aapieekana nümüin Maleiwa otta aluwataanüshii naya nutuma süpüla nakaalinjain na wayuu anakana noʼuluʼu Maleiwa (Juan 1:51).
MAATSOʼU 30–AAʼURIIROʼU 5
KOROLO KOJUTUSÜ SULUʼUKA TÜ WIWÜLIAKAT | GÉNESIS 29, 30
«Kasaatshi Jacob»
w03-S 15/10 29 püt. 6
Kojutusü nümüin Jacob tü aleewaakat nümaa Maleiwa
Awalaajünüsü wanee jiet süpülapünaa kasaalüin shia. Aapünüsü süpaʼüna namüin na süpüshikana. Saashin tü Pütchi Aapünakat nümüin Moisés, aapünüsü 50 siclo pülaata süpüleerua wanee majayüt kasaalüinjatka. Naashin Gordon Wenham, wanee atüjakai süpüleerua tü Wiwüliakat, tia shia tü achuntunakat saaʼu wanee jiet majayüt. Eepejeʼe na nnojoliikana awalaajüin süpüshuaʼa tia nneetkat (Deuteronomio 22:28, 29). Sutuma nnojoluin süpüla nuwalaajüin Jacob nümüin Labán saaʼu Raquel, nüküjain niʼyataainjachin nümüin soʼu akaratshi juya. Müshi Wenham: «Wanee wayuu eekai niʼyataain, awalaajünüsü nümüin süka shiatapüna siclo jee shiale wanee siclo soʼu wanee kashi, mapuʼusü tia sümaiwa paala chaa Babilonia [awalaajünüshi wanee wayuu 42 siclo sünainmüinreʼeya 84 siclo soʼu akaratshi juya], wainma tü nüsülajakat Jacob nümüin Labán süpüla saapünüinjatüin Raquel nümüin». Anasü nümüin Labán tü naainjakat Jacob (Génesis 29:19).
w07-S 1/10 8, püt. 6
Süchonnii Lea otta Raquel na israeliitakana, pepiamüinjiraashii naya
¿Wanaawasüche saaʼin Lea nümaa chi süshikai? ¿Nüpüleeruataapa aaʼin shia? ¿Jalajatü Raquel soʼu tia? ¿Sütüjaa aaʼuche tü alatakat? Müle shia, ¿jamüsüche saaʼin? ¿Eesüche süpüla shiyoutajaain sümaa nünüiki chi süshikai? Nnojotsü süküjain tia tü Wiwüliakat. Müsüjeseʼe nnojoluin watüjaain saaʼu kasain jülüjain saaʼin Raquel sümaa Lea süchiki tia alatakat. Nütüjaapa saaʼu Jacob nimeejünüin, nnojoishi jashichin nia sümüin Raquel otta Lea, jashichishi nia nümüin Labán. Anuujeseʼe nünüiki nümüin: «Aʼyataashi taya pümüin saaʼu Raquel. ¿Jamüshi piʼikeʼerakaʼa taya sünain shiain paapüin tamüin neʼe Lea?». ¿Jamaka nünüiki Labán nümüin Jacob? Anuu nünüiki: «Nnojotsü sükuaippain wayuu yaajeʼewat yaa saapünüin wane jierü emiiruaa süpüla kaʼwayuuseinjatüin shia süpülapünaa tü epayaakat. Anakaja jooluʼu müleka paʼatapajüle wane semaana süpüla keraainjatüin tü miʼiraakat. Je süchikijee, taapeerü pümüin Raquel saaʼu piʼyataainjachin tamüin soʼu akaratshi juya süchikuaʼaya» (Génesis 29:25-27). Nnojotsü nüchajaalain Jacob müinjachin nia piamain nuʼwayuuse. Mojushaatasü tia süka süchunjiraain tü jieyuukalüirua sümaa üttüin saaʼin.
it-2-S 343 püt. 8
Sukuwaʼipa kaʼwayuusee
Aainjünaka shikiira: Talatüshii na israeliitakana naainjapa shikiira kasaalü, nnojotpejeʼe wainmain kasa naainjaka. Soʼu tü kaʼi kasaalüinjatkalü oʼu wanee jiet, anasü maʼin saʼanaaya shipialuʼujee. Oʼoojusü shia palajana otta mapa sushulerüin saaʼu seita jemetakat eejuu (anasü paashajeʼerüle Rut 3:3 otta Eze 23:40). Akaalinjünüsü shia natuma na süchepchiakana süpüla shiʼitaain sünain tü süchirapalakat otta tü süsheʼin kasuutat anaka maʼin anoʼu (Jer 2:32; Alat 19:7, 8; Sl 45:13, 14). Eesü tü eekat aʼatüin süüliijana kojutusü otta süchikijee shiʼitaain sünain wanee painyeera antaleeka sünainmüin suuʼui (Is 3:19, 23; 49:18; 61:10; Alat 21:2). Sükajee tia, wayaawata aaʼu jamüin mapüleeka nümüin Labán nimeejüin Jacob, aapünüsü neʼe Lea nümüin suulia Raquel (Gé 29:23-25). Suʼunapa Rebeca nümaʼanamüin Isaac shiʼitaain sünain suʼupünaa wanee painyeera (Gé 24:65). Sutuma saainjain tia tü jietkat, shiiʼiyatüin sujutu nümüin chi suʼwayuuseinjachikai (1Co 11:5, 6, 10).
Püchajaa süchiki kaaʼürüi suluʼu tü Wiwüliakat
it-1-S 56
Süchonyaashii
Maaʼatshii aka saaʼin süchonnii Raquel na süchonniikana Bilhá, akaataajaʼa neʼe sukuwaʼipa Lea sümaa tü süchepchiakat (Gé 30:3-8, 12, 13, 23, 24). Sutuma nüchonniin naya Jacob, aapünüsü namüin apaalaa maʼaka na süchonniikana Raquel otta Lea. Sutuma suluwataain Raquel saaʼu tü süchepchiakat, shia aluwataaka naaʼu na süchonniikana. Müsia neʼe sukuwaʼipa Lea sümaa tü süchepchiakat.
w04-S 15/1 28 püt. 7
Pütchi anaka maʼin sünainjee tü karaloʼutakat Génesis (shiʼipa 2)
30:14, 15. ¿Jamüsü shiaka sücheküin Raquel tü mandrágorakat suulia kachonwaa? Sümaiwa paala, anasü sümüin wayuu tü mandrágorakat süpüla nnojoluin aijain shiʼiruku. Payalasü shia süpüla suchuntaain saaʼin wayuu ainkawaa otta kachonwaa (El Cantar de los Cantares 7:13). Nnojotsü süküjain tü Wiwüliakat jamüin süchekaka Raquel tü mandrágorakat, eesüjaʼa sücheküle shia süpüla nnojoluin shiʼrüin müliaa sutuma maralüin shia. Alatüsü kojuyasü juya süpüla niiʼiyatüin Jeʼwaa naʼanasia sümüin süpüla kachoinjatüin shia (Génesis 30:22-24).