«Anuuitpaja joo taya nümüin Maleiwa»

1, 2. (1) ¿Jamüsü nünüiki chi wayuu antakai shipialuʼumüin María nüsakapa shia? (2) ¿Kasache nüntaka apüla chia wayuukai shipialuʼumüin María?

EIRAKAASÜ María iipünaamüin süpüla shiʼrüinjachin chi wayuu antakai shipialuʼumüin jee ponoshootoshi nia saaʼin. Nnojoishi nia asakirüin nünain chi süshikai jee tü shiikat, shia naashajaweeka amaa shiaka. Jaʼyasü naaʼu chia wayuukai nnojoluin yalejeʼewalin nia Nazaret. Süka joʼuuchoin tia pueulokot, maponojosat tü wayuu chejeʼewatkalüirua. Akaisaʼa chi wayuu antakai shipialuʼumüin María, naatajaishaana maʼin. Jee naata maʼin nüsakia, müshi nia: «¿Jamayaa pia? Eeshi chi Maleiwakai pümaa süka kojutüin maʼi pia nütüma» (paashajeʼera Lucas 1:26-28).

² Tia shia aküjünaka maʼin palajana suluʼu tü Wiwüliakat süchiki María, tü nüchonkat Helí. Suluʼujeejana naya tü pueulokot Nazaret chaa Galilea. Achuntuushiirü shia nutuma wanee wayuu José nünülia süpüla nuʼwayuuseinjatüin. Chia wayuukai aʼyataai süka taapüla, mayaapejeʼe nnojoluin washirüin nia, wayuu kanoulashi maʼin. Sütüjaa aaʼu María nnojoluinjatüin wainmain kasa sümaʼana nümaapa shia José, aʼyataainjatü shia nümaa otta kachoinjana naya. Nüküjapejeʼe wanee kasa sümüin chi wayuu antakai shipialuʼumüin. Shia süchiki wanee kasa nüneekaka apüla shia Maleiwa, wanee kasa aʼwanajaainjatka atuma sukuwaʼipa.

3, 4. ¿Kasa tü nnojoluinjatkat jülüjain waaʼin süpüla weʼraajüin María? ¿Kasa anaka süpüla jülüjain waaʼin süchiki?

³ Wainma wayuu ponokana aaʼin sutuma nnojoluin saashajaain maʼin tü Wiwüliakat süchiki María. Nnojotsü maʼin süküjain süchiki süpüshi, süchiki sukuwaʼipa otta nnojorüleesia süküjain süchiki jamapuʼuin maʼin shiyolojo. Atüjapejeʼe waya sünainjee tü aküjünakat süchiki suluʼu tü Wiwüliakat mayaapejeʼe nnojoluin wainmain tü süchikikat sukuwaʼipa.

⁴ Süpüla weʼraajüinjatüin maʼin María, nnojoluinjatü jülüjain waaʼin tü ekirajünakat süchiki suluʼu tü iküleesiakalüirua. Nnojotsü jülüjainjatüin waaʼin müin shia maʼaka saaʼin tü shiyaakuayaa epintajünakat otta tü aainjünakat süka yeeso. Nnojotsü jülüjainjatüin waaʼin tü münakat süchiki sünain shiain «tü Niikat Maleiwa» otta shiain «tü Aluwataakat saaʼu tü kasakalüirua chaa Iipünaa». Shia anaka jülüjale waaʼin tü sümakat tü Wiwüliakat süchiki. Süküjain tü Wiwüliakat jamapuʼuin maʼin sunoula María otta tü waaʼinrajatkat süpüla washatüin shia.

Aapiee chi antakai sümaʼanamüin

5. (1) ¿Kasa watüjaaka aaʼu süchiki María sutuma tü saaʼinrakat soʼu nüsaküin shia chi aapieekai? (2) ¿Kasa wayaawataka aaʼu sutuma tü sukuwaʼipakat María?

⁵ Chi antakai sümaʼanamüin María nia chi aapieekai Gabriel, nnojoishi wayuuin. Ainkuusü maʼin saaʼin María wanaa sümaa nüsaküin shia süka nüküjain kojutuin shia nutuma Maleiwa. Jee sütüjawee aaʼu jamaluʼuluin maʼin nünüiki chi aapieekai sümüin (Luc. 1:29). Süka nnojoluin yaletüin saaʼin María, nnojotsü kachiiruain saaʼin kojutuinjatüin shia sutuma wayuu, shiapejeʼe naashajaain achiki chi aapieekai kojutuin shia nümüin Jeʼwaa. Watüjaa aaʼu keeʼireein saaʼin María talatüinjachin Jeʼwaa sümaa, nnojotpejeʼe jülüjain saaʼin talatüichipain nia sümaa. Wachajaale maʼin sukuwaʼipa süpüla talatüinjachin Jeʼwaa wamaa otta nnojorüle yaletüin waaʼin, wayaawateerü aaʼu wanee kasa shiyaawataka aaʼu María. ¿Kasa wayu tia? «Chi wayuu eekai pülain naaʼin nuulia Maleiwa, nnojoleechi akaaliijünüin nütüma. Nia akaaliijünaka nütüma chi eekai jüüjüüin nümüin», müsü tü Wiwüliakat (Sant. 4:6).

6. ¿Kasa aneekünaka apüla María naashin chi aapieekai?

⁶ Choʼujaashaatasü nnojoluin yaletüin saaʼin María, süka jamüin, nüküjain chi aapieekai sümüin süneekünüin nutuma Maleiwa süpüla wanee kasa anashaatasü maʼin. Naashin chi aapieekai, kachoinjatü María wanee joʼuu toolo jee niainjachi kojutuleeka saʼakajee wayuu süpüshuaʼa sainküinjee mmakat süpüshuaʼa. Anuu nünüiki Gabriel sümüin: «Aneekuushi chi joʼuukai nütüma Maleiwa süpüla nuluwataainjatüin tü wayuu judíokalüirua, tü nuuʼuliwoʼukalüirua Jacob, maa aka nuluwataapüʼüin paala sümaiwa chi putuushikai David. Müichia nnojolin ooʼulaain suulia aluwatawaa» (Luc. 1:32, 33). Sütüjaa aaʼu María sülatüirüin suulia miit juya süchikijee nüküjain Jeʼwaa nümüin David nuluwataainjachin wanee nuuʼuliwoʼu süpüla kaʼika süpüshuaʼa (2 Sam. 7:12, 13). Chi joʼuu süchoinjachikai María, ¡nia chi Mesías kakaliaichikai maʼin saʼatapajüin nupueulose Maleiwa!

7. (1) ¿Kasa wayaawataka aaʼu sutuma tü süsakitkalü anain María chi aapieekai? (2) ¿Kasa natüjaka sünainjee María na jimaʼaliikana otta na majayünnüükana?

⁷ Naashin chi aapieekai, «pia Tachonkai» meechi chi Maleiwa Miyoʼushikai nümüin chi joʼuukai. ¿Jameetche sukuwaʼipa süpüla jemeinjatüin wanee wayuu nümaa Nüchon Maleiwa? ¿Jameetche sukuwaʼipa süpüla kachoinjatüin María sümaa nnojoluin nünainpünaain shia wayuu toolo? Nnojoyülia shia kasaalüin nümaa José, müsüjeseʼe süsakirüin chi aapieekai sünain maa: «¿Jamakuaippatkai taya kachoinjatüin sünain nnojolüin nünainpünaain taya wayuu toolo?» (Luc. 1:34). Jaʼyasü saaʼu María nnojoluin japülin shia saaʼu nnojoyüliain nünainpünaain shia wayuu toolo. Kojutusü sümüin majayülüin shia. Maaʼulu, nnojotsü kojutuin tia namüin na jimaʼaliikana otta na majayünnüükana otta nemeeʼerainpalashii na jieyuu nnojoyüliikana nünainpünaain wanee toolo otta chi jimaʼai nnojoyüikai sünainpünaain wanee jierü. Aʼwanajaasü maʼin sukuwaʼipa wayuu maaʼulu, nnojotpejeʼe aʼwanajaain nukuwaʼipa Jeʼwaa (Mal. 3:6). Kojutushii maʼin nümüin Jeʼwaa na wayuu oonookana sümaa tü nuluwataakalü anain maʼaka kojutapuʼuin nümüin sükalioʼu María na oonookana nümaa (paashajeʼera Hebreokana 13:4).

8. ¿Jamüshi süpüla joʼuuinjachin chi süchonkai María sümaa maainjalain nia?

⁸ Jüüjüüsü María waneepia nümüin Maleiwa, nnojotpejeʼe lotuin maʼin sukuwaʼipa. ¿Jameeiche süpüla maainjalainjachin chi joʼuukai, chi Nüchonkai Maleiwa? Anuu nünüiki Gabriel sümüin: «Chi Maleiwa Miyoʼushikai maʼi, nuluwataainjachi chi Naaʼinkai pünainmüin. Niʼitaweetkalaka pümüin kachonwaa, süpüla ‹Pia Tachon Maainjalasaikai›, süpüla nümünüinjachin chi joʼuukai nütüma Maleiwa» (Luc. 1:35). Tü pütchikat «maainjalaa» shia wulere maʼin nukuwaʼipa wanee wayuu. Mojulaapejeʼe wayuu süpüshuaʼa joʼuuiwaʼaya shia, eweeniraasü sümaa müin sukuwaʼipa, nnojotsü jaralüin joʼuuin sümaa lotuin sukuwaʼipa. Nüküjapejeʼe chi aapieekai sünain naaʼinrüinjatüin Jeʼwaa wanee kasa pülasü, niʼitaainjachi chi Nüchonkai suluʼu süchonla María otta naaʼinmajüinjachi nia nükajee chi naaʼinkai suulia sülataain nünainmüin tü kaainjalaakat. ¿Sunoujainche María nünüiki chi aapieekai? ¿Jamüsüche sünüiki nümüin?

Tü sümakat María

9. (1) ¿Kasa nnojotka nayaawatüin aaʼu waneinnua wayuu süchiki tü alatakat sümüin María? (2) ¿Kasa nüküjaka Gabriel sümüin María katsüinreeka atuma sunoula?

⁹ Eeshii eekai nnojoluin nanoujain sünain tü alatakat sümüin María. Maʼaka naaʼin waneinnua teólogo aʼyataakana suluʼu tü iküleesia nnojotkat shiimain, nnojotsü nanoujain eein süpüla ipuoluin wanee majayüt sümaa nnojoluin nünainpünaain shia wayuu toolo. Mayaapejeʼe nekirajaain maʼin süchiirua tia, nnojotsü nayaawatüin saaʼu tü nümakat chi aapieekai Gabriel sünain maa: «Shiimüin sünain nnojolüin kasain isain nüchiki Maleiwa» (Luc. 1:36, 37). Sunouja anainrü María nünüiki chi aapieekai süka wayuuin kanoulasü shia. Nnojotpejeʼe anoujaʼalüin neʼe süpaʼa mma, wayuu kekiisü shia otta sütüjaa aaʼu shiimain tü sunoujakalü anain. Nüküjaka Gabriel sümüin wanee kasa katsüinreeka atuma sunoula. Nüküjain sümüin ipuoluin Elisabet sutuma nüpülain Maleiwa. Süpüshi María tia wayuukot, maralü shia paala sümaa laülaairüin shia.

10. ¿Jamüsü kapüleeka sümüin María tü aneekünakalü apüla shia?

¹⁰ ¿Kaseetche saaʼinraka María? Aneekünüsü shia nutuma Maleiwa süpüla niin shia chi Nüchonkai otta sütüjaa aaʼu naaʼinreerüin Maleiwa süpüshuaʼa tü nümakat chi aapieekai. Talatüsü maʼin saaʼin sutuma tia. Wainmapejeʼe kasa jülüjaka saaʼin. Jülüjakajasaʼa saaʼin müleka ayateechire kasaalüin José sümaa nütüjaapa saaʼu ipuoluin shia. Eesüjaʼa shapaale saaʼin saaʼu tü saaʼinrajatkat. Malaaka joo ipuoluinjatüin shia nümaa chi Nüchonkai Maleiwa aishikai maʼin nüpüla. Jemeyutpa shia nümaa, saaʼinmajüinjachi nia suulia kasa mojusü. ¡Nnojotsü shaitaain tü saaʼinrajatkat!

11, 12. (1) ¿Kasa naaʼinraka waneinnua aʼyataalii nümüin Maleiwa nüneekapa naya süpüla wanee aʼyatawaa? (2) ¿Kasa wayaawataka aaʼu sünainjee sukuwaʼipa María sutuma tü sümakat nümüin chi aapieekai Gabriel?

¹¹ Saashin tü Wiwüliakat, wainmajüsü naaʼin noʼutku na wayuu aʼyataapuʼukana nümüin Maleiwa sutuma nüneeküin naya süpüla wanee aʼyatawaa. Isainjatiaa nachiki tia aʼyatawaakat naaʼinruʼu. Jamüshijaʼa Moisés, isasü nüchiki aküjaa nünüiki Maleiwa naashin süka kajain nünüiki (Éx. 4:10). Naashin Jeremías, jintüi neʼe nia süpüla aaʼinraa tü nüneekakalü apüla nia Maleiwa (Jer. 1:6). Jee müshia Jonás, ¡aʼluwataashi suulia aaʼinraa tü nuluwataakalü anain nia Maleiwa! (Jon. 1:3). ¿Kasakaʼa saaʼinrüin María?

¹² Anashaatasü maʼin wamüin tü sümakat María, süka jamüin, mapüleein sünüiki, jaʼyasü saaʼu nnojoluin yaletüin saaʼin otta oonoosü shia nümaa Maleiwa. Anuu sünüiki nümüin Gabriel: «Anuuitpaja joo taya nümüin Maleiwa [nüchepchia taya, TNM]. Anashi müleka naaʼinrüle taka tü püküjakat achiki tamüin» (Luc. 1:38). Naʼakajee na achepchieepuʼukana, naya mojutkana na achepchiee tepichiyüliikana otta nia atüjaaka saaʼu chi nalaamainkai tü aainjünajatkat naka. Shia jülüjaka saaʼin María tia nüchiki Jeʼwaa, chi Sülaamainkai. Sütüjaa aaʼu María waneepiain Jeʼwaa namaa na waneepiakana nümaa jee sütüjaa aaʼu aneerüin shia nutuma saaʼinrüle tü nüneekakalü apüla shia (Sal. 18:25).

13. Nuluwataale waya Jeʼwaa sünain aaʼinraa wanee kasa eekai müin kapüleekai saaʼin wamüin, ¿jamüsü anaka washatüle sukuwaʼipa María?

¹³ Eeshiijaʼa nuluwataale waya Jeʼwaa sünain aaʼinraa wanee kasa eekai müin kapüleekai saaʼin wamüin. Watüjaapejeʼe saaʼu sutuma tü sümakat tü Wiwüliakat anain weʼitaale waaʼin nünain Jeʼwaa maʼaka saaʼinrüin shia María (Prov. 3:5, 6). ¿Washateetche sukuwaʼipa María? Waaʼinrüle tia, aneena waya nutuma Jeʼwaa otta katsüinjeerü wanoula nünain.

Oʼunusü eemüin Elisabet

14, 15. (1) ¿Kasa naaʼinraka Jeʼwaa süpüla nükatsüinrüin sunoula María soʼu chajatüin shia eekai Elisabet otta Zacarías? (2) ¿Kasa watüjaka sünainjee tü sümakat María suluʼu Lucas 1:46-55?

¹⁴ Sütütüleʼerüin saaʼin María tü nümakat Gabriel sümüin süchiki Elisabet. ¡Shiainjaʼa ayaawateerüin saaʼu jamüin saaʼin María sutuma tü alatakat sümüin! Oʼunusüjaʼa María sünain anaʼlawaa sümüin Elisabet saaʼu tü uuchi chakat Judá. Eetaasü maʼaka apünüin jee pienchi kaʼi waraitüin shia süpüla süntüin chamüin. Shikerotapa shipialuʼumüin Elisabet otta Zacarías chi sacerdootekai, nükatsüinrüin Jeʼwaa sunoula. Saapaiwaʼaya neʼe Elisabet sünüiki María sünain asakaa, «akutulaashi chi süchonkai yaa süleʼeruʼu» otta antüshi chi naaʼinkai Maleiwa saaʼu sümaa sümüin sümüin María: «Pia niikat chi Tasenyotsekai». Soʼu tia, nüküjain Maleiwa sümüin Elisabet niain chi Mesíaskai chi süchonkai María. Akaʼaya shia, anasü maʼin sünüiki sümüin María saaʼu waneepiain shia nümaa Maleiwa otta soonooin nümaa. Anuu sünüiki: «Anataʼaleesüjaʼa maʼi pia, süka punoujain sünain shikettaajünüinjatüin süpüshua tü nüküjakat achiki Maleiwa pümüin» (Luc. 1:39-45). Pansaʼaleesia sümüin María sünain nikeraajeerüin Jeʼwaa süpüshuaʼa tü nümakat sümüin.

¹⁵ Ashajuushisü suluʼu tü Wiwüliakat tü sümakat María sümüin Elisabet (paashajeʼera Lucas 1:46-55). Nnojotpajaʼa wainmain maʼin sünüiki María saashajaapa saashin tü Wiwüliakat, shia neʼe wainmaka aluʼu sünüiki wanaa sümaa saashajaain sümaa Elisabet jee wainma kasa watüjaka sünainjee tü sümakat. Wanee kasa watüjaka shia kamalain sümüin aapaa analuʼut, müshijeseʼe suʼwaajüin Jeʼwaa saaʼu nüneeküin shia süpüla niinjatüin shia chi Mesíaskai. Jaʼyasü saaʼu ichein maʼin sunoula, süküjainjeseʼe neʼrüin japülii nutuma Jeʼwaa na pülayaakana aaʼin nuulia jee nükaaliinjain na müliakana aaʼin otta na aʼyataweekana nümüin sümaa nnojoliin yaletüin naaʼin. Sutuma tü sümakat María jaʼyasü saaʼu shiʼraajüin maʼin Nünüiki Maleiwa; kojuyatua suchuntuin pütchi suluʼujee tü Nünüikikat Maleiwa, eetaasü maʼaka saaʼin piama shikii pütchi suchuntakat María.a

16, 17. (1) ¿Kasa saaʼinraka María otta Jesuu anaka süpüla washatüin? (2) ¿Kasa wayaawataka aaʼu sutuma tü sukuwaʼipakat María sümaa Elisabet?

¹⁶ Wanee kasa jaʼyaka saaʼu María shia süsakireʼerüin saaʼin sünain tü saashajeʼerakat suluʼujee Nünüiki Maleiwa. Jamüsüjaʼa suʼuraajapa, süküjain tü saashajeʼerakat suluʼujee tü Nünüikikat Maleiwa. Nüshatüinjaʼa tia mapa chi süchonkai, müshijeseʼe nümüin: «Tü tekirajakat anain, nnojotsü pütchin taleʼeruʼujeejatü neʼe, naapajala tamüin chi kajünalakai taya» (Juan 7:16). ¿Weeʼiyatüinche kojutuin wamüin tü Wiwüliakat wekirajapa wayuu süka? ¿Shiataapa wekirajüin tü pütchi waleʼeruʼujeejatkat neʼe? Anasü maʼin washatüle sukuwaʼipa María.

¹⁷ Chajatü María makatüin sümaʼana Elisabet apünüin kashi. Natütüleʼerakajasaʼa naaʼin waneʼewai nakua suʼunnaa tia (Luc. 1:56). Sutuma tü sukuwaʼipakat María sümaa Elisabet, wayaawata aaʼu aneerüin maʼin waaʼin, anale na wayuu waʼaleewainkana. Waʼaleewajaale namaa na wayuu aikana apüla Jeʼwaa, katsüinjeerü wanoula otta arütkaajeena maʼin waya nünainmüin Jeʼwaa (Prov. 13:20). Oʼunajatüirü María chaa shipialuʼumüin. ¡Jameetkajasaʼa nünüiki José sümüin nütüjaapa saaʼu ipuoluin shia!

María nümaa José

18. ¿Kasa süküjaka María nümüin José? ¿Kasa naaʼinraka sutuma tia?

¹⁸ Nnojotsü saʼatapajüin María shimiyoʼulaain süleʼe süpüla süküjain nümüin José ipuoluin shia. Eesüjaʼa süsakirüle saaʼin palajana jameerüin nünüiki süchiki tia süka niain wanee wayuu kojutükai amüin Maleiwa. Süküjapejeʼe nümüin süpüshuaʼa tü alatakat sümüin. Mojusü maʼin naaʼin José sutuma tia jee kapüleesü nümüin nunoujain tü sümakat María nümüin. Müshi kawalaʼatakai naaʼin sutuma. Nnojotsü süküjain tü Wiwüliakat kasain jülüjain naaʼin José soʼu tia, shia süküjaka nuuʼulaainjatüin María. Wanaa sümaa tia, suchuntuushiire wanee jierü nutuma wanee wayuu toolo süpüla nuʼwayuuseinjatüin, müinnapa kasaatkai naaʼin sümüin wayuu. Süka nnojoluin nücheküin José saapülijünüin María sutuma wayuu, nuuʼulaainjatiaa shia ojuunaa (Mat. 1:18, 19). ¡Shapaakajasaʼa saaʼin María sutuma tia alatakat! Nnojotpejeʼe shia jashichin nümüin José sutuma nnojoluin nunoujain sünüiki. Aisü sümüin shiʼrüin müliain maʼin naaʼin, wayuu anamia nia.

19. ¿Kasa naaʼinraka Jeʼwaa süpüla nütüjaainjatüin aaʼu José tü anakat süpüla naaʼinrüin?

¹⁹ Nükaaliinjünaka José nutuma Jeʼwaa süpüla nütüjaainjatüin saaʼu tü anakat süpüla naaʼinrüin. Antüshi wanee aapiee nüʼlapüinruʼu sünain nüküjain nümüin ipuoluin María sutuma nüpülain Maleiwa. ¡Anakajasaʼa naaʼin José süchikijee tia! Shiaitpa naaʼinraka jooluʼu tü saaʼinrakat María, oonooshi nia nümaa Jeʼwaa. Kasaatshi nia sümaa María otta naaʼinrüinjatü wanee kasa nnojotka jaralüin aaʼinrüirüin tia yaa mmapaʼa, naaʼinmajüin chi Nüchonkai Maleiwa (Mat. 1:20-24).

20, 21. ¿Kasa eeka süpüla natüjain sünainjee María na wayuu kasaatkana otta na kasaaleekana?

²⁰ Mayaapejeʼe sülatüirüin maʼaka 2.000 juya süchikijee yaajatüin María yaa mmapaʼa, wainma kasa eeka süpüla natüjain sünainjee María na wayuu kasaatkana otta na kasaaleekana. Talatakajasaʼa maʼin naaʼin José sutuma naaʼinrüin tü nümakat chi aapieekai nümüin otta niʼrapa María sünain anain maʼin naaʼinmajia chi süchonkai sutuma. Jee niyaawata aaʼu choʼujaain maʼin achuntaa kaaliinwaa nümüin Maleiwa süpülapünaa nüneeküin wanee kasa naaʼinrajatka (Sal. 37:5; Prov. 18:13). Watüjaa aaʼu ayatüin nüneeküin süpüleerua nüpüshi tü anakat maʼin namüin.

²¹ ¿Kasa watüjaka sutuma niain José kasaaleein amaa María? Soto waaʼin kapüleepünaain nümüin José anoujaa tü sümakat María nümüin süchiki ipuoluin shia. Nnojotpejeʼe ashapalaain saaʼin María otta sütüjaa aaʼu naaʼinreerüin José tü kasa anakat noʼuluʼu Maleiwa. Shiyaawata aaʼu María anain maʼin nnojorüle süshapalaain aaʼin wayuu. Anasü maʼin sukuwaʼipa María süpüla nashatüin na wawalayuu jieyuukana. Wanee kasa nütüjaka José otta müsia María süchiki tia alatakat namüin shia anain maʼin yootowaire naya waneepia otta naküjiraale tü shiimainkat (paashajeʼera Proverbios 15:22).

22. ¿Jamüsü anashaataka maʼin nukuwaʼipa José otta María soʼu kasaalüin naya? ¿Jarat tü aʼyatawaa eʼitaanakat najapuluʼu?

²² Anashaatasü maʼin nukuwaʼipa José otta María soʼu kasaalüin naya, süka jamüin, alanaʼaleein naalin Jeʼwaa napüla suulialeʼeya kasa süpüshuaʼa. Akaʼaya naya, aishi maʼin chi nachonkai napüla sümaa naaʼinmajüin nia süka talateein naaʼin Jeʼwaa natuma. Wainma kasa anasü neʼraka otta eesü kasa kapüleesü alataka namüin. Miyoʼu maʼin tü aʼyatawaa eʼitaanakat najapuluʼu, nepijüin Jesuu. ¡Nnojoishi eeichin wanee wayuu eekai müin aka naaʼin Jesuu yaa mmapaʼa!