EKIRAJAAYA 55
Pükaalinja suluʼu tü outkajaaleekat
Sainküinpünaa mmakat watta naalii na wayuu aʼwaajakana Jehová suluʼu tü outkajaaleekalüirua. Kojutusü namüin tü ekirajünakalü anain naya, makalaka nakaaliijeein na nawalayuukana jee naʼyataweein sünain tü aainjünakat suluʼu tü outkajaaleekat. ¿Müsüche paaʼin pükaalinjeein eere puutkajaain?
1. ¿Kasa paaʼinrajatka süpüla pükaalinjain suluʼu tü outkajaaleekat?
Wainma kasa eeka süpüla waaʼinrüin suluʼu tü outkajaaleekat. Eeshii süpüla wakaalinjain na wawalayuu laülaayuukana, na ayuuikana jee wamaale naya sünain tü outkajawaakat. Isalejeʼe wachiki waaʼinrüin tia, eesüjaʼa süpüla wayaʼlajüin namüin tü nayaʼlajüinjatka metkaaraluʼu jee wakaalinjüle naya sünain epitajaa nepia jee sünain waneirua kasa choʼujaaka namüin (paashajeʼera Santiago 1:27). Eeshii süpüla wakaalinjain sünain epitajaa tü Piichi Outkajaaleekat. Nnojotsü apüleeruaanüin waaʼin süpüla waaʼinrüin tia, waaʼinrüin shia süka waaʼin wamüiwaʼa, süka alin wapüla Maleiwa jee na wawalayuukana (Salmo 110:3).
Wainma kasa eeka süpüla naaʼinrüin na wawalayuu woutiisakana süpüla nakaalinjain suluʼu tü outkajaaleekat. Na wawalayuu tooloyuukana, eeshii süpüla naʼyataain neʼipajee na laülaashiikana jee laülaashiin naya mapa yapale natuma tü sümakat tü Bibliakat süpüla aʼyatawaakat tia. Na tooloyuukana jee na jieyuukana, eeshii süpüla pürekutsooliin naya, eeshii süpüla naküjain maʼin pütchi jee eeshii süpüla nakaalinjain sünain akumajaa Piichi Outkajaalee. Eetaashii na akolojookana suluʼumüin wanee outkajaalee eere palirüin na wawalayuukana.
2. ¿Kasa waaʼinrajatka süpüla wakaalinjain suluʼu tü outkajaaleekat süka wanneetse otta süka waneirua kasa eeka wamaʼana?
«Kojuta putuma Jehová süka tü kasa kojutusü pümaʼanakat» müsü tü Bibliakat (Proverbios 3:9). Talatüsü waaʼin süka wasülajüin wanneetse jee waneirua kasa eeka wamaʼana süpüla wakaalinjain suluʼu tü outkajaaleekat jee süpüla süküjünüin pütchi sainküin mmakat süpüshuaʼa (paashajeʼera 2 Corinto 9:7). Sükajee tü wasülajakat, eeshii süpüla wakaalinjain na wawalayuu eʼrakana müliaa. Wainma na wawalayuu akatalakana nneerü süpüla nasülajüin (paashajeʼera 1 Corinto 16:2). Eesü süpüla nejitüin shia suluʼu tü kojonchon eeka suluʼu tü Piichi Outkajaaleekat jee naluwataale shia suluʼupünaa Internet, suluʼu donate.jw.org. Nuuʼulaain Jehová wasülajüin nümüin waneirua kasa eeka wamaʼana süpüla weeʼiyatüin naalin wapüla.
WEKIRAJAA SOOʼOMÜIN
Wekirajaa süchiki waneirua kasa waaʼinrajatka süpüla wakaalinjain suluʼu tü outkajaaleekat.
3. Pükaalinja süka tü kasa eekat pümaʼana
Aishii nüpüla Jehová nümaa Jesús na wayuu asülajakana sümaa talatüin naaʼin. Niʼrüin Jesús tü saaʼinrakat wanee wayuu müliasü outa aʼwayuuset. Jaashajeʼera Lucas 21:1-4 otta yooto jia süchiki tüü:
¿Asülajüinjanache waya wainma nneerü süpüla talatüin naaʼin Jehová wamaa?
¿Jamüsü naaʼin Jehová nümaa Jesús wasülajapa sükajee waaʼin?
Süpüla pütüjaain saaʼu kasain aaʼinnüin süka tü nneerü wasülajakat, jünaja tü VIDEOKOT. Süchikijee, yooto jia süchiki tüü:
¿Kasa akaalinjünaka anain na wawalayuukana sainküinpünaa tü mmakat süka tü nneerü asülajünakat?
4. Eeshi süpüla pükaalinjain
Na wayuu aʼyataapuʼukana nümüin Maleiwa sümaiwa paala, aʼyataashii naya süka süpüshuaʼa naaʼin süpüla sunouteʼennüin tü aʼwaajüleekat Maleiwa. Nnojoishii akaalinjain neʼe süka nneerü. Jaashajeʼera 2 Crónicas 34:9-11 otta yooto jia süchiki tüü:
¿Kasa naaʼinraka na israelitakana süpüla nanoutuin tü piichi awaajüleekat Maleiwa?
Süpüla pütüjaain saaʼu müinya sukuwaʼipa natuma na aküjaliikana pütchi nüchiki Jehová, jünaja tü VIDEOKOT. Süchikijee, yooto jia süchiki tüü:
¿Jamüsü wuleinjatka tü Piichi Outkajaaleekat jee anainjatka shiyolojo?
¿Kasa paaʼinrajatka süpüla pükaalinjain?
5. Jiakana tooloyuukana, jukooʼomüinra jiʼyataain
Süküjain tü Bibliakat laülaainjatüin naaʼin sünain anoujaa na tooloyuukana süpüla nakooʼomüinrüin naʼyataain suluʼu tü outkajaaleekat. Süpüla jütüjaain saaʼu nüchiki wanee wawala ountakai tia, jünaja tü VIDEOKOT. Süchikijee, yooto jia süchiki tüü:
¿Kasa naaʼinraka Ryan süpüla kooʼomüin nunoula jee nükaaliijain suluʼu tü outkajaaleekat?
Aküjünüsü suluʼu tü Bibliakat tü naaʼinrajatkat na wawalayuukana süpüla naʼyataain neʼipajee na laülaashiikana jee laülaashiin naya. Jaashajeʼera 1 Timoteo 3:1-13, TNM otta yooto jia süchiki tüü:
¿Kasa naaʼinrajatka na wawalayuukana süpüla naʼyataain neʼipajee na laülaashiikana jee laülaashiin naya?
¿Kasa naaʼinrajatka naʼwayuuse jee nachonnii? (Jaashajeʼera süchikuaʼa wetsiikulokot 4 jee 11).
Nachajaale sukuwaʼipa na wawalayuukana süpüla naʼyataain neʼipajee na laülaashiikana jee laülaashiin naya, ¿kasa anasü neʼreetka na wawalayuukana?
EESHII WAYUU EEKAI NASAKIRÜIN: «¿Jalejeekuwat napüla na Aküjaliikana pütchi tü nneerü nakumajakalü aka piichi jee karaloʼuta?».
¿Jameerü pünüiki namüin?
WATÜJAAITPAKA AAʼU
Kojutusü nümüin Jehová wasülajüle nneerü, waneirua kasa eeka wamaʼana jee wakatarüle kaʼi süpüla wakaalinjain na wawalayuukana.
Pusouta shiʼipajee
¿Kasa waaʼinrajatka süpüla wakaalinjain suluʼu tü outkajaaleekat?
¿Kasa waaʼinrajatka süpüla wakaalinjain süka wanneetse jee waneirua kasa eeka wamaʼana?
¿Kasa pükaalinjeeka anain suluʼu tü outkajaaleekat?
PÜNAʼLA SOOʼOMÜIN
Nnojoluitpa nuchuntuin Maleiwa tü diezmokot namüin na wayuu aʼyataakana nümüin. Paashajeʼera süchiki tia.
«¿Jamüsü sünüiki tü Bibliakat süchiki tü diezmokot?» (Pütchi suluʼuka jw.org)
Süküjain tü Bibliakat waneirua kasa naaʼinrajatka wanee wayuu eekai woutiisain. ¿Jama saaʼinrajatüle shia wanee jierü?
«Na laülaashiikana napüleerua na anoujashiikana» (Aapiria Wayuu, peʼureeroʼu 2021)
Anuu nachiki waneinnua wawalayuu yalayalakana aaʼin sünain eʼikajaa karaloʼuta namüin na nawalayuukana.
Eitajünüsü karaloʼuta suluʼujeejatü tü Bibliakat chaa Congo (4:25)
Paashajeʼera süchiki jamüin nnojoliika nachuntuin nneerü na Aküjaliikana pütchi maʼaka naaʼinrüin shia na suluʼukana tü wane iküleesiakalüirua.