Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
JUUNIOʼU 4-10
KOROLO KOJUTUSÜ SULUʼUKA TÜ WIWÜLIAKAT | MARCOS 15, 16
«Tü pütchi ekeraajakat nünain Jesuu»
(Marcos 15:24, TNM) Jee nakachetka nia sünain wanee wunuʼu otta neitajaka namüinjiraa tü nüsheʼinkat sümaa nashantanajiraain saaʼu süpüla natüjaain saaʼu jaralin kamüinjachin shia.
(Marcos 15:29, 30, TNM) Jee müshiʼiya na wayuu alatakana nüʼütpünaa, naliatüin nekii sümaa namüin. «Tojuttireerü tü aʼwaajüleekat jee takumajeerü shia süchikuaʼa soʼu apünüin kaʼi, mataashi pümakai, 30 püshakata maala saaʼujee türa wunuʼukat süpüla katüin poʼu».
nwtsty-E pütchi suluʼujeejatü tü Wiwüliakat süchiki Mr 15:24, 29
neitajaka namüinjiraa tü nüsheʼinkat: Süküjain Juan 19:23, 24, TNM, waneirua kasa nnojotka aküjünüin suluʼu Marcos, Lucas otta Mateo: ashantanajiraashii na surulaat romaanokana saaʼu tü nüsheʼinkat Jesuu jee saaʼu tü sutujeejatkat nüsheʼin, pienchisü shiʼipa natuma tü nüsheʼinkat, naapaain wanee shiʼipa waneʼewai sukua otta nashantanajiraaka saaʼu tü sutujeejatkat nüsheʼin süka nnojoluin nachatajaweein shia. Sükajee müin tü naaʼinrakat, ekeraajüsü tü süküjakat Salmo 22:18. Eeshiijaʼa nayapuʼule makatüin amaʼana nüsheʼin chi oʼutunakai aaʼin na wayuu akachetkana nia. Müsüjeseʼe naakatapuʼuin nüsheʼin jee wanee kasa eekai nünain süpülapünaa noʼutuin naaʼin jee sükajee tia miyoʼu tü japülii niʼrakat chi kaainjaraikai.
naliatüin nekii: Naaʼinrüin wanee wayuu tia sümaʼaleʼeya nuchuntuin wanee pütchi nimeʼerainpalaka otta nülerajaka aka wayuu. Na alatakana nüʼütpünaa Jesuu soʼu tia, nekeraajüin tü sümakat Salmo 22:7 sümaa nnojoluin natüjaain saaʼu.
(Marcos 15:43, TNM) Otta müshia José, chi chejeʼewaikai Arimatea, naʼakajachi na laülaashii sulujunakana tü Sanedrínkat, jee müshia nia, naʼatapajüin süntüin nuluwataaya Maleiwa. Yalayalasü naaʼin sünain ekerotoo nümaʼanamüin Pilato jee nuchuntuin müliashii.
(Marcos 15:46, TNM) Otta niyaʼlajaka tü lino anasükat maʼin, jee nükoʼoluin müliashii süka, sümaa niʼitaain nia suluʼu wanee woowira aainjuushi süka wanee ipa miyoʼu otta niʼiteʼeraka wanee ipa miyoʼu soʼuluʼu tü woowirakat.
nwtsty-E pütchi suluʼujeejatü tü Wiwüliakat süchiki Mr 15:43
José: Sünainjee naatain tü kasa nüshajakat Marcos, Lucas, Juan otta Mateo nüchiki José, shiiʼiyatüin nashajüin waneʼewai nakua tü karaloʼuta nanüliamaakat. Jamüshijaʼa Mateo süka nükotchojüin nneerü nümüin chi sülaülashikai mma, nüshajüin wayuuin «washirü» José. Otta müshia Marcos ashajüshi nia namüin na romaanokana, nüküjain napüshin nia «na suluʼujanakana tü Laülaapiakat» otta naʼatapajüin süntüin Nuluwataaya Maleiwa. Otta müshia Lucas süka tottoolin anamia nia, nüküjain wayuuin «anamia jee loto akuwaʼipachi» José otta nnojoishi wanaawain nia sümaa tü aainjünakat nüka Jesuu. Nia neʼe Juan aküjaka nuunjulajapuʼuin José niain «wanee nikirajüin Jesuu süka mmoluin nia neema na judíokana» (Mt 27:57-60, TNM; Mr 15:43-46, TNM; Lu 23:50-53, TNM; Jn 19:38-42, TNM).
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Mr 15:25
yaamüin kaʼikat: Maʼaka saaʼin 9 wattaʼa maalü. Eeshii wayuu makana naatain tü sümakat Marcos suulia tü sümakat Juan 19:14-16, eere süküjain naapüin Pilato nikii Jesuu süpüla nuʼutunüin aaʼin maʼaka kaleʼu. Mayaapejeʼe nnojoluin süküjain tü Wiwüliakat jamüin naataka tia pütchikalüirua, eesü waneirua kasa jülüjeeka waaʼin. Eesü waneirua kasa wanaawaka atuma tü nüshajakat Juan, Lucas, Mateo otta Marcos eere nashajüin tü alatakat nümüin Jesuu süpülapünaa outuin nia. Naküjain pieinchiruʼu, nujuʼitüin chi kaʼikai wanaa sümaa noutkajaain na sacerdootekana namaa na laülaashiikana jee neʼikajaain Jesuu nümaʼanamüin Poncio Pilato, chi eʼitaanakai süpüla aluwatawaa sutuma Roma (Mt 27:1, 2; Mr 15:1; Lu 22:66–23:1; Jn 18:28). Naashin Mateo, Marcos otta Lucas epiyuushijaasü mmapaʼaka maʼaka kaleʼu suʼunnaa kachetüin Jesuu, «awasajaʼaleesia maa aka aliika» (Mt 27:45, 46; Mr 15:33, 34; Lu 23:44). Eeshii wayuu makana nuʼutunajachin aaʼin wanee wayuu soʼujeʼereʼeya niʼyaajünüin. Eesü aire maʼin nüliuʼo wanee wayuu jee eeshi outule nia sünainjee. Aishaatasü maʼin nümüin Jesuu tü nülioʼukat soʼu niʼyaajünüin, müshijeseʼe niʼitaanüin wanee wayuu nüchikumüin süpüla nülüʼüjain tü wunuʼukot (Lu 23:26; Jn 19:17). Nuʼutunajachire aaʼin wanee wayuu soʼujeʼereʼeya niʼyaajünüin, eeshiijaʼa süpüla wamüin eein maʼaka jeʼra oora alataka süchikijee niʼyaajünüin Jesuu sünainmüinreʼeya nüchitünüin sünain tü wunuʼukot. Wanaawasü tia sümaa tü sümakat Mateo 27:26, TNM otta Marcos 15:15, TNM wanaa sümaa saashajaain süchiki niʼyaajünüin Jesuu jee nuʼutunüin aaʼin. Eesüjaʼa shiale nüponojooin atuma Pilato outuin Jesuu süchikijeechon nükachennüin (Mr 15:44, TNM). Otta müshiʼiya na ashajakana tü Wiwüliakat pienchisü shiʼipa wanee kaʼi natuma sümaa apünüinwalin shia oora, akaʼaya saʼwai, müsia neʼe sukuwaʼipa natuma. Müsüjeseʼe wattain saalii kasa aküjünaka süchiki yaamüin kaʼika, kaleʼu otta aliika, ayaawajünawaisü sünainjee niweetüin chi kaʼikai, maʼaka 6 wattaʼa maalü (Mt 20:1-5; Jn 4:6; Alu 2:15; 3:1; 10:3, 9, 30). Jülüjeesü waaʼin nnojotpuʼuin natüjaain saaʼu na wayuukana jalapüshijatüin maʼin tü kaʼikat, müsüjeseʼe naküjawalin wanee oora eekai wanaapünaain sümaa tü kaʼikat, tia shia tü alatakat suluʼu Juan 19:14 (Mt 27:46; Lu 23:44; Jn 4:6; Alu 10:3, 9). Tü wekirajaaitpakalü anain shia nüküjain Marcos niʼyaajünüin Jesuu, aluʼujasaʼa Juan, shia neʼe naashajaaka achiki nükachennüin Jesuu sünain wanee wunuʼu. Eesüjaʼa shiale naashajaain neʼe achiki Marcos otta Juan tü apünüinsü oora sülatakalü oʼu tü aainjünakat nüka Jesuu jee nnojotsü shiain jalapüshijatüin shia. Nnojotsü nüküjain Juan jalapüshijatüin maʼin tia, «kaleʼojatü», müshi neʼe nia. Otta müsia, sutuma naatain tü nüshajakat Juan, shiiʼiyatüin nnojoluin nüshanalain tü nüshajakat sünainjee tü nüshajakat Marcos. Ashajüshi Juan kakalia mapa süchikijee nüshajüin Marcos.
nwtsty-E pütchi suluʼujeejatü tü Wiwüliakat süchiki Mr 16:8
süka mmolüin maʼi naya: Saashin tü ashajuushi sümaiwajatkat eere süküjünüin süchiki jamüin sukuwaʼipa sajaʼlajaaya tü nüshajakat Marcos, ajaʼttüsü tia pütchikat süka wetsiikulo 8. Eeshii na makana joʼuuchon neʼe tia pütchikat, nnojotsü süpüla müinjatüin sajaʼttia wanee pütchi, alawaa neʼe naashin. Nnojotpejeʼe müinjatüin wanüiki mayaa süka matüjain wainmaa tü nüshajakat Marcos. Jerónimo otta Eusebio, eejana naya soʼu siglo 4, naashin nayakana, ajaʼttüsü tü nüshajakat Marcos süka tü pütchikat «süka mmolüin maʼi naya».
Wainma pütchi ashajuushika süka griego jee waneirua pütchi alatinnaka suluʼu waneirua anüikii eʼitaaka wanee pütchi joʼuuchon sooʼomüin tü nüshajakat Marcos otta eeshii na wainmaleekana atuma tü pütchi neʼitaakat süchikijee wetsiikulo 8. Tü pütchi wainmaleekalia eʼitaanaka sooʼomüin (12 wetsiikulo tia) ashajünüsü shia suluʼu Manuscrito Alejandrino, Códice Ephraemi Syri Rescriptus otta suluʼu Códice de Beza Cantabrigense (tia karaloʼutakalüirua soʼujatü siglo 5). Otta eʼitaanüsü shia suluʼu Vulgata latina, Peshitta siríaca otta suluʼu Siríaco Curetoniano. Nnojotpejeʼe tia pütchikalüirua suluʼu piamasü karaloʼuta soʼujatka siglo 4: Códice Sinaítico otta Códice Vaticano. Otta nnojotsü shia suluʼu Códice Sinaítico Siríaco (eesü soʼujatüle shia siglo 4 jee shiale siglo 5) jee nnojotsü eʼitaanüin tia wetsiikulokalüirua suluʼu ashajuushi kakaliaitkat suluʼuka copto shaídico süchikimaajatkat tü karaloʼutakat Marcos (soʼujatü siglo 5). Shia sajaʼttaka aka wetsiikulo 8 tü karaloʼutakat Marcos ashajünakat suluʼu armenio otta georgiano.
Eesü waneirua karaloʼuta suluʼu griego jee waneirua karaloʼuta alatinnaka mapa suluʼu waneirua anüikii eere shiʼitaanüin wanee pütchi joʼuuchon sooʼomüin. Suluʼu tü kanüliakat Códice Regio soʼujatka siglo 8, eʼitaanüsü piamaleʼeya jee eʼitaanüsü palajana tü pütchi joʼuuchonkat. Süpülapünaa tü pütchi eʼitaanakat aküjünüsü eein waneinnua wayuu atüjashii anakana amüin tia pütchikat, nnojotpejeʼe atüjaanüin aaʼu suluʼujeejatüle shia tü Wiwüliakat. Tü Wiwüliakat wayuunaikiruʼu shiʼitaain tü wetsiikulokot 9-20.
PÜTCHI MIYOʼU EʼITAANAKAT SOOʼOMÜIN
Tü pütchi miyoʼu eʼitaanakalü süchikijee Marcos 16:8, nnojotsü nüshajiralain shia Maleiwa suluʼu tü Wiwüliakat. Shia tü makat mayaa:
9 Osoʼiraasü naaʼin Jesús soʼu tü palajatkat kaʼi suʼttiakat semaana. Eeʼiyataashi nia sümüin María Magdalena wattaʼa maalü nnojoliiwaʼaya shiʼrüin nia wayuu. Tü Maríakat anülia, shia tü ayuʼnnakat oulia akaratshisü yolujaa paala nütüma Jesús. 10 Süchikijee shiʼrüin Jesús, oʼunüsü María sünain aküjaa nüchiki namüin na wayuu nümaajanakana paala. Eejana naya süpüla sünain aʼyalajaʼalüin süka mojuin maʼi naaʼin. 11 Shiasaʼa süküjapa namüin sünain shiʼrüichipain Jesús sünain kataa oʼu, nnojotsü noonooin amaa tü sünüikikat. 12 Je süchikijee tia, eeʼiyataashi Jesús namüin wane piamashii noʼuluku sünain waraittüin naya suluʼu wopu. Mayaainje waraittüin nia namaa, nnojoishi nayaawatüin. 13 Oʼunüshii naya süchikijee nayaawatapa Jesús sünain aküjaa nüchiki namüin na napüshikana. Otta müshiʼiya naairua, nnojoliishii oonooin sümaa tü nanüikikat. 14 Je süchikijee mapa, eeʼiyataashi Jesús namüin na nikirajüin polookana waneemüin. Ekaashii naya nüpüla. Nüchiajaain naya süka matsüin nanoula je süka manoujüinyeein naya, süka nnojoliin noonooin sümaa nanüiki na wayuu eʼrüshiikana nia süchikijee susoʼiraain naaʼin. 15 Je shiasa mapa, nümakalaka Jesús namüin na nikirajüinkana: «Juʼuna jumata sainküin mmakat süpüshua süpüla aküjaa tachiki tayakai, chi Oʼtteʼerüikai, sümüin wayuu süpüshuaʼaleʼeya. 16 Chi wayuu eekai nünoujain tanain sünain nuwoutisaajünüin, oʼttaajeechi tatüma. Aluʼusa chi eekai nnojoin nünoujain tanain, kasalajaneerü nümüin naainjala. 17 «Chi wayuu eekai nünoujain tanain, naaʼinreerü tatüma kasa eekai isain süchiki wayuu, tü nütüjakat apüleerua Maleiwa nümüiwa. Ounteechi ayuʼlaa yolujaa je aashajawaa süka pütchi waneejatü. 18 Müleka naapaale wane wüi ouktasiroʼut, je müleka nüsüle wane emeneenajia, nnojoleechi ouktüin sütüma. Je niʼitaapa najapü saaʼu wayuu eekai ayuulin, aneerü», nümakalaka Jesús namüin na nikirajüinkana.
19 Shiasa süchikijee naashajaain chi Senyotkai Jesús namüin, nuʼuninnakalaka chaa iipünaamüin eemüin chi Maleiwakai sümaa nüikkalaain nikialuʼujee. 20 Nayasaʼa na nikirajüinkana, noʼunakalaka sainküin mmakat süpüshua sünain aküjaa nüchiki sümüin wayuu. Je sütüjaanakalaka aaʼut sütüma wayuu sünain pansaain nanüiki, süka nakaaliijünüin nütüma chi Senyotkai süpüla aaʼinraa tü kasa anasü nütüjakat apüleerua Maleiwa nümüiwa.
Wetsiikulo aashajeʼennajatka
(Marcos 15:1-15, TNM) Jee mayaashi niweetüin chi kaʼikai, noutkajaakalaka na sacerdootekana namaa na laülaashiikana otta na karaloʼutamaajanakana, eejana napüshuaʼa na suluʼukana tü sanedrínkat, jee kaülajüshi Jesuu natuma sümaa neʼikajaain nia nümaʼanamüin Pilato. 2 Nüsakitkalaka nia Pilato: «¿Pia chi aluwataashikai naaʼu na judíokana?». Nusoutaka Jesuu: «Püküjaipaʼasa shia». 3 Wattapejeʼe saalii kasa naküjaka na sacerdootekana nüchiki. 4 Jee nüsakitka nia Pilato nüchikuaʼa, sümaa nümüin nümüin: «¿Jamüsü nnojotka jamüin pünüiki shiʼipajee tü namakat? ¡Watta saalii tü paainjalakat naashin!». 5 Nnojoipejeʼe asoutuin nüchikuaʼa, jee ponosü maʼin naaʼin Pilato tia. 6 Eekajasaʼa Pilato, nüjütawai achikichi wanee püreesashi eekai achuntünüin nümüin soʼu tü miʼiraakat. 7 Soʼu tia, eejachi wanee wayuu Barrabás nünülia, püreesashi namaa na ashutushiikana naaʼu na sülaülakana mma, jee uwomuyuushii naya. 8 Nantakalaka na wayuukana jee nachuntkalaka nümüin Pilato tü naaʼinrapuʼukat napüleerua. 9 Nümakalaka Pilato namüin: «¿Shia jüchekaka tajütüin nüchiki chi aluwataashikai napüleerua na judíokana?». 10 Müsü nünüiki mayaa süka niyaawatüin saaʼu nachuunjain na sacerdootekana, müsüjeseʼe naapüin nikii Jesuu. 11 Nayasaʼa na sacerdootekana, nashükajüin na wayuukana süpüla niainjachin nachuntüin Barrabás süpüla ojuʼitinnaa. 12 Shiasaʼa nümakalaka Pilato namüin: «¿Kaseetkalaka taaʼinrüin nüka chi aluwataashikai naaʼu na judíokana jaashin?». 13 «¡Akachenneeshi sünain wunuʼu!», namakalaka. 14 «¿Kasakai naainjalaka juulia?», nümakalaka Pilato namüin. «¡Akachenneeshi sünain wunuʼu!», namakalaka maʼin nümüin. 15 Shiasaʼa süka talateein naaʼin na wayuukana nutuma Pilato, nüjütaka nüchiki Barrabás otta müshia Jesuu naapa ekiichi süpüla nükachennüin sünain wunuʼu süchikijee niʼyaajünüin.
JUUNIOʼU 11-17
KOROLO KOJUTUSÜ SULUʼUKA TÜ WIWÜLIAKAT | LUCAS 1
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Lu 1:69
Oʼtteʼerüikai Pülashikai maʼi: Jee shiale «nuʼuwa wanee mürüt oʼtteʼeria wayuu». Saashajaale tü Wiwüliakat süchiki nuʼuwa wanee mürüt, shia süküjeeka achiki katchin wanee wayuu, nütkaain süchiirua mma otta nükanajüin nüʼünüü (1Sa 2:1; Sl 75:4, 5, 10; 148:14). Nuʼuwa wanee mürüt eesü niyaawasere shia wanee aluwataai jee shiale nüpüshi, jaʼitashii mojulaain jee anamiale naya. Otta wanaa sümaa süküjünüin nasheʼetüin wanee kasa süka noʼuwa, shia aküjüneeka wainmain mma najapuluʼuka süka nakanajüin (Dt 33:17; Da 7:24; 8:2-10, 20-24). Sünain pütchi suluʼukat Lucas wanaa sümaa sümüin «nuʼuwa wanee mürüt oʼtteʼeria wayuu», nia saashajaaka achiki chi Mesíaskai, nia chi oʼtteʼerüi pülashikai maʼin.
(Lucas 1:76, TNM) Otta müshia piakai tachonchee, «nünüikimaajachi chi Miyoʼushikai», müneechi pia süka piainjachin oʼunüin nüpüleerua nümaʼanamüin Jeʼwaa, süpüla yapajüin putuma tü wopu nuʼunuinjatkalü aluʼu.
nwtsty-E pütchi suluʼujeejatü tü Wiwüliakat süchiki Lu 1:76
piainjachin ouʼnüin nüpüleerua nümaʼanamüin Jeʼwaa: «Piainjachin ouʼnüin nüpüleerua nümaʼanamüin Jeʼwaa», münüshi Juan chi Owoutisaajüikai süka niainjachin aküjain pütchi nüchiki Jesuu palajana, otta müshia Jesuu niainjachi nüjünalaka chi Nüshikai otta nünülialuʼuinjachi nia (Jn 5:43; 8:29; paashajeʼera tü pütchi suluʼujeejatkat tü Wiwüliakat süchiki nünülia Jeʼwaa sünainjee wetsiikulokot tüü).
JUUNIOʼU 18-24
KOROLO KOJUTUSÜ SULUʼUKA TÜ WIWÜLIAKAT | LUCAS 2, 3
«¿Pükatchinrüinche punoula nünain Jeʼwaa?»
nwtsty-E pütchi suluʼujeejatü tü Wiwüliakat süchiki Lu 2:41
oʼunapüʼüshii naya: Oʼunapuʼusü Mariia nümaa José juyawai sünain tü Pascuakat, saaʼinrüin tia mayaapejeʼe nnojoluin saaʼinrajatüin tia wanee jierü saashin tü pütchi aapünakat nümüin Moisés (Éx 23:17; 34:23). Oʼunapuʼushii naya 300 kiloometüro noʼunaiwaʼaya jee naleʼejapa sümaa napüshi, jee awainmalaashii na nachonniikana neʼipaʼaya.
nwtsty-E pütchi suluʼujeejatü tü Wiwüliakat süchiki Lu 2:46, 47
sünain asakiijaa naya: Sünainjee ponuin naaʼin na wayuukana tü nüsakitkalü anain Jesuu, wayaawata aaʼu nnojoluin shiain nüsakirüin anain tü nüsakirakalü anain wanee jintüi eekai eein (Lu 2:47). Tü pütchikat griego «asakiijaa» shia saashajaaka achiki nüsakirüle wanee wayuu sümaa nusoutuin sükajee nüsakirüin wanee kasa shiʼipajee tü asakinnakalü anain nia maʼaka saainjünüin laülaapialuʼu (Mt 27:11; Mr 14:60, 61; 15:2, 4; Alu 5:27). Naashin na ashajakana tü kasa alatüitkat, eeshii waneinnua ekirajülii na judíokana, makatawaika süchikijee tü miʼiraakat süpüla nekirajüin soʼuluʼu tü aʼwaajüleekat. Eepuʼushii süpüla naikalaain na wayuukana namülatuʼu süpüla naapajüin nanüiki jee nasakirüin naya sünain wanee kasa.
ponüsü maʼi saaʼin: Tü pütchi ashajünakat süka griego alatinnüsü süka «ponoshootoo aaʼin», tia shiiʼiyatüin eein süpüla kamaʼain wanee wayuu sünain ponoo aaʼin wanee kasa jee sülatüle sümüin kojuyatua.
nwtsty-E pütchi suluʼujeejatü tü Wiwüliakat süchiki Lu 2:51, 52
jüüjüüin waneepia: Eesü süpüla müin sülatiria: «ayatüshi jüüjüüin» jee «ayatüshi noonooin». Sükajee müin süshajia tü pütchikat süka griego, shiiʼiyatüin niitaain Jesuu namaa na kachonniikana nia sümaa nnojoluin yaletüin jee jüüjüüin nia süchikijee ponuin naaʼin na ekirajüliikana tü kasa nütüjakalü apüleerua süchiki Nünüiki Maleiwa. Alanaʼaleesia tü naaʼinrakat Jesuu sünain noonooin süka shiainjatüin naaʼinrüin tü Pütchi aapünakat nümüin Moisés (Éx 20:12; Gal 4:4).
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Lu 2:14
wayuu yaa mmoluʼu shiiʼiree anajiraainjanain naya: Eesü waneirua ashajuushi eeka süpüla müin sülatiria mayaa: «otta saaʼu tü mmakat, anainjana na wayuukana», jee shia sülatiriaka tia suluʼu waneirua Wiwülia. Eepejeʼe waneirua ashajuushi wanaawaka anüiki sümaa Traducción del Nuevo Mundo. Tü nümakat chi aapieekai nnojotsü maluʼuluin anain naaʼin Maleiwa namaa napüshuaʼa na wayuukana jaʼitasü jamüin nakuwaʼipa jee kasain naaʼinrüin. Tü nüküjeekat chi aapieekai shia anain naaʼin Maleiwa namaa na eeʼiyatakana kanoulain maʼin naya nünain jee noushikajaain süchiirua nukuwaʼipa chi Nüchonkai (Paashajeʼera tü pütchi suluʼujeejatkat tü Wiwüliakat süchiki anajiraainjanain naya, sünainjee wetsiikulokot tüü).
anajiraainjanain naya: Sünain tü pütchi nümakat chi aapieekai, nia Maleiwa anajiraweeka namaa na wayuukana, nnojoishii nayain na wayuukana. Tü pütchikat griego eudokía eesü süpüla sülatinnüin «anashiin wanee wayuu sümüin wane» otta «talatüin wayuu sümaa wane». Eʼitaanüsü tü pütchikat eudekéo suluʼu Mateo 3:17, Marcos 1:11 otta Lucas 3:22, eere süküjünüin naashajaain Maleiwa nümaa chi Nüchonkai süchikijee woutiisain nia. Tia pütchikat maluʼulu «anashiin nia nümüin» otta «talatüin naaʼin nümaa». Sükajee tü pütchikat «anajiraainjanain naya» (anthrópois eudokías), naya saashajaaka achiki na wayuu talatakana atuma naaʼin Maleiwa. Otta eesü süpüla sülatinnüin «wayuu anashiikana nümüin Maleiwa» jee «wayuu talataka atuma naaʼin Maleiwa». Makalaka tü nümakat chi aapieekai nnojotsü maluʼuluin talatüin naaʼin namaa napüshuaʼa na wayuukana. Tü nüküjeekat chi aapieekai shia anain naaʼin Maleiwa namaa na eeʼiyatakana kanoulain maʼin naya nünain jee noushikajaain süchiirua nukuwaʼipa chi Nüchonkai. Shiimainsaʼaya sümaa eein süpüla nayain anajiraweein na wayuukana otta eesü süpüla shiain saashajaain achiki tia tü pütchikat eudokía (Ro 10:1; Flp 1:15), eʼitaanapejeʼe maʼin shia süpüla saashajaain süchiki niain anajiraweein Maleiwa (tü kasa anakat nümüin) jee shiale sukuwaʼipa saainjia tü kasa nüchekakat (Mt 11:26; Lu 10:21; Éf 1:5, 9; Flp 2:13; 2Te 1:11). Eʼitaanüsü tia pütchikat suluʼu Septuaginta süpüla saashajaain süchiki niain anajiraweein Maleiwa (Salmo 51:18 [50:20, LXX]).
wp16.3-S süp. 9 püt. 1-3
¿Pütüjaa aaʼu?
¿Jarai chi nüshikai José?
Chi wayuu aʼyataaikai süka taapüla chaa Nazaret, nia chi nüshiyaashikai Jesuu. ¿Jarai chi nüshikai José? Nüchon nia Jacob saashin tü pütchi nüshajakat Mateo nachiki na nutuushinuukana José, shiasaʼa saashin tü pütchi nüshajakat Lucas «nüchon Elí» José. ¿Jamüshiiche piamashiika na wayuu achuntunakana anülia? (Lucas 3:23; Mateo 1:16).
Anuu tü nüshajakat Mateo: «Jacob, nüshi José». Tü pütchi nüshajakat Mateo shiiʼiyatüin niain Jacob chi nüshikai José. Shia nüshajaka Mateo nanülia na nutuushinuukana José. Sükajee tia jaʼyasü nuuʼuliwoʼuin David José otta eein süpüla nuluwataain, niapejeʼe aneekünüin Jesuu süpüla aluwatawaa süka nüchonyaain nia.
Anuu tü nüshajakat Lucas: «José nüchon Elí». Tia pütchikat eesü süpüla maluʼuluin shia mayaa: «nüchon wattajachi», jee shiale «suʼwayuuse nüchon». Müsia neʼe sünüiki Lucas 3:27, TNM. Saashin tia pütchikat «nüchon Nerí», Sealtiel niapejeʼe kachoin nia Jeconías (1 Crónicas 3:17; Mateo 1:12). Nüchon Nerí tü nuʼwayuusekat Sealtiel, nnojotsü atüjaanüin aaʼu kasaichin sünülia tü nuʼwayuusekat, nüshimia Nerí Sealtiel. Akaataʼaya neʼe José, «nüchon» Elí saaʼu nuʼwayuusein Mariia, tü nüchonkat. Makalaka nüshajüin Lucas jaraliin na nüpüshikana Jesuu sünainjee tü niikat (Roma 1:3). Makalaka süküjain tü Wiwüliakat piamasü sukuwaʼipa nüpüshi Jesuu jee watta saalii kasa watüjaka sünainjee tia.
JUUNIOʼU 25-JUULIOʼU 1
KOROLO KOJUTUSÜ SULUʼUKA TÜ WIWÜLIAKAT | LUCAS 4, 5
«Wachechera waaʼin suuʼulakünapa waaʼin maʼaka naaʼinrüin shia Jesuu»
nwtsty-E video
Süraloʼu tü aʼwaajüleekat
Eesüjaʼa shiimainre nümaanüin Jesuu nutuma Satanaa süraloʼumüin tü aʼwaajüleekat eere yaletüin maʼin tü miichikat, jee nümaka nümüin numuttajachin mmoluʼumüin, nnojotpejeʼe watüjaain aaʼu jalajatüin maʼin tia. Tü pütchi ashajünakat yaa shia saashajaaka achiki süpüshuaʼa tü aʼwaajüleekat, eeshijaʼa süpüla chajachin Jesuu shaʼwatüin uuchijeeruʼu, süraloʼu tü aʼwaajüleekat (1) jee chajachire nia sücheʼetoujee tü aʼwaajüleekat. Numuttulejeʼe Jesuu saaʼujee tü aʼwaajüleekat, outushijeʼe nia, aluʼusaʼa nükaaliinjale nia Jeʼwaa.
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Lu 4:17
tü nüshajalakat Isaías chi nünüikimaajachikai Maleiwa: Tü rooyo nüshajakat Isaías, antünaka anain süʼütpaʼa mar Muerto, 7,3 meetüro sajaʼapüin otta 17 süpana, aainjuushi süka pergamino, ejeʼipanajuushi shia otta eesü 54 shiʼipa pütchi sünain. Eesüjaʼa müle sajaʼapüin tü rooyo aashajeʼennakat suluʼu tü ekirajüleekat na judíokana chaa Nazaret. Soʼu nükalia Jesuu nnojotpuʼusü kapiitulo otta wetsiikulo sünain tü karaloʼuta suluʼukat tü Wiwüliakat, müshijeseʼe nüchajaain Jesuu tü pütchi naashajeʼereekat sümaa nnojoluin kapiitulo jee wetsiikulo sünain. Nüntapejeʼe sünain jalajatüin ashajuushin shia, tia shiiʼiyatüin niʼraajashaatain Jesuu tü Nünüikikat Maleiwa.
nwtsty-E pütchi suluʼujeejatü tü Wiwüliakat süchiki Lu 4:25
apünüin juya shiatapünaamüin: Saashin 1 Reyes 18:1, nüküjain Elías shiʼitajatüin juya sülatapa «apünüin juya». Müshiijeseʼe eein wayuu makana nnojoluin pansaain nünüiki Jesuu sümaa tü sümakat Palajatkat Reyes. Nnojotpejeʼe aküjünüin suluʼu tü pütchi Ashajuushikat süka Hebreo, shiʼitüin juya süpülapünaa sülatüin apünüin juya. Tia «apünüinkat juya» ayaawajünüsü shia soʼujee nüküjain nümüin Acab meʼitüinjatüin juya (1Re 17:1). Eesüjaʼa nüküjale tia Elías suʼunnaa nnojoluin shiʼitüin juya, eesüjaʼa eere maʼaka aipirua kashi tia, eepajaʼa kakaliale kashi meʼitüinka oʼu juya. Otta nnojotsü eʼitamaatüin tü juyakat soʼuleʼeya naashajaain Elías nümaa Acab sülatapa «apünüin juya», shia alataka palajana tü siki ojutuukat iipünaajee chaa saaʼu tü uuchikat Carmelo (1Re 18:18-45). Müsüjeseʼe tü pütchi nüküjakat Jesuu sümaa tü nüküjakat Santiago, chi nuwalakai, suluʼu Santiago 5:17, nnojotsü naatain suulia tü sümakat 1 Reyes 18:1.