EKIRAJAAYA 17
Tü nukuwaʼipakat Jesús
Wekirajaale süchiki tü kasa nümapuʼukat Jesús otta süchiki tü kasa naaʼinrapuʼukat yaaiwaʼaya nia saaʼu tü Mmakat, aleeweena maʼin waya nümaa otta nümaa Jehová, chi Nüshikai. Wekirajaa süchiki nukuwaʼipa Jesús otta süchiki tü waaʼinrüinjatkat süpüla müin wakuwaʼipa maʼaka saaʼin nukuwaʼipa.
1. ¿Jamüsü makaʼa nukuwaʼipa Jesús maʼaka saaʼin nukuwaʼipa chi Nüshikai?
Wanaa sümaa chajachin Jesús iipünaa nümaa chi Nüshikai soʼu watta saalii juya, wainma tü kasa nütüjakat sünainjee nukuwaʼipa. Wanaawasü tü jülüjakat naaʼin sümaa tü jülüjakat naaʼin chi Nüshikai. Nükaalinjain na müliakana aaʼin otta naaʼinrüinya tü naaʼinrakat chi Nüshikai (paashajeʼera Juan 5:19). Wanaawasü nukuwaʼipa Jesús sümaa nukuwaʼipa chi Nüshikai. «Chi eekai niʼrüin taya, niʼrüin chi Tashikaʼiya» müshijeseʼe nümüin (Juan 14:9). Pikirajaale maʼin süchiki nukuwaʼipa Jesús, piʼraajeerü maʼin nukuwaʼipa Jehová. Jamüshijaʼa Jesús, nükaalinjain na wayuu müliakana aaʼin maʼaka naaʼinrüin shia Jehová, chi Nüshikai.
2. ¿Jamüsü watüjaaka saaʼu alin maʼin nüpüla Jesús chi Nüshikai?
«Chi toonookai amaa waneepia, nia chi Tashikai. Je jooluʼu saaʼu taaʼinrüinjatüin tü nuluwataakat anain taya, atüjaaneerü aaʼu sütüma wayuu sainküin mma sünain alin maʼi nia tapüla» müshi Jesús (Juan 14:31). Soʼu yaajachin Jesús Mmapaʼa, jaʼyasü naaʼu alin maʼin nia nüpüla chi Nüshikai. Oonooshi maʼin nia sümaa nünüiki, jaʼitakajeʼe soʼu niʼrüin müliaa naaʼinrüinya tia. Süka alin maʼin nüpüla Jesús chi Nüshikai, nüküjain sümüin wayuu süchiki nukuwaʼipa otta nükaalinjain na waneinnua süpüla aleewainjanain naya nümaa Jehová (Juan 14:23).
3. ¿Jamüsü watüjaaka saaʼu alin wayuu nüpüla Jesús?
«Aishaatashii tapüla na wayuukana» müshi Jesús saashin tü Bibliakat (Proverbios 8:31). Sükajee tü kasa pülasü naaʼinrakat, atüjaana aaʼuchi pülashin nia otta alin maʼin wayuu nüpüla (Marcos 1:40-42). Anamiashi Jesús sümüin wayuu süpüshuaʼa. Nütütüleʼerüin naaʼin na wayuu anamiakana sükajee nüküjain namüin süchiki tü kasa anasü eeinjatkat mapeena. Aishii nüpüla Jesús na aaʼinrakana tü nikirajakalü anain, nnojoliipejeʼe nayain neʼe alin nüpüla. Aisü wayuu süpüshuaʼa nüpüla makalaka nülatirüin müliaa jee outuin nia saaʼu naainjala na wayuukana (paashajeʼera Juan 15:13, 14).
WEKIRAJAA SOOʼOMÜIN
Wekirajaa sooʼomüin süchiki nukuwaʼipa Jesús otta wekirajaa süchiki tü waaʼinrüinjatkat süpüla alin wapüla na wayuukana otta süpüla wakaalinjain naya maʼaka naaʼinrüin shia Jesús.
4. Aishi nüpüla Jesús chi Nüshikai
Sünainjee tü nukuwaʼipakat Jesús, wayaawata aaʼu tü waaʼinrajatkat süpüla weeʼiyatüin naalin Maleiwa wapüla. Jaashajeʼera Lucas 6:12 otta Juan 15:10 jee 17:26, TNM. Süchikijee, yooto jia süchiki tüü:
¿Kasa waaʼinrajatka süpüla weeʼiyatüin naalin Jehová wapüla maʼaka naaʼinrüin shia Jesús?
Aishaatashi maʼin nüpüla Jesús chi Nüshikai müshijeseʼe nuʼuraajawalin nümüin.
5. Nükaalinjain Jesús na müliakana aaʼin
Nnojotsü jülüjain naaʼin Jesús nukuwaʼipa neʼe nümüiwaʼa, jülüjasü naaʼin nakuwaʼipa na waneinnua. Wanaa sümaa mapüsain maʼin nia nükaalinjain na waneinnua. Jaashajeʼera Marcos 6:30-44 otta yooto jia süchiki tüü:
¿Kasa naaʼinraka Jesús süpüla nükaalinjain na waneinnua? (Jaashajeʼera süchikuaʼa wetsiikulokot 31, 34, 41 otta 42).
¿Kasa nükaalinjaka anainjee Jesús na waneinnua? (Jaashajeʼera süchikuaʼa wetsiikulokot 34).
Sünainjee müin nukuwaʼipa Jesús maʼaka saaʼin nukuwaʼipa Jehová, ¿kasa watüjaka sünainjee nukuwaʼipa Jehová?
¿Kasa waaʼinrajatka süpüla wakaalinjain na waneinnua maʼaka naaʼinrüin shia Jesús?
6. Asülajüi maʼin Jesús
Asülajüi Jesús mayaainjeʼe nnojoluin wainmain kasa nümaʼana. Müinjanaʼaya waya, asülajüliinjana waya. Jaashajeʼera Aluwataaushikana [Hechos] 20:35 otta yooto jia süchiki tüü:
Sünainjee tü nümakat Jesús, ¿kasa waaʼinrajatka süpüla talatüin waaʼin?
Jünaja tü VIDEOKOT otta yooto jia süchiki tüü:
¿Kasa waaʼinrajatka süpüla wasülajüliin jaʼitairü nnojoluin wainmain kasa wamaʼana?
¿Pütüjaa aaʼu tüü?
Süküjain tü Bibliakat woʼuraajüinjanain nümüin Jehová sükajee nünülia Jesús (jaashajeʼera Juan 16:23, 24, TNM). Waaʼinrüle tia, kojutusü wamüin tü naaʼinrakat Jesús süpüla aleewain waya nümaa Jehová.
EESHII WAYUU EEKAI NAMÜIN: «Aleinjatia nutuma Maleiwa müliain wayuu».
Sünainjee müin nukuwaʼipa Jesús maʼaka saaʼin nukuwaʼipa chi Nüshikai, ¿jamüsü watüjaaka saaʼu nnojoluin aleinjatüin nutuma Maleiwa müliain wayuu?
WATÜJAAITPAKA AAʼU
Aishi Jehová nüpüla Jesús otta aishiʼiya na wayuukana nüpüla. Piʼraajüle maʼin nukuwaʼipa Jesús, piʼraajeerü maʼin nukuwaʼipa Jehová, jama müinya nukuwaʼipa maʼaka saaʼin nukuwaʼipa chi Nüshikai.
Pusouta shiʼipajee
¿Kasa waaʼinrajatka süpüla weeʼiyatüin naalin Jehová wapüla maʼaka naaʼinrüin shia Jesús?
¿Kasa waaʼinrajatka süpüla weeʼiyatüin naalin na wayuukana wapüla maʼaka naaʼinrüin shia Jesús?
¿Kasa kamalainka pümüin sünainjee nukuwaʼipa Jesús?
PÜNAʼLA SOOʼOMÜIN
Pikirajaa süchiki nukuwaʼipa Jesús süpüla püshatüin nukuwaʼipa.
Pikirajaa sünain jamüin woʼuraajüinjanaka nümüin Jehová sükajee nünülia Jesús.
«¿Jamüshii woʼuraajüinjanaka sükajee nünülia Jesús?» (Aapiria Wayuu, peʼureeroʼu 1, 2008)
¿Süküjainche tü Bibliakat süchiki nütapaʼa Jesús?
«¿Jamüsü sünüiki tü Bibliakat süchiki nütapaʼa Jesús?» (Pütchi suluʼuka jw.org)
¿Kasa watüjaka sünainjee kojutuin nümüin Jesús na jieyuukana?
«Kojutushii na jieyuukana nümüin Maleiwa» (Aapiria Wayuu, settienpüroʼu 1, 2012)