EKIRAJAAYA 3

«Süntakalaka tü nüpülainkat Maleiwa naaʼumüin»

Tü alatakat sükalioʼu Pentecostés süntapa tü nüpülainkat Maleiwa naaʼu

Suluʼujeejatü Aluwataaushikana 2:1-47

1. Püküja süchiki tü aainjünapuʼukat sünain tü miʼiraakat Pentecostés.

TALATÜSHII maʼin na wayuu chajanakana Jerusalén.a Kaitüsü sümüsain tü aʼajünakat suluʼu tü aʼwaajüleekat. Eeʼirajüshii maʼin na Leviitakana tü jayeechi kanüliakat Hallel (Salmo 113 sünainmüin 118). Wotusü maʼin tü kaayekalüirua namaa na wayuu antakana wattajee, suluʼujeejana naya tü mmakat Elam, Mesopotamia, Capadocia, Ponto, Egipto otta Roma.b ¿Kasache noutkajaaka apüla? Süpüla tü kanüliakat Pentecostés «palajatka süchon aʼttiee» eesü sümünüle (Núm. 28:26). Aainjünawaisü juyawai tia miʼiraakat sujutaaya tü atpajakat cebada otta suʼttia sütpajünaka oʼu trigo, talatüsü saaʼin wayuu soʼu tia.

Wanee mapa sümaajatkat tü mma eejeʼewaliire na wayuu aapakana tü pütchi anaka maʼin sünain tü Pentecostés soʼujatka 33 So. W. 1. Mma: Libia, Egipto, Etiopía, Bitinia, Ponto, Capadocia, Judea, Mesopotamia, Babilonia, Elam, Media y Partia. 2. Pueulo: Roma, Alejandría, Menfis, Antioquía (de Siria), Jerusalén y Babilonia. 3. Palaa: mar Mediterráneo, mar Negro, mar Rojo, mar Caspio y golfo Pérsico.

JERUSALÉN, EERE NOʼUNUIN NA JUDÍOKANA SÜPÜLA AʼWAAJAA MALEIWA

Tü aküjünakalü achiki suluʼu tü palajatkat kapiitulo suluʼu tü karaloʼutakat Aluwataaushikana chajatü alatüin Jerusalén. Pueulokot tüü, pasanainsü sünain waneirua uuchi chakat Judea, 55 kilómetro wüinpümüin sünain tü palaa kanüliakat Mediterráneo. Soʼu juyakat 1070 Sü.W., nükanajüin chi Aluwataashikai David na nüʼünüükana saaʼu tü uuchi kanüliakat Sion, niʼitaaka tü nipiakat saaʼu. Awainmalaasü mapa tü pueulokot chaa Jerusalén shiaka mapa tü pueulo miyoʼusükat suluʼu tia mmakat.

Pejesü tü uuchikat Moria sünain tü uuchikat Sion, naashin na judíokana, oʼutunataaichijeʼe aaʼin Isaac nutuma Abrahán saaʼu tia uuchikat, 1.900 juya süpülapünaa tü aküjünakat suluʼu Aluwataaushikana. Nukumajapa Salomón tü aʼwaajüleekat saaʼu tü uuchikat Moria, süpüshisü shia tü pueulokot. Nuʼwaajünaka Jehová suluʼu tia mmakat natuma na judíokana.

Antawaishii suluʼumüin tü aʼwaajüleekat na judío waneepiakana nümaa Jehová süpüla nasülajüinjanain wanee kasa nümüin jee naʼwaajüinjachin nia soʼutpünaa tü miʼiraa aainjünawaikat natuma. Oonooshii sümaa tü nuluwataakalü anain Maleiwa, tü makat mayaa: «Oʼunuinjana na tooloyuukana nümaʼanamüin Jehová apünüintua süpüla juyakat suluʼumüin tü mma nüneekakat» (Deut. 16:16). Chajatü Jerusalén tü laülaapiakat natuma na judíokana jee na sülaülajanaka mma, «Laülaapia Miyoʼusükat», müshii naya sümüin tü kanüliakat Sanedrín.

2. Püküja süchiki tü alatakat soʼu sükalioʼu Pentecostés soʼu tü juyakat 33.

² Sajaʼttia tü kashikat maayoʼu maʼaka 9 watta maalü soʼu tü juyakat 33 So.W. alatüsü wanee kasa ponoko maʼin saaʼin wayuu. «Saapünakalaka suʼloolo wanee kasa iipünaajee müsü aka saaʼin suʼloolo wanee joutai eekai katchin maʼin» (Aluw. 2:2). Saapünaka suʼlotuin tia suluʼu tü miichi eejanale na 120 nikirajüinkana Jesús suchuwalaaya sümaka wanee kasa saaʼu nekii müsü aka saaʼin shiyee wayuu.c Süntakalaka tü nüpülainkat Maleiwa naaʼumüin, naashajaaka suluʼu anüikii naatajatü. Ponusü maʼin naaʼin na wayuu nnojoliikana Judíoin naapapa naashajaain na nikirajüinkana Jesús suluʼu nanüikipala naya wayuukana (Aluw. 2:1-6).

3. (1) ¿Jamüsü anaka maʼin tü alatakat sünain tü Pentecostés soʼujatkat tü juyakat 33 So.W.? (2) ¿Jamaluʼulu naapakai saaʼin Pedro tü palajatkat yaawe soʼu nüküjain pütchi?

³ Anashaatasü maʼin tü kasa alatakat soʼu tia süka nüneeküin Maleiwa na chainjanakana iipünaamüin (Gal. 6:16). Müsü naapakai saaʼin Pedro tü palajatkat yaawe soʼu nüküjain pütchi namüin naya wayuukana. Sünainjee tia eeshii süpüla neʼrüin kasa anasü waneinnua wayuu (Mat. 16:18, 19). Sükajee tü naaʼinrakat Pedro, na judíokana otta müshia na ekerotokana naʼakamüin sünain anoujaa eeinnapa süpüla naneekünüin nutuma Maleiwa süpüla napüshinjanain na chainjanakana iipünaa.d Aluwataainjana nümaa Cristo jee sacerdoteinjanain naya (Apoc. 5:9, 10). Shiasaʼa mapa müinjatia nakuwaʼipa na Samariajeʼewaliikana jee müshia na nnojoliikana judíoin. ¿Kasa watüjaka sünainjee tü Pentecostés soʼujatkat tü juyakat 33 So.W.?

«Jutkataka naya napüshuaʼa suluʼu wanee miichi» (Aluwataaushikana 2:1-4)

4. ¿Kasa ayataka naaʼinrüin na anoujashiikana maaʼulu yaa maʼaka naaʼinrapuʼuin shia na anoujashiikana soʼu juyakat 33?

⁴ Noʼttaiwaʼaya na anoujashiikana nünain Cristo eejana maʼaka 120 anoujashii suluʼu wanee miichi soʼu naneekünüin sutuma tü nüpülainkat Maleiwa (Aluw. 2:1). Wainmapejeʼe na woutiisakana soʼu kaʼikat tia. Müsü nakuwaʼipa na anoujashiikana noʼttaiwaʼaya, ayatayuliipejeʹe naya akooʼomüinraain maaʼulu yaa. Aküjashii naya tü pütchi anakat maʼin sainküinpünaa mma süchiki Sukuwaʼipa Aluwatawaa nutuma Maleiwa, naainjain tia süpülapünaa sajaʼlajaain tü kasa alatakat sainküin mmakat (Mat. 24:14).

5. (1) ¿Kasa anasü neʼraka na anoujashiikana sünainjee kottiraain naya nakalioʼu na aluwataaushikana? (2) ¿Kasa anasü weʼreetka wayakanaʼaya?

⁵ Atütülaakajasaʼa maʼin naaʼin na anoujashii eejanakana soʼu tia na chainjanakana iipünaa jee müshia mapa na «waneirua tanneetse» nümakana amüin Jesús (Juan 10:16). Keeʼireesü maʼin naaʼin Pablo nakaalinjiraain na anoujashiikana, anuujeseʼe tü nüshajakat namüin na anoujashii chajanakana Roma: «Teʼreein maʼin jia süpüla takatchinrüinjatüin tü junoulakat nünain Maleiwa jee shiale süpüla watütüleʼerajiraain waaʼin waneʼewai wakua sükajee tü wanoulakat» (Roma 1:11, 12).

ROMA, TÜ MMA MIYOʼUSÜKAT

Wanaa sümaa süshajünüin tü kasa alatakat suluʼu tü karaloʼutakat Aluwataaushikana, eʼnnaajünüsü maʼin Roma otta kojutusü maʼin shia atumawaa. Laülaasü tü mmakat Roma saaʼu Gran Bretaña, palaamüin saaʼu África, saaʼu océano Atlántico sünainmüinreʼeya golfo Pérsico.

Sainküinjeejana mma na wayuu kepiakana Roma, naatawai neʼiruku, nakuwaʼipa, nanüikipala otta naatayaa müsü tü kasa nanoujakalü anain. Wainma maʼin wopu chaa Roma müsüjeseʼe eejatüin wayuu sainküinjeejatü mmakat jee oʼotowaaisü anuwa eküülümaajatü otta sümaajatü waneirua kasa kojutuka maʼin, namüinjatü tia na wayuu kepiakana Roma. Antawaisü tia eemüin tü soʼonulekat anuwa kanüliakat Ostia.

Soʼu nakalia na nikirajüinkana Jesús alatüsü suulia wanee miyon wayuu kepiaka chaa Roma. Wainmaleʼeya na achepchieekana, na kaainjaraliikana, na tepichi eekai noikuushin, na eekai napütüüshin sutuma nei jee niale nashi. Noʼutku na achepchieekana napüshi na judío antinnaka Jerusalénjee soʼu nushutuin Pompeyo saaʼu, soʼu juyakat 63 Sü.W.

Wainma na wayuu maʼletsekana chaa Roma. Watta saalii wayuu kottoka suluʼu wanee miichi. Epijaashii naya sünainjee tü nneerü jee tü eküülü nasülajakat na sülaülashiikana mma. Nukumajirüin chi aluwataashikai suutkajaale wayuu, estadio süpüla shiʼrajüinjatüin sukua wanee kasa süsirajüinjatka aka, shiʼrajüinjatüin sukua wayuu eekai eejiraain sümaa wüchii outaleepaʼaya shia otta shiʼrajüinjatüin sukua ama eekai shiyoujiraain sümaa sajaralajüin kareeta. Nnojotsü achekajünüin namüin na wayuukana süpüla neʼrajüinjanain tia.

6, 7. ¿Jamüsü sukuwaʼipa shikeraajia natuma na anoujashiikana tü nuluwataakalü anain naya Jesús?

⁶ Tü waaʼinrakat maaʼulu yaa müsü aka saaʼin tü naaʼinrakat na anoujashii eejanakana nakalioʼu na aluwataaushikana. Naapüin Jesús wanee aʼyatawaa namüin na nikirajüinkana, mayaainjeʼe kapüleejeerüin shia talateerü naaʼin sünain. Müshi nia namüin: «Anashii juʼunule sünain ekirajaa wayuu maʼleekalia sainküin tü mmakat. Woutiiseena naya jutuma saaʼu nünülia chi Tashikai, saaʼu tanülia tayakai chi Nüchonkai otta saaʼu nüpülain Maleiwa. Jikirajeena naya süpüla noonooinjanain sümaa süpüshuaʼa tü taluwataakalü anain» (Mat. 28:19, 20).

⁷ Nuʼunirüin Jehová nakuwaʼipa na wawalayuukana süpüla naküjainjanain pütchi. Kapüleepejeʼe waküjain pütchi sümüin wayuu eekai naatain sünüiki. Alatüsü suulia 1.000 anüikii ashajünaka aluʼu karaloʼuta suluʼujeejatka tü Bibliakat. Talateerü maʼin waaʼin woutkajaale waküjale pütchi jee wekirajüle wayuu nüchiki Maleiwa.

8. ¿Kasa anasü weʼraka sutuma woutkajaʼawalin?

⁸ Süpüla wountuinjatüin wachecherüin waaʼin soʼutpünaa tü kaʼi keemakat maʼin nükaalinjain waya Jehová nakajee na wawalayuukana. Müsü nünüiki Pablo namüin na anoujashii Hebreokana: «Anasü kachipünaale waaʼin nakuwaʼipa na waneinnua süpüla aijiraainjanain waya jee süpüla waaʼinrüinjanain kasa anasü. Nnojoliinjana makatüin waya suulia tü outkajawaakat maʼaka makatawalin waneinnua wayuu suulia. Shiainjaʼa anain watütüleʼerüle naaʼin na waneinnua waneʼewai wakua, jama sülüʼülüin maʼin tü nükaliakat Maleiwa» (Heb. 10:24, 25). Waneepiale waya sünain tü outkajawaakat watütüleʼereerü naaʼin na waneinnua jee atütülaajeerü waaʼin.

«Naapapa naashajaain na nikirajüinkana Jesús suluʼu nanüikipala naya wayuukana» (Aluwataaushikana 2:5-13)

Aküjashii pütchi na nikirajüinkana Jesús namüin na judíokana otta na ekerotokana naʼakamüin sünain anoujaa suluʼupünaa kaaye. — «¿Aashin naashajaain suluʼu wanüikipala süchiki tü kasa anasü naaʼinrakat Maleiwa?» (Aluwataaushikana 2:11).

9, 10. ¿Kasa naaʼinraka noʼutku wawalayuu süpüla naküjainjanain pütchi suluʼu naata anüikii?

⁹ Talatakajasaʼa maʼin naaʼin na judíokana otta na ekerotokana naʼakamüin sünain anoujaa soʼu tü Pentecostés soʼujatka juyakat 33 So.W. Eeshijaʼa wainmale na wayuu atüjakana hebreo otta griego, ponoko maʼin naaʼin «naapapa naashajaain na nikirajüinkana Jesús suluʼu nanüikipala» (Aluw. 2:6). Talatüsü maʼin saaʼin tü wayuukalüirua süka süküjünüin namüin tü pütchi anakat maʼin suluʼu nanüikipala. Nnojotsü nountuin tia maaʼulu yaa na anoujashiikana. Wainmapejeʼe na wawalayuu aküjakana pütchi sainküin mma. ¿Jamüsü sukuwaʼipa natuma? Eeshii wawalayuu ekirajaakana sünain wanee anüikii naatajatü süpüla jaloulinjanain naya suluʼu wanee outkajaalee jee nakolojoole suluʼumüin wanee mma naata. Ponusü maʼin naaʼin na wayuukana naapapa tü pütchi anasükat suluʼu nanüikipala.

¹⁰ Jülüjataa waaʼin tü saaʼinrakat Christine otta müshiʼiya akaratshishii wawalayuu ekirajaakana sünain tü anüikiikat gujaratí. Suʼunapa suluʼumüin tü shiʼyataaleekat süsaküin wanee majayüt aashajaakat gujaratí. Ponusü saaʼin tia tü wayuukat, sütüjaweeka saaʼu jamüin shikirajaaka Christine sünain wanee anüikii kapüleeka maʼin. «Anakajasaʼa maʼin tü pütchi püküjainjakalü achiki» sümaka sümüin.

11. ¿Kasa waaʼinrajatka süpüla waküjain pütchi namüin na wayuu naatakana anüikii?

¹¹ Isasü wachiki wekirajaain wapüshuaʼa sünain wanee anüikii naatajatü. Eepejeʼe süpüla yapajüin watuma tü wanüikinjatka sünain aküjaa pütchi sükajee tü aplicacionkot JW Language^®. Anashii watüjale asaka na wayuukana suluʼu nanüikipala jee watüjale jeʼrasü pütchi süpüla kamalainjatüin namüin na wayuu naatakana anüikii nekirajaain nüchiki Maleiwa. Püküja süchiki jw.org jee piiʼiyata namüin tü videokalüirua otta müsia tü karaloʼutakalüirua eeka suluʼu nanüikipala. Waaʼinrüle tia, talateerü maʼin waaʼin maʼaka naaʼin na anoujashii namaiwajanakana waküjale pütchi namüin na wayuukana suluʼu nanüikipala.

JUDÍO KEPIAKANA MESOPOTAMIA OTTA EGIPTO

Saashin tü karaloʼutakat La historia del Pueblo Judío en la era de Jesucristo: «Kepiashii napüshi na nüikeyuukana Israel, tü poloosükat eʼirukuu otta müshia na judíokana chaa Mesopotamia, Media otta Babilonia süchikijee namaanüin natuma na asiriokana jee natuma na babiloniokana». Aküjünüsü suluʼu Esdras 2:64 naleʼejüin neʼe Jerusalénmüin 42.360 israelita süchikijee namaanüin natuma na babiloniajeʼewaliikana. Soʼujatü tia juyakat 537 Sü.W. Naashin Flavio Josefo soʼutpünaa nakalia na nikirajüinkana Jesús, wainma na judío kepiakana süʼütpünaa Babilonia. Nashajaka tü pütchi aluwataanakalü anain na judíokana, tü kanüliakat Talmud de Babilonia, soʼunnaa siglo 3 otta 5.

Atüjaana aaʼu chajanain na judíokana kepiain Egipto soʼunnaa siglo 6, atüjaana aaʼu tia sünainjee waneirua ashajüshi ousütünakalü anain. Nüküjain Jeremías nünüiki Jehová namüin na judío kepiakana suluʼupünaa tia mmakat jee suluʼu Menfis (Jer. 44:1, noota). Eeshiijaʼa wainmale na judío akolojookana Egiptomüin soʼunnaa tü juyakat 323 sünainmüin juyakat 30 Sü.W. Naashin Josefo noʼutku na kepiakana Alejandría naya na judío antakana Egiptojee. Aluwataashii naya saaʼu tü mma kepiaka aluʼu naya. Naashin Filón, wanee judío ashajüikai süchiki wanee kasa soʼunnaa siglo 1, eejana maʼaka wanee miyon judío kepiakana chaa Egipto, chejee Libia sünainmüinreʼeya Etiopía.

«Nüshaʼwalaaka Pedro» (Aluwataaushikana 2:14-37)

12. (1) ¿Jamüsü watüjaka saaʼu shikeraajüin tü nümakat Joel soʼu tü Pentecostés soʼujatkat 33 So.W.? (2) ¿Jamüsü naʼatapajaka na nikirajüinkana Jesús shikeraajüinjatüin tü nüküjatüjütkalia Joel?

¹² Nüshaʼwalaaka Pedro süpüla nüküjainjachin pütchi namüin na wayuu wattakana naalii sainküinjeejanaka mma, naatayaa makana anüikii (Aluw. 2:14). Nüküjain Pedro nountuin na nikirajüinkana Jesús naashajaain suluʼu naata anüikii nutuma Maleiwa. Ekeraajüsü sükajee tia tü nümatüjütkalia Joel, tü makat yaa: «Taapeerü tü tapülainkat sümüin wayuu maʼleekalia» (Joel 2:28). Süpülapünaa nuʼunuin Jesús sirumatuʼumüin, müshi nia namüin na nikirajüinkana: «Achunteechi maʼin taya nümüin chi Tashikai jee nüjüteetkalaka tü akaalinjainjanakat jia» tia, shia tü nüpülainkat Maleiwa (Juan 14:16, 17).

13, 14. (1) ¿Kasa naaʼinraka Pedro süpüla süntajatüin suluʼumüin saaʼin wayuu tü nümakat? (2) ¿Jamüsü süpüla washatüinjatüin tü naaʼinrakat?

¹³ Nümaka joo Pedro sümaa lotuin nünüiki: «Natüjaainjatü aaʼu napüshuaʼa na wayuu kepiakana Israel niʼitaanüin Jesús nutuma Maleiwa süpüla Waseñotseinjachin nia otta süpüla Cristoinjachin nia, chi anii joo jükacherüin sünain wanee wunuʼu süpüla outajachin nia» (Aluw. 2:36). Mayaainjeʼe nnojoliin eejanain naya wayuukana wanaa sümaa nuʼutunuin aaʼin Jesús napüshi naya na oʼutakana naaʼin. Kojutupejeʼe naya nümüin Pedro süpüla sujutuuinjatüin suluʼu naaʼin tü nüküjakat namüin. Shia keeʼireekat naaʼin Pedro nayaawajaainjanain na wayuukana suulia naainjala. ¿Airuʼutsüche namüin na wayuukana tü nüküjakat Pedro? Nnojorüleejaʼa. «Naapaiwaʼaya na wayuukana tia pütchikat, müsüjaʼaya sütkünakai naaʼin». Müshiijeseʼe namüin nümüin Pedro otta müshia na aluwataaushikana. «Wawalayuu, ¿kasakaʼa anain süpüla waaʼinrüin?». Sutuma anain sukuwaʼipa nünüiki Pedro ojutuusü naaʼin na wayuukana jee ayaawajaashii naya suulia naainjala (Aluw. 2:37).

¹⁴ Eesü süpüla washatüin nukuwaʼipa Pedro süpüla süntajatüin suluʼumüin saaʼin wayuu tü wamakat. Waküjapa pütchi nnojoishii peʼipaainjanain waya namaa na wayuukana, nnojoishii wachiaainjanain nnojorüle pansaain tü nanoujakalü anain. Anasü waküjale wanee pütchi aneetka atumaa naaʼin na wayuukana. Waashajaale süchiki tü anakat namüin, eesüjaʼa süpüla naapaain sümaa tü sümakat tü Bibliakat. Anale maʼin sukuwaʼipa süküjia tü Nünüikikat Maleiwa watuma arütkaajeena nünainmüin Maleiwa na wayuu anamiakana.

ANOUJASHII KEPIAKANA PONTO

Soʼunnaa tü Pentecostés eejatkat soʼu tü juyakat 33 wainma wayuu aapajakana tü pütchi nüküjakat Pedro. Judío naya chejeʼewalii Ponto, palaajeeruʼusü shia sünain Asia Menor (Aluw. 2:9). Noʼutku naya wayuukana naküjain tü pütchi naapakat, naleʼejapa noumainpaʼamüin. Tü palajatü karaloʼuta nüshajakat Pedro nuluwataain namüin na anoujashii chajanakana sainküin tü mmakat Ponto (1 Ped. 1:1).g Jaʼyasü saaʼu tü nüshajakat Pedro shapaain naaʼin na anoujashiikana sutuma sülatüin wainma kasa namüin (1 Ped. 1:6). Eesüjaʼa napüleeruaanüle aaʼin saaʼujee nanoula.

Sünainjee tü karaloʼuta nuluwataakat Plinio el Joven nümüin Trajano chi sülaülakai Roma, wayaawata aaʼu müliain atumawaa na anoujashiikana chaa Ponto. Aluwataashi Plinio saaʼu Bitinia otta Ponto chaa Roma. Nüküjain Plinio soʼu juyakat 112 So.W. Müin na anoujashiikana maʼaka saaʼin wanee ayuulii oʼttaka sünain wayuu süpüshuaʼa. Nuchuntuin namüin na anoujashiikana naküjainjanain nnojoluin neʼraajüin Cristo, oʼutuna aaʼinchi chi eekai nnojoluin naaʼinrüin tia. Ajütüna achikichii chi eekai nuʼulejüin Cristo, nuʼuraajüin namüin na wane maleiwayaashiikana otta sümüin niyaakua Trajano. Niyaawataka Plinio nnojoleerüin naaʼinrüin tia na shiimainshiikana anoujain nünain Cristo.

g «Anoujashii sainküinka tü mmakat» naya münakana amüin na judío eejanaka sainküinpünaa tü mmakat. Sünainjee tia, wayaawatüin saaʼu judíoin na palajana wayuu oʼttakana sünain anoujaa nünain Cristo.

«Woutiisaiwa jia» (Aluwataaushikana 2:38-47)

15. (1) ¿Jamüsü nünüiki Pedro namüin na jutkatüshiikana? (2) ¿Kasa naaʼinraka na wayuukana sutuma tia? (3) ¿Jamüshii keraaka süpüla woutiisaa watta naalii wayuu soʼu tia?

¹⁵ Anuu tü nümakat Pedro namüin na judíokana otta namüin na nnojoliikana judíoin eejanaka sünain tü Pentecostés soʼujatkat juyakat 33: «Anashii jiyaawajaale suulia jaainjala waneʼewai jukua, woutiisaiwa jia» (Aluw. 2:38). Woutiisashii maʼaka 3.000 wayuu soʼu tia. Eeshiijaʼa woutiisale naya shiroku laa chaa Jerusalén jee pejepünaa sünain.e ¿Woutiisamaatüshiicheʼe neʼe naya? Nnojo. Nnojotsü anain woutiisale wanee wayuu ekirajaakai sünain tü Bibliakat jee niale nüchon wanee wawala nnojorüle keraain naya. Soto waaʼin kamalain namüin na judíokana otta namüin na ekerotokana naʼakamüin sünain anoujaa woutiisakana soʼu tia naashajeʼerüin tü Nünüikikat Maleiwa. Napüshi naya na wayuu aneekünakana nutuma Maleiwa. Eeshii na antakana wattajee sünainmüin tia miʼiraakat. Nayaawatapa saaʼu niain aneekünüin Jesucristo nutuma Maleiwa kettaashii naya süpüla woutiisain jee naʼyataain nümüin Maleiwa namaa na oushikajaakana nüchiirua Cristo.

¿JARALII NA PROSÉLITOKANA?

Eejana «wayuu judío otta müshiʼiya wayuu nnojoliikana judíoin ekerotokana naʼakamüin na judíokana sünain anoujaa» aapajakana tü nümakat Pedro soʼunnaa tü Pentecostés eejatkat soʼu juyakat 33 So.W. (Aluw. 2:10).

Noʼutku na wayuu aneekünaka süpüla tü aʼyatawaa choʼujaakat maʼin nia Nicolás «wanee wayuu napüshi na nnojoliikana judíoin ekerotokana naʼakamüin na judíokana sünain anoujaa. Chejeʼewai nia Antioquía» (Aluw. 6:3-5). Nnojoishii judíoin na prosélitokana, ekerotushii naya naʼakamüin na judíokana sünain anoujaa. Müshii naya maʼaka naaʼin na judíokana naashin na wayuukana süka nanoujain nünain Maleiwa, oonooshii sümaa tü pütchi aapünakat nümüin Moisés, nayoutuin kamaleiwaseyaainjanain naya jee toolole naya, nachoteʼerüinjatü süta nakorolo. Napüshishii naya na israelitakana.

Taashipa atumawaa na judíokana Babiloniajee soʼu tü juyakat 537 Sü.W. wainma na judío nnojoliikana aleʼejüin Israelmüin. Ayatapejeʼe naya anoujain sünain tü nanoujatüjütkalia anain. Na wayuu kepiakana süʼütpünaa Israel jee wattapünaa sünain, anoujashii sünain tü nanoujakalü anain na judíokana. Nashin Horacio otta Séneca, piamashii wayuu ashajülii namaiwajana, wainma na wayuu anoujakana wanaa namaa na judíokana jee nashatüin nakuwaʼipa. Prosélito münüshii naya.

16. ¿Jamüsü watüjaka saaʼu nasülajüliin maʼin na anoujashii namaiwajanakana?

¹⁶ Naapüin naʼanasia Jehová namüin naya wayuukana. Müsü tü Bibliakat nachiki: «Nayasaʼa na wayuu ekerotokana sünain anoujaa, kottushii naya otta nasülajiraain wanee kasa eekai namaʼanain. Noiküin tü kasa eejatkat namaʼana sümaʼaleeya noumain süpüla neitajüin tia nakaaluʼu na nawalayuukana, wanaapünaa sümaa tü kasa choʼujaakat namüin» (Aluw. 2:44, 45).f Maaʼulu yaa nashatüin na wawalayuukana nakuwaʼipa naya anoujashiikana sünain nasülajüliin maʼin.

17. ¿Kasa naaʼinrajatka wanee wayuu süpüla woutiisain nia?

¹⁷ Süpüla naapüinjachin naaʼin wanee wayuu nümüin Maleiwa jee woutiisainjachin nia naaʼinrajatü waneirua kasa pansaa sümaa tü sümakat tü Bibliakat. Ekirajaainjachi nia sünain tü Bibliakat (Juan 17:3). Kanoulainjachi jee ayaawajaainjachi suulia naainjala mojuinjatü naaʼin saaʼujee tü kasa mojusü naaʼinrapuʼukat (Aluw. 3:19). Nuuʼulaainjatü suulia tü kasa mojusü naaʼinrapuʼukat jee naaʼinrajatü tü nüchekakat Maleiwa (Roma 12:2; Éf. 4:23, 24). Süchikijee naaʼinrüin tia oʼuraajüinjachi nümüin Maleiwa süpüla naapüinjatüin naaʼin jee woutiisainjachi nia (Mat. 16:24; 1 Ped. 3:21).

18. ¿Kasa neʼreetka na wayuu woutiisakana?

¹⁸ ¿Paapüitpa paaʼin nümüin Jehová jee woutiisaichipa pia? Paaʼinrüitpale tia, talata paaʼin sünain aʼyatawaa nümüin Maleiwa. Nükaalinjeechi pia Maleiwa maʼaka nükaalinjain na nikirajüinkana Jesús süpüla püküjain maʼin pütchi nüchiki otta paaʼinrüin tü nüchekakat.

a Paashajeʼera tü pütchikat: «Jerusalén, eere noʼunuin na judíokana süpüla aʼwaajaa maleiwa».

b Paashajeʼera tü pütchikalüirua «Roma, tü mma miyoʼusükat»; «Judío kepiakana Mesopotamia otta Egipto» otta «Anoujashii kepiakana Ponto».

c Süntapa tü nüpülainkat Maleiwa naaʼu na nikirajüinkana Jesús müsü shia aka saaʼin siki.

d Paashajeʼera tü pütchikat «¿Jaralii na prosélitokana».

e Nnojotpejeʼe shiain neʼe tia tü woutiisakalü oʼu watta saalii wayuu. Jamüsüjaʼa chaa Kiev Ucrania, akoosütoʼu 7 soʼu 1993, woutiisashii maʼaka 7.402 wayuu suluʼu aipirua piscina. Sünain wanee outkajawaa miyoʼu eere nantüin wawalayuu sainküinjeejanaka mma. Piama oora woutiisaka oʼu naya.

f Aainjünüsü tia süpüla nakaalinjünüin na jekenakana anoujain süpüla saapüinjatüin tü choʼujaakat namüin süpüla eeinjatüin nakalia Jerusalén shiiʼiree nekirajaain sooʼomüin nüchiki Maleiwa. Asülajüshii naya süka naaʼin namüiwaʼa nnojotsü naainjain tia mojusheeka (Aluw. 5:1-4).