Waneepiashi wamaa Jeʼwaa otta nülatirüin woulia waainjala

1, 2. (1) ¿Jamüshii aika wapüla na waʼaleewainyuu eekana wamaa waneepia otta alatirakana woulia waainjala? (2) ¿Jarat tü apünüinsü pütchi wekirajaainjatkalü anain?

¿KASA naaʼinraka wanee wayuu müleka shiimainre paʼaleewain nia? Müsü sünüiki wanee wawala: «Saaʼin tamüin, müleka shiimainre aleewain wamaa wanee wayuu, eeshi nia wamaa waneepia otta nülatirüin woulia waainjala». Aishii maʼin wapüla na waʼaleewainyuu eekana wamaa waneepia otta alatirakana woulia waainjala. Anasü waaʼin namaa otta weʼrüin alin waya napüla (Prov. 17:17).

² Niaʼala neʼe Jeʼwaa chi Waʼaleewain eekai wamaa waneepia otta nülatirüin woulia tü waainjalakat. Müsü tü Wiwüliakat: «Süka anamiain pia Jeʼwaa otta pücheküin pülatirüin suulia wayuu tü saainjalakat. Yaataayaai püpüla naalii na wayuu aʼwaajakana pia.» (Sal. 86:5, NM). ¿Kasa sünainpünaaka eein wamaa waneepia wanee wayuu otta nülatirüin woulia waainjala? ¿Kasa niiʼiyataka aka shia Jeʼwaa? ¿Kasa waaʼinrajatka süpüla washatüin nukuwaʼipa? Watüjaale saaʼu tü aküjünakat shiʼipajee tia apünüinsükat pütchi, aijeechi maʼin wapüla Jeʼwaa otta aleeweena maʼin waya namaa na wawalayuukana (1 Juan 4:7, 8).

EESHI JEʼWAA WANEEPIA SÜMAA WAYUU

3. ¿Kasa sünainpünaaka eein wamaa waneepia wanee wayuu?

³ ¿Kasa sünainpünaaka eein wamaa waneepia wanee wayuu? Nükaaliinjüin waya waneepia; nnojoishii niyüülajüin waya jaʼitairü mojukuwaʼipalüin wakuwaʼipa. Nnojoishi eein wanee wayuu makai aka naaʼin Jeʼwaa; eeshi nia wamaa waneepia (Alat. Map. 16:5, NM).

4, 5. (1) ¿Kasa niiʼiyataka aka Jeʼwaa eein nia waneepia sümaa wayuu? (2) ¿Jamüsü sütütüleʼeraka waaʼin eein Jeʼwaa namaa na aʼyataakana nümüin?

⁴ ¿Kasa niiʼiyataka aka Jeʼwaa eein nia waneepia sümaa wayuu? Matüjüinsalii niyüülajaa Jeʼwaa na wayuu aʼyataakana nümaa. Niʼrüin David, eein Jeʼwaa waneepia nümaa (paashajeʼera 2 Samuel 22:26). Niʼrüin David nükaaliinjünüin otta naaʼinmajünüin nutuma Jeʼwaa wanaa sümaa saainjüneein kasa mojusü nümüin (2 Sam. 22:1). ¿Jamüshi eeka Jeʼwaa waneepia nümaa David? Süka eein David waneepia nümaa Jeʼwaa. Anasü maʼin nümüin Maleiwa ayatüle eein waneepia nümaa na aʼyataakana nümüin otta nnojoleechi wattaluʼuin nia noulia (Prov. 2:6-8).

⁵ Atütülaasü waaʼin müleka jülüjüle waaʼin tü ashajünakat süchiki eein Jeʼwaa waneepia namaa na aʼyataakana nümüin. Müsü nünüiki wanee wawala kanüliakai Reed: «Atalatalaasü taaʼin sutuma taashajeʼerüin nüchiki Jeʼwaa wanaa sümaa nükaaliinjüin David suʼunnaa tü müliaa niʼrakat. Otta wanaa sümaa nuunjulaakuʼu nümüin nuulia Saúl, ayatshia eein Maleiwa nümaa. Atütülaasü taaʼin süka tatüjaain saaʼu eejeechin Jeʼwaa tamaa; jaʼitairü kasain alatüin tamüin. Shiajaʼa neʼe eeinjachin taya nümaa». Müshiʼiya wayakana, ¿aashimüin? (Roma 8:38, 39).

6. (1) ¿Kasa maa niiʼiyataka aka Jeʼwaa eein nia waneepia sümaa wayuu? (2) ¿Kasa watüjaaka aaʼu sutuma naaʼinrüin waneepia tü nümakat?

⁶ ¿Kasa maa niiʼiyataka aka Jeʼwaa eein nia waneepia sümaa wayuu? Shia wanaa sümaa naaʼinrüin waneepia tü nümakat. Müshi nia wamüin: «Jaʼitaichi laülaain wanee wayuu, tayaʼaya neʼe Maleiwakai waneepia» (Is. 46:4, NM). Tü nüneekakat Jeʼwaa, pansaasü shia sümaa tü nümakat süchiki wanee kasa (Mal. 3:6). Nnojoishi alaain nia, nikeraajüin tü nümakat (Is. 55:11). Süpüla anainjatüin wakuwaʼipa naashin Jeʼwaa, oonooinjana waya nümaa. Watüjaa aaʼu nikeraajeerüin tia nümakat süka matüjüin nia aküjaa alawaa (Is. 48:17, 18).

WASHATA NUKUWAʼIPA JEʼWAA

7. ¿Kasa waaʼinrajatka süpüla washatüin nukuwaʼipa Jeʼwaa?

⁷ ¿Kasa waaʼinrajatka süpüla washatüin nukuwaʼipa Jeʼwaa? Wakaaliinjüinjana na wayuu eʼrakana müliaa (Prov. 3:27). Waapüle nüchiki wanee wawala mojukai aaʼin sutuma ayuulin nia, müliain sutuma nüpüshi jee shiale saalin kaainjalain nia, anasü watütüleʼerüle naaʼin sükajee wanee pütchi analuʼut (Zac. 1:13.)a Waainjüle tia, weeʼiyateerü nümüin shiimain aleewain waya nümaa otta eein waya waneepia nümaa. Niʼreerü aishaatain nia wapüla (Prov. 18:24).

8. ¿Kasa waaʼinrajatka süpüla eein waya sümaa waʼwayuuse? ¿Kasa waaʼinrajatka süpüla eein waya namaa na wawalayuukana?

⁸ Washatüin nukuwaʼipa Jeʼwaa eere waya namaa na wayuu aikana wapüla. Kaʼwayuusere waya, nnojotsü kawalaʼatainjatüin watuma waʼwayuuse (Prov. 5:15-18). Müsüjeseʼe nnojoluin waainjüin wanee kasa akataleʼeraka waya suulia waʼwayuuse (Mat. 5:28). Eeshii waya namaa na wawalayuukana wanaa sümaa nnojoluin weperulajüin nachiki. Otta wayoukta achikirü waapajüin wanee perulaa nüchiki wanee wawala (Prov. 12:18).

9, 10. (1) ¿Jarai chi nnojolinjachikai wakatalaain oulia? (2) ¿Jamüsü eejeetka kaʼi kapüleeka oʼu wamüin oonowaa nümaa Jeʼwaa?

⁹ Nnojoishii waya akatalaainjanain nuulia Jeʼwaa; jaʼitairü kasain alatüin wamüin, eeinjana waya waneepia nümaa. Wacheküinjatü tü kasa nüchekakat otta walerajüinjatü tü kasa nülerajakat (paashajeʼera Salmo 97:10). Wanaawale waaʼin nümaa Jeʼwaa sünain süpüshuaʼa tü kasakalüirua, mapüleejeerü wamüin oonowaa sümaa tü nümakat wamüin (Sal. 119:104).

¹⁰ Watüjaa aaʼu eejeerüin kaʼi kapüleeka oʼu wamüin oonowaa nümaa Jeʼwaa. Maʼaka saaʼin tü alatakat namüin na wawalayuu kaʼwayuuseekana, eesüleʼe nnojorüle nantüin sünain tü wayuu pansaakat akuwaʼipa namaa (1 Cor. 7:39). Eesü süpüleeruaanüle aaʼin wanee wawala natuma na manoujüinsalii shiʼyataakana amaa süpüla nüchajaanüin chi suʼwayuuseinjachikai. Mayaainjeʼe keechiyeein shia, oonooinjatü nümaa Jeʼwaa. Aishii maʼin wapüla na wawalayuu makana akuwaʼipa. Wainmeerü kasa anasü neʼraka nutuma Jeʼwaa na wayuu oonookana waneepia nümaa mayaainjeʼe kapüleein shia namüin (Heb. 11:6).

NÜLATIRÜIN WOULIA WAAINJALA

11. ¿Kasa sünainpünaaka motuin naaʼin Maleiwa saainjala wayuu?

¹¹ Tü wanee nukuwaʼipakat Jeʼwaa shia nülatirüin woulia tü waainjalakat. ¿Kasa sünainpünaaka akuwaʼipaakat tia? Shia wanaa sümaa motuin waaʼin naainjala na wayuukana. Nnojotsiaaje machipünaain waaʼin tü aainjünakat wamüin, shiajaʼa neʼe nnojolin jashichikuʼu wamüin namüin na aainjakana wamüin wanee kasa mojusü. Saashin tü Wiwüliakat, nücheküin Maleiwa nülatirüin suulia wayuu tü saainjalakat (Sal. 86:5).

12. (1) ¿Kasa niiʼiyataka aka Jeʼwaa nülatirüin woulia waainjala? (2) ¿Jamaluʼulu nülanaain woulia Maleiwa tü waainjalakat?

¹² ¿Kasa niiʼiyataka aka Jeʼwaa nülatirüin woulia waainjala? Motoleesia naaʼin tü waainjalakat (Is. 55:7). Watüjaa aaʼu tia sünainjee tü sümakat wamüin tü Wiwüliakat (paashajeʼera Aluwataaushikana 3:19). Müshi Pedro namüin na wayuukana: «Jiyaawajaa jümata suulia jaainjala otta juuyantaa jümata nünainmüin Maleiwakai suulia tü kasa mojusü jaaʼinrakat». Niyaawajaale wanee wayuu suulia naainjala, mojusü naaʼin saalii tü naainjalakat otta nnojotsü naainjüin shia piantua (2 Cor. 7:10, 11). Ouyantaashi nia suulia naainjala wanaa sümaa nuuʼulaain suulia tü naainjalakat süpüla naainjüin tü nüchekakat Maleiwa. ¿Jameerü nakuwaʼipa na wayuu oonookana nümaa Pedro? Nülanaainjatü Maleiwa tü naainjalakat. Wanaa sümaa naainjüin Maleiwa tia, motoleesia naaʼin Maleiwa tü waainjalakat (Heb. 10:22; 1 Juan 1:7).

13. ¿Kasa nüküjeeka achiki Jeʼwaa wanaa sümaa nüküjüin moteerüin naaʼin tü waainjalakat?

¹³ ¿Jamüsü watüjaaka saaʼu motoleeinya naaʼin Maleiwa waainjala? Wekirajaa sünain tü nümakat Jeʼwaa süchiki tü pütchi nüpansaajakat namaa na anoujüshii aluwataainjanakana nümaa Kürisüto. Sünain pütchikat tia, aküjünüsü nülatirüin Maleiwa naainjala na eʼitaakana naaʼin sünain ouktüin Jesuu (paashajeʼera Jeremías 31:34). Müshi Jeʼwaa: «Nnojoleena süsalain naainjala tatuma süka moteerüin shia taaʼin». Nüküjüin wamüin Jeʼwaa müirüinya motuin naaʼin tü waainjalakat. Nnojotsü nüsoʼirakuʼu nümüin waaʼin sünain tü waainjalakat (Roma 4:7, 8).

14. ¿Jamüsü sütütülaaka waaʼin sutuma tü naainjakat Jeʼwaa süka waainjalakat? Püküja tü alatakat sümüin wanee wawala.

¹⁴ Amülialaasü waaʼin sutuma tü naainjakat Jeʼwaa süka tü waainjalakat. Anuu sünüiki wanee wawala ojuʼitinnaka paala: «Tatüjaa aaʼu nülatirüin toulia Maleiwa tü taainjalakat otta taküjüin shia namüin na waneeinnua. Akaisaʼa müin kaʼyatakai naaʼin toulia, saaʼin tamüin nnojotsü müin nukuwaʼipa namaa na waneeinnua». Atütülaasü saaʼin tü wawalakat sutuma saashajeʼerüin süchiki tü naainjakat Jeʼwaa süpüla motuin naaʼin saainjala tü wayuukalüirua. Müsü shia: «Teʼrüin aipüralin sümaa kamaneein Jeʼwaa». Antüsü suluʼumüin saaʼin pütchikat tüü: «Nnojotsü anain jülüjüle waaʼin ayateerüinya sotokuʼu müin naaʼin [Jeʼwaa] tü waainjalakat».b Müsü tü wawalakat: «Sotokuʼu müsü taaʼin nnojoluin motuin naaʼin Maleiwa tü taainjakat. Tatüjaa aaʼu kapüleein shia, akatsaʼa tarütkaain joo nünainmüin Jeʼwaa. Nnojoluitpa shapaain maʼin taaʼin». ¡Shiimainjaʼaya maʼin aipüralin Jeʼwaa otta motuin naaʼin tü waainjalakat! (Sal. 103:9.)

MOTO WAAʼIN SAAINJALA WAYUU MAʼAKA NAAʼIN JEʼWAA

15. ¿Kasa waainjüinjatka süka naainjala na wayuukana?

¹⁵ Eesü süpüla washatüin nukuwaʼipa Jeʼwaa wanaa sümaa motuin waaʼin naainjala na wayuukana (paashajeʼera Lucas 17:3, 4). Nülatirüin woulia Jeʼwaa tü waainjalakat, motoleesia shia naaʼin. Müinjatia wakuwaʼipa, walatirüinjatü saainjala wanee wayuu otta motoleeinjatia waaʼin.

16. (1) ¿Kasa sünainpünaaka motuin waaʼin saainjala wayuu? (2) ¿Kasa waaʼinrajatka süpüla nülatirüin woulia Maleiwa waainjala?

¹⁶ Wanaa sümaa walatirüin saainjala wanee wayuu, nnojotsiaajee shiain sutuma machipünaain waaʼin tü saainjalakat otta jooin waya süpüla wayuu. Sünainpünaasü nnojolin jashichikuʼu wamüin. Soto waaʼin nülatireerüin woulia Maleiwa waainjala müleka walatirüle naainjala na waneeinnua (Mat. 6:14, 15). Nütüjaa aaʼu Jeʼwaa kaainjaraliin waya (Sal. 103:14). Müinjatia neʼe wakuwaʼipa namaa na wawalayuukana otta motuinjatü waaʼin tü naainjalakat (Éf. 4:32; Col. 3:13.)

17. ¿Kasa waaʼinrajatka süpüla nnojoluin jashichikuʼu wamüin namüin na aainjakana wamüin kasa mojusü?

¹⁷ Watüjaa aaʼu kapüleein wamüin motuin waaʼin saainjala wayuu. Alatsü tia namüin na anoujüshii aluwataainjanakana nümaa Kürisüto (Filip. 4:2). ¿Kasa akaaliinjeenaka waya süpüla nnojoliin jashichin waya namüin na wawalayuukana naainjüle kasa mojusü wamüin? Wekirajaa sünain tü naainjakat Job. Aisü maʼin nümüin wanaa sümaa airuʼuluin nünüiki Elifaz, Bildad otta Zofar (Job 10:1; 19:2). Achiaanüshii naya nutuma Jeʼwaa otta aluwataanüshii naya nünainmüin Job (Job 42:7-9). Oʼuraajüinjachi Job naaʼu naya wayuukana. Anasü nukuwaʼipa Job nutuma Jeʼwaa süka motuin naaʼin naainjala na apünüinshiikana wayuu (paashajeʼera Job 42:10, 12, 16, 17). ¿Kasa shikirajaka anain waya tia? Nnojoleena jashichikuʼu müin waya namüin na aainjakana wamüin kasa mojusü müleka woʼuraajüle naaʼu.

KOJUTA MAʼIN WAMÜIN TÜ NUKUWAʼIPAKAT JEʼWAA

18, 19. ¿Kasa waaʼinrajatka süpüla kojutüin maʼin wamüin nukuwaʼipa Jeʼwaa?

¹⁸ Atütülaasü waaʼin sutuma wekirajaain sünain tü nukuwaʼipakalüirua Jeʼwaa. Wekirajaa achikirü kamaneein nia, nnojoluin koʼuin nukuwaʼipa sümüin wayuu, asülajülin nia, nnojolin macheʼein nia süchiirua tü nümakat, waneepiain nia wamaa otta nülatirüin woulia tü waainjalakat. Paliʼirü neʼe tü kasa watüjaakalü aaʼu süchiki nukuwaʼipa Jeʼwaa. Wattayülia saalin tü kasa wekirajaainjatkalü anain nüchiki (Ecl. 3:11). Pansaasü waaʼin sümaa tü nümakat Pablo: «Kekiishaatashi maʼi nia. Nütüjaa aaʼulu kasa süpüshua. Nnojotsü wayaawatüin aaʼu süpüshua tü kasa anasü naaʼinrakat». Kamalainsü maʼin wamüin tü aipiruasükat nukuwaʼipa Jeʼwaa otta aipüralin maʼin nia (Roma 11:33).

¹⁹ Anasü müleka kojutüle maʼin wamüin tü nukuwaʼipakat Jeʼwaa. Wainkeerü tia müleka wekirajaale sünain tü nukuwaʼipakat, jülüjüle shia waaʼin otta weeʼiyatüle shia suluʼu wakuwaʼipa (Éf. 5:1). Otta pansaajeerü waaʼin sümaa pütchikat tüü: «Aluʼusaʼa tayakai anasü tamüin arütkawaa nünainmüin Maleiwa» (Sal. 73:28, NM).