Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
NOWIENPÜROʼU 5-11
KOROLO KOJUTUSÜ SULUʼUKA TÜ WIWÜLIAKAT | JUAN 20,21
«¿Alanaʼaleesü taalin püpüla suulialeʼeya tüüirua?»
(Juan 21:15-19, TNM) Süchikijee nekaain, nümakalaka Jesuu nümüin Simón Pedro: «Simón nüchonkai Juan, ¿aishi taya püpüla suulialeʼeya tüüirua?». «Aa, pütüjaa aaʼu sülanaʼaleein paalin tapüla» nümaka Pedro nümüin. «Anashii paaʼinmajüle na taʼanneetsekana» nümaka Jesuu nümüin. 16 Nümaka süchikuaʼa nümüin: «Simón, nüchonkai Juan, ¿aishi taya püpüla?». «Aa, pütüjaa aaʼu sülanaʼaleein paalin tapüla» nümaka Pedro nümüin Jesuu. «Anashii paaʼinmajüle na taʼanneetsecheinkana» 17 Apünüintuaichi joo nüsakirüin Jesuu: «Simón, nüchonkai Juan, ¿alanaʼaleesü taalin püpüla?». Mojukalaka naaʼin Pedro saaliijee nüsakinnüin apünüintua. Nümakalaka nümüin Jesuu: «Senyotkalee, pütüja aaʼu kasaka süpüshuaʼa, pütüjaa aaʼu sülanaʼaleein paalin tapüla». «Anashii paaʼinmajüle na taʼaneetsecheinkana» nümaka Jesuu nümüin. 18 Tamüshi paala pia, jimaʼaiwaʼaya pia oʼunüshi pia eepünaa puʼuneein, akaisaʼa laülaapa pia, apataaneechi pia sutuma wayuu otta amaaneechi pia eemüin nnojoluin pücheküin. 19 Müsü nünüiki Jesuu nümüin Pedro süpüla naapirüinjachin nia süchiki jamüinjatüin nukuwaʼipa sünain outaa mapa. Shiasaʼa joo süchikijee, nümaka nümüin: «Ayataa tamaain pia waneepia».
nwtsty-E pütchi suluʼujeejatü tü Wiwüliakat süchiki Jn 21:15, 17, TNM
nümakalaka Jesuu nümüin Simón Pedro: Yootiraashi Jesuu nümaa Pedro maʼaka jeʼra kaʼi süchikijee nuunjulajüin apünüintua Pedro süchiki niʼraajüin Jesuu. Asakinnüshi Pedro apünüintua nutuma Jesuu müleka aire nia nüpüla, mojusü naaʼin Pedro sutuma nüsakirüin nia Jesuu apünüintua (Jn 21:17, TNM). Suluʼu Juan 21:15-17 eʼitaanüsü piamasü pütchi griego, tü palajatkat shia agapáo, aire wayuu wapüla maluʼulu, tü wane pütchikat shia filéo, tia shia sülanaʼalere saalii wayuu. Piantua nüsakinnüin Pedro nutuma Jesuu «¿aishi taya püpüla?». Piantua «aa» nümüin Pedro nümüin otta nüküjain shia süka naaʼin. Nüsakitka nia Jesuu: «¿Alanaʼaleesü taalin püpüla?». «Aa» nümaka Pedro nümüin. Kojuyatua nüküjain Jesuu nümüin Pedro niiʼiyatüinjatü naalin nüpüla nikirajüle otta naaʼinmajüle na anoujashiikana, na makana aka saaʼin naʼanneetse Jesuu (Jn 21:16, 17, TNM; 1Pe 5:1-3, TNM). Sükajee tü naaʼinrakat Jesuu, nuuʼulaain nüküjain Pedro apünüintua nümüin alin maʼin nia nüpüla otta naapaleein wanee aʼyatawaa nümüin: nükaaliinjainjanain na anoujashiikana süpüla ichein nanoula. Niyaawatüin aaʼu Pedro motuin naaʼin Jesuu naainjala.
¿aishi taya püpüla suulialeʼeya tüüirua?: Eesü wainma kasa süküjeeka achiki pütchikat tüü suluʼu griego. Eeshii noʼutku wayuu atüjakana süpüleerua Wiwülia makana anain sülatinnüle tia pütchikat mayaa: «¿Aireeshia taya püpüla noulialeʼeya na wane tekirajüinkana?» jee shiale «¿aireeshia maʼin taya püpüla suulialeʼeya taalin napüla na wanee tekirajüinkana?». Eesüjaʼa shiale pansaain müle sülatiria mayaa: «¿Aishi taya püpüla suulialeʼeya kasakalüirua tüü?». Tia kasakalüirua nümaka Jesuu shia tü niʼyataainkalü Pedro. Müshi nümakai Jesuu nümüin: «Airejeʼe taya püpüla suulialeʼeya korolo otta oʼunaa süchiirua washirüü, anashi mata pikirajüle na puwalayuukana». Süka nulojulin jime Pedro, pansaasü sümaa nukuwaʼipa tia nüsakitkat anain Jesuu. Mayaainjeʼe kakaliain nia sünain oʼunaa nüchiirua Jesuu (Jn 1:35-42), nnojoishi ooʼulamaatüin nia suulia ejimejaa, müshijeseʼe nümüin Jesuu mapa nümüin nuuʼulaainjachin suulia tü aʼyatawaa anakat maʼin nümüin süpüla nukotchajüinjatüin wayuu süpüla sunoujainjatüin (Mt 4:18-20; Lu 5:1-11). Süchikijee outuin Jesuu, oʼttüshi nüchikuaʼa Pedro otta na waneinnua sünain olojoo jime (Jn 21:2, 3). Müshijeseʼe nüküjain Jesuu nümüin Pedro nüneeküinjatü tü kasa palajanainjatkat nutuma. ¿Nüneeküinjatche tü aʼyatawaa kamalainkat maʼin nümüin? ¿Shiataapa nüneeküin nükaalinjain na anoujashiikana süpüla ichein nanoula? (Jn 21:4-8).
Apünüintuaichi: Apünüintua nuunjulajüin Pedro süchiki niʼraajüin Jesuu, sükajee tü naaʼinrakat Jesuu, nuuʼulaain nüküjain Pedro apünüintua nümüin alin maʼin nia nüpüla. Apünüintua nüküjain Jesuu nümüin shiainjatüin palajanain nutuma tü kasa sünainpünaakat aʼyatawaa nümüin Maleiwa. Ekirajünüshii na anoujashiikana nutuma Pedro otta natuma waneinnua anoujashii, natütüleʼerüin naaʼin, otta naaʼinmajüin naya. Mayaainjeʼe aneekünüin naya anoujashiikana süpüla chain naya iipünaa choʼujaasü namüin süchechennüin nanoula (Lu 22:32).
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Jn 20:17
Nnojo pajapuluʼujain taya: Tü pütchi griego háptomai eesü maluʼurule «epettaa» jee shiale «aʼalijaa». Eesü müle sülatiria mayaa suluʼu waneirua Wiwülia: «Nnojo pipettüin taya». Nnojotpajaʼa mojuin nümüin Jesuu nipettünüin sutuma María Magdalena, nnojotsü mojushiin nümüin saapaanüin nuuʼui sutuma waneinnua jieyuu süchikijee süsoʼiraain naaʼin (Mt 28:9). Eesüjaʼa shiale jülüjain saaʼin María Magdalena nuʼunajachitchin Jesuu iipünaamüin. Süka alin maʼin Jesuu süpüla saʼalijain nia suulia nuʼunüin. Süka nnojoluinjachin nuʼunüin Jesuu nümaka sümüin María: «Nnojo pajapuluʼujain taya [...]. Shia anaka aluʼu müleka puʼunüle eemüin na tawalayuukana süpüla püküjainjatüin tanüiki namüin».
nwtsty-E pütchi suluʼujeejatü tü Wiwüliakat süchiki Jn 20:28
chi Tasenyotsekai, chi Tamaleiwasekai: Tia maluʼulu «chi Senyot tamüinkai otta chi Maleiwa (ho theós) tamüinkai». Naashin noʼutku waneinnua atüjashiikana süpüleerua Wiwülia, tia shia nünüiki wanee wayuu ponokai aaʼin Jesuu. Mayaapejeʼe süküjünüin tia pütchikat nuʼupala Jesuu nia kamüinjachika shia Maleiwa, chi Nüshikai Jesuu. Eepajaʼa na makana nümüinjatüin Jesuu tia pütchikat. Mülejeʼe shia, pansaainjatü sümaa tü waneirua pütchi eʼitaanakat suluʼu tü Wiwüliakat. Müsü paala nünüiki Jesuu sümüin María: «Aleʼejeechi taya nümaʼanamüin chi Tashikai, chi Jüshikai wanaa tamaa, nümaʼanamüin chi Tamaleiwasekai, chi Jümaleiwasekai wanaa tamaa». Müshiijeseʼe nnojoluin wamüinjanain shiain jülüjain naaʼin Tomás niain Jesuu chi Maleiwa pülashikai (pütchi suluʼujeejatü tü Wiwüliakat süchiki Jn 20:17). Naapüin Tomás nünüiki Jesuu wanaa sümaa nuʼuraajüin nümüin chi Nüshikai otta «taata» jee «Maleiwa shiimainshikai» nümüin nümüin (Jn 17:1-3, TNM). Eesüjaʼa müle nünüiki Tomás süka müin aka naaʼin maleiwa Jesuu nümüin niakai, nnojoitpajaʼa niain chi Maleiwa pülashikai (pütchi suluʼujeejatü tü Wiwüliakat süchiki Juan 1:1). Eesüjaʼa wanaawale nünüiki Tomás sümaa tü namakat waneinnua anoujashii namüin na aapieekana nüjütaka Maleiwa, aküjünüsü nachiki suluʼu tü pütchi Ashajuushikat süka Hebreo. Eeshijaʼa nütüjaale saaʼu Tomás süchiki waneirua pütchi eere naashajaain na wayuukana namaa na aapieekana, sümaa müin naashajaakai aaʼin nümaa Jeʼwaa (anasü paashajeʼerüle Gé 16:7-11, 13; 18:1-5, 22-33; 32:24-30; Jue 6:11-15; 13:20-22). Eeshijaʼa «chi Tamaleiwasekai» nümüin Tomás nümüin Jesuu, süka nütüjaain aaʼu niain chi nuluwataalakai Maleiwa.
Eeshii na makana niain aküjünüin achiki chi Maleiwa pülashikai suluʼu wetsiikulokot tüü, sutuma tü pütchi eʼitaanakat süpülapünaa «Tasenyotsekai, otta «Tamaleiwasekai». Eepajaʼa süpüla shiʼitaanüin tia pütchikalüirua süka shiapuʼuin sukuwaʼipa süshajia wanee pütchi süka griego. Mayaainjeʼe nujuʼitirüin Tomás tia pütchikat, nnojotsü jaʼyain sükajee tia kasain jülüjain naaʼin soʼu nüküjain tia.
NOWIENPÜROʼU 12-18
KOROLO KOJUTUSÜ SULUʼUKA TÜ WIWÜLIAKAT | ALUWATAAUSHIKANA 1-3
«Naapüin Jeʼwaa chi naaʼinkai namüin na anoujashii namaiwajanakana»
w86-S 1/12 süp. 29 püt. 4, 5, 7
Talateena maʼin waya wasülajüle süka süpüshuaʼa waaʼin
Soʼujeʼereʼeya maʼin sukumajaain sukuwaʼipa tü anoujaa shiimainsükat soʼu tü juyakat 33 So.W., ayatüshii na 3.000 anoujashii jekenakana woutiisain «sünain tü aashajawaakat nümaa chi Maleiwakai otta ayatshii naya sünain tü okolochojowaakat süpüla jutkataa sünain ekawaa». ¿Kasapülajatü naaʼinraka tia? Süpüla nachechejiraainjatüin naaʼin otta ayatüin naya sünain aapajaa tü nekirajakat anain naya na aluwataaushiikana (Aluwataaushikana 2:41, 42).
Na judíokana otta na nnojoliikana judíoin, antüshii neʼe naya jerusalénmüin süpüla tü miʼiraa kanüliakat Pentecostés. Na jekenakana ekerotuin sünain anoujaa makatüshii naya Jerusalén wainma kaʼi süpüla kooʼomüinjatüin nanoula. Makalaka kapüleejaain namüin na chajanakana Jerusalén, naapüin neküin namüin napüshuaʼa na nawalayuukana otta eeinjanale natunküin. Naʼakajee na antüshiikana eejana na ajaʼlajaakana nanneetse otta eejana na wainmakana kasa namaʼana. Aʼiniraashii naya nanneetse süpüla nakaaliijain na alatakana amüin choʼujawaa (Aluwataaushikana 2:43-47).
Noiküin na anoujashiikana kasa eeka namaʼana otta nakaalinjain süka na nawalayuukana, naaʼinrüin tia süka naaʼin namüiwaʼa. Nnojoishi jaralin apüleeruain naaʼin süpüla nasülajüinjanain wanee kasa otta nnojoishii joo maʼletsereein naya sutuma nasülajüin. Süka neʼrüin na nawalayuukana sünain müliain naya, na eekana amaʼana, noiküin noumain otta nakorolo süpüla napaajiraain tü süliakat naka waneʼewai nakua na choʼujaakana amüin. Naaʼinrüin tia süpüleerua Nuluwataaya Maleiwa (anasü paashajeʼerüle 2 Corinto 8:12-15).
Püchajaa süchiki kaaʼürüi suluʼu tü Wiwüliakat
it-2-S süp. 88 püt. 1
Jesucristo
«Chi katakai atüma soʼu wayuu». Sükajee anain shia nümüin chi Nüshikai, naapajiraain nikii Jesuu naaʼu na wayuukana. Sünainjee tü naaʼinrakat, eeinapa süpüla anajiraain nümaa Maleiwa na anoujashii aneekünakana nutuma süpüla aluwatawaa nümaa Jesuu chaa iipünaa otta sükajee tü naaʼinrakat eeinjana na katüinjanakana noʼu waneepia saaʼu tü mmakat (Mt 6:10, TNM; Jn 3:16, TNM; Éf 1:7; Heb 2:5; paashajeʼera RESCATE). Müshijeseʼe niain Jesuu «chi katakai atüma soʼu wayuu [«nüchon chi Aluwataashikai», ENP; Ga; NC, 1981; Besson; «Aneeküshi», BC]» süpüshuaʼa (Alu 3:15). Tü pütchi griego sülatinnaka anainjee tü pütchikat «chi aneekünüshikai palajana», meematüsü aka saaʼin tü pütchi aküjünakat nüchiki Moisés (Alu 7:27, 35) wanaa sümaa sümünüin niʼitaanüin «süpüla aluwatawaa» saaʼu Israel.
NOWIENPÜROʼU 19-25
KOROLO KOJUTUSÜ SULUʼUKA TÜ WIWÜLIAKAT | ALUWATAAUSHIKANA 4, 5
«Ayatüshii naya aküjain pütchi sümaa meimmoluin naaʼin»
w08-S 1/9 süp. 15, pütchi süttaka
Aapajünapuʼusü neʼe tü pütchikat otta mapa eesü tü nünüikikat Maleiwa: Tü pütchi ashajuushikat otta na anoujashii namaiwajanakana
¿Matüjainsaliiche eera karaloʼuta na Aluwataaushiikana?
Müsü sünüiki tü Wiwüliakat nachiki na aluwataaliikana otta na laülaashiikana chaa Jerusalén: «Neʼrapa Pedro otta Juan sünain aashajawaa sümaa nnojolin mmotkai naaʼinrua otta neʼrüin naya sünain wayuuin mekirajaainsalii sünain karaloukta otta sünain wayuuin wayuwaʼata naya, ainkuusü maʼi naaʼinrua» (Aluwataaushikana 4:13). Tü pütchikat «mekirajaainsalii» makat, suluʼu alijunaiki wanaapünaasü sümaa nukuwaʼipa wanee wayuu matüjainreekai süpüleerua karaloʼuta. ¿Müsüche nakuwaʼipa na aluwataaushiikana? Anuu sünüiki wanee pütchi nashajala na atüjaka süpüleerua Wiwülia: «Tü namakat na laülaashiikana, nnojotsü pansaain sümaa nakuwaʼipa na aluwataaushiikana, jamüshijaʼa Pedro eeshijaʼa nütüjale aashajeʼeraa karaloʼuta otta nikirajaale sünain karaloʼuta otta nütüjale ashajaa [müsia neʼe nukuwaʼipa Juan]. Tü namakat shia süka naatain maʼin nakuwaʼipa na aluwataaushiikana noulia na aluwataaliikana otta na laülaashiikana» (The New Interpreterʼs Bible).
w08-S 15/5 süp. 30 püt. 6
Pütchi anaka maʼin sünainjee tü karaloʼutakat Aluwataaushikana
4:13 ¿Matüjainreʼesaiche eera süpüleerua karaloʼuta Pedro nümaa Juan? Nnojo, wayuu «mekirajaainsalii sünain karaloukta» münüshii naya süka nnojoluin nekirajünüin suluʼu tü eʼikülee eere nekirajünüin na judíokana.
it-1-S süp. 160 püt. 7
Aluwataaushiikana
Naʼyataaka anain na anoujashii namaiwajanakana. Atütülaasü maʼin naaʼin na aluwataaushiikana sutuma naapüin Jeʼwaa chi naaʼinkai namüin soʼu tü miʼiraa kanüliakat Pentecostés. Suluʼu Aluwataaushikana kapiitulo waneesia sünainmüin kapiitulo jaʼrai aküjünüsü süchiki yalayalain maʼin naaʼin na aluwataaushiikana sünain aküjaa pütchi otta aküjaa süchiki nüsoʼiraain aaʼin Jesuu. Ayatüshii naya aküjain pütchi mayaainjeʼe nasürünnüin suluʼu kaatset, naʼyaatünüin otta noʼutüneein aaʼin natuma na sülaülashiikana mma. Süchikijee tü miʼiraa kanüliakat Pentecostés, aʼyataashii maʼin na aluwataaushiikana nükajee chi naaʼinkai Maleiwa otta kooʼomüinkalaka maʼin na wayuu ekerotokana sünain anoujaa (Alu 2:41; 4:4). Chapuʼushii naya palajana aküjain pütchi Jerusalén otta mapa oʼunüshii naya samariamüin otta süchikijee sainküinpünaa mmaka süpüshuaʼa (Alu 5:42, TNM; Alu 6:7; 8:5-17, 25; 1:8).
Püchajaa süchiki kaaʼürüi suluʼu tü Wiwüliakat
it-2-S süp. 662 püt. 4
Tü ipa jaʼijaasükat
Müsü sünüiki Salmo 118:22: «Tü ipa nayoutakat na akumajüliikana, shia tü ipa jaʼijaasükat» (heb. roʼsch pin·náh). Aashajaashi Jesuu süchiki tia pütchikat otta nüküjain niain niakai tü «ipa jaʼijaasükat» (gr. ke·fa·lḗ gō·ní·as, tü ipa jaʼijaasükat). (Mt 21:42; Mr 12:10, 11; Lu 20:17). Maʼaka saaʼin tü ipa shikiisükat wanee miichi, müsia nukuwaʼipa Jesuu, nia nekiipüʼü na anoujashiikana chainjanakana iipünaa, naya anoujashiikana müshii suluʼukai naaʼin wanee piichi aʼwaajülee Maleiwa. Wanaawasü tü nümakat Pedro sümaa sünüiki Salmo 118:22, naashin niakai, nia Jesuu «tü ipa ayouktünakat natüma na akumajüliikana miichi» otta nia «anakai süpüla akumajaa tia miichikat» (Alu 4:8-12; paashajeʼera 1Pe 2:4-8).
w13-S 1/3 süp. 15 püt. 4
Aküjashi naʼalain Pedro otta Ananías. ¿Kasa watüjaka sünainjeʼe tü nakuwaʼipakat?
Aküjashi naʼalain Ananías sümaa tü nuʼwayuusekat, noiküin wanee mma namaʼanajatü süpüla napaajiraain tü süliakat naka na nawalayuukana. Niasaʼa Ananías nüküjain namüin na aluwataaushiikana naapüin süpüshuaʼa sülia tia mma noikakat, nanaajaapejeʼe süpüshi tia nneetkat. Niiʼiyatüin Jeʼwaa nümüin Pedro alawaain nünüiki Ananías, nümakalaka Pedro nümüin: «Nnojoishii wayain neʼe püküja amüin paʼalain, aküjashi pia paʼalain nümüin Maleiwakaʼiya». Wanaa sümaa naapüin nünüiki Pedro, nujuttakalaka Ananías sünain outaleʼeinya nia. Maʼaka apünüin oora süchikijee outuin Ananías, antüsü tü nuʼwayuusekat, otta süküjaka saʼalain maʼaka naaʼin chi suʼwayuusekai, outakalaka shiaʼaya.
Wetsiikulo aashajeʼennajatka
(Aluwataaushikana 5:27-39, TNM) Jee antinnüshii naya namülatuʼumüin na laülaayuu suluʼukana tü kanüliakat Sanedrín. Nümakalaka chi laülaashikai napüleerua na sacerdotekana namüin: 28 «Aashin wapülajüin juulia ayatüinjanain jia aashajaain nüchiki Jesuu. Shialeeitpaʼa neʼe joutka sainküin Jerusalén tü jikirajakat anain. Jee joʼoteein waaʼu wasirüin nuʼutunuin aaʼin chi wayuu jaashajaakai achiki». 29 Nusoutaka joo Pedro otta na wane aluwataaushiikana: «Alanaʼaleesüjaʼa sünain niainjachin woonooin amaa anüiki Maleiwa suulialeʼeya sünüiki wayuu. 30 Chi Maleiwakai, Namaleiwasekai na watuushinuukana, nüsoʼira aaʼinchi Jesuu süchikijee outaa, chi jükacherirakai sünain wunuʼu. 31 Jee ayalereʼennüshi nia nutuma Maleiwa süpüla joyotuin nikialuʼujee süpüla niainjachin Chi Katakai atuma soʼu wayuu otta nuʼtteʼerüin na wayuu israelkana suulia saainjala. 32 Aküjashii waya pütchi süchiki tüü, süka weʼrajüin sukua otta maʼayaka neʼe naaʼin chi Naaʼinkai Maleiwa aküjashii waya süchiki, chi naapakai joo Maleiwa namüin na oonookana sümaa nünüiki». 33 Nayasaʼa na laülaayuukana, aashichijaashii naya nooʼomüin na aluwataaushiikana sutuma tü namakat. Noʼuteekalaka naaʼin sünainjee. 34 Jee yala naʼakajee na laülaayuukana eejachi wanee wayuu kanüliashi Gamaliel, napüshi na fariseokana. Wayuu ekirajüi nia sünain tü karaloʼuta nüchikimaajatkat Maleiwa otta kojutushi nia sutuma wayuu. Niasaʼa niakai, nuchuntaka nojuʼitinnüin na aluwataaushiikana. 35 Nümaka joo namüin na yalajanakana nümaa: «Wayuuinnua, nuuʼuliwoʼukana Israel, jalia neʼe jiajeʼe. Anasü müleka jütüjaale maʼin saaʼu tü jaaʼinreekat naka naya wayuukana. 36 ¿Süka jamüin? Jekenainkat, oʼttüshi Teudas sünain aküjaa süchiki laülawaa saaʼu wayuu. Jee eejana maʼaka 400 wayuu nümaajana, otta nuʼutunapa aaʼin Teudas, aʼwalakajaayaa müshii na nümaajanakana, motokoloko naya aaʼinyuu. 37 Otta mapa nüchikijee Teudas, eweeta müshia Judas, chi galileajeʼewaikai, suʼunnaa sükalia süshajünüin sünülia tü wayuukalüirua süpüshuaʼa. Kojuya müsia wayuu nümaajana. Outapa nia, aʼwalakajaayaa müshii na nümaajanakana. 38 Tamüshii paala jia: Anashii nnojoliire jipettüin naya wayuukana, (müleka sünainjeejatüle neʼe wayuu tü kasa naaʼinraka, ajaʼlajaajeerü neʼe. 39 Akaajasaʼa müleka nünainjeejatüle shia Maleiwa, nnojoleerü juuntüin jajaʼlajeʼerüin shia), jalia neʼe jia suulia jütkaʼayaalain nümaa Maleiwa».
NOWIENPÜROʼU 26-TISIENPÜROʼU 2
KOROLO KOJUTUSÜ SULUʼUKA TÜ WIWÜLIAKAT | ALUWATAAUSHIKANA 6-8
«Ooʼulakünüsü naaʼin na anoujashii namaiwajanakana»
bt-S süp. 41 püt. 17
«Alanaʼaleesüjaʼa sünain niainjachin woonooin amaa anüiki Maleiwa suulialeʼeya sünüiki wayuu»
17 Eejiraainjanapejeʼe na anoujashiikana sümaa wanee kasa alataka namüin. ¿Kasa wayuu tia? Soto waaʼin makatüin wainma kaʼi Jerusalén na jekenakana sünain anoujaa süpüla kooʼomüinjatüin nanoula. Süka neʼrüin na nawalayuukana müliain naya, asülajüshii nneerü süpüla nakaalinjain naya sünain tü choʼujaakat namüin (Aluw. 2:44-46; 4:34-37). Sutuma müin nakuwaʼipa, alatüsü wanee kasa amojujeʼeraka nakuwaʼipa: na jieyuu outakana aʼwayuuse «ashajaasükalüirua pütchi hebreo» asülajünawaisü namüin eküülü otta müsia tü «aashajaasükalüirua pütchi griego» nnojotsü asülajünüin namüin (Aluw. 6:1). Eeshiijaʼa mojutüyaale na jieyuu outakana aʼwayuuse aashajaakana griego, tia shia wanee kasa mojujiraaka maʼin atuma wayuu.
bt-S süp. 42 püt. 18
«Alanaʼaleesüjaʼa sünain niainjachin woonooin amaa anüiki Maleiwa suulialeʼeya sünüiki wayuu»
18 Nayasaʼa na aluwataaushiikana, süka nayain na jülüjakana aaʼin naʼyataain na anoujashiikana, nakumajirüin sukuwaʼipa tia mojujirawaakat. Müshii namüin na anoujashiikana: «Suulia wooʼulaʼalaain suulia aküjaa nünüiki Maleiwakai, nnojotsü süpüla ayateein wajapuluʼuin tü ottonojookat sümüin wayuu müliasü» (Aluw. 6:2). Naküjain namüin shiain anaka naneeküle naʼakajee, akaratshishii tooloyuu eekai «pansaain nakuaippa je sünain katsüin maʼi chi Naaʼinkai Maleiwa» naaʼu. Süpüla shiʼitaanüin najapuluʼu tia aʼyatawaakat (Aluw. 6:3). Aneeküinjana naya wayuu tooloyuu pansaaka akuwaʼipa süka nnojoluin shiain neʼe ottonojoo eküülü tü naaʼinrajatkat, aapünajatü najapuluʼu nneerü nayaʼlajüinjatka aka tü eküülü naapüinjatkat namüin na müliakana. Sükasü griego nanülia na aneekünakana, eesüjaʼa anale tia sümüin tü jieyuu mojutukana atumawaa paala. Oʼuraajüshii palajana na aluwataaushiikana süpülapünaa naneeküin na akaratshishiikana wayuu eʼitaanajanaka ajapuluʼu «tü aʼyatawaakat».
Püchajaa süchiki kaaʼürüi suluʼu tü Wiwüliakat
bt-S süp. 45 püt. 2
«Esteban, anashi maʼi Maleiwakai nümüin otta naapüin pülaa nümüin»
2 Nnojotsü jaʼyayaain sünain nuʼupünaa Esteban mmoluin nia, jaʼitakajeʼe na laülaayuushiikana naaʼu na judíokana neʼrüin sünain «mataalain aka nuʼupünaa wane aapiee nümaʼanajeejachi» Maleiwa (Aluw. 6:15). Jaʼyasü naaʼu Esteban yalayalain maʼin naaʼin otta jimatüin naaʼin maʼaka naaʼin na aapiee nümaʼanajeejanakana Jeʼwaa. Mayaainjeʼe üttashaatain maʼin naaʼin na laülaayuukana nünain Esteban, neʼrüin jimatüin maʼin naaʼin. ¿Jamüshiche maʼaka nukuwaʼipa Esteban?
bt-S süp. 58 püt. 16
Aküjashi tü pütchi anasükat nüchiki Jesuu
16 Wanaawasü tü waʼyataainkat maaʼutpünaa sümaa tü aʼyatawaa naainjakat Felipe. Nnojoluinjana neʼe waya aküjain pütchi namaa na wawalayuukana, eeshii süpüla waküjain pütchi sümüin wayuu eepünaale waya maʼaka woʼunajaale. Eesü anale maʼin aashajawaa sümaa wayuu aapajeekana maʼin tü pütchikat. Müsü mayaa süka niʼitaain Jeʼwaa na aapieekana süpüla naküjain «sümüin wayuu nünüiki chi Maleiwakai, tü pütchi shiimüinkat» otta süpüla süküjünüin sümüin «eʼirukuukat süpüshua sainküin mmakat süpüshua» (Alat. Map. 14:6). Nüküjain Jesuu sünainpünaainjanain na aapieekana tü aküjaakat pütchi. Wanaa sümaa nüküjain Jesuu süchiki tü trigokat jee tü mojuui keimsesükat, nüküjain nayainjanain na «aapiee nümaʼanajeejanakana Maleiwa» akotchojokana tü trigokat (müsü sukuwaʼipa tia suʼunnaa tü kaʼi sajaʼlajaweetkat oʼu kasa süpüshuaʼa). Süpüla nekeraajüin na aapieekana tü aluwataanakalü anain naya, najaʼttirüinjana suluʼujee tü Nuluwataayakat Maleiwa na «kaainjaraliikana ooʼulaka na kaainjalapüʼükana atüma wayuu», nayainjana akotchojokana na chainjanakana kepiain iipünaa otta na wayuu wattakana aalii kepiainjanaka yaa mmapaʼa (Mat. 13:37-41; Alat. Map. 7:9; Juan 6:44, 65; 10:16).