EKIRAJAAYA 49
Naaʼinrajatka na kaʼwayuuseshiikana süpüla anain nakuwaʼipa
Talatüsü maʼin naaʼin wanee wayuu soʼu tü kaʼi kasaatkalü oʼu nia. Meesü nukuwaʼipa süpüla kaʼikat süpüshuaʼa sümaa nuʼwayuuse. Eesü süpüla müinya shia. Natüjaa aaʼu tia na anoujashii kakaliainnakana kasaalüin. Eesü süpüla talatüin naaʼin sümaa naʼwayuuse naaʼinrüle tü sümakat tü Bibliakat.
1. ¿Kasa naaʼinrajatka chi wayuu kaʼwayuusekai?
Niainjachi laülaaka wanee wayuu saaʼu nuʼwayuuse jee nüchonnii naashin Jehová (paashajeʼera Éfeso 5:23, 24). Niainjachi aneekaka tü anainjatkalü atuma nakuwaʼipa. «Anakaja müleka aire jüpüla juʼwayuuse» müsü tü Bibliakat namüin na tooloyuu kaʼwayuusekana (Éfeso 5:25). Chi wayuu aikai apüla nuʼwayuuse, kapülasü naaʼin sukuwaʼipa suʼupala wayuu jee namüiwaʼapa naya. Naaʼinmajüin shia, naapüin tü kasa choʼujaakat sümüin jee nükaalinjain shia süpüla anainjatüin saaʼin (1 Timoteo 5:8). Nüchajaain sukuwaʼipa süpüla anainjatüin sunoula (Mateo 4:4). Oʼuraajüshi nia sümaa jee naashajeʼerüin tü Bibliakat. Chi wayuu aikai apüla nuʼwayuuse, naaʼinmajüin shia. Sutuma naaʼinrüin tia, ayatüshia nia aleewain nümaa Jehová (paashajeʼera 1 Pedro 3:7, TNM).
2. ¿Kasa saaʼinrajatka tü wayuu kaʼwayuusekat?
«Anakaja müleka kojutule jütüma juʼwayuuse» müsü tü Bibliakat sümüin tü wayuu kaʼwayuusekat (Éfeso 5:33). Süpüla saaʼinrüin tia, jülüjainjatü saaʼin tü kasa anasü naaʼinrakat chi suʼwayuusekai otta tü naaʼinrakat süpüla naaʼinmajüin shia sümaa süchonnii. Kojutuinjachi nia sümüin jee sükaalinjainjachi nia sünain tü kasa naaʼinrajatkat. Aashajaainjatü shia nümaa süka anaka akuwaʼipa. Anainjatü sünüiki nüchiki jaʼitaichi nnojolin anoujain nia wanaa sümaa.
3. ¿Kasa naaʼinrajatka na kaʼwayuuseshiikana süpüla aijiraainjanain naya?
Saashin tü Bibliakat aʼaniraasü nukuwaʼipa wanee wayuu sümaa nuʼwayuuse (Mateo 19:5). Sünainjee tia pütchikat, nayaawata aaʼu na kaʼwayuuseshiikana nnojoluinjatüin naaʼinrüin wanee kasa mojujiraweenaka atuma naya. Yootojiraainjana naya süpüla naküjain jamüin naaʼin otta neeʼiyatüin aijiraain maʼin naya. Nnojotsü alanaʼaleeinjatüin sujutu wanee kasa suulialeʼeya nakuwaʼipa sünain kaʼwayuusee jee nakuwaʼipa nümaa Jehová. Nnojoishii naya aleewainjanain maʼin sümaa wayuu nnojotka naʼwayuusein.
WEKIRAJAA SOOʼOMÜIN
Wekirajaa sünain waneirua pütchi suluʼujeejatka tü Bibliakat aijiraajeenaka atuma na kaʼwayuuseshiikana.
4. Piakai kaʼwayuusekai, ai püpüla puʼwayuuse jee paaʼinmaja shia
«Jia tooloyuukana, anakaja müleka aire jüpüla juʼwayuuse waneʼewaʼire jukua [...] maa aka alin jia jüpülajiraa» müsü tü Bibliakat (Éfeso 5:28-30). ¿Jamaluʼulu tia pütchikat? Jünaja tü VIDEOKOT otta yooto jia süchiki tüü:
¿Kasa naaʼinrajatka wanee wayuu süpüla kapülain naaʼin nuʼwayuuse jee niiʼiyatüin saalin nüpüla?
Jaashajeʼera Colosas 3:12 otta yooto jia süchiki tüü:
¿Kasa naaʼinrajatka chi wayuu kaʼwayuusekai süpüla müin nukuwaʼipa sümüin nuʼwayuuse?
5. Ai püpüla puʼwayuuse jee kojuta nia pümüin
Saashin tü Bibliakat kojutuinjachi sümüin wanee wayuu suʼwayuuse jaʼitaichi manoujain nia. Jaashajeʼera 1 Pedro 3:1, 2 otta yooto jia süchiki tüü:
Manoujainre puʼwayuuse, eesüjaʼa keeʼireere paaʼin nunoujain, ¿kasakaʼa paaʼinrüinjatüin? ¿Püküjain jatche pütchi nümüin waneepia? ¿Shiataapa anainjatüin pukuwaʼipa nümüin jee kojutuinjachin nia pümüin? ¿Jamüsü anaka paaʼinrüle tia?
Paaʼinwajiraale wanee wayuu sümaa nuʼwayuuse aneerü sukuwaʼipa tü kasa naaʼinrakat. Eejeetpejeʼe kaʼi nnojoleetka oʼu wanaawain saaʼin nümaa. Sülatüle tia sümüin, süküjainjatü nümüin tü jülüjakat saaʼin sümaa shiiʼiyatüin nujutu sümüin. Sotuinjatü saaʼin niʼitaalain Jehová nia süpüla laülaain saaʼu jee naaʼu nachonnii, tia süpülajatü anain nakuwaʼipa. Sükaalinjainjachi nia süpüla anain sukuwaʼipa tü kasa naaʼinrakat. Müle shia sutuma aneerü nakuwaʼipa. Jaashajeʼera 1 Pedro 3:3-5 otta yooto jia süchiki tüü:
¿Jamüsü naaʼin Jehová niʼrüle kojutuin sümüin wanee wayuu chi suʼwayuusekai?
6. Eesü süpüla junouteʼerüin tü mojujiraakalü aaʼujee jia
Nnojoishi eein wanee wayuu maleʼeruʼukai kaainjalaa, waleʼeruʼusü shia wapüshuaʼa. Makalaka yootuinjachin wanee wayuu sümaa nuʼwayuuse süpüla nanouteʼerüin wanee kasa eekai sülatüin namüin. Jünaja tü VIDEOKOT otta yooto jia süchiki tüü:
¿Jamüsü watüjaaka saaʼu nnojoluin paaʼinwajiraain na wayuu weʼrakana suluʼu tü videokot?
¿Kasa naaʼinraka süpüla paaʼinwajiraain naya?
Jaashajeʼera 1 Corinto 10:24 otta Colosas 3:13, TNM. Süchikijee, yooto jia süchiki tüü:
¿Jamüshi paaʼinweechika wanee wayuu sümaa nuʼwayuuse naaʼinrüle tü sümakat tia wetsiikulokalüirua?
Kojutuinjana wamüin na waneinnua saashin tü Bibliakat. Waaʼinrüin tia aire wapüla wayuu. Jaashajeʼera Roma 12:10 otta yooto jia süchiki tüü:
«Nnojoire kojutuin taya sümüin jee maalinre taya süpüla, meeria takuwaʼipa sümüin», ¿jamüsü nnojotka müinjatüin nünüiki wanee wayuu süchiki nuʼwayuuse?
EESHII WAYUU EEKAI NAMÜIN: «Müshii nnojoliinnapaka paaʼinwajiraain waya».
¿Jameerü pünüiki namüin süpüla nayaawatüin saaʼu sunouteʼereerüin nakuwaʼipa tü sümakat tü Bibliakat?
WATÜJAAITPAKA AAʼU
Aijiraainjachi wanee wayuu sümaa nuʼwayuuse, kojutujiraainjana naya jee naaʼinrüinjatü tü sümakat tü Bibliakat süpüla anain nakuwaʼipa.
Pusouta shiʼipajee
¿Kasa naaʼinrajatka wanee wayuu süpüla anain nukuwaʼipa sümaa nuʼwayuuse?
¿Kasa saaʼinrajatka wanee wayuu süpüla anain sukuwaʼipa nümaa suʼwayuuse?
Kaʼwayuusere pia, ¿jeʼtsü tü pütchi suluʼujeejatkat tü Bibliakat paaʼinweenaka atuma jia?
PÜNAʼLA SOOʼOMÜIN
Paashajeʼera süchiki waneirua pütchi aneetka atuma pukuwaʼipa sümaa puʼwayuuse otta püchonnii.
Aneerü nukuwaʼipa wanee wayuu sümaa nuʼwayuuse naaʼinrüle tü nümakat Maleiwa. Anuu süchiki tia suluʼu tü video jayeechimaajatkat.
Pikirajaa süchiki tü saaʼinrajatkat wanee wayuu süpüla kojutuin sümüin laülaain saaʼu chi suʼwayuusekai.
Ouʼulaajirashi paala wanee wayuu sümaa nuʼwayuuse, kasaatpejeʼe naya nachikuaʼa naaʼinrapa tü sümakat tü Bibliakat. Pünaja süchiki tia.
Art sümaa Zanna Capers: Kasaatshii wachikuaʼa süka nükaalinjain waya Jehová (5:14)