Tü sümakat tü Bibliakat nachiki na aapiee nümaʼanajeejanaka­na Maleiwa

Keeʼireesü naaʼin Jehová weʼraajüin na nüpüshi chakana iipünaa: na aapiee nümaʼanajeejanakana. «Na nüchonniikana Maleiwa» müsü tü Bibliakat nachiki (Job 38:7). ¿Jamüsü sünüiki tü Bibliakat nachiki? ¿Kasa naaʼinraka süpüleerua wayuu? ¿Nüpüshiche Maleiwa napüshuaʼa na aapieekana?

1. ¿Jamüsü nakuwaʼipa na aapiee nümaʼanajeejanakana Maleiwa?

Nukumajüin palajana Jehová na aapiee nümaʼanajeejanakana, shiasaʼa mapa nukumajüin tü Mmakat. Meʼrujusalii naya maʼaka meʼrujuin nia otta kepiashii naya chaa iipünaa (Hebreokana 1:14). Watta maʼin naalii na aapieekana jee naatayaa müsü nakuwaʼipa (Alateetkat Mapeena [Apocalipsis] 5:11). Naaʼinrüin tü nümakat Jehová jee oonooshii sümaa nünüiki (Salmo 103:20). Nuluwataapuʼuin Jehová na aapiee nümaʼanajeejanakana süpüla naküjain tü nünüikikat, süpüla nakaalinjain na aʼyataakana nümüin otta süpüla noʼtteʼerüin naya. Maaʼulu yaa, nakaalinjain na anoujashiikana süpüla nantüin nanain na wayuu eʼraajeekana nukuwaʼipa Maleiwa.

2. ¿Jarai chi kanüliakai Satanás otta na yolujaakana?

Eʼrüshii wayumüin waneinnua aapiee nümaʼanajeejana Jehová. Chi palajachikai sünain müin nukuwaʼipa nia «chi sülaülakai yolujaa kanüliakai Satanás, chi eʼikeʼerakai wayuu sainküin mmakat süpüshuaʼa» (Alateetkat Mapeena 12:9). Alaülaajaweeshi Satanás naaʼu na waneinnua, müsüjeseʼe nüchajaain sukuwaʼipa süpüla niʼrüinjachin wayumüin Adán sümaa Eva nümüin Maleiwa. Eʼrüijaashii wayumüin mapa waneeinna aapiee wanaajiraa nümaa Satanás. Na aapiee makana akuwaʼipa, yolujaa münüshii. Nüjünajaaka naya Jehová chejee sirumatuʼujee yaa Mmapaʼamüin otta ajaʼttinneena naya mapa (paashajeʼera Alateetkat Mapeena 12:9, 12).

3. ¿Kasa naaʼinraka Satanás namaa na yolujaakana süpüla nimeejüin wayuu?

Nachajaain sukuwaʼipa süpüla nemeejüin wayuu sükajee tü kasa naaʼinrakat na ouutshiikana jee waneirua kasa sünainpünaaka yolujaa. Mojeerü nukuwaʼipa chi wayuu aaʼinrakai tia süka nayain naashajaain amaa na yolujaakana. Eeshii na wayuu aashajeʼerakana horoscopo, na asakirakana na atüjakana süpüleerua sukuwaʼipa jolotsü, na ooʼulaküliikana jee na ouutshiikana. Eeshii na wayuu achajaakana tratamiento sünainpünaaka yolujaa otta na aashajaakana namaa na outushiikana. Nnojotpejeʼe anain tia nümüin Jehová. «Nnojo juʼunuin sümaʼanamüin ouutsü jee namaʼanamüin na ooʼulaküliikana» müshi nia (Levítico 19:31). Nüchajaain sukuwaʼipa Satanás namaa na yolujaakana süpüla mojuinjatüin wakuwaʼipa, nüʼünüü naya Jehová, naaʼinmajüinjeseʼe waya Jehová noulia.

WEKIRAJAA SOOʼOMÜIN

4. Na aapieekana, nakaaliijain wayuu süpüla neʼraajüin nukuwaʼipa Jehová

Nnojoishii aküjain pütchi sümüin wayuu na aapieekana. Nakaalinjapejeʼe na aʼyataakana nümüin Maleiwa süpüla nantüin nanain na wayuu ekirajaweekana nüchiki. Jaashajeʼera Alateetkat Mapeena 14:6, 7 otta yooto jia süchiki tüü:

• ¿Jamüsü choʼujaaka wamüin nakaalinjain waya sünain aküjaa pütchi na aapiee nümaʼanajeejanakana Maleiwa?

• Eesü noʼunireerüle pukuwaʼipa na aapieekana süpüla puusütüin nanain na wayuu ekirajaweekana sünain tü Bibliakat, ¿jamüsü sükatchinraaka paaʼin sutuma tia?

5. Wayouta tü kasa sünainpünaakat yolujaa

Nüʼünüü Jehová Satanás namaa na yolujaakana, waʼünüü joo nayaʼaya. Jaashajeʼera Lucas 9:38-42 otta yooto jia süchiki tüü:

• ¿Kasa naaʼinraka na yolujaakana naka na wayuukana?

Wayouta tü sünainpünaakat yolujaa suulia waaʼinrajüin tü keeʼireekat naaʼin. Jaashajeʼera Deuteronomio 18:10-12 otta yooto jia süchiki tüü:

• ¿Kasa naaʼinraka na yolujaakana süpüla namojujüin wakuwaʼipa jee süpüla narütkaain wanainmüin? ¿Kasa tü aaʼinnakat eere kepiain pia sünainpünaaka yolujaa?

• ¿Jamüsü nüküjaka Maleiwa nnojoliinjanain sünainpünaain waya yolujaa?

Jünaja tü VIDEOKOT otta yooto jia süchiki tüü:

VIDEO: «Jüʼleeja chi Yolujaakai» (5:02)

• ¿Anasüche süpüla sajapünain süchon Palesa tia laniakat? ¿Jamüsüjaʼa saaʼin pümüin?

• ¿Kasa saaʼinraka Palesa süpüla nnojoluin jamajüin shia natuma na yolujaakana?

Napüshuaʼa na anoujashii shiimainshiikana, nayoutuin tü kasa namaʼanajeejatkat na yolujaakana. Jaashajeʼera Aluwataaushikana [Hechos] 19:19 otta 1 Corinto 10:21 otta yooto jia süchiki tüü:

• Pümaʼanale wanee kasa sünainpünaaka yolujaa, ¿jamüsü anaka paʼajüle shia?

6. Piyouta tü kasa mojusü nümaʼanajeejatkat Satanás namaa na yolujaakana

Chi laülaakai naaʼu na yolujaakana nia Satanás. Akaajasaʼa chi laülaakai naaʼu na aapiee nümaʼanajeejanakana Maleiwa, nia Miguel. Tia shia wanee nünülia Jesús, pülashi maʼin nia. Jaashajeʼera Alateetkat Mapeena 12:7-9 otta yooto jia süchiki tüü:

• ¿Jaralii na pülashiikana maʼin? ¿Satanás namaa na yolujaakana?, ¿niataapa Miguel namaa na aapieekana?

• ¿Mmoluinjanache na anoujashiikana neema Satanás otta neema na yolujaakana?

Puunteerü piyoutuin tü kasa mojusü nümaʼanajeejatkat Satanás namaa na yolujaakana. Jaashajeʼera Santiago 4:7 otta yooto jia süchiki tüü:

• ¿Kasa paaʼinrajatka süpüla nnojolin jamajüin pia nutuma Satanás otta natuma na yolujaakana?

WATÜJAAITPAKA AAʼU

Nakaalinjain waya na aapiee nümaʼanajeejanakana Maleiwa. Nüʼünüü Jehová Satanás namaa na yolujaakana jee nemeejüin wayuu sükajee tü kasa naaʼinrakat na outshiikana.

Pusouta shiʼipajee

• ¿Kasa naaʼinraka na aapieekana süpüla neʼraajüin na wayuukana nukuwaʼipa Jehová?

• ¿Jarai chi kanüliakat Satanás otta jaralii na yolujaakana?

• ¿Jamüsü nnojotka anain sünainpünaale pia tü kasa naaʼinrakat na outshiikana?

PÜNAʼLA SOOʼOMÜIN

Wekirajaa sünain jamüin watüjaaka saaʼu niainya neʼe Jesús chi Miguel münakai, chi laülaakai naaʼu na aapieekana.

«¿Jarai chi Miguel münakai?» (Pütchi suluʼuka jw.org)

Paashajeʼera jamüin watüjaaka saaʼu eein chi Yolujaakai.

«¿Shiimüinchejeʼe sünain eein chi Yolujaakai?» (Pütchi suluʼuka jw.org)

Paashajeʼera süchiki tü saaʼinrakat wanee wayuu süpüla suuʼulaain suulia sünainpünaain shia yolujaa.

«Tatüjaaitpa aaʼu kasapülajanain eeka waya» (Aapiria Wayuu, juulioʼu 1, 1993)

Pikirajaa süchiki tü kasa naaʼinrakat Satanás süpüla nimeejüin wayuu sükajee tü kasa naaʼinrakat na outshiikana.

«Tü pütüjaainjatkat aaʼu süchiki tü kasa naaʼinrakat na outshiikana» (¿Püntüinche sünain tü wopu sünainmüinjatkat tü kataakalü oʼuu waneepia?, shiʼipa 5)