¿Kasa weʼreetka sünainjee outuin Jesús?

Nnojoishi jaa müin Adán sümaa Eva nümüin Maleiwa. Müsüjeseʼe kaainjalain, müliain jee outuin wayuu.a Nnojoliipejeʼe niyüülajüin waya Jehová, nuluwataain chi Nüchonkai süpüla taashinjanain waya suulia waainjala jee outaa. Süküjain tü Bibliakat taashin waya nutuma Jesús sünainjee outuin nia saaʼu waainjala. Jamüshijaʼa püreesale wanee wayuu, awalaajünüinjachi aaʼu süpüla taashinjachin nia. Taashishii waya nutuma Jesús sükajee naapajiraain nikii waaʼu sümaa maainjalain nia (paashajeʼera Mateo 20:28). Mayaainjeʼe eein süpüla katüin noʼu Jesús waneepia yaa saaʼu tü Mmakat, aapajiraashi nia nikii süpüla naapüin wamüin süchikuaʼa tü amülouikat nutuma Adán sümaa Eva. Aishii maʼin waya nüpüla Jehová nümaa Jesús sükajee naaʼinrüin tia wapüleerua. Sünainjee tü sümakat ekirajaayakat tüü, kojuteerü maʼin pümüin naapajiraain nikii Jesús.

1. ¿Kasa weʼreetka maaʼulu sünainjee outuin Jesús?

Süka waleʼeruʼuin tü kaainjalaakat, eesü waaʼinrüle kasa nnojotka anain nümüin Jehová. Eepejeʼe süpüla aleewain waya nümaa wayaawajaale suulia waainjala jee wachuntule nümüin nülatirüin woulia waainjala saaʼu nünülia Jesús (1 Juan 2:1). «Ouktüshi nia saaʼu waainjala waya kaainjaraliikana. Je nnojoleechi ouktüin piantua, süka kettaaitpain tü naaʼinrakat süpüla anajiraainjanain waya nümaa Maleiwa» müsü tü Bibliakat nüchiki Jesús (1 Pedro 3:18).

2. ¿Kasa weʼreetka mapeena sünainjee outuin Jesús?

Naapüin Jehová nikii chi Nüchonkai «süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM). Sünainjee tü naaʼinrakat Jesús, nunouteʼerüin Jehová tü kasa mojusü eekat sünainjee naainjala Adán. Weʼitaale waaʼin sünain naapajiraain nikii Jesús waaʼu, eesü süpüla katüin woʼu süpüla kaʼikat süpüshuaʼa suluʼu wanee Mma anasü (Isaías 65:21-23).

WEKIRAJAA SOOʼOMÜIN

3. Nnojoliinnapa waya süchepchiain kaainjalaa jee outaa sünainjee outuin Jesús

VIDEO: ¿Jamüshi outaka Jesús? (shiʼipa 1) (2:01)

• ¿Kasa amülouika nutuma Adán sutuma moonooin nia nümaa Maleiwa?

Jaashajeʼera Roma 5:12 otta yooto jia süchiki tüü:

• ¿Kasa alataka maaʼulu sünainjee kaainjalain Adán?

Jaashajeʼera Juan 3:16, TNM otta yooto jia süchiki tüü:

• ¿Jamüshi nuluwataaka Jehová chi Nüchonkai Mmapaʼamüin?

1. 1. Wayuu maainjalasai paala Adán. Sünainjee kaainjalain nia nümüin Maleiwa, kaainjalaka jee outaka wayuu.

2. 2. Wayuu maainjalasai Jesús. Sünainjee jüüjüüin nia waneepia nümüin Maleiwa, eesü süpüla katüin noʼu waneepia na wayuukana jee maainjalain naya nünainjee.

4. Eesü süpüla anain sukuwaʼipa wayuu süpüshuaʼa sünainjee outuin Jesús

VIDEO: ¿Jamüshi outaka Jesús? (shiʼipa 2) (2:00)

• ¿Jamakuwaʼipat süpüla taashin wayuu süpüshuaʼa nünainjee neʼe waneeshia wayuu?

Jaashajeʼera 1 Timoteo 2:5, 6 otta yooto jia süchiki tüü:

• Nnojotsü eejatüin paala tü kaainjalaakat nüleʼeruʼu Adán, shiasaʼa kaainjalapa nia, kaainjalashii jee outushii na wayuukana. Naatapejeʼe nukuwaʼipa Jesús, maainjalasai nia. ¿Kasakaʼa naaʼinrüin süpüla taashin wayuu süpüshuaʼa suulia kaainjalaa?

5. Anasü tü naaʼinrakat Jehová püpüleerua süka alin pia nüpüla

Kojutusü namüin na naʼaleewainkana Jehová taashin naya nutuma. Anuu nünüiki wanee wayuu kojutukai amüin tia. Jaashajeʼera Galacia 2:20, TNM otta yooto jia süchiki tüü:

• Süka kojutuin nümüin Pablo taashin nia suulia naainjala, ¿jamüsü nünüiki suluʼu wetsiikulokot tüü?

Outushii napüshuaʼa na nüikeyuukana Adán sünainjee kaainjalain nia. Eesü süpüla katüin poʼu waneepia sünainjee nuluwataain Jehová chi Nüchonkai Mmapaʼamüin süpüla outuin nia paaʼu.

Paashajeʼerapa wetsiikulokot tüüirua, jülüja paaʼin jamüin naaʼin Jehová wanaa sümaa niʼrüin müliain maʼin atumawaa chi Nüchonkai. Jaashajeʼera Juan 19:1-7 otta 16-18, TNM otta yooto jia süchiki tüü:

• ¿Jamüsü paaʼin sutuma tü naaʼinrakat Jehová nümaa Jesús püpüleerua?

WATÜJAAITPAKA AAʼU

Sünainjee outuin Jesús saaʼu waainjala, nülatirüin Jehová woulia waainjala otta eesü süpüla katüin woʼu waneepia.

Pusouta shiʼipajee

• ¿Jamüshi outaka Jesús?

• ¿Jamüshi niaka anain Jesús süpüla taashin atuma wayuu suulia kaainjalaa?

• ¿Jamüsü anaka pukuwaʼipa sünainjee outuin Jesús?

PÜNAʼLA SOOʼOMÜIN

Pikirajaa sünain jamüin niaka Jesús anain süpüla taashin atuma waya.

«¿Jamakuwaʼipat süpüla taashinjatüin wainma wayuu sünainjee outuin Jesús?» (Pütchi suluʼuka jw.org)

Pikirajaa sünain tü waaʼinrajatkat süpüla katüin woʼu waneepia.

«¿Kasa naaʼinraka Jesús süpüla katüinjatüin woʼu?» (Pütchi suluʼuka jw.org)

¿Eesüche süpüla sülatinnüin woulia waainjala?

«Susoutaka eʼipajee tü Bibliakat» (Aapiria Wayuu, maayoʼu 2013)

Anuu nüchiki wanee wayuu anakai aaʼin süchikijee niyaawatüin saaʼu naapajiraain nikii Cristo naaʼu. Sutuma tia niiʼiratüin nukuwaʼipa.

«Nnojolitchipa müin süchepchiakai taaʼin tü atkawaakat» (Pütchi suluʼuka jw.org)