Suʼttia pütchi

1, 2. (1) ¿Jamüsüche nakuwaʼipa na wayuu aashajaanakana achiki suluʼu tü Wiwüliakat nümüin wanee wawala? (2) ¿Jamüsü anaka maʼin waʼaleewainre naya wayuukana?

«WANAA sümaa naashajaain nachiki na wayuu aküjünakana achiki suluʼu tü Wiwüliakat, maaʼatshi naashajaakai aaʼin nachiki naʼaleewainyuu kakaliainnakana niʼraajüin», müsü wanee wawala kettaapa nünüiki chi wawala alapalaakai naaʼu, wayuu miyoʼu chia wawalakai. Kakaliaichi nia ekirajaain sünain tü Wiwüliakat nachiki na wayuu namaiwajannuu waneepiakana nümaa Maleiwa otta nikirajüin wayuu sünain tü nütüjakat nachiki. Müsüjeseʼe nütüjaain maʼin saaʼu nakuwaʼipa naya wayuukana, maaʼatshi aka saaʼin naʼaleewainyuu nümüin.

² Anashaatasü maʼin waʼaleewainre na wayuu aashajaanakana achiki suluʼu tü Wiwüliakat. ¿Müshiiche naya pümüin? Jülüjataa paaʼin tüü: ¿Jameerü paaʼin yootule pia namaa naya wayuukana, pülatirüle kaʼi namaa otta piʼraajüle maʼin tü nakuwaʼipakat? ¿Jameerü pukuwaʼipa piʼraajüle maʼin Noé, Abraham, Rut, Elías otta Ester? ¡Wainmeetkajasaʼa kasa anasü naküjeetka pümüin süpüla punoutuin pukuwaʼipa jee süpüla natütüleʼerüin paaʼin! (Paashajeʼera Proverbios 13:20).

3. (1) ¿Kasache eeka süpüla watüjain nanainjee na wayuu saashajaakana achiki tü Wiwüliakat? (2) ¿Jarat tü pütchi wasouteetkalü eʼipajee?

³ Anashaateerü maʼin kottapa waya namaa na wayuu anamia asoʼiraweenakana aaʼin süka eein süpüla aleewain waya namaa (Aluw. 24:15). Eeshii süpüla sükaaliinjain waya maaʼulu nakuwaʼipa na wayuu aashajaanakana achiki suluʼu tü Wiwüliakat, ¿suluʼu jamüin? Nüküjain wamüin Pablo jamüinjatüin sukuwaʼipa watuma: «Anakajaʼa müleka jüshatüle nakuaippa na wayuu achechetkana naaʼin sünain anoujaa sümaiwa paala. Müleka nnojorüle sukulajaain jaaʼin [...], meena aka jia naaʼin sünain jüchecherüin jaaʼin sünain jaʼatapajüin tü naaʼinrüinjatkat chi Maleiwakai jümüin saaʼu pansaain nünüiki jümüin» (Heb. 6:12). Süpülapünaa waashajeʼerüin nachiki naya wayuukana anashii wasoutule shiʼipajee tü wasakitkalü anain sünainjee tü nümakat Pablo: ¿Kasa wayu tü kanoulaakat otta jamüsü choʼujaaka kanoulain waya? ¿Kasa waaʼinrajatka süpüla washatüin sukuwaʼipa nanoula na wayuu waneepiapuʼukana nümaa Jeʼwaa?

¿Kasa wayu tü kanoulaakat otta jamüsü choʼujaaka shia wamüin?

4. ¿Jamüsü nanüiki noʼutku na wayuukana süchiki tü kanoulaakat? ¿Jamüsü nnojotka shiimain tü namakat?

⁴ Tü kanoulaakat shia wanee akuwaʼipaa anakat maʼin, müsüjeseʼe kojutuin maʼin shia namüin na wayuu waashajaainjanakana achiki suluʼu karaloʼutakat tüü. Maaʼutpünaa yaa, wainma na wayuu mojutkana amüin tü kanoulaakat, anoujashii neʼe süpaʼa mma, nnojotsü eein wanee kasa shiimainka atuma tü nanoujakalü anain naashin. ¿Shiimainche tü namakat? Nnojo, nnojotsü shiimain. Shiimainre kanoulain waya, nnojoleena waya oʼunuin neʼe süchiirua tü wanoujeekalü atuma jee müsia nnojoleena waya anoujain neʼe nünain Maleiwa sooʼopünaa waaʼin. Tü kanoulaakat nnojotsü müin aka saaʼin tü suchuntaakat waaʼin, süka jamüin, tü keeʼireekat waaʼin soʼukai nnojoleerü keeʼireein waaʼin wattaʼa. Nnojoishii waya anoujainjanain neʼe sünain eein chi Maleiwakai, choʼujaasü watüjaain saaʼu kasain wanoujain anainjee. Jaʼitakajeʼe «tü yolujaakalüirua, nanouja anainrü» eein chi Maleiwakai saashin tü Wiwüliakat (Sant. 2:19).

5, 6. (1) ¿Jarat tü piamasükat kasa sünainpünaaka tü kanoulaakat otta nnojotka süpüla weʼrüin? (2) ¿Jamüinjatü sukuwaʼipa tü wanoulakat? Püküja wanee shiyaawase.

⁵ ¿Kasa maa waaʼinrajatka shiimainre tü wanoulakat? Wekirajaa sünain jamüin sünüiki tü Wiwüliakat süchiki tü kanoulaakat (paashajeʼera Hebreokana 11:1, TNM). Nüküjain Pablo piamasü kasa sünainpünaaka tü kanoulaakat otta nnojotsü süpüla weʼrüin shia. Wanee shia «tü kasa nnojotkat weʼrüin» sümaa eein shia maʼaka naaʼin Jeʼwaa, chi Nüchonkai otta tü Nuluwataaya chakat iipünaa. Jee tü wane kasa sünainpünaakat kanoulaa shia «tü kasa waʼatapajakat maʼin», tü nnojoyütkalia ekeraajüin maʼaka saaʼin tü mma jeketüinjatkat sutuma Nuluwataaya Maleiwa. ¿Nnojoleetche ekeraajüin tü kasa waʼatapajakat süka nnojoluin weʼrüin shia?

⁶ Nnojotsiaajeʼe maluʼuluin tia. Naashin Pablo, nnojoishi anoujaʼalüin süpaʼa mma chi eekai shiimain nunoula. Jamüsüjaʼa tü pütchikat «shiimainre wamüin shikeraajeerüin» nümaka Pablo, «sükaraloʼutse wanee kasa» maluʼulu shia. Jülüjataa paaʼin süsülajünüinjatüle wanee piichi pümüin. Eesüjaʼa saapünüle pümüin sükaraloʼutse tia piichikat sümaa pümünüin: «Anuu tü pipiainjatkat». Nnojotpejeʼe shiain aküjüneein pümüin pipiainjatüin tia karaloʼutakat. Tia süpülajatü pütüjaain saaʼu shiimain pukoroloin tia piichikat. Müsia neʼe sukuwaʼipa tü kanoulaakat, wayaawata aaʼu sutuma tia shiimain shikeraajeerüin tü Nünüikikat Maleiwa.

7. Püküja jamüin sukuwaʼipa tü kanoulaa shiimainsükat.

⁷ Shiimainre wanoula, jaʼyasü saaʼu wakuwaʼipa, wanüiki otta weʼitaain waaʼin nünain Jeʼwaa. Müle sukuwaʼipa tü wanoulakat, meechi Jeʼwaa maʼaka naaʼin Washi wamüin, wayaawateerü aaʼu alin maʼin waya nüpüla otta shiimain nikeraajeerüin süpüshuaʼa tü nümakat. Nnojotpejeʼe shiainjatüin neʼe waaʼinrüin tia. Tü kanoulaakat müsü aka saaʼin tü alatakat sümüin wayuu jee mürüt nnojorüle neküin, amatsüinjaasü naaʼin. Akaataajaʼa neʼe tü kanoulaakat, amatsüinjaajeerü nnojorüle waaʼinrüin tü kasa anasü nüchekakat Jeʼwaa wapüleerua (Sant. 2:26).

8. ¿Jamüsü choʼujaaka kanoulainjanain waya?

⁸ ¿Jamüsü choʼujaaka kanoulainjanain waya? Nüküjain Pablo jamüin choʼujaaka tia wamüin (paashajeʼera Hebreokana 11:6, TNM). Nnojoliire wanoujain nünain Jeʼwaa, nnojoleena waya arütkaain nünainmüin otta nnojoleechi talatüin nia wamaa. Müsüjeseʼe choʼujaain kanoulainjanain waya süpüla warütkaain nünainmüin Jeʼwaa, chi Washi chakai iipünaa otta waʼwaajüinjachi nia.

9. ¿Kasa naaʼinraka Jeʼwaa süka nütüjaain saaʼu choʼujaain kanoulainjanain waya?

⁹ Süka nütüjaain aaʼu Jeʼwaa choʼujaain kanoulainjanain waya, nikirajüin waya sükajee nakuwaʼipa na wayuu anakana maʼin anoula. Nikirajüin waya süpüla shiimainjatüin wanoula. Maaʼulu yaa, eeshii na wawalayuu laülaakana wapüleerua sünain anoujaa otta washatüinjatü sukuwaʼipa nanoula saashin tü Wiwüliakat (Heb. 13:7, TNM). Eetaashii joo na wattakana aalii wayuu namaiwajannuu anakana maʼin anoula, na naashajaakana achiki Pablo (Heb. 12:1, TNM). Nuchuntuin Pablo nanülia noʼutku naya wayuukana suluʼu tü karaloʼutakat Hebreokana kapiitulo 11. Wainmapejeʼe maʼin na wayuu namaiwajannuu anakana maʼin anoula saashin tü Wiwüliakat. Eeshii tooloyuu otta jieyuu, jee naatawaisü nakuwaʼipa ooʼulaka nouyase. Maaʼulu yaa, watta naalii na wayuu manoulakana, müsüjeseʼe anain wekirajaale nachiki na wayuu kanoulakana aashajaanakana achiki suluʼu tü Wiwüliakat.

¿Kasa waaʼinrajatka süpüla washatüin sukuwaʼipa nanoula?

10. Wekirajaapa wamüiwaʼa sünain tü Wiwüliakat, ¿kasa waaʼinrajatka süpüla washatüin sukuwaʼipa nanoula na wayuu namaiwajannuukana?

¹⁰ Süpüla washatüin nukuwaʼipa wanee wayuu, jülüjashaatainjatü waaʼin palajana tü nukuwaʼipakat. Sutuma tia, ekirajaana maʼin anainrü palajana nakuwaʼipa na wayuu aküjünakana achiki suluʼu karaloʼutakat tüü. Aainjünüsü tia süpüla jülüjashaatainjatüin waaʼin nakuwaʼipa naya wayuukana süpüla washatüin shia. Anapejeʼe pikirajaale sooʼomüin nachiki suluʼu waneirua karaloʼuta. Eesü süpüla paaʼinrüin tia pikirajaapa pümüiwaʼa sünain tü Wiwüliakat. Püsakireʼerüinjatü paaʼin sünain tü paashajeʼerakat, müinjatü piʼrakai saaʼin tü alatakat namüin na wayuu paashajeʼerakana achiki otta müinjachi chakai paaʼin namaa. Müinjatü piʼrakai saaʼin tü mmapaʼakat chayaa, müinjatü paatakai saaʼin seejuu tü wüitshiikat otta müinjatü paapakai saaʼin nanüiki naya wayuukana. Maa piakai aaʼin alatüin amüin tü alatakat namüin. Paaʼinrüle tia, shiimainjeena maʼin naya pümüin, piʼraajeena maʼin naya otta meena maʼaka naaʼin paʼaleewainyuu pümüin.

11, 12. (1) ¿Kasa waaʼinrajatka süpüla müinjachin weʼraajakai naaʼin Abraham sümaa Sara? (2) Püküja jamüin anaka ekirajawaa süchiki Ana, nüchiki Elías otta Samuel.

¹¹ Pütüjaapa maʼin saaʼu nakuwaʼipa na wayuu aashajaanakana achiki suluʼu tü Wiwüliakat, keeʼireejeerü paaʼin püshatüin nakuwaʼipa. Eeshijaʼa puluwataanüle sutuma nupueulose Jeʼwaa sünain aküjaa pütchi eere palitchoin wawalayuu jee shiale puuʼulaküinjatüin wanee jeketü sukuwaʼipa aküjaa pütchi eeka kapüleein pümüin. Jülüjapa paaʼin tia aʼyatawaa aapünakat pümüin otta puʼuraajapa nümüin Jeʼwaa süpüla nükaaliinjain pia, anasü sotule paaʼin nukuwaʼipa Abraham. Niakai sümaa Sara, napütüin nepia otta nakorolo chaa Ur süpüleerua aaʼinraa tü nümakat Jeʼwaa otta wainma kasa anasü neʼrakat sünainjee tia. Pikirajaale sünain tü nakuwaʼipakat, meena piʼraajakai naaʼin.

¹² Jülüjataa paaʼin tüü: mojule maʼin paaʼin otta nnojoire puʼuneein sünain tü outkajawaakat sutuma airuʼuluin nünüiki wanee paʼaleewain pümüin jee niale wanee kasa pünain, anasü sotule paaʼin sukuwaʼipa Ana. Jamüsüjaʼa shia, nnojotsü ooʼulaain suulia aʼwaajaa Jeʼwaa sutuma mojulaain Peniná sümüin. Püshatüle sukuwaʼipa Ana, shieerü paaʼinraka tü kasa anasükat otta meerü Ana pümüin maʼaka saaʼin wanee paʼaleewain. Müleka jülüjale paaʼin nnojoluin kasain anain apüla tü piʼyataainkat nümüin Jeʼwaa, aneerü pümüin pikirajaale nüchiki Elías. Pikirajaapa nüchiki, piyaawateerü aaʼu wainmain kasa alataka nümüin. Eepejeʼe Jeʼwaa waneepia nümaa sünain akaaliinjaa nia jee sünain atütüleʼeraa naaʼin. Eeshii jimaʼalii otta majayünnüü koleejiajiraaka namaa tepichi keejiakana amüin amaʼüjirawaa akuwaʼipa, ¿jaraitka anain süpüla nekirajaain achiki? Eeshii süpüla nekirajaain nüchiki Samuel, nnojotsü amojujaain nukuwaʼipa sutuma naaʼinrüin kasa mojusü na nüchonniikana Elí suluʼu tü aʼwaajüleekat Maleiwa.

13. ¿Alawaache tü wanoulakat sutuma washatüin sukuwaʼipa nanoula na wayuu namaiwajannuukana? Püküja jamüin maka pünüiki.

¹³ ¿Alawaache tü wanoulakat sutuma washatüin sukuwaʼipa nanoula na wayuu aashajaanakana achiki suluʼu tü Wiwüliakat? Nnojorüleejaʼa. Saashin tü Wiwüliakat, washatüinjatü sukuwaʼipa nanoula na tooloyuu otta jieyuu namaiwajannuukana (1 Cor. 4:16; 11:1; 2 Tes. 3:7, 9, TNM). Noʼutku naya wayuukana, nashatüin nakuwaʼipa waneinnua aʼyataalii nümüin Maleiwa eetüjüliikana napülapünaa. Jamüsüjaʼa suluʼu tü ekirajaayakat 17, weʼreerü suchuntuin María süpüshi tü sümakat Ana wanaa sümaa suʼuraajüin nümüin Jeʼwaa, sükajee tia wayaawata aaʼu süshatüin María sukuwaʼipa sunoula Ana. ¿Alawaache sunoula María sutuma saaʼinrüin tia? Nnojottaa. Shiʼitaain maʼin saaʼin María nünain Jeʼwaa sutuma süshatüin sukuwaʼipa sunoula Ana otta anasü sukuwaʼipa noʼuluʼu Jeʼwaa.

14, 15. (1) Püküja tü kasa anasü eekat sünain karaloʼutakat tüü. (2) ¿Kasa waaʼinrajatka süpüla watüjain sünainjee karaloʼutakat tüü?

¹⁴ Tü pütchi suluʼukat karaloʼutakat tüü süpülajatü ichein wanoula. Jee tü ekirajaayairua suluʼukat sünainjeejatü tü pütchikat «Washata sukuwaʼipa nanoula» ojuʼitawaika suluʼu Aapiria Wayuu soʼujee 2008 sünainmüin 2013. Akooʼomüinjünapejeʼe tü pütchikat. Tü asakinnakalü anain sünain tü ekirajaayakalüirua süpülajatü wekirajaain sünain tü pütchikat otta watüjain sünainjee. Akaʼaya shia, akumajünüsü kojuyasü ayaakuaa jeketü süpüla karaloʼutakat tüü, anashaatasü sünoʼu otta sukumajia. Jee müsia, anoutunusü waneirua ayaakuaa eetüjütkalia. Sünain karaloʼutakat tüü, eesü piamasü maapa otta ashajünüsü sünain tü juya sülatakalü oʼu wanee kasa. Tü karaloʼutakat Washata sukuwaʼipa nanoula, anasü süpüla wekirajaain sünain wamüiwaʼa, sümaa wapüshi otta namaa na wawalayuukana. Anashaatasü maʼin kottüle waya sümaa wapüshi süpüla waashajeʼerüin shia.

¹⁵ Wekirajaale sünain karaloʼutakat tüü, atüjeena maʼin waya ashataa sukuwaʼipa nanoula na wayuu namaiwajannuu aʼyataapuʼukana nümüin Jeʼwaa. Akatsüinraajeerü wanoula shiʼipaʼaya waashajeʼerüin nachiki. Jee müsia, arütkaajeena maʼin waya nünainmüin Jeʼwaa, chi Washi iipünaajachikai.