EKIRAJAAYA 51
Waashajaa süka pütchi analuʼut süpüla talatüin naaʼin Jehová wamaa
Anasü maʼin wakumajia nutuma Jehová, kanüishii waya nutuma. ¿Kapülasüche naaʼin Jehová anale jee mojule wanüikipala? Jamüsaʼa shia (paashajeʼera Santiago 1:26). Wekirajaa sünain tü waaʼinrajatkat süpüla talatüin naaʼin Jehová sümaa wanüikipala.
1. ¿Kasa waaʼinrajatka süpüla watütüleʼerüin naaʼin na waneinnua süka wanüiki?
Süküjain tü Bibliakat watütüleʼerüinjatüin naaʼin na wawalayuukana (1 Tesalónica 5:11). Pütüjaale saaʼu nüchiki wanee wayuu mojukai aaʼin, ¿kasa paaʼinrüinjatka süpüla pütütüleʼerüin naaʼin? Püküja nümüin alin nia püpüla otta süchiki wanee kasa anaka nutuma. Wainma wetsiikulo eeka süpüla paashajeʼerüin nümüin süpüla pütütüleʼerüin naaʼin, paashajeʼera nümüin süpüshi tia pütchikat. Jülüja paaʼin eein süpüla anain jee mojuin naaʼin wanee wayuu sutuma tü pümakat nümüin. Soto paaʼin kamaneeinjachin pia nümüin jee nnojoluinjachin jashichin pia paashajaapa nümaa (Proverbios 15:1).
2. ¿Kasa pütchi nnojoluinjatka wojuʼitirüin waashajaapa?
«Nnojo jaashajaain süka pütchi eekai airuʼulüin sümüin wayuu» müsü tü Bibliakat (paashajeʼera Éfeso 4:29). Saashin tia wetsiikulokot nnojoluinjatü yarüttüin wanüiki, airuʼuluin shia jee waashajaain süka pütchi mojeetka atuma saaʼin wayuu. Nnojoluinjana waya aküjain perulaa jee alawaa süchiki wayuu (paashajeʼera Proverbios 16:28).
3. ¿Kasa waaʼinrajatka süpüla anainjatüin naaʼin na waneinnua sutuma tü wamakat?
Atüjaana aaʼu tü jülüjakat waaʼin jee tü suluʼukat waaʼin sükajee wanüiki (Lucas 6:45). Süpüla waashajaain süka pütchi analuʼut, jülüjeesü waaʼin tü kasa anasü kojutukalü sutuma wayuu, tü lotokalü atuma wakuwaʼipa, tü wulekalü atuma waaʼin, tü waʼwaataakat saaʼu anain maʼin shia jee tü aijeenakalü anainjee na waneinnua wapüla (Filipos 4:8). Waaʼinreerü tia, anale tü kasa wanajakat, tü waapajakat jee tü washaitakat. Otta anale nakuwaʼipa na wayuu waʼaleewajaakana amaa (Proverbios 13:20). Süpülapünaa püküjain wanee kasa nümüin wanee wayuu, jülüja paaʼin aneerüle naaʼin sutuma. «Eeshi chi eekai mayaawajaain saaʼu nünüiki, müshi nusotokai saaʼin wayuu süka shiʼichi chajaruuta, akaajasaʼa sutuma nanüiki na kekiikana maʼin aawalaasü saaʼin wayuu» müsü tü Bibliakat (Proverbios 12:18).
WEKIRAJAA SOOʼOMÜIN
Wekirajaa sünain tü waaʼinrajatkat süpüla talatüin naaʼin Jehová sutuma wanüikipala jee süpüla anain naaʼin na waneinnua sutuma.
4. Piyaawata saaʼu pünüiki
«Nnojotsüjeʼe müin tanüiki nümüin» eeshii wamüle süchikijee mojuin wanüiki nümüin wanee wayuu (Santiago 3:2). Jaashajeʼera Galacia 5:22, 23 otta yooto jia süchiki tüü:
Sünainjee tü sümakat Galacia, ¿kasa puchunteetka nümüin Jehová süpüla piyaawatüin saaʼu pünüiki? ¿Jamüsü aneetka pukuwaʼipa paainjale tü sümakat Galacia?
Jaashajeʼera 1 Corinto 15:33, TNM otta yooto jia süchiki tüü:
¿Jameerü wanüikipala natuma na waʼaleewajaakana amaa, sutuma tü wanajakat, tü waapajakat jee tü washaitakat?
¿Kasa mojeetka otta aneetka atuma wanüikipala?
Jaashajeʼera Eclesiastés 3:1, 7 otta yooto jia süchiki tüü:
¿Jouja anaka süpüla koʼutuin waya jee waküjain süchiki wanee kasa?
5. Ana pünüiki nachiki na waneinnua
¿Kasa waaʼinrajatka süpüla nnojoluinjatüin airuʼuluin wanüiki otta nnojoluinjatüin mojuin naaʼin na waneinnua watuma? Jünaja tü VIDEOKOT otta yooto jia süchiki tüü:
¿Jamüsü nunouteʼeraka sukuwaʼipa nünüikipala chi wawala weʼrakai suluʼu tü videokot?
¿Kasa naaʼinraka süpüla nuuntuin tia?
Jaashajeʼera Eclesiastés 7:16 otta yooto jia süchiki tüü:
¿Kasa jülüjainjatka waaʼin waküjeere wanee kasa nnojotka anain nüchiki wanee wayuu?
Jaashajeʼera Eclesiastés 7:21, 22 otta yooto jia süchiki tüü:
Mojule sünüiki wayuu püchiki, ¿jamüsü sükatchinraka paaʼin wetsiikulokot tüüirua süpüla püchecherüin paaʼin suulia jashichin pia jee suulia mojuin paaʼin?
6. Kemeʼeria pünüiki paashajaapa namaa püpüshi
Keeʼireesü naaʼin Jehová kemeʼeriain wanüiki waashajaapa namaa na wapüshikana. Waküjainjatü namüin alin naya wapüla. Jünaja tü VIDEOKOT otta yooto jia süchiki tüü:
¿Kasa waaʼinrajatka süpüla kemeʼeriain wanüiki waashajaapa sümaa wapüshi?
Jaashajeʼera Éfeso 4:31, 32 otta yooto jia süchiki tüü:
¿Jamüinjatü sukuwaʼipa pünüiki sümüin puʼwayuuse jee püchonnii?
Nüküjain Jehová nümüin chi Nüchonkai alin nia nüpüla. Jaashajeʼera Mateo 17:5 otta yooto jia süchiki tüü:
Yootopa pia sümaa puʼwayuuse jee püchonnii, ¿kasa paaʼinrajatka süpüla püshatüin nukuwaʼipa Jehová?
Pütütüleʼera naaʼin na waneinnua saaʼujee wanee kasa anasü naaʼinraka.
EESHII WAYUU EEKAI NAMÜIN: «Aleʼeya taya, tanüikipala tia. Airejeʼe shia namüin, nnaaja nakuwaʼipa».
¿Jamüsüjaʼa pünüiki süchiki tia?
WATÜJAAITPAKA AAʼU
Eesü süpüla anain naaʼin jee mojuin naaʼin na wayuukana sutuma wanüiki. Jülüjeesü waaʼin tü waküjainjatkat, joujainjatüin waküjain shia jee aneerüle saaʼin wayuu sutuma.
Pusouta shiʼipajee
¿Kasa waaʼinrajatka süpüla watütüleʼerüin naaʼin na waneinnua sükajee wanüiki?
¿Kasa pütchi nnojoluinjatka wojuʼitirüin waashajaapa?
¿Kasa waaʼinrajatka süpüla kemeʼeriain wanüiki sümüin wayuu jee waashajaain süka pütchi analuʼut?
PÜNAʼLA SOOʼOMÜIN
¿Kasa paaʼinrajatka süpüla pütütüleʼerüin naaʼin na waneinnua sükajee pünüiki?
Paashajeʼera süchiki tü paaʼinrajatkat süpüla nnojoluin piweetirüin pütchi yarüttüsü.
«¿Anasüche waashajaale süka pütchi yarüttüsü?» (Pütchi suluʼuka jw.org)
Pünaja süchiki tü paaʼinrajatkat süpüla nnojoluin piperulajüin wayuu.
Paashajeʼera nüchiki wanee wayuu nükaalinjakai Jehová süpüla nnojoluin yarüttüin nünüikipala.
«Jülüjakaʼa taaʼin jameerüin takuwaʼipa watta kaʼi» (Aapiria Wayuu, akoosütoʼu 1, 2013)