«Wanaa sümaa outuin Sofíaa sutuma wanee ayuulii kakaliaka sünain, 39 juya waya sünain kasaalüü. Nakaalinjain maʼin taya na taʼaleewainkana otta kupaashi maʼin taya suʼunnaa tia. Alatapejeʼe wanee juya sünain mojushaatain maʼin taaʼin. Akaʼaya taya, eesü anale taaʼin jee mapa, mojulaʼa müsü taaʼin. Mayaapejeʼe sülatüirüin apünüin juya süchikijee sünaajaain Sofía, eeshi taʼyalajalaʼa tamüle sutuma mojuin maʼin taaʼin» (Kostas).

¿Eeichi outuin wanee püpüshi? Eesüjaʼa müle paaʼin maʼaka naaʼin Kostas sutuma tia alatakat pümüin. Aishaatasü maʼin wamüin outule waʼwayuuse, wanee wapüshi jee niale wanee waʼaleewain. Saashin tü karaloʼutakat The American Journal of Psychiatry, keemashaatasü otta kakalia mojuin naaʼin wanee wayuu outule wanee nüpüshi. Sutuma mojuin maʼin naaʼin chi wayuu outakai apüshi, eeshijaʼa nüsakireʼerüle naaʼin sünain tüü: «¿Ayateetche mojuin taaʼin waneepia? ¿Talateetche taaʼin tachikuaʼa? ¿Kasa taaʼinrajatka süpüla analüin taaʼin?».

Aküjünüsü tia sünain rewiisütakat tüü. Sünain tü wane ekirajaayakat, wekirajaajeerü süchiki tü alatakat wamüin nünaajaale jekenainka wanee wapüshi. Otta sünain tü waneirua ekirajaayakat, wekirajaajeerü anain tü waaʼinrajatkat süpüla eejiraain waya sümaa tü mojuukalü aaʼin.

Kasataalejeseʼe sükaalinjain pütchikat tüüirua jee sümülialüin naaʼin na wayuu müliakana aaʼin süka nünaajaain wanee napüshi.

Naashin waneinnua atüjashii, wainma sukuwaʼipa tü alatakat wamüin nünaajaapa wanee wapüshi. Naatawaipejeʼe tü alatakat wamüin waneʼewai wakua. ¿Eeka süpüla nnojoluin mojuin maʼin naaʼin wanee wayuu nünaajaale wanee nüpüshi? Nnojotsiaajeʼe shiain tia. Anasü naaʼin wanee wayuu nnojorüle nüchecherüin naaʼin suulia aʼyalajaa, eepejeʼe waneirua kasa naaʼinrajatka süpüla eejiraain nia sümaa tü alatakat nümüin. Oʼunüsü tia süchiirua sukuwaʼipa nüpüshi, nukuwaʼipa niakai jee süchiirua tü alatüitkat nümüin otta kasain outuin atuma müliashii.

WANEIRUA KASA KAPÜLEEKA ANAINJEE SHIA

Na wayuu anaajaainnakana apüshi, nnojotsü natüjaain aaʼu kaseerüin neʼrüin süchikijee tia. Wainmapejeʼe tü kasa alatakat jee antaka suluʼumüin naaʼin. Wekirajaa süchiki waneirua.

Mojulaʼa sümüle waaʼin süchikijee anain waaʼin paala. Outule süpüshi wanee wayuu, aʼyalajüsü shia nüchiirua, sotushi nia saaʼin otta eesü anale jee mojulaʼa sümüle saaʼin. Eesü mojuleere maʼin saaʼin sotule nia saaʼin jee süʼlapüjaale nümaa. Outaiwaʼaya wanee wapüshi moʼooshii neʼe waya. Majatü Tina wanaa sümaa nünaajaalaʼa nümüin chi suʼwayuusekai, moʼoosü neʼe shia. «Taapaiwaʼaya tia, isasü tachiki aʼyalajaa. Motsosü taaʼin süka shapaain taaʼin, nnojotsü antapünaain suluʼu tekii tü alatakat tamüin», müsü shia.

Shapaale, jashichire otta müle wayakai aaʼin kasirüin tü alatakat. Müshi Iván süchiki tü alatakat nümüin: «Süchikijee nünaajaain Eric, chi wachonkai sümaa 24 nuuyase, jashichishi maʼin taya jee müsia Yolanda tü taʼwayuusekat. Ponusü maʼin waaʼin tia, jama nnojoluin watüjaain saaʼu wayuuin jashichi waya. Eesü jülüjawaire waaʼin wayain kasirüin tü alatakat nümüin chi wachonkai. Eeshii wasakirüle waaʼin sünain jamüin nnojotka wachajaain maʼin sukuwaʼipa süpüla wakaalinjain nia». Alatüsü tia nümüin Alejandro soʼu sünaajaain tü nuʼwayuusekat süchikijee kakaliain shia ayuulin. Müshi nia: «Antüsü suluʼumüin tekii, nuuʼulaain taya chi Maleiwakai teʼrüin tamüliala süka wayuuin mojulaashi taya. Mojulaʼa müsü taaʼin süchikijee jülüjain taaʼin tia, müshi niayaakai aaʼin kasirüin tatuma Maleiwa tü alatakat tamüin». Müsia tü alatakat nümüin Kostas, chi wayuu waküjakai achiki suluʼu tü palajatkat ekirajaaya, müshi nia: «Eeshi jashichiwaire taya sümüin Sofía saaʼu sünaajaain. Moju müsia taaʼin süchikijee tia süka tatüjaain saaʼu nnojoluin süsirüin tü alatakat».

Nnojorüle pansaain tü jülüjakat waaʼin. Eesü nnojorüle pansaain tü jülüjakat waaʼin. Jamüshijaʼa nünaajaale süpüshi wanee wayuu, eeshi suʼupeʼejüle nia, eesü müle saapakai saaʼin nuuʼuisanaira jee nünüiki. Eesü kapüleere sümüin jülüjainjatüin saaʼin tü saaʼinrajatkat otta eesü motowaire saaʼin wanee kasa. Müsü Tina süchiki tia: «Eesü yootule taya sümaa wanee wayuu, wattapejeʼe neʼe taaʼin suulia. Jülüjasü taaʼin waneepia tü outakalü atuma Timo. Kapüleesü tamüin jülüjain taaʼin wanee kasa naata suulia tia, shapaasü maʼin taaʼin sünainjee tia».

Wamüiwaʼaweere waya. Nünaajaale wanee wapüshi eeshii jashichire waya jee mojushiire wamüin kottoo namaa waneinnua wayuu. Müshi Kostas: «Müshi naatakai taaʼin kottüle taya namaa waneinnua wayuu sümaa naʼwayuuse. Jaʼitakajeʼe neʼe namaale taya na maʼwayuusekana». Otta müsü Yolanda, tü nuʼwayuusekat Iván: «Mojushiisü maʼin wamüin yootoo namaa wayuu shapaakana aaʼin saaʼu wanee malaachon neʼe, nnojotka antapünaain sünain tü alatakat wamüin. Otta eeshii na wayuu aküjakana wamüin anain maʼin nakuwaʼipa na nachonniikana. Talatüsü taaʼin sutuma tü naküjakat wamüin, nnojotpejeʼe taapajeein shia. Watüjaa aaʼu ayatüinjatüin waaʼinrüin tü waaʼinrapuʼukat, nnojotpejeʼe waaʼin süpüla aaʼinraa tia».

Ayuuire waya. Nünaajaale wanee wapüshi, eeshii meküinyeere waya, washakajüle jee matunküinweere waya. Anuu nünüiki Aarón süchiki tü alatakat nümüin waneepa juya süchikijee nünaajaain chi nüshikai: «Matunküinjeesai taya, achijiraʼawaishi taya saʼwai otta sotowaisü taaʼin outuin chi tashikai».

Naashin Alejandro, eeshi ayuuijaalaʼa nümüle neʼe. Müshi nia: «Kojuyatua takua sümaʼanajee tottoolu sünain anaʼliraa otta ‹anashi pia› maʼwaishii neʼe tamüin. Mapa, tayaawata aaʼulu shiain ayuulin atuma taya tü mojuukalü aaʼin». Anashi mapa Alejandro, anapejeʼe tü naaʼinrakat süka nünaʼlirüin soʼu tia. Mojule maʼin naaʼin wanee wayuu, eeshi süpüla jooin nia süpüla ayuulii otta eetüjürüle wanee ayuulii nünain, eesü süpüla saʼakülaain süchikuaʼa sutuma tia.

Kapüleere wamüin aaʼinraa waneirua kasa. Müshi Iván: «Outapa Eric, nnojotsü neʼe waküjain tia namüin na wapüshikana jee na waʼaleewainyuukana, waküjain shia nümüinya chi nülaamainkai otta nümüin chi wayuu naʼanapajakai epia. Wainma karaloʼuta wakumajiraka laülaapialuʼu otta wakotchojüin tü nükorolokalüirua Eric. Anainjana waya süpüla waaʼinrüin tia, mapüsapejeʼe maʼin waya otta mojusü maʼin waaʼin».

Eeshii na wayuu kapüleekana amüin aaʼinraa tü kasa naaʼinrapuʼukat müliashii. Tia shia tü alatakat sümüin Tina, müsü shia: «Kataiwaʼaya noʼu chi taʼwayuusekai niapuʼushi jülüjakai aaʼin tü kasa sünainpünaakat tü wanneetse suluʼukat wanko. Otta aʼyataapuʼushi nia sünain waneirua kasa. Shapaʼaleesia maʼin taaʼin süka tayainjatüin aaʼinrüin joo tia. ‹¿Tainkeetche tia?›, majiraasü taya».

Sutuma süpüshuaʼa tü wekirajaaitpakalü anain nachiki na anaajaakana apüshi, müsü kapüleekai saaʼin eejirawaa sümaa tia. Aishaatasü wamüin nünaajaale wanee wapüshi, eejiraajeenapajaʼa waya sümaa tia watüjaale saaʼu tü alatawaikat sümüin wayuu eekai sünaajaain süpüshi. Soteesü paaʼin naatawalin tü alatakat wamüin nünaajaale wanee wapüshi. Otta eeshii na wayuu anakana aaʼin süka natüjaain saaʼu nnojoluin mojuin naʼyalajüle jee mojule naaʼin sutuma outuin wanee napüshi.

¿TALATEETCHE TAAʼIN TACHIKUAʼA?

Tü eekat süpüla sülatüin wamüin. Nnojoleerü mojuin paaʼin waneepia, analeerü paaʼin mapa. Nnojotpejeʼe maluʼuluin tia anaʼleeinjatüinya paaʼin otta motoʼoleeinjachin paaʼin müliashii. Mapa, nnojoleerü mojuin maʼin paaʼin maʼaka sümaʼleiwaʼaya, eepejeʼe süpüla mojulaʼa sümüin paaʼin sünainjee sotuin paaʼin chi püpüshi anaajaakai jee shiale antüin tü kaʼi kasaatkalü oʼu jia jee nünaajaaka oʼu müliashii. Eeshii na wayuu anakana aaʼin süchikijee tia otta ayatsia naaʼinrüin süchikuaʼa tü kasa naaʼinrapuʼukat paalainka. Choʼujaapejeʼe nakaalinjünüinjanain sutuma napüshi jee naʼaleewainyuu süpüla nainküin tia jee nnojoluinjatü naapüin naaʼin sünain tü mojuukalü aaʼin.

¿Mojeetche waaʼin waneepia? Eeshii na wayuu alatakana oulia tü mojuukalü aaʼin sülatapa maʼaka jeʼra kashi otta eeshii na anakana aaʼin sülatapa wanee juya jee piama juya shiale. Eepejeʼe na kakaliakana sünain mojuin naaʼin nüchiirua wanee napüshi eekai nünaajaain.a Anuu tü nümakat Alejandro süchiki tia: «Apünüin maʼin juya sünain mojuin maʼin taaʼin».

Nnojo süshapalaain paaʼin. Soto paaʼin nnojoleerüin mojukuʼu müin paaʼin waneepia. ¿Kasakaʼa paaʼinrüinjatüin süpüla analüinjatüin paaʼin otta süpüla nnojolinjachin kakaliain pia sünain mojuin paaʼin?

Püchajaale pütchi akaalinjeeitka pia süpüla nnojoluin mojuin maʼin paaʼin saaʼujee nünaajaain wanee püpüshi, pünteerü anain wainma pütchi. Saʼakajee tia, eejeerü pütchi jalouijeetka pümüin suulialeʼeya waneirua. Eesüjaʼa sülatüle tia süka naatain tü alatakat wamüin waneʼewai wakua nünaajaapa wanee wapüshi. Müsüjeseʼe nnojoleerüin jaloulin sümüin wayuu süpüshuaʼa tü pütchi jalouikat nümüin wanee wayuu.

Mayaapejeʼe müin tia, eesü waneirua pütchi eeka süpüla akaalinjain pia. Jaʼitakajeʼe na tottoolu akaalinjaliikana wayuu eekai sünaajaain süpüshi, eesü nakaalinjale shia sükajee tü sümakat wanee karaloʼuta kakaliaitkat maʼin, tia shia tü Wiwüliakat.

1: PUUʼULAA NAKAALINJAIN PIA PÜPÜSHI JEE PAʼALEEWAINYUU

• 

  Anasü maʼin paaʼinrüle tia naashin waneinnua tottooluirua süka sükaalinjeechin pia süpüla nnojoluin mojuin maʼin paaʼin. Mayaapejeʼe anain tia, eeshijaʼa pümüiwaʼaweere pia otta jashichire pia namüin na akaalinjeekana pia. Aleʼeya wakuwaʼipa sülatüle wamüin tia.

• Shiimain nnojoluin choʼujaain eeinjatüin wayuu waneepia pümaa, nnojoipejeʼe akayalaainjachin pia noulia na waneinnua, süka jamüin, eein süpüla choʼujaain pümüin akaalinjünaa. Kamanee pia namüin püküjapa namüin tü kasa choʼujaakat pümüin jee tü nnojotkat choʼujaain.

• Nnojo kakaliain pia pümüiwaʼa otta nnojo kakaliain pia kottüin, piyaawatüinjatü saaʼu tia.

TÜ SÜMAKAT TÜ WIWÜLIAKAT: «Anashii piamashii wayuu nuulia waneeshia [...]. Nujuttüle waneeshia eeshi süpüla nütameʼennüin nutuma chi wane» (Eclesiastés 4:9, 10).

2: ANA PIKÜIN OTTA PAAINJA EJERCICIO

• Anale piküin, nnojoleerü shapaain maʼin paaʼin. Pika frutas, verduras otta waneirua eküülü nnojotka manteekain maʼin.

• Püsa maʼin wüin otta nnojo püsüin kasa eeka püsiain maʼin.

• Meküinyeere pia, pika kojuyatua paliʼirüwai eküülü. Otta eesü süpüla puchuntüin nümüin chi tottootkai naapaiwa pümüin vitaminas.a

• Paainjale ejercicio jee waraitüle pia sümaa puwaʼülaain, nnojoleerü jülüjain paaʼin kasa mojusü. Eeshii na wayuu aainjakana ejercicio süpüla sotuin naaʼin chi napüshi anaajaakai otta eeshii na aaʼinrakana tia süpüla nnojoluin sotuin nia naaʼin.

TÜ SÜMAKAT TÜ WIWÜLIAKAT: «Nnojoishi eein wanee wayuu eekai üttüin naaʼin sünain tü niʼirukukat, tü naaʼinrakat shia naaʼinmajüin shia» (Éfeso 5:29, Santa Biblia: Dios habla hoy).

3: PUTUNKA MAʼIN

• 

  Anasü maʼin nümüin wanee wayuu nutunküle, shialeekajaʼa nünaajaale wanee nüpüshi, choʼujaʼaleesia maʼin nutunküin süka mapüsain maʼin nia.

• Piyaawatüinjatü tü kepein püsakat otta tü yootshi püsakat süka eein süpüla suwatüin lapü puulia sutuma.

TÜ SÜMAKAT TÜ WIWÜLIAKAT: «Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua joutai» (Eclesiastés 4:6).

4: PIYAAWATA PUKUWAʼIPA

• 

  Naatawaisü tü alatakat wamüin waneʼewai wakua nünaajaapa wanee wapüshi. Müsüjeseʼe pütüjaainjatüin saaʼu kasainjatüin paaʼinrüin süpüla eejiraain pia sümaa tü mojuukalü aaʼin.

• Eeshii na wayuu aʼyalajakana jee na yootokana süchiki tü alatakat namüin süpüla nnojoluin mojuin maʼin naaʼin. Eetaashii na achechetkana naaʼin suulia tia. Naatawai tü namakat na tottoolu akaalinjaliikana wayuu eekai sünaajaain süpüshi, süchiki tü waaʼinrajatkat mojule maʼin waaʼin. Kapüleere pümüin yootoo sümaa wayuu süchiki jamüin paaʼin, eeshi süpüla yootuin pia süchiki tia nümaa wanee paʼaleewain.

• Eeshii na wayuu aʼyalajakana süpüla nnojoluin mojuin maʼin naaʼin otta eeshii na achechetkana naaʼin suulia tia.

TÜ SÜMAKAT TÜ WIWÜLIAKAT: «Wayaʼala neʼe atüjaaka saaʼu tü kasa mojukalü atuma waaʼin» (Proverbios 14:10, Nueva Versión Internacional).

5: NNOJO PAAʼINRÜIN KASA AMÜLOUIJEETKA ATUMA PUKUWAʼIPA

• 

  Eeshii na wayuu asakana yootshi, akaijakana yüi otta mariwaana. Eetaashii na asajakana wunuʼu nnojotka saapajalain tottoolu namüin süpüla nnojoluin mojuin maʼin naaʼin. Nnojotsü anain tia süka amüloulin wayuu sutuma. Eesü süpüla analüin naaʼin wanee wayuu sutuma tia, motsomüinpejeʼe neʼe sümaʼa otta wainma kasa mojusü eeka sünainjee. Paaʼinra waneirua kasa naataka suulia tia süpüla nnojoluin shapaain maʼin paaʼin.

TÜ SÜMAKAT TÜ WIWÜLIAKAT: «Anakaja wooʼulaale suulia tü yarüttakat atüma waaʼin, tü mojukat atüma wakuaippa» (2 Corinto 7:1).

6: WANAAWA PUTUMA TÜ KAʼI PAAʼINRAKALÜ OʼU WANEE KASA

• Eeshii na wayuu achajaakana sukuwaʼipa süpüla naaʼinrüin waneirua kasa moteetka atuma naaʼin tü alatakat namüin.

• Süpüla analüin paaʼin paʼaleewajaa namaa waneinnua wayuu otta aleewa maʼin pia namaa na paʼaleewainkana. Pikirajaa sünain waneirua kasa jee püshaita waneirua kasa.

• Mapa, nnojoleerü mojuin maʼin paaʼin süka wainmain tü kasa paaʼinrakat. Müle pia, eejiraashi pia sümaa tü mojuukalü aaʼin.

TÜ SÜMAKAT TÜ WIWÜLIAKAT: «Eesü kaʼi süpüla kasa süpüshuaʼa [...]: kaʼi süpüla aʼyalajaa otta süpüla asirajaa» (Eclesiastés 3:1, 4).

7: KERAA PUTUMA TÜ PAAʼINRAJATKAT

• 

  Paaʼinramaata süchikuaʼa tü kasa paaʼinrapuʼukat sümaiwa.

• Keraa putuma jalapüshinjachin piisalaain, jalapüshinjachin piʼyataain otta jalapüshinjachin paaʼinrüin waneirua kasa. Müle shia putuma, meerü ayatakai pukuwaʼipa maʼakaapuʼu sümaiwa.

• Paaʼinra waneirua kasa jutateetka atuma paaʼin.

TÜ SÜMAKAT TÜ WIWÜLIAKAT: «Nnojoleerü sotuin naaʼin tü kasa alatüitpakat nümüin süka naapüin chi Maleiwakai talataa aaʼin nümüin» (Eclesiastés 5:20, Reina-Valera Actualizada).

8: PAʼATAPAJA PAALA SÜPÜLAPÜNAA PÜNEEKÜIN WANEE KASA

• Eeshii na wayuu aneekakana tü kasa naaʼinrajatkat süchikijee neʼe nünaajaain wanee napüshi otta eesü nayaawatüle mapa nnojoluin anain tü kasa naneekakat.

• Paʼatapaja paala süpülapünaa pukolojooin suluʼujee pipia, piiʼiratüin piʼyataain jee shiale süpüla püsülajüin nükorolo müliashii.

TÜ SÜMAKAT TÜ WIWÜLIAKAT: «Nnojorüle washapajaain sünain aaʼinraa wanee kasa, aneerü sukuwaʼipa. Jee washapajaale maʼin sünain aaʼinraa tia, mojeerü sukuwaʼipa» (Proverbios 21:5, Traducción en lenguaje actual).

9: SOTO PAAʼIN MÜLIASHII

• 

  Eeshii na wayuu nnojoliikana mojuin maʼin aaʼin naaʼinrüle waneirua kasa süpüla sotuinjachin naaʼin müliashii.

• Pümaʼana niyaakua müliashii jee shiale wanee kasa eeka nükoroloin. Püshaja sünain wanee karaloʼuta süchiki waneirua kasa alataka pümüin nümaa müliashii. Nnojoleerü mojuin maʼin paaʼin paaʼinrüle tia.

• Pünaajaa kasa eeka süpüla sotuin atuma paaʼin chi püpüshi anaajaakai otta eesü süpüla piʼrajaain shia nnojotpa mojuin maʼin paaʼin.

TÜ SÜMAKAT TÜ WIWÜLIAKAT: «Soto paaʼin tü kasa alatüitkat» (Deuteronomio 32:7).

10: PÜKATALA KAʼI SÜPÜLA PEEMERAAIN

• Pükatala kaʼi süpüla peemeraain.

• Kapüleere pümüin pükatalüin kojuyasü kaʼi süpüla peemeraain, eesü süpüla paaʼinrüin waneirua kasa soʼu wanee jee piama kaʼi süpüla jutatüin paaʼin. Eeshi süpüla puʼunüin sünain wanee excursión, suluʼumüin wanee museo jee puʼunajaale suluʼu kemion pejepünaa neʼe.

• Jaʼitakajeʼe neʼe paaʼinrüle wanee kasa naata suulia tü paaʼinrawaitkat, aneerü paaʼin sutuma.

TÜ SÜMAKAT TÜ WIWÜLIAKAT: «Jooʼuya tamaaiwa jia chamüin eere yüütüülin mmakat süpüla jeemeraainjanain» (Marcos 6:31).

11: PÜKAALINJA WAYUU

• 

  Soto paaʼin aneerüin paaʼin pükaalinjale na waneinnua.

• Eeshii süpüla pükaalinjain na wayuu mojukana aaʼin sünainjee nünaajaain wanee napüshi jee niale wanee naʼaleewain. Eeshiijaʼa yooteere naya süchiki tü alatakat namüin.

• Pükaalinjale jee pümüliarüle naaʼin na waneinnua, talateerü maʼin paaʼin jee nnojoleerü jülüjain paaʼin eeʼeraain neʼe pia.

TÜ SÜMAKAT TÜ WIWÜLIAKAT: «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana [Hechos] 20:35).

12: JÜLÜJA PAAʼIN TÜ KOJUTUINJATKAT MAʼIN PÜMÜIN

• Suluʼujee tü alatakat pümüin, eesü süpüla shiiʼiratüin tü jülüjakat paaʼin süchiki kasain kojutuleein maʼin pümüin.

• Püsakireʼera paaʼin sünain kasain paaʼinrüin süka pukuwaʼipa.

• Naatale neʼe tü kasa kojutukat pümüin, punouteein pukuwaʼipa.

TÜ SÜMAKAT TÜ WIWÜLIAKAT: «Shia anaʼleeka oʼunaa sünain wanee outaa suulialeʼeya oʼunaa sünain wanee miʼiraa süka shiainjatüinya alatüin tia namüin napüshuaʼale na wayuukana. Otta chi wayuu katayüikai oʼu, nütüjaa aaʼu shiainjatüin alatüin tia nümüin» (Eclesiastés 7:2, La Biblia de las Américas).

Nnojotsü eein wanee kasa anaʼleejeetka atuma paaʼin. Anapejeʼe naaʼin waneinnua wayuu naashin sünainjee naaʼinrüin kasa makalü aka saaʼin tü aküjünakat sünain pütchikat tüü. Eesü waneirua kasa naata suulia tü aküjünakat yaʼayaa eeka süpüla paaʼinrüin süpüla nnojoluin mojuin maʼin paaʼin. Paaʼinrüle shia, piʼreerü anain paaʼin sutuma.

EETAAIRÜ MAʼAKA SAAʼIN JEʼRA JUYA SÜNAIN SHIKIRAJAANÜIN ACHIIRUA TÜ ALATAKAT NAMÜIN NA WAYUU ANAAJAAKANA APÜSHI. Wanaawasü tü namakat na tottootkana sümaa tü sümakat tü Wiwüliakat. Müsüjeseʼe wayaawatüin saaʼu ayatüin jaloulin tü sümakat. Nnojotsü neʼe süküjain wamüin tü anakat süpüla waaʼinrüin, süküjainya wamüin pütchi nnojotka ashajünüin suluʼu karaloʼutaka eekai eein. Jee sümülialüin naaʼin na wayuu anaajaakana apüshi.

• Nnojoishii müliain na wapüshi anaajaakana

  Saashin Eclesiastés 9:5, nnojotsü kasain natüjaain aaʼu na outushiikana otta nnojotsü kasain jülüjain naaʼin (Salmo 146:4). Na outushiikana müshii natunkakai maʼin aaʼin saashin tü Wiwüliakat (Juan 11:11).

• Amülialaasü waaʼin süka kanoulain waya nünain chi Maleiwa aikai apüla waya

  Müsü tü Wiwüliakat: «Jülüjashii naaʼin Jeʼwaaa na anamiakana otta eesü naaʼin wanaa sümaa nachuntuin kaalinwaa nümüin» (Salmo 34:15). Nnojotsü neʼe waküjain nümüin Maleiwa süpüshuaʼa tü suluʼukat waaʼin süpüla pansaain tü jülüjakat waaʼin. Waaʼinrüin tia süpüla aleewain maʼin waya nümaa chi Kakumalakai waya. Süka pülain nia, eesü süpüla nümülialüin waaʼin.

• Tü anaa nüküjakalü achiki Maleiwa

  Kojuyatua süküjain tü Wiwüliakat süsoʼiraainjatüin naaʼin na outushiikana. Saashin tü Wiwüliakat, paʼaraiisüpa tü Mmakat nnojoleerü «ouktaa, mojuu aaʼin, aʼyalajaa, je saalii ayuulii» (Alateetkat Mapeena [Apocalipsis] 21:3, 4). ¿Eeirü jülüjain paaʼin tia?

Watta naalii na wayuu amülialaakana aaʼin süka natüjaain saaʼu neʼreenain nachikuaʼa na napüshi anaajaakana. Eesü wanee wayuu Ann sünülia, anaajaashi chi suʼwayuusekai süchikijee 65 juya sünain kasaalüin naya. Müsü sünüiki: «Tanouja anainrü tü sümakat tü Wiwüliakat süchiki nnojoluin müliain na wapüshi anaajaakana otta tatüjaa aaʼu nüsoʼireʼereerüin Maleiwa naaʼin na wayuu sotokana naaʼin. Jülüjasü taaʼin tia sotowaipa taaʼin chi taʼwayuusekai otta amülialaasü taaʼin sutuma».

Anuu sünüiki Tina, tü wayuu waküjayütkalü achiki sünain tü wane pütchikalüirua: «Tayaawata aaʼu nükaalinjain taya Maleiwa soʼuleʼeya tü kaʼi nünaajaakalü oʼu Timo. Nümülialüin taaʼin Jeʼwaa suʼunnaa mojuin maʼin taaʼin. Tatüjaa aaʼu shikeraajeerüin tü sümakat tü Wiwüliakat süchiki nasoʼiraainjatüin naaʼin na outushiikana jee atütülaasü taaʼin sutuma tia süpüla eejiraain taya sümaa tü alatakat tamüin nüsoʼiraleepa aaʼin Timo».

Watta naalii na wayuu anoujakana sünain tü sümakat tü Wiwüliakat maʼaka saaʼinrüin shia Tina. Müleka alawaale saaʼin pümüin tü sümakat tü Wiwüliakat, eeshi süpüla pikirajaain süchiki jamüin anaka maʼin tü sümakat otta jamüin shikeraajeetka tü sümakat. Müle shia putuma, piyaawateerü aaʼu shiain neʼe tü Wiwüliakat eein süpüla amülialüin naaʼin na wayuu anaajaakana apüshi.

¿PÜTÜJAWEE AAʼU SOOʼOMÜIN SÜCHIKI NASOʼIRAAINJANAIN AAʼIN NA OUTUSHIIKANA?

Suluʼu tü paajinakat jw.org, puusüteerü anain waneirua video aashajaaka süchiki tia.

¿KASA ALATAKA NAMÜIN NA OUTUSHIIKANA?

¿Kasa alataka namüin na outushiikana? Amülialaasü waaʼin sutuma tü sümakat tü Bibliakat süchiki tia.

Püchajaa suluʼu KARALOʼUTAIRUA > VIDEO (eere sümüin: TÜ BIBLIAKAT).

¿AAPAJEESHI PIA PÜTCHI ANASÜ?

Watta maʼin saalii kasa mojusü aküjünawaika achiki, ¿eejeetche waapüin achiki pütchi eekai anain?

Püchajaa suluʼu SHIKIRAJAKA ANAIN TÜ BIBLIAKAT > TALATAA AAʼIN OTTA JIMATAA AAʼIN