¿Eeshiche süpüla püküjüin pütchi rimiinkoʼuluwai?
1. ¿Kasa shikirajaka anain waya tü naainjakat Pablo otta na nümaajanakana chayaa Filipos?
1 Eemeraʼawaishii saawanoʼu na judío kepiakana Filipos jee nüntapünaaka yala Pablo namaa na nümaajanakana. Nnojotsüjee jaralüin mojuin anüiki namüin neemeraalejeʼeya. Akatsaʼa süka natüjaain aaʼu noutkajaʼawaliin sünain oʼuraajaa na judíokana wanee saʼata süpaatiase tü pueulokot, chamüinshii naya aküjüin pütchi. Makalaka woutiisain Lidia jee na shipialujunakana. ¡Talatakajasaʼa maʼin naya aküjüliikana pütchi! (Aluw. 16:13-15.) Maaʼulu yaa, wainma wayuu eemeraaka rimiinkoʼu. ¿Anasüche saaʼin pümüin pükatarüle shiʼipa tia kaʼikat süpüla aküjaa pütchi?
2. ¿Kasa eejiraapuʼuka amaa na aʼyataakana nümüin Jeowa süpüla naküjüin pütchi sümaa mekeʼejuuin naaʼin?
2 Eejirawaa süchiirua aküjaa pütchi rimiinkoʼu. Soʼu 1927 achuntünüsü maʼin namüin na aʼyataakana nümüin Jeowa nakatalüin shiʼipa kaʼi rimiinkoʼuluwai süpüla naküjüin pütchi. Akatsaʼa nayouktamaatüin shia na sülaülakana mma. Wainma wawalayuu ataʼünnaka chayaa Estados Unidos, aliʼrajünüshii sünain nnojoluin nooʼulaain sheemeraain wayuu rimiinkoʼu, nekeʼejüin saaʼin wayuu otta noikkaain sümaa maapujuuin karaloukta namüin. Akatsaʼa nnojoliin nooʼulaain suulia tia. Soʼu 1930, ajütünüshii kojuyashii wawalayuu outkajaakana suluʼu wanee outkajaalee pejejiraasü süpüla naküjüin pütchi. Eeshii wainmale maʼin na wawalayuukana makalaka isain naya süchiki tü pulusiiakat mayaainjeʼe sütaʼüleein naya. ¿Kojutüsü wamüin tü naainjakat naya wawalayuukana süpüla waküjüin pütchi sümaa mekeʼejuuin waaʼin?
3. ¿Jamüsü anaka aküjaa pütchi rimiinkoʼu?
3 Süpülajatü maʼin aküjaa pütchi. Kojuya na wayuu nnojoliikana aʼyataain rimiinkoʼu makalaka eein süpüla jimatüin naaʼin. Na oʼunakana suluʼu wanee iküleesia, eeshii süpüla nacheküin aashajawaa nüchiki Maleiwa soʼu kaʼikat tia. Woutkajaale rimiinkoʼu, aʼanaaushiinnapa waya süpüla aküjaa pütchi müsüjeseʼe eein süpüla wachajaain sukuwaʼipa süpüla waküjüin pütchi süpülapünaa tü outkajawaakat jee shiale süchikijee. Pülüʼüja palitchon eküülü, choʼujaale shia pümüin.
4. ¿Jamüshii talateenaka waya wakatarüle shiʼipa kaʼi rimiinkoʼu süpüla aküjaa pütchi?
4 Wakatarüle shiʼipa kaʼi rimiinkoʼu süpüla aküjaa pütchi, apütaayülia kaʼi süpüla weemeraain. Jee talateena maʼin waya süka waʼyataain nümüin Maleiwa (Pro. 19:23). Otta eesüjaʼa süpüla wantüin sünain wanee wayuu eekai müin aka saaʼin Lidia.