Aʼatapajüshii Jerusalén

NIKIRAJÜIN Jesús wayuukana naainnua. Oonooshii naya nümüin, nnojoishii oʼunuin Jerusalénjee. Wanaa sümaa naʼatapajüin kepisanajaasü tü piichikat, müsü sülatakai wanee jouktai miyoʼu. Eejaaka suchuwala siki saaʼu nekii. ¿Piʼrüin shia saaʼu nekii na nikirajüinkana? ¿Kasa wayuu tia?

¡Shia wanee kasa pülasü! Chashi Jesús sirumatuʼu nümaa chi Nüshikai otta nuluwataaka chi naaʼinkai Maleiwa nanainmüin na nikirajüinkana. ¿Kasa naainjaka nutuma chi naaʼinkai Maleiwa? Aashajaashii naya süka naata anüikii.

Nanalaaka wainma wayuu süka naapüin shipisana tü jouktaikat. Eeshii wayuu wattajeʼewalii antaka sünain tü miʼiraakat Pentecostés. Naashajaaka na nikirajüinkana Jesús namüin na wayuukana suluʼu nanüiki süchiki tü kasa anasü naainjakat Maleiwa. ¡Ponoko naya naaʼin na wayuukana!

Namaka: ‹Napüshuaʼa na wayuukana galileajeʼewalii. ¿Jamaka naashajaaka süka wanüiki?›

Nüshaʼwalaaka Pedro sümaa emetuluin nünüiki süpüla nüküjüin jamakuwaʼipalüin tia. Nüküjaka süchiki nukuwaʼipa Jesús süpüla nuʼutunuin otta süsoʼireʼennüin naaʼin. Nümaka Pedro: ‹Ichaa Jesús sirumatuʼu nikialuʼujee Maleiwa. Nüjütüin chi naaʼinkai Maleiwa chi nüküjakai achiki paala. Makalaka eein tü kasa pülasükat›.

Kettaapa nünüiki Pedro, mojusü naaʼin na wayuukana sutuma tü aainjünakat nümüin Jesús. Namaka: ‹¿Kasa waaʼinrüinjatka? Nümaka Pedro: ‹Jiiʼiranajaa jukuwaʼipa otta juwoutisaajira›. Nawoutisaajünaka 3.000 wayuu otta nashataka nukuwaʼipa Jesús.