Püküja pütchi süka eepünaale pia
1. Püküja kasapülajatüin tü karalouktakat ¿Pücheküin pütüjaain saaʼu tü shiimainkat?
1 Tü karalouktakat ¿Pücheküin pütüjaain saaʼu tü shiimainkat? akumajuushi süpüla woʼttüin sünain ekirajaa sünain tü Wiwüliakat otta süpülajatü wattakuwalin tü shiimainkat nüchiki Maleiwa (Ecl. 11:6). Anuu tü sukuwaʼipainjatkat süpüla waküjüin pütchi süka.
2. ¿Kasa waainjüinjatka süpüla woʼttüin sünain aashajawaa nümaa wanee wayuu sükajee tü karalouktachonkot?
2 Süpüla woʼttüin sünain aashajawaa. Eesü süpüla paapüin shia nümüin wanee wayuu, piiʼiyata tü aipiruasükat asakiraa sünainka tü palajatkat süpana otta püma nümüin: «Sünainjee tüü, ¿jarat püsakirüitka anain?». Paapapa nünüiki, püsoukta süka tü karalouktakat otta paashajeʼera wanee pütchi suluʼujee tü Wiwüliakat. Süchikijee, paashajeʼera jee paashajaa süchiki süpüshi tü chiiruaajatkat süpana otta paapa nümüin tü karalouktakat Kasa shikirajaka. Jaʼitakajeʼe nnojorüle nücheküin shia, nümaʼanaitpa tü karalouktachonkot otta eesü süpüla makatüin suluʼu naaʼin tü pütchikat sutuma (Mat. 13:23).
3. ¿Kasa eeka süpüla waainjüin wainmale niʼyataain wanee wayuu wapüla?
3 Wainmale niʼyataain. Püma nümüin: «Süka wainmain piʼyataain, tapütüin paala pümüin karalouktakat tüü. Eesü aipiruasü kasa eeka süpüla wasakirüirüin anain otta asouktüsü shia sükajee tü Wiwüliakat. Tatüjawee aaʼu jamüin pünüiki süchiki tia weʼrajiraapa soʼu wanee kaʼi».
4. ¿Jamüinjatü wanüiki waküjapa pütchi kaayeruʼu süka tü karalouktachonkot?
4 Waküjapa pütchi kaayeruʼu. Eesü süpüla müin wanüiki: «¿Jamayaa pia? ¿Püsakirüirü anain tüü? [Puuʼulaa nüsouktai.] Sünain karalouktakat tüü eesü tü sümakat tü Wiwüliakat süchiki tia, pansaasü otta anasü maʼin shia». Nnojoire nüshapajaain, eeshi süpüla pikirajaain nümaa süsouktia süpüshi tü asakinnakat anain jee eesü süpüla paapüin tü karalouktakat Kasa shikirajaka.
5. ¿Kasa waainjawalinjatka süka tü karalouktachonkot yüütüüle wapüla?
5 Yüütüüle. Suluʼu waneeirua mma, apütünawaisü karaloukta suluʼu piichi eeka yüütüülin sümaa nnojoluin jaʼyain shia. Jaainjawaire tia, anasü jüpütawaire tü karalouktakat ¿Pücheküin pütüjaain saaʼu tü shiimainkat? Juuyantapa eesü süpüla müin jünüiki: «Yüütüüsüinka wapüla, weʼitaaka wanee karaloukta soʼuluʼu pipia. ¿Pütüjawee aaʼu süsouktia süpüshi tü aipiruasü asakiraa sünainkat?».
6. Püküja kasain anain atuma tü karalouktakat ¿Pücheküin pütüjaain saaʼu tü shiimainkat?
6 Mapüleesat otta pansaasü tü sümakat tü Wiwüliakat suluʼu tü karalouktakat ¿Pücheküin pütüjaain saaʼu tü shiimainkat? Süpülajatü wayuu süpüshuaʼa jaʼitairü naatain sukuwaʼipa otta sunoula. Otta müsia mapüleesat aküjaa pütchi süka: jaʼitakajeʼe na tepichikana otta na jekennuukana eesü süpüla naainjüin shia. ¿Aküjawaishi pia pütchi süka eepünaale pia?