Wainma maʼin na meʼrujusaliikana saashin tü Wiwüliakat. Jeʼwaa meʼrujusai nia (Juan 4:24; 1 Timoteo 1:17).

Nümüiwaʼajachi Jeʼwaa nümaiwa chaaʼaya sirumatuʼu. Nukumajaka na meʼrujusaliikana, na aapiee münakana. Pülashii otta atüjüshii maʼin naya noulia na wayuukana. Wainma na aapiee nukumajalakana Jeʼwaa; Daniel wanee wayuu aʼyataashi nümüin Maleiwa niʼrüin wainma maʼin aapiee (Daniel 7:10; Hebreokana 1:7).

Nukumajüin Maleiwa na aapieekana süpülapünaa nukumajüin tü Mmakat (Job 38:4-7). Na aapieekana nnojoishii nayain na wayuu ouktuinnapakana.

Anamia namaiwa na aapiee nukumajalakana Jeʼwaa. Mapa, mojulaajaashi wanee aapiee chi kanüliakai Satanás chi Yolujaakai. Aʼwaajüneeshi nia nuulia Jeʼwaa. Waashajaa jooluʼu süchiki tia alatakat.

Kachonpuʼusü maʼin tü wunuʼuliakalüirua suluʼu tü mma kanüliakat Edén. Naashin Jeʼwaa eesü süpüla niküin Adán sümaa Eva süchon tia wunuʼuliakalüirua. Akatsaʼa, eesü wanee wunuʼu nnojoluinjatka neküin süchon, neküle shia oukteena (Génesis 2:9, 16, 17).

Soʼu wanee kaʼi aashajaayaasü wanee wüi sümaa Eva nutuma Satanás chi Yolujaakai. Shiküle süchon tü wunuʼukat nnojoluinjatü shia ouktuin naashin, kekiinjatü maʼin maʼaka naaʼin Maleiwa. Sümaa naʼalain Satanás tü nüküjakat shiküin Eva süchon tü wunuʼukat. Süchikijee, shikiraka Adán (Génesis 3:1-6).

Sutuma tia watüjaaipa aaʼu niʼrülin wayumüin otta aküjülin alawaa Satanás. Nnojoluinjatü ouktuin Eva naashin müleka shiʼrüle wayumüin nümüin Maleiwa. Naʼalain tü nüküjakat. Ouktusü Eva otta müshia Adán, akaisaʼa Satanás nnojoishi ouktuin, ouktajachipajaʼa nia sünainjee tü naainjalakat. Ayatayüiya nia maaʼulu sünain aküjaa alawaa, eʼikeʼeraa saaʼin wayuu otta naainjirüin naya kasa eeka mojuin nümüin Maleiwa (Juan 8:44).

Eʼrüliijaashii wayumüin waneeinnua aapiee

Mapa, mojulaajaashii waneeinnua aapiee. Neʼrüin sirumatuʼujee na jieyuu yaajanakana saaʼu tü mmakat. Makalaka wayuuyaain naya Mmapaʼamüin süpüla namaʼüjiraain nakuwaʼipa sümaa tü jieyuukalüirua, mojusü maʼin tia nümüin Maleiwa (Génesis 6:1, 2; Judas 6).

Otta müsia mojusü maʼin nakuwaʼipa na wayuukana sutuma. Kachonshii naʼwayuuse na aapieekana, akanasaʼa naatajana maʼin na nachonniikana, miyoʼuyuu maʼin sümaa mojulaain maʼin naya. Mapa, joutsü maʼin kasa mojusü saaʼu tü Mmakat, makalaka najaʼttirüin Jeʼwaa na mojulaashiikana süka wanee juya miyoʼu maʼin. Na katakana oʼu süchikijee tia juyakat nia Noé sümaa tü nüpüshikat (Génesis 6:4, 11; 7:23).

Aleʼejüshii na aapiee mojulaashiikana sirumatuʼumüin, nnojoishii ouktuin, süsalashii tü naainjalakat nutuma Maleiwa, maleʼejüinsalii naʼakamüin na aapiee anamiashiikana otta nnojoishii naya wayuuyaain nachikuaʼa. Oukteena naya süntapa tü kaʼi kasalajaneetkat oʼu naainjala (Judas 6).

Ojutunüshi Satanás sirumatuʼujee

Soʼu tü juyakat 1914 eejatü wanee atkawaa chaaʼaya sirumatuʼu. Süküjüin wamüin tü Wiwüliakat suluʼu Alateetkat Mapeena: ‹Eesü wanee atkawaa chaaʼaya iipünaa, Miguel [Jesucristo] jee na aapiee nümaajanakana [anamiashiikana], atkaashii naya nümaa chi kayuushikai [Satanás] jee sümaa tü aapiee nümaajatkalüirua [mojulaasükalüirua]. Otta nayakana, ayamüluushii nutuma Miguel. Nujutuin naya chejee iipünaajee. Chi kayuushi miyoʼushaata ojutunakai nia chi wüi nümaiwajaikai kanüliakai Satanás, chi eʼikeʼerakai wayuu sainküin mmakat süpüshuaʼa. Ojutunuichipa nia yaa mmaluʼumüin namaa na aapiee nümaajanakana [mojulaashiikana]›.

¿Kasa eeka sutuma tia? Müsü tü Wiwüliakat: «Je sükajee nujutünüichipain chi Yolujaakai, anakaja müleka talatüle waaʼin wapüshua waya yaakana iipünaa nümaa Maleiwa». Talatüinjana na aapiee anamiashiikana süka nujutunuichipain Satanás sirumatuʼujee namaa na aapiee mojulaashiikana. ¿Kasa alatüinjatka namüin na wayuu yaakana saaʼu tü Mmakat? Müsü tü Wiwüliakat: «Otta müshiʼiya jia kepiakana sainküin mmakat süpüshuaʼale, müleʼo maʼi tü müliaa jiʼreetkat, süka nujutünüichipain chi Yolujaakai jaʼakamüin. Je jashichishaatashi maʼi nia, süka nütüjaain saaʼu sünain sülüʼülüin nükalia süpüla ataʼünnaa» (Alateetkat Mapeena 12:7-9, 12).

Shiimain, mojusü nakuwaʼipa na wayuukana otta eʼikeʼennüshii naya nutuma Satanás jee na aapiee mojulaashiikana. Nanülia na aapiee mojulaashiikana yolujaa. Nüʼünüü chi Maleiwakai otta mojulaashii naya napüshuaʼa.

Mojulaashi maʼin Satanás otta na yolujaakana. Nuʼuta aaʼinrü nümüʼlüin otta tü aʼyataasükalüirua nümüin Job. Süchikijee, nuʼuta aaʼinchii polooshii nüchonnii, nujuttirüin tü piichikat eejanale naya süka «wanee jouktai miyoʼu maʼin». Mapa ayuuishi Job nutuma «ourulajüsü sümaa kajüin nüta, nuuʼuinainjee sünainmüinreʼeya nikii» (Job 1:7-19; 2:7, NM).

Manüisalü otta moʼupaʼasalü wayuu natuma na yolujaakana wanaa sümaa yaajachin Jesús mmapaʼa (Mateo 9:32, 33; 12:22). Eeshi wanee wayuu müliashi maʼin otta nükashalüin tü nütakat süka ipa (Marcos 5:5). Otta wanee jintüi aʼwaatüshi, «apalasüjawaʼain müshi, oʼkchichijawaʼain müshi sütüma tü yolujaakat» (Lucas 9:42).

Müsia maaʼulu oʼutui saaʼin wayuu Satanás namaa na yolujaakana. Watta maʼin saalii kasa mojusü naainjaka saaʼu tü mmakat soʼujeʼereʼeya nujutunuin iipünaajee. Ayuuishii, matuinkuinsalii, mojusü naʼlapüin otta ataüjaanüshii na wayuukana natuma. Eeshii eeka noʼutuin saaʼin wayuu, noʼutiraain naaʼin otta mamainnain natuma.

Saashin Lintina wanee wayuu kepiasü chaaʼaya Surinam ouktusü 16  süpüshi natuma na yolujaakana otta müliasü maʼin shia natuma soʼu 18  juya. Saashin shiaka «anasü maʼin namüin na yolujaakana müliain otta noʼutuin saaʼin wayuu».

Akaisaʼa Jeʼwaa eeshi süpüla naaʼinmajüin na aʼyataashiikana nümüin nuulia Satanás (Proverbios 18:10).