EKIRAJAAYA 10
Oonooshi waneepia Jesuu
¿Oonoʼowaishi pia waneepia nümaa püshi otta sümaa püi?... Eesü kapüleere tia, ¿aashimüin? ¿Oonooshiche Jesuu nümaa Jeʼwaa? ¿Oonooshiche nia nümaa nüshi jee sümaa nii?... Sükaaliinjeechi pia nukuwaʼipa Jesuu süpüla poonooin nümaa püshi jee sümaa püi, jaʼitairü kapüleein pümüin. Jooʼu wekirajaai nüchiki Jesuu.
Süpülapünaa nüntüin Jesuu yaa saʼakamüin wayuu, chapuʼushi nia iipünaa nümaa Jeʼwaa chi Nüshikai. Wanaa sümaa yaajachin nia mmapaʼa, kashishi nia otta keishi nia. José nünülia chi nüshikai otta María sünülia tü niikat. ¿Pütüjaa aaʼuchi jamakuwaʼipalin Jesuu süpüla kashin otta kein nia yaa mmapaʼa?...
Süpüla joʼuuinjachin Jesuu yaa mmapaʼamüin, niʼitaain nia Jeʼwaa suluʼu süchonla María. Niaʼala neʼe Jeʼwaa atüjaka süpüleerua tia. Emiyoʼulaashi Jesuu suluʼu süleʼe María maʼaka miyoʼuin wanee joʼuu süleʼeruʼu nii. Sülatapa mekietsat kashi, jemeishi Jesuu. Makalaka kashin otta kein Jesuu yaa mmapaʼa.
Wanaa sümaa polooin piama nuuyase Jesuu, naainjüin wanee kasa süka alin maʼin Jeʼwaa nüpüla. Alatüsü tia soʼu nuʼunüin Jesuu namaa na nüpüshikana chaa Jerusalénmüin sünain aʼwaajaa Jeʼwaa. Shiasaʼa müin nüleʼejapa José sümaa María nepialuʼumüin, nasukajaain Jesuu süka nnojolin nia neʼrüin. ¿Kasakaʼa naainjüin José sümaa María?...
¿Kasa naainjaka Jesuu suluʼu tü aʼwaajüleekat Maleiwa?
Nüleʼejamaataka José sümaa María Jerusalénmüin sünain achajawaa nüchiki Jesuu. Shapaasü maʼin naaʼin süka nnojolin nantüin anain Jesuu. Sülatapa apünüin kaʼi, nanta anainchi nia suluʼu tü aʼwaajüleekat Maleiwa. ¿Pütüjaa aaʼuchi jamüin chaka Jesuu suluʼu tü aʼwaajüleekat Maleiwa?... Shia süka shikirajünüin wayuu chayaa nüchiki Maleiwa otta atüjeeshi maʼin Jesuu wainma kasa nüchiki Jeʼwaa. Aishi maʼin Jeʼwaa nüpüla Jesuu otta talateesü naaʼin nutuma. Oonooshi waneepia Jesuu nümaa Jeʼwaa mayaainjeʼe müliain maʼin nia sutuma wayuu. ¿Oonooshiche Jesuu nümaa José otta sümaa María?... ¡Jamüsüsaʼa! Süküjüin wamüin tü Wiwüliakat noonooin Jesuu.
¿Kasa shikirajaka anain pia nukuwaʼipa Jesuu?... Oonooinjachi pia nümaa püshi otta sümaa püi, jaʼitairü kapüleein pümüin. ¿Paainjeerü tia?...