Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa — PÜTCHIPÜLEE SULU'UKA INTERNET sutuma Watchtower

Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa

Juulioʼu 3-9

KOROLO KOJUTUSÜ SULUʼUKA TÜ WIWÜLIAKAT EZEQUIEL 11-14

«¿Paainjainche ‹tü suchuntaakat paaʼin›?»

(Ezequiel 11:17, 18) »Müinjatü pünüiki: ‹Anuu nünüiki Jeʼwaa, chi Miyoʼushikai saaʼu kasa süpüshuaʼa: «Takotchojeena jia jüchikuaʼa saʼakajee tü pueulokalüirua, jee suluʼujee tü mma wattakualiikalü aluʼu jia atumawaa, shieerü taapaka jümüin Israel süpüla juumain shia. ¹⁸ Oʼuneena naya chamüin jee nasünneʼereerü tü kasa kashüülaasü eekat chayaa otta tü kasa alerajünakat.

w07-S 1/7 süp. 11 püt. 4

Pütchi anaka maʼin sünainjee tü karaloʼutakat Ezequiel (shiʼipa 1)

Eesü wanee kasa niʼraka Ezequiel soʼu juyaka 612 Sü.W., chajaittaa nia Jerusalén. Niyoutuin maʼin tü kasa alatakat suluʼu tü aʼwaajüleekat Jeʼwaa. Nayeena neʼe kataka oʼu na eʼitaanakana anain tü nejeetsekat, alateerü tia najaʼttirapa Jeʼwaa na ooʼulaakana nia, nayeena nüjütakana nooʼomüin na aipiruashiikana wayuu, na nayaawasekana nusurulaatse Jeʼwaa (Ezequiel 9:2-6). Süpülapünaa sülatüin tia, aküjüneerü tü pütchi süchikimaajatkat najaʼttinnajanain nutuma Maleiwa, tia pütchikat müinjatü aka saaʼin siki (Ezequiel 10:2). Mayaapejeʼe najaʼttirajanain Jeʼwaa na mojulaashiikana, nüküjaleʼeinya nükotchojüinjanain na israeliitakana nachikuaʼa.

(Ezequiel 11:19) Wanaaweerü naaʼin tatuma, jeketeerü nakuwaʼipa tatuma, tasünneʼereerü noulia tü naaʼin makat aka saaʼin ipa, otta teʼitaajeerü nanain wanee eekai anain.

(Ezequiel 11:20) Süpüla jaaʼinrajatüin tü taluwataakalü anain jee oonooinjana jia sümaa tü taneekakat süpüla jaaʼinrüin. Tapueuloseena naya jee Namaleiwaseechi taya»›.

Püchajaa süchiki kaaʼürüi suluʼu tü Wiwüliakat

(Ezequiel 12:26-28) Jee nümakalaka Jeʼwaa tamüin, anuu nünüiki: ²⁷ «¡Kaatei! Müsü neʼe nanüiki na chakana Israel: ‹Nnaayülia sükalia tü kasa niʼrakat, ekeraajeerü mapeena, wattayülia maʼin›. ²⁸ Müinjatü pünüiki namüin: ‹Anuu nünüiki Jeʼwaa, chi Miyoʼushikai saaʼu kasa süpüshuaʼa: «‹Nnojoleechi taya kamaʼakuʼu müin süpüla tekeraajüin tü tamakat. Wanee kasa eeka taküjüin ayateeria shia tekeraajüin›, müsü nünüiki Jeʼwaa, chi Miyoʼushikai saaʼu kasa süpüshuaʼa»›».

w07-S 1/7 süp. 13 püt. 8

Pütchi anaka maʼin sünainjee tü karaloʼutakat Ezequiel (shiʼipa 1)

12:26-28. Aashajaainjachi Ezequiel namüin na asirajakana nüka saaʼujee nüküjain pütchi, müinjachi nia namüin: «Nnojoleechi taya kamaʼakuʼu müin süpüla tekeraajüin tü tamakat», [...] müsü nünüiki Jeʼwaa. Wakaaliinjainjana na waneinnua süpüla neʼitaain naaʼin nünain Jeʼwaa, süpüla sajaʼttinnüin kasa mojusü.

(Ezequiel 14:13, 14) «Eere wanee pueulo aainjaka kasa mojusü sümaa moonooin naya sümaa tanüiki, aniweechi taya sooʼomüin, tajaʼttireerü shia maʼaka shiʼyüttünüin wanee wunuʼu akachennaka anain pan, tajüteerü jamü sooʼomüin, jee toʼuteena aaʼin na wayuu suluʼukana sümaʼaleʼeya namüʼlüin.» ¹⁴ «‹Aniiyüire Noé, Daniel otta Job naʼaka, nnojoishiije outuin naya wanaa namaa süka wayuuin loto akuwaʼipachii naya›, müsü nünüiki Jeʼwaa, chi Miyoʼushikai saaʼu kasa süpüshuaʼa».

w07-S 1/7 süp. 13 püt. 9

Pütchi anaka maʼin sünainjee tü karaloʼutakat Ezequiel (shiʼipa 1)

14:12-23. Oʼttaajeena waya müleka waainjüle tü nümakat Jeʼwaa. Nnojoishii nayainjanain oonooin wooʼopünaa sümaa nünüiki Jeʼwaa na waneinnua (Roma 14:12).

Wetsiikulo aashajeʼennajatka

(Ezequiel 12:1-10) Ayatakalaka naashajaain Jeʼwaa tamaa sünain maa: ² «Wayuu eʼrülii wayumüin na kepiakana aʼaka pia, eesü noʼu nanain, nnojotpejeʼe kasain neʼrüin, eesü nacheʼe nanain nnojotpejeʼe kasain naapüin, süka neʼrüliin wayumüin. ³ Aluʼusaʼa piakai, anashi yapajüle pia süpüla oʼunaa, anashi puʼunule noʼupala. Oʼunajachi pia noʼupala, suluʼujee tü mma kepiakalü aluʼu pia. Eeshi neʼreechire pia mayaapejeʼe neʼrüliin wayumüin. ⁴ Piyuʼlüinjatü noʼupala tü püchisekat, paaʼinrajatü tia soʼutpünaa eein tü kaʼikat, jee puʼuneechika aliika noʼupala maʼaka naaʼin na wayuu amaanakana. ⁵ »Poototo süsepü tü pueulokot noʼupala jee pujuʼita noʼupala. ⁶ Punuloʼujeerü tü püchisekat noʼupala. Piyuʼleerü tü püchisekat aipoʼupa. Koʼuutajaneechi pia süpüla nnojoluin piʼrüin tü mmakat, süka piain shiyaawasein tatuma tü alatajatkat sümüin Israel». ⁷ Jee ayatakaʼaya tatuma tü nümakat tamüin. Tayuʼluin tü tachisekat maʼaka saaʼin nüchise wayuu eekai nümaanajachin, taaʼinrüin tia soʼukai, jee wanaa sümaa aliikain kaʼikat, toototuin süsepü pueulokot süpüla tojuʼitajachin. Tayuʼluin tü tachisekat aipoʼupa. Talüʼüjaka shia tanuloʼupünaa noʼupala. ⁸ Jee nümakalaka Jeʼwaa tamüin wattaʼa maalü: ⁹ «‹¿Kasa paaʼinraka?›, ¿müshii pümüin na chajanakana Israel, na eʼrüliikana wayumüin? ¹⁰ Püma namüin: ‹Anuu nünüiki Jeʼwaa, chi Miyoʼushikai saaʼu kasa süpüshuaʼa: «Nümüinjatü chi laülaashikai, eesü wanee pütchi süliajatü Jerusalén jee naliajatü napüshuaʼa na kepiakana Israel»›.

JUULIOʼU 10-16

KOROLO KOJUTUSÜ SULUʼUKA TÜ WIWÜLIAKAT EZEQUIEL 15-17

«¿Pikeraajüinche tü pümakat?»

(Ezequiel 17:1-4) Jee ayatakaʼaya nünüiki Jeʼwaa tamüin: ² «Anasü kayaawasere putuma tü pünüikikat otta püküja namüin na chakana Israel tü alatajatkat namüin. ³ Maa pünüiki namüin: ‹Anuu tü nümakat Jeʼwaa chi Miyoʼushikai saaʼu kasa süpüshuaʼa: Tü warulapai anakalü maʼin tü miyoʼukat maʼin atüna, anajüsü maʼin shia otta anasü maʼin sünoʼu, antüsü tia warulapai Líbano jee saapaaka wanee sütünachon chi cedro. ⁴ Saapaain shia süraloʼujee tü cedrokat jee süntirüi shia Canaánmüin, shiʼitaaka shia suluʼu wanee mma eere maʼin oikkaalii.

w07-S 1/7 süp. 12 püt. 6

Pütchi anaka maʼin sünainjee tü karaloʼutakat Ezequiel (shiʼipa 1)

17:1-24 ¿Jaralii na piamashii warulapai miyoʼuyuukana? ¿Jamaluʼulu nasuluin sütüna tü cedrokot? ¿Kasa kayaawaseka tü sütünachon wunuʼu nüpünajakat Jeʼwaa süchikuaʼa? Na piamashiikana warulapai nia chi aluwataakai saaʼu Babilonia nümaa chi aluwataakai saaʼu Egipto. Chi palajachikai warulapai antüshi saaʼujee wanee cedro, niyaawase Jesuu tia cedrokat süka niain chi nuuʼuliwoʼukai David. Chi warulapaikai nusuluin sütünachon wunuʼu, tia shia wanaa sümaa nüikaleʼennüin Sedequías nüchikumüin Joaquín chi aluwataaikai saaʼu Judá. Mayaainjeʼe naapüin Sedequías nünüiki nümüin chi aluwataaikai saaʼu Babilonia, achuntüshi nia kaaliinwaa nümüin chi aluwataaikai saaʼu Egipto. Nnojotpajaʼa kasain saamüin nümüin tia, amaanüshi nia Babiloniamüin jee outushi nia chayaa. Eesü wanee kasayaa naaʼinraka Jeʼwaa, nusuluin wanee sütünachon cedro otta nüpünajüin shia saaʼu tü uuchikat Sión, miyoʼushaatasü tia mapa. Nia kayaawaseka shia Jesuu, nünainjee niakai, eesü kasa anasü süpüla wayuu süpüshuaʼa (Alateetkat Mapeena 14:1).

(Ezequiel 17:7) »›»Eekalaka wanee warulapaiya, miyoʼu maʼin sütünakat otta anasü maʼin. Shiasaʼa joo tü suuʼuliakat uuwa shiyurulüin tü suuʼurülakat sünainmüin, jee müsia tü sütünakat shiyurulüin süpüla shiʼyotunüin wüin saaʼu. Ojuʼita müsü shia eere süpünajünüin shia paala.

(Ezequiel 17:15) Eʼrüijaashi nia wayumüin nümüin süka nuluwataain pütchimaajana egiptomüin süpüla naapüinjachin ama nümüin sümaa watta saalii wayuu. ¿Aneetche nukuwaʼipa? ¿Oʼttaʼajeeche ee nia, chi nnojoikai ekeraajüin nünüiki pansaaka nutuma paala? ¿Isajeeiche ee nia?

w07-S 1/7 süp. 12 püt. 6

Pütchi anaka maʼin sünainjee tü karaloʼutakat Ezequiel (shiʼipa 1)

(Ezequiel 17:18, 19) Mojutsat nümüin wanee pütchi pansaaka atumawaa paala. ¡Kaatei! Naapüin paala nünüiki, müsü maʼin tü naaʼinrakat, nnojoleechi nia oʼttaain.»› ¹⁹ »‹Anuu tü nümakat Jeʼwaa, chi Miyoʼushikai saaʼu kasa süpüshuaʼa: «Shiimain maʼin tanüiki, shiaʼaya mojutka nümüin tü pütchi tapansaajakat paala. Kasalajaneerü tia nümüin tatuma.

w12-S 15/10 süp. 30 püt. 11

Pikeraajüinjatü tü pümakat

¹¹ ¿Jamüsü nüshajiraka Jeʼwaa suluʼu tü Wiwüliakat tia alatakat? ¿Choʼujaasüche maʼin wekeraajüin tü wamakat? Anuu sünüiki tü Wiwüliakat: «Nnojotsü pansaain nanüiki. [...] Kasalajaneerü sümüin wayuu süpüshua eekai saaʼinrüin kasa eekai müin aka tia sümaa suʼutinnaleein aaʼin» (Rom. 1:31, 32). Napüshi na wayuu nnojoliikana ekeraajüin tü namakat nia faraón chi aluwataaikai saaʼu Egipto, Sedequías chi aluwataaikai saaʼu Judá, jee Ananías sümaa Safira. Eejüinjatü waaʼin suulia majüin wakuwaʼipa maʼaka naaʼin naya wayuukana (Éx. 9:27, 28, 34, 35; Ezeq. 17:13-15, 19, 20; Aluw. 5:1-10).

w88-S 15/9 süp. 17 püt. 8

Niyuutuin Jeʼwaa tü nüchajaruutsekat

⁸ Naashin Jeʼwaa, müshi aka saaʼin warulapai chi aluwataakai saaʼu Egipto nümaa chi aluwataakai saaʼu Babilonia. Asünneʼennüshi chi aluwataaikai Joaquín sünainjee aluwatawaa nutuma chi aluwataakai saaʼu Babilonia jee niʼitaaka Sedequías nüchikumüin. Nnojotpejeʼe nikeraajüin Sedequías nünüiki, achuntüshi neʼe kaaliinwaa nümüin chi aluwataakai saaʼu Egipto, chi makai aka saaʼin warulapai. Nuchuntüin Sedequías nünülia Jeʼwaa nüküjaiwaʼa nümüin chi aluwataakai saaʼu Babilonia waneepiainjachin nia nümaa, mojusü pütchi nüchiki Jeʼwaa saaʼujee nnojoluin nikeraajüin Sedequías nünüiki. Wekeraajüinjatü waneepia tü wamakat suulia mojuin pütchi nüchiki Jeʼwaa sutuma waaʼinrüin wanee kasa eekai mojuin. ¡Anashaatasü maʼin tü waʼyataakalü anain saaʼujee waküjaliin pütchi nüchiki Jeʼwaa! (Ezequiel 17:1-21).

Püchajaa süchiki kaaʼürüi suluʼu tü Wiwüliakat

(Ezequiel 16:60) Jee müshia tayakai, soteerü taaʼin tü pütchi tapansaajakat pümaa majayülüiwaʼaya pia, tapansaajeerü pümaa wanee pütchi süpülajatka kaʼi süpüshuaʼa.

w88-S 15/9 süp. 17 püt. 7

Niyuutuin Jeʼwaa tü nüchajaruutsekat

⁷ Naashin Jeʼwaa, Judá müsü aka saaʼin suuʼulia uuwa wünaʼapüjatü mojuka achon saaʼujee mojulaain maʼin na wayuu kepiakana suluʼu, shia neʼe anaka apüla saʼajünüin (Ezequiel 15:1-8). Otta müsia shia müsü aka saaʼin wanee joʼuu apütünaka sümüiwaʼa, niyuʼluin Jeʼwaa na israeliitakana Egiptojee jee nipijüin naya maʼaka wanee wayuu epijakai wanee joʼuu, waneʼereʼeya miyoʼupa shia. Müsü aka saaʼin nuʼwayuuse Jeʼwaa Israel, naatapejeʼe neʼe na maleiwayaashii naʼwaajaka na chajanakana chayaa otta ajaʼttinnajana naya saaliijee tia. Nüpansaajüinjatpejeʼe Jeʼwaa wanee pütchi süpülajatü kaʼi süpüshuaʼa namaa na waneepiakana nümaa, nüpansaajüinjatü namaa na chainjanakana iipünaa (Ezequiel 16:1-63; Jeremías 31:31-34; Galacia 6:16).

(Ezequiel 17:22, 23) »‹Anuu nünüiki Jeʼwaa, chi Miyoʼushikai saaʼu kasa süpüshuaʼa: «Tasuleerü wanee sütünachon tü cedrokot chaa iipünaajee sünain, jee tapünajeerü shia saaʼu wanee uuchi eekai miyoʼuin. ²³ Teʼitaajeerü shia saaʼu tü uuchi miyoʼukat maʼin chaa Israel, otta miyoʼujeerü süpana sümaa kachonjeerüin shia, shieerü wanee cedro miyoʼuka maʼin. Otta kepiayaa meena na wüchiikana sünain sütüna, kepieena suupünaa seemiouse.

w07-S 1/7 süp. 12 püt. 6

Pütchi anaka maʼin sünainjee tü karaloʼutakat Ezequiel (shiʼipa 1)

Wetsiikulo aashajeʼennajatka

(Ezequiel 16:28-42) »›Müsü aka saaʼin wayuu maaʼinsat pia nooʼomüin na chajanakana Asiria, nnojotsü kasain talatayaain atuma paaʼin, ayatüsia pia pachetüin. ²⁹ Ayatüsia maʼin pia maʼaka saaʼin wanee wayuu maaʼinsat chaa Canaán, chaa naʼaka na caldeokana. Nnojotpajaʼa talatüin paaʼin sünainjee paainjala. ³⁰ Anuu nünüiki Jeʼwaa: «¡Jashichishi maʼin taya pümüin saaʼujee paaʼinrüin tia, saainjala wayuu maaʼinsat tü kasa paaʼinrakat! ³¹ Apaʼawajaasü pia ipa sotpaʼa wopu jee piʼitaain shiyaakua wanee kasa aʼwaajünajatka chaa pülaasapaʼa, eepejeʼe wanee kasa naataka atuma pia suulia wanee maaʼinsat, piyoutuin puwalaajünüin saaʼu tü paaʼinrakat. ³² Jamüsüjaʼa wanee wayuu eeka kakuwaʼipain nuulia chi suʼwayuusekai, amaʼüjiraasü shia sukuwaʼipa nümaa wanee wayuu naata nuulia. ³³ Asülajüna amüinrü wanee wayuu maaʼinsat, aluʼuinjaʼa piakat pia neʼe asülajaka kasa namüin na napüshuaʼa na wayuu amaʼüjiraakana akuwaʼipa pümaa. Walaashii naya putuma süpüla nantajanain pünainmüin süpüla wanaawain naya pümaa. ³⁴ Naata maʼin pukuwaʼipa suulia tü wanee jieyuu amaʼüjiraakat sukuwaʼipa, nnojotpejeʼe wayuuin maaʼinsat pia paashin, kekiriasü pia sümaa nnojoluin kasain aapünüin pümüin, shia naataka aluʼujee pia tia suulia tü wanee jieyuu maaʼinsatkalüirua.› ³⁵ »Jülüjataa joo paaʼin nünüiki Jeʼwaa pümüin piaka maaʼinsatka. ³⁶ Anuu nünüiki Jeʼwaa chi Miyoʼushikai saaʼu kasa süpüshuaʼa: ‹Saaʼujee amüloulin tü paʼanasiakat otta saaʼujee jaʼyainpain pukorolo wanaa sümaa pümaʼüjiraain pukuwaʼipa namaa na makana amaa pia otta sümaʼaleʼeya tü maleiwayaasükalüirua paʼajakalü amüin puchon sümaa amülain nasha. ³⁷ Takotchojeena napüshuaʼa na pümaʼüjiraakana amaa, na kamalainkana amüin pia, takotchojeena namaa na püʼürülakana, tooteena naya pooʼomüin, jee neʼreerü pukorolo jee jaʼyeerü pia. ³⁸ »›Süsaleerü pia paainjala tatuma maʼaka saaʼin jierü amaʼüjiraaka sukuwaʼipa, teeʼiyateerü taashiain pümüin saaʼujee tachumüjüin. ³⁹ Taapeerü pikii namüin, najaʼttireerü tü ipa püpaʼawajaakat jee tü ayaakuaa aʼwaajünakat, jee namasheʼinjeerü pia otta nasüteerü tü korolo anakat atuma piyolojo, napüteerü pia sünain masheʼinwaa. ⁴⁰ Najüteerü watta naalii wayuu pooʼomüin, naʼinnaʼaleerü pia süka ipa otta noʼyotoojeerü pümüla süka chajaruuta. ⁴¹ Naʼajeerü pipia jee süsaleerü pia paainjala natuma suʼupala wainma jieyuu, tooʼuleʼereerü pia suulia maaʼin paaʼin jee nnojoleerü kekiriain pia. ⁴² Otta ojoloweechi taya suulia jashiee, nnojoleechi taya achunjuin. Jimateechi neʼe taya jee nnojoleechi taya jashichin›.

JUULIOʼU 17-23

KOROLO KOJUTUSÜ SULUʼUKA TÜ WIWÜLIAKAT EZEQUIEL 18-20

«Nnojotsü sotuin naaʼin Jeʼwaa piantua waainjala»

(Ezequiel 18:19, 20) »›Jee meena jia: «¿Jamüshi nnojoluinjachika nuwalaajüin wanee wayuu saaʼujee naainjala chi nüshikai?». Akaajasaʼa chi nüchonkai, lotusü nukuwaʼipa otta naainjain tü taluwataakalü anain. ²⁰ Chi wayuu eekai kaainjalain, outeechi. Wanee wayuu nnojoleechi awalaajüin naainjala nüshi otta wanee wayuu nnojoleechi awalaajüin naainjala nüchon. Asouteechi chi anamiakai saaʼu tü kasa naainjaka otta chi mojulaashikai asouteechi saaʼu tü mojukat nutuma.

w12-S 1/7 süp. 18 püt. 2

Nnojotsü sotuin naaʼin Jeʼwaa piantua waainjala

Nüküjain Jeʼwaa nükajee Ezequiel tü kasa alatajatkat sümüin Judá otta sümüin Jerusalén. Nnojoishi naʼwaajüin Jeʼwaa napüshuaʼa na judíokana otta joutsü maʼin tü mojulawaakat. Nüküjatüjülia Jeʼwaa sajaʼttinnajatüin Jerusalén natuma na babiloniokana jee nüküjaleʼeinya nasoutajanain na judíokana waneʼewai nakua saaʼu tü kasa naaʼinrakalü otta tü kasa naneekakat (wetsiikulo 19 otta 20).

(Ezequiel 18:21, 22) Niyaawajaale wanee wayuu eekai mojulaain suulia naainjala jee noonoole sümaa tü taluwataakalü anain otta lotule sukuwaʼipa wanee kasa nutuma, ayateechi katüin oʼu. Nnojoleechi outuin. ²² Nnojoleerü sotuin taaʼin tü kasa mojusü naainjakat paala. Ayateechi katüin oʼu süka lotuin nukuwaʼipa.›

(Ezequiel 18:23) »Anuu tü nümakat Jeʼwaa: ‹¿Talatüsüsa taaʼin outule wane wayuu saaliijee naainjala? ¿Shiataapa anain tamüin niyaawajaale suulia naainjala süpüla katüinjatüin noʼu?›

(Ezequiel 18:32) »‹Anuu tü nümakat Jeʼwaa: «Nnojoireejaʼa süpüla talatüin taaʼin saaʼu outuin wanee wayuu. Shia anaka aluʼu müleka niyaawajaale suulia naainjala süpüla katüinjatüin noʼu›».

w08-S 1/4 süp. 8 püt. 4

Sajaʼttireerü Armagedón süpüshuaʼale tü atkawaakat

Süka niain Jeʼwaa chi kasalajanaka atuma saainjala wayuu, lotoshaatasü sukuwaʼipa wanee kasa nutuma, meeria nutuma kasalajanapa saainjala wayuu nutuma. Müsü nünüiki Abrahán: «Pia kasalajanaka atüma sümüin saainjala wayuu sainküin mmakat süpüshua, acheküshi paaʼinrüin waneepia tü anasükat». Niʼrüin Abrahán lotuin maʼin nukuwaʼipa Jeʼwaa waneepia (Génesis 18:25). Saashin tü Wiwüliakat nnojotsü anain nümüin Jeʼwaa outajachin wanee wayuu eekai kaainjalain. Najaʼttirüin naya Jeʼwaa müleka nnojorüle nayaawajaain suulia naainjala (Ezequiel 18:32; 2 Pedro 3:9).

w06-S 1/12 süp. 27 püt. 11

Kasa waaʼinrajatka süpüla weeʼiyatüin alin wapüla na wayuukana

¹¹ Washatüinjatü nukuwaʼipa Jeʼwaa süpüla weeʼiyatüin naalin namüin na wayuu nnojoliikana aʼyataain nümüin Jeʼwaa. Mayaainjeʼe üttüin naaʼin Jeʼwaa sünain tü kasa mojusükat, kamaneeshi nia namüin na kaainjaraliikana süpüla nooʼulaain suulia tü kasa mojusü naaʼinrakat süpüla nasaʼwatüin tü kataakalü oʼu waneepia (Ezequiel 18:23). Nnojotsü nücheküin amülouilinjatüin wayuu saaliijee nnojolüin mayaawajaain suulia saainjala (2 Pedro 3:9). Keeʼireesü naaʼin «suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat» (1 Timoteo 2:4). Müshijeseʼe nuluwataain Jesuu na nikirajüinkana süpüla naküjainjanain pütchi sümüin wayuu maʼleekalia jee nekirajüin naya süpüla nanoujainjanain (Mateo 28:19, 20). Waküjapa pütchi weeʼiyatüin alin wapüla chi Meleiwakai otta alin wapüla na wayuukana namaʼaleʼeya na waʼünüükana.

Püchajaa süchiki kaaʼürüi suluʼu tü Wiwüliakat

(Ezequiel 18:29)»›Meerü nanüikin na israeliitakana: «Nnojotsü anain tü nüpünakat Jeʼwaa». ¿Shiimainchejeʼe nnojoluin anain tü tapünakat jaashin jiakana chakana Israel? ¿Nnojoishisaʼa jiain na mojukana apüna?›

(Ezequiel 20:49) Tamaka jooluʼu: «¡Jeʼwaakalee, piakai miyoʼushikai saaʼu kasa süpüshuaʼa! ‹Ashajüshi pütchi kanüliaka proverbios› müshii neʼe na wayuukana tachiki».

w07-S 1/7 süp. 14 püt. 3

Pütchi anaka maʼin sünainjee tü karaloʼutakat Ezequiel (shiʼipa 1)

20:1, 49. Jaʼyasü saaʼu nakuwaʼipa na laülaashii chajanakana Israel nayoutuin tü pütchi nüküjakalü achiki Ezequiel namüin. Jalia waya suulia washatüin nakuwaʼipa naya wayuukana.

Wetsiikulo aashajeʼennajatka

(Ezequiel 20:1-12) Soʼu tü juyakat akaratshikat, soʼu kashikat jaʼrai wanaa nümaa chi kaʼikai polookai, antüshi na laülaashii chajanakana Israel süpüla naapüin tü nümakat Jeʼwaa, naikkalaaka taʼatoʼu. ² Nümakalaka Jeʼwaa tamüin: ³ «Paashajaa namüin na laülaashii yaakana Israel, maa pünüiki namüin: ‹Anuu tü nümakat Jeʼwaa chi Miyoʼushikai saaʼu kasa süpüshuaʼa: «¿Aashin antüin jia süpüla jaapajüinjatüin tü tamüinjatkat jümüin? ‹tamüshii paala jia taya chi Miyoʼushikai saaʼu kasakat süpüshuaʼa »nnojoleerü jamüin tanüiki jümüin»› ⁴ »¿Jameerü joo pünüiki namüin? ¿Piiʼiyata namüin neʼrüliin maʼin wayumüin? Püküja namüin süchiki tü kasa mojusü maʼin naaʼinrakat na natuushinuukana. ⁵ Maa pünüiki namüin: ‹Anuu tü nümakat Jeʼwaa chi Miyoʼushikai saaʼu kasakat süpüshuaʼa: «Soʼujeʼereʼeya maʼin tü kaʼi taneekakalü oʼu na Israeliitakana, tayalerüin tajapü otta taapüin tanüiki namüin. Shiimain tayalerüin tajapü jee taapüin tanüiki nümüin chi nuuʼuliwoʼukai Jacob, teʼraajirüin naya tü tanüliakat chaa suluʼu tü mmakat Egipto. Taapüin tanüiki namüin sünain maa: ‹Taya Jeʼwaa chi jümaleiwasekai. ⁶ Soʼu kaʼikat tia, tayalerüin tajapü jee taapüin tanüiki namüin sünain tayüʼlüin naya Egiptojee suluʼumüin wanee mma anasü taneekakat napüla wanee mma eere amülaain mapa otta leechi, tia mmakat shia saʼanasia süpüshuaʼale tü mmakalüirua. ⁷ Tamakalaka namüin waneʼewai nakua: ‹Anasü müleka jujutüle tü kasa kashüülasükat, nnojo jiʼyarülajaain jukuwaʼipa namaa namaleiwase na chakana Egipto. Taya Jeʼwaa chi Jümaleiwasekai.› ⁸ »›»Akanasaʼa nayakana, eʼrüijaashii wayumüin tamüin, nnojoishii jaa müin tamüin. Nnojotsü nojutüin tü kasa kashüülasü eejatkat namaʼana jee ayatüshii naya sünain aʼwaajaa tü maleiwayaasü nnojotkat kasain anain apüla chajatkat Egipto. Tamaka namüin müliainjanain naya tatuma otta neʼrüinjatüin noʼukajatü chaa Egipto. ⁹ Tü kasa taaʼinrakat, taaʼinrüin suulia mojutuin atumawaa tanülia natuma na wayuu kaʼakajanakana jia, saaʼu teʼraajirüin tanülia namüin wanaa sümaa tayuʼlüin jia suluʼujee Egipto. ¹⁰ Makalaka tayuʼlüin jia Egiptojee isashiipaʼamüin. ¹¹ »›»Taküjaka namüin tü jaaʼinrajatkat süpüla anainjatüin nukuwaʼipa chi wayuu oonookai sümaa, süpüla katüinjatüin noʼu. ¹² Taneeküin tü kaʼikat saawanoʼu süpüla shiyaawasein namüin tayain Jeʼwaa chi wulekai atuma naya.

JUULIOʼU 24-30

KOROLO KOJUTUSÜ SULUʼUKA TÜ WIWÜLIAKAT EZEQUIEL 21-23

«Niainjachi aluwataaka chi shiimainshikai maʼin nuuʼuliwoʼuin David»

(Ezequiel 21:25) Otta müshia piakai aluwataakai saaʼu Israel, chi mojulaashikai maʼin, amayeijünüshi pia, alüʼütsü pükalia süpüla ajaʼttinnaa.

w07-S 1/7 süp. 13 püt. 11

Pütchi anaka maʼin sünainjee tü karaloʼutakat Ezequiel (shiʼipa 1)

Soʼu Juyakat 611 Sü. W., akaratshipa juya na judíokana chaa Babilonia, antüshii na laülaashiikana naʼakajee israeliitakana nünainmüin Ezequiel süpüla nüsakirüin nia sünain nünüiki Jeʼwaa. Nüküjaka Ezequiel namüin neʼrüliijaain wayumüin na israeliitakana paala jee nüküjain namüin najaʼttirajanain naya Jeʼwaa (Ezequiel 20:1; 21:3). Nüküjain nünüiki Jeʼwaa nümüin Sedequías chi aluwataakai saaʼu Israel, müshi nia: «Püsünneʼera puulia tü pikiyaalajakat jee tü kotsekat. Aʼwanajaweerü shia. Anasü yaletüle atumawaa tü kasa eekat wünaapünaa jee anasü wünaapünaale atumawaa tü kasa eekat iipünaa. Tajaʼttireerü, tajaʼttireerü shia. Otta müsia nnojoleerü jaralüin aapünüin amüin tü aluwataayakat, waneʼereʼeya nüntapa chi shiimainshikai kapülajachin shia [Jesucristo], nieechi taapaka amüin shia» (Ezequiel 21:26,27, TNM).

(Ezequiel 21:26) Püsünneʼera puulia tü pikiyaalajakat jee tü kotsekat. Aʼwanajaweerü shia. Anasü yaletüle atumawaa tü kasa eekat wünaapünaa jee anasü wünaapünaale atumawaa tü kasa eekat iipünaa.

w11-S 15/8 süp. 9 püt. 6

Nia naʼatapajaka chi Mesíaskai

⁶ Nuuʼuliwoʼu nia Judá. Nüküjain Jacob süpülapünaa outuin nia tü kasa anasü neʼrüinjatkat na nüchonniikana. Müinjatü nukuwaʼipa Judá naashin: «Otta piakai Judá, pieechi aneekünaka süpüla aluwatawaa süka tü wunuʼu najapuluʼukat wanee aluwataai. Jee aluwataajeechi pia waneepia nüntaleepa Siló. Jüüjüweerü pueulokalüirua süpüshuaʼa nümüin» (Gén. 49:10, TNM). Nia aashajaanaka achiki Jesuu sünain türa pütchikat, tia shia tü namakat waneinnua judío ekirajaakana süchiirua. ¿Kasa kayaawaseka tü wunuʼu najapuluʼukat wanee aluwataai? Shiyaawasesü niain aluwataain. Saashin tü pütchikat nayainjana aluwataaka na nuuʼuliwoʼukana Judá, oʼttatüjülia tia nüikalaaiwaʼaya David sünain aluwatawaa. ¿Jamaluʼulu tü anülieekat Siló? «Chi kamüinjachikai», maluʼulu. Chi kanüliakai Siló niainjachi wanee nuuʼuliwoʼu Judá jee aluwataainjachi nia waneepia. Süpüla wayaawatüin naaʼu jaralin chia kanüliakai Siló, jülüjeesü waaʼin tü nümakat Jeʼwaa nümüin Sedequías chi chiiruaajachikai aluwataain saaʼu Jerusalén. Nüküjain nümüin eeinjachin chi shiimainshikai kamüinjatüin tü aluwataayakat jee niainjachi aluwataaka (Eze. 21:26, 27). Nia neʼe Jesuu chi nuuʼuliwoʼukai David nüchikumüinka Sedequías. Anuu nünüiki chi aapiee kanüliakai Gabriel sümüin María: «Aneekuushi chi joʼuukai nütüma Maleiwa süpüla nuluwataainjatüin tü wayuu judíokalüirua, tü nuuʼuliwoʼukalüirua Jacob, maa aka nuluwataapüʼüin paala sümaiwa chi putuushikai David. Müichia nnojolin ooʼulaain suulia aluwatawaa» (Luc. 1:32, 33). Watüjaaitpa aaʼu niain Jesuu chi kanüliakai Siló, nuuʼuliwoʼu nia Judá nümaa David (Mat. 1:1-3, 6; Luc. 3:23, 31-34).

(Ezequiel 21:27) Tajaʼttireerü, tajaʼttireerü shia. Otta müsia nnojoleerü jaralüin aapünüin amüin tü aluwataayakat, waneʼereʼeya nüntapa chi shiimainshikai kapülajachin shia, nieechi taapaka amüin shia.

Püchajaa süchiki kaaʼürüi suluʼu tü Wiwüliakat

(Ezequiel 21:3) Jee müinjachi pia sümüin Israel: ‹Anuu nünüiki Jeʼwaa: «¡Kaatei!, anii taya pooʼomüin, tayuuteerü tü tachajaruutsekat jee toʼuteechi aaʼin chi eekai anamiain nümaʼaleʼeya chi eekai mojulaain.

w07-S 1/7 süp. 14 püt. 1

Pütchi anaka maʼin sünainjee tü karaloʼutakat Ezequiel (shiʼipa 1)

21:3. ¿Kasa kayaawaseka tü «chajaruuta» niyuutakat Jeʼwaa? Nia kayaawaseka shia Nabucodonosor namaa na nusurulaatsekana, nüneeküin naya Jeʼwaa süpüla najaʼttirüin Jerusalén sümaa Judá. Otta shiyaawasesü shia tü nupueulose Jeʼwaa chakat iipünaa, eere na aapiee pülashiikana maʼin.

(Ezequiel 23:49) Jee nantireerü jaʼakamüin tü nakuwaʼipa yarüttakat maʼin, otta jieena asoutaka saaʼu naainjala na namaleiwaseyaakana. Jütüjaweetka saaʼu tayain Jeʼwaa, chi Miyoʼushikai saaʼu kasa süpüshuaʼa›».

w07-S 1/7 süp. 14 püt. 6

Pütchi anaka maʼin sünainjee tü karaloʼutakat Ezequiel (shiʼipa 1)

23:5-49. Naʼwaajüin neʼe maleiwayaasü na chajanakana Israel otta Judá sutuma wanaawain na aluwataashiikana namaa na aluwataakana suluʼu tü mma kepiakat naʼütpünaa. Eeja waaʼin suulia saʼaniraain wakuwaʼipa namaa na manoujainsaliikana süpüla nnojoluin seemiajaain wanoula (Santiago 4:4).

Wetsiikulo aashajeʼennajatka

(Ezequiel 21:1-13) Jee ayatakaʼaya naashajaain Jeʼwaa tamaa sünain maa: ² «Piirakaa sümüin Jerusalén jee püküja tü alatajatkat sümüin tü piichi aʼwaajüleekat otta tü alatajatkat sümüin Israel. ³ Jee müinjachi pia sümüin Israel: ‹Anuu nünüiki Jeʼwaa: «¡Kaatei!, anii taya pooʼomüin, tayuuteerü tü tachajaruutsekat jee toʼuteechi aaʼin chi eekai anamiain nümaʼaleʼeya chi eekai mojulaain. ⁴ Tayuuteerü tachajaruutse süpüla toʼutüin naaʼin chi eekai anamiain nümaa chi eekai mojulaain chejee uuchijee chamüinreʼeya palaamüin. ⁵ Jee natüjaweerü aaʼu napüshuaʼa na wayuukana tayain tayakai Jeʼwaa ayuutaka tachajaruutse. Nnojoleerü tanaajaain süchikuaʼa»›. ⁶ »Jee müshia piakai, püsanala paaʼin sümaa kutkuttüin piyatapünaapünaa. Püsanalüinjatü paaʼin noʼupala sümaa jashichin pia. ⁷ Shiasaʼa müle nanüiki pümüin: ‹¿Jamüshi püsanatka paaʼin?›, meechi pia neʼipajee: ‹Süchiki wanee kasa aküjünaka tamüin›. Shiimain eejeerüin tia, mmoleena maʼin napüshuaʼa na wayuukana, nnojoleerü kasain anain apüla tü najapükat, mojeerü maʼin naaʼin, shotteerü neʼe shira nasapain. ‹Kaatei! Shiimain shikeraajeerüin tia›, müsü nünüiki Jeʼwaa, chi Miyoʼushikai saaʼu kasa süpüshuaʼa». ⁸ Jee ayatakaʼaya naashajaain Jeʼwaa namaa sünain maa: ⁹ «Anashi püküjale tü kasa alatajatkat jee müinjachi pia: ‹Anuu nünüiki Jeʼwaa: «maa pünüiki: ‹¡Anuu wanee chajaruuta, anuu wanee chajaruuta! Akasajünüsü jee Aasajünüsü shia. ¹⁰ Aasajünüsü süpüla süchotoonüin sümüla wayuu süka jee aasajünüsü süpüla jorottuin shia›»›». «¿Talateenache waya saaliijee tia?» «‹¿Nayoutüinche tü wunuʼu najapuluʼukat chi tachon aluwataainjachikai maʼaka naaʼinrüin shia süka wunuʼulia eekai eein? ¹¹ »›Eeshi chi aapakai shia süpüla saasajünüin, jee süpüla najapuluʼuin shia wayuu. Chajaruutakat tia aasajünüsü shia süpüla saapünüin nümüin wanee wayuu süpüla outaa saaʼin wayuu. ¹² »›Anashi puʼwaatüle, anuu tia chajaruutakat sooʼomüin tapueulose, anuu nooʼomüin na laülaashiikana saaʼu Israel. Nayeena outaka na wayuu suluʼukana tapueulose. Anashi puʼwatüle püpüʼü. ¹³ Ajaʼttinnüsü wayuu, ¿jama joo niyoutule tü wunuʼu najapuluʼukat wanee aluwataai? Nnojoleechi nia katüin oʼu›, müsü nünüiki Jeʼwaa chi Miyoʼushikai saaʼu kasa süpüshuaʼa.

JUULIOʼU 31- AKOOSÜTOʼU 6

KOROLO KOJUTÜSÜ SULUʼUKA TÜ WIWÜLIAKAT EZEQUIEL 24-27

«Akatchinraasü wanoula sünain nünüiki Jeʼwaa sutuma tü alatakat sümüin Tiro»

(Ezequiel 26:3, 4) Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Tiro, anii taya pooʼomüin, shiimain tajüteerüin pooʼomüin watta saalii pueulo maʼaka saaʼin süshi tü palaakat. ⁴ Jee najaʼttireerü süsepü Tiro jee nojuttireerü tü toore eekat chayaa, meerü tepitajakai saaʼin tü mmakat chaa sümaʼanajee, jorotteerü neʼe tü suumainkat sümaa tü ipa chakat suluʼu.

si-S süp. 133 püt. 4

Karaloʼuta suluʼujeejatü tü Wiwüliakat, nuumero 26: Ezequiel

⁴ Shiimainsü maʼin tü nüshajakat Ezequiel, wayaawata aaʼu tia sükajee shikeraajüin tü nüshajakat paala süchiki Tiro, Egipto sümaa Edom. Nüküjain Ezequiel sajaʼttinnajatüin Tiro. Ekeraajüsü süpüshi tia pütchikat wanaa sümaa nushutuin Nabucodonosor saaʼu süchikijee nuutkajüin paala shia soʼu 13 juya (Eze. 26:2-21). Nnojotpejeʼe ajaʼttinnareʼeinya Tiro. Nüküjapejeʼe Jeʼwaa paala sajaʼttinnajatüin süpüshuaʼaleʼeya. Anuu nünüiki Jeʼwaa paala nükajee Ezequiel: «Meerü tepitajakai saaʼin tü mmakat chaa sümaʼanajee, jorotteerü neʼe tü suumainkat sümaa tü ipa chakat suluʼu. [...] Eʼitaaneerü shiroku tü wüinkat tü ipakat, sümaa tü taapüla pümaʼanajatkat jee müsia tü mmakat» (Ezequiel 26:4, 12, TNM). Ekeraajüsü tia 250 juya süchikijee süküjünüin. Ashutushi Alejandro Magno saaʼu Tiro wanaa sümaa chajatüin shia pasanain sünain tü palaakat. Nakotchojoko na nusurulaatsekana Alejandro tü ipa apütaakat süchikijee sushutunüin aaʼu paala otta nojutaka shia shiroku tü palaakat, naainjaka wanee wopu yaletüsü süka. Eesü maʼaka 800 meetüro tia wopukat chamüinreʼeya Tiro. Shiasaʼa noutkajapa shia, naʼaliikajaaka sooʼopünaa tü süsepükat, eetaasü maʼaka 46 meetüro sajaʼapüin jee nekerotoko suluʼumüin soʼu juyaka 332 Sü.W. Watta naalii na wayuu outakana jee wainma na oikünakana süpüla achepchieein naya. Ekeraajüsü tü nümakat Ezequiel paala, ipa neʼe tü eejatkat Tiro jee awayajiasü shia tü kusu olojiakat (26:14). Otta müshiʼiya na edomitakana, chajana kepiain wane saʼata Israel, ajaʼttinnüshii naya maʼaka nüküjain Ezequiel süka mojulaain maʼin naya (25:12, 13; 35:2-9). Jee müsia ekeraajüsü tü nümakat Ezequiel süchiki sajaʼttinnajatüin Jerusalén otta sukumajünajatüin Israel süchikuaʼa (17:12-21; 36:7-14).

(Ezequiel 26:7-11) »Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Kaatei, tantireechi Nabucodonosor sooʼomüin Tiro, chi aluwataakai saaʼu Babilonia, seechi nia palaajee, nia laülaaka saaʼu tü aluwataasükalüirua, eejeerü ama nümaa, eejeerü kareeta süpülajatü atkawaa, eejeena surulaat amaajuna, watteerü saalii wayuu nümaa. ⁸ Noʼuteerü aaʼin süka chajaruuta tü wayuuirua kepiakat wünaʼapü, jee noutkajeerü pia, meerü aka saaʼin süsepü pueulo tia natameʼerakat pooʼomüin, miyoʼushaateerü maʼin tia. ⁹ Jee neʼitaweerü maakina süpüla najuttirüin süsepü Tiro sümaa najuttireerüin tü toorekat süka chajaruuta. ¹⁰ Shiasaʼa sutuma wattain maʼin saalii tü amakat, nnojoleerü kasain shiʼrüin wayuu saaʼujee kaitteerüin tü mmakat sutuma suuʼui tü amakat. Akutkujaweerü süsepü sutuma nooʼuisana na surulaatkana jee suuʼuisana ama sümaa kareeta, alateerü tia nikerotapa suluʼumüin maʼaka nikerotuin wanee wayuu jutatüle wanee pueulo nüpüla. ¹¹ Ajaʼtteerü tü kaayekat sutuma suuʼui tü amakalüirua. Oʼutuneena aaʼin na wayuukana süka chajaruuta jee ajuichijaweerü süsaʼa tü pueulokot, tü ajapuluʼujakat paala shia.

ce-S süp. 216 püt. 3

¿Nünüikiche Maleiwa tü Wiwüliakat?

³ Süshaʼwajülepuʼu anua Tiro, eʼraajünapuʼusü maʼin shia, süpüshi shia Fenicia. Eʼrülii wayumüin naya namüin na Israeliitakana eere na wayuu aʼwaajüliikana Jeʼwaa, chapuʼusü Israel süʼütpaʼa Tiro. Nüküjaka Jeʼwaa nükajee wanee nünüikimaajachi kanüliashi Ezequiel, sajaʼttinnajatüin Tiro, nüküjatüjülia tia 250 juya paala. Müsü nünüiki Jeʼwaa: «shiimain tajüteerüin pooʼomüin watta saalii pueulo [...] Jee najaʼttireerü süsepü Tiro jee nojuttireerü tü toore eekat chayaa, meerü tepitajakai saaʼin tü mmakat chaa sümaʼanajee, jorotteerü neʼe tü suumainkat sümaa tü ipa chakat suluʼu. Jee awayajiasü shia tü kusu olojiakat pasanain sünain palaa». Nüküjaleein Ezequiel jaralinjatüin tü pueulo ashutajatkat palajana saaʼu Tiro otta kasainchin nünülia chi shikiipüʼükai tia pueulokot, müshi nia: «Tantireechi Nabucodonosor sooʼomüin Tiro, chi aluwataakai saaʼu Babilonia» (Ezequiel 26:3-5,7 TNM).

(Ezequiel 26:4) Jee najaʼttireerü süsepü Tiro jee nojuttireerü tü toore eekat chayaa, meerü tepitajakai saaʼin tü mmakat chaa sümaʼanajee, jorotteerü neʼe tü suumainkat sümaa tü ipa chakat suluʼu.

(Ezequiel 26:12) Nasüteerü puulia tü kasa eekat pümaʼana jee naapaweerü tü puikaainkat, najuttireerü süsepü tü pueulokot sümaʼaleʼeya tü piichi anajakat maʼin. Eʼitaaneerü shiroku tü wüinkat tü ipakat, sümaa tü taapüla pümaʼanajatkat jee müsia tü mmakat›.

it-1-S süp. 83

Alejandro

Akanajuushii piantua na surulaat persakana nutuma Alejandro, akanajuushii naya sotpaʼa tü süchikat Gránico jee nakanajuuka nachikuaʼa eeka tü patajatshii kanüliakat Isos, watta naalii na surulaat outakana, eetaashi maʼaka shiatapünaa miyon. Nnojoishi oʼunüin Alejandro nachiirua, shia nuʼunaka ooʼomüin Tiro. Aküjünatüjülia paala sujuttinnajatüin süsepü Tiro sümaa tü toore chajatkat jee müsia tü miichikat otta ojutunajatü shia shirokumüin tü palaakat (Eze 26:4, 12). Nükotchojüin Alejandro tü ipa apütaakat süchikanain Tiro eeiwaʼaya shia sotpaʼa palaakat süpülapünaa najaʼttirüin shia Nabucodonosor. Nukumajaka Alejandro wanee wopu shirokupünaa palaaka, antaleesia shia eemüin Tiro, chajatü shia pasanain sünain palaaka, 800 meetüro tia wopukot. Ashutushi nia saaʼu süka anua sümaa niʼitaain maakina atkaaya, najaʼttiraka Tiro soʼu juyaka 332 Sü.W., süchikijee suʼwaataain paala saaʼujee pasanain shia sünain palaa.

Püchajaa süchiki kaaʼürüi suluʼu tü Wiwüliakat

(Ezequiel 24:6) Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹¡Mojuinjatü maʼin sukuwaʼipa tü pueulo amülakalü aluʼu isha, tü makalü aka wayeeta jerutka aanükü, kachaʼasü suluʼupünaa, nnojotsü aakatüin tia suulia! Paakata tia suulia shiʼipawai, nnojotsü ashantanajiraanajatüin aaʼu.

(Ezequiel 24:12) ¡Watta saalii kasa suluʼu! Ajaʼlajüsü naaʼin wanee wayuu sünainjee, nnojotpejeʼe aakatayaain tü kachaʼasükat sünainjee. ¡Paʼajapan sümaʼaleʼeya tü kachaʼasü sünainkat!

w07-S 1/7 süp. 14 püt. 2

Pütchi anaka maʼin sünainjee tü karaloʼutakat Ezequiel (shiʼipa 1)

26:6-14. ¿Kasa kayaawaseka kachaʼain tü wayeetakat? Wanaa sümaa suutkajünüin Jerusalén, müsü aka saaʼin wanee wayeeta eekai jeruluin maʼin saanükü, kachaʼasü shia münüsü, tia shiyaawasesü tü kasa yarüttüsü naaʼinrakat na wayuu chajanakana Israel otta süka noʼutulin saaʼin wayuu. Nnojoluinjana naya ooʼulaain suulia aaʼinraa kasa kashüülasü maʼin maʼaka nnojoluin jorottajatüin wanee wayeeta eekai kachaʼain jaʼitairü süpütünüin saaʼu tü sikikat sümaa maluʼuin shia.

(Ezequiel 24:16, 17) «Kaatei, tasheʼeteerü puʼupala tü kasa kapülakat saaʼin wayuu süpüla tasünneʼerüin shia. Nnojoishi pia aʼyaajüinjachin puʼuluuwain saaʼujee tia, nnojoishi aʼyalajüinjachin. ¹⁷ Püsanala paaʼin sümaa yüütüin pia. Nnojotsü mojuinjatüin paaʼin saaliijee outuin wayuu. Piʼitaa pünain pikiyaalaja jee paʼata pünain pukoʼusüin. Nnojo puunjuluin püʼliima, nnojoishi eküinjachin pia pan».

w88-S 15/9 süp. 21 püt. 24

Niyuutuin Jeʼwaa tü nüchajaruutsekat

²⁴ Naatajatüinjatü maʼin nukuwaʼipa Ezequiel (Paashajeʼera Ezequiel 24:15-18). ¿Jamüshi nnojoluinjachika mojuin naaʼin Ezequiel saalii nuʼwayuuse outapa shia? Süpülajatü niiʼiyatüin namüin jamüinjatüin naaʼin na judíokana sajaʼttinapa Jerusalén sümaa tü aʼwaajüleekat jee müshiʼiya na wayuukana. Naapirüin paala Ezequiel na wayuukana, nnojoluinjachika nia aapirüin nüchikuaʼa waneʼereʼeya naapapa süchiki sajaʼttinnüin Jerusalén. Akaajaʼa neʼe maaʼulu, moʼoojeerü tü iküleesia nnojotkat shiimain süntapa sükalia süpüla ajaʼttinnaa. Jee suʼttapa tü «müliaa miyoʼukat», nnojoleerü aapinnüin, süka naapirüin shia paala na chainjanakana iipünaa (Mateo 24.21). Jee najaʼttirüinjanapa naya Jeʼwaa, moʼoojeena naya namaa waneinnua wayuu jee natüjaajeerü aaʼu niain chi kanüliakai Jeʼwaa (Ezequiel 24:19-27).

Wetsiikulo aashajeʼennajatka

(Ezequiel 25:1-11) Jee ayatakaʼaya naashajaain Jeʼwaa tamaa jee sünain maa: ² «Piirakaa namüin na chajanakana Ammón jee püküja tü alatajatkat namüin. ³ Jee müinjatü pünüiki nachiki na chajanakana Ammón: ‹Paapa nünüiki Jeʼwaa, chi Miyoʼushikai saaʼu kasa süpüshuaʼa. Anuu nünüiki Jeʼwaa, chi Miyoʼushikai saaʼu kasa süpüshuaʼa: «Saaʼujee ¡Aej!, jümüin jiʼraiwaʼaya tü aʼwaajüleekat taya süka mojutuin shia atumawaa jee mojuin jünüiki süchiki Israel saaʼujee sajaʼttinnüin otta mojuin jünüiki süchiki Judá sutumajee sümaanüin, ⁴ taapeena ekii jia namüin na wüinpejeʼewaliikana, jee kasepüyaajeerü juumain natuma otta neʼitaweerü piichi aʼwaajülee suluʼu. Nekeerü süchon jüttia sümaa naseerü tü leechi eekat jümaʼana. ⁵ Otta müsia Rabá meerü aka saaʼin shikajaale kameeya, otta müsia Ammón, eemeraweerü anneerü süpaʼa jee jütüjaweerü aaʼu tayain chi kanüliakai Jeʼwaa»›». ⁶ Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Saaʼujee puʼwatüin pajapü jee püsheʼetüin wayuu süka puuʼui otta saaʼujee talatüin paaʼin sümaa püsirajüin süka Israel, ⁷ anii joo taya pooʼomüin, tayuruluin tajapü pooʼomüin süpüla pajaʼttinnüin, taapeerü ekii pia sümüin tü wanee pueulokalüirua, tajaʼttireerü pia saʼakajee tü pueulokalüirua. Yüütaleʼejeeria pia tatuma, pütüjaweetka saaʼu tayain chi kanüliakai Jeʼwaa›. ⁸ »Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Saaʼujee müin sünüiki Moab sümaa Seír: «¡Kaatei! Judá, müsü aka saaʼin tü waneirua pueulokalüirua», ⁹ müshijeseʼe teeʼiyateerüin sümüin tü wanee pueulokalüirua tü kasa eekat süpüla najayatüin anainjee Moab, teeʼiyateerü namüin jalapünaain sülüjüle, tü pueulo anakat maʼin saʼakajee, shieerü teeʼiyataka Bet-jesimot, Baal-meón, otta müsia Quiryataim, ¹⁰ chamüinreʼeya eeka na wüinpüjeʼewaliikana, süʼütpaʼa nepia na chajanakana Ammón, taapeerü ekii shia, nnojoleena sotuin saaʼin wayuu na chajanakana Ammón sainküin tü pueulokalüirua. ¹¹ Jee süsaleena naainjala na chajanakana Moab tatuma jee natüjaweenaka saaʼu tayain chi kanüliakai Jeʼwaa›.