Suluʼu Wekirajaayainjatü sünain tü outkajawaakat, soʼujee settienpüroʼu, eʼitaaneerü wanee jeketü sukuwaʼipa süpüla aküjaa pütchi. «Wekiraja wayuu sünain tü shiimainkat» sünülia. Süpülajatü weeʼiyatüin sümüin wayuu tü shiimain shikirajakalü anain tü Wiwüliakat sükajee wasakirüin naya otta weeʼiyatüin namüin wanee wetsiikulo.

Kamalainre tü pütchikat namüin, wapüteerü napüla wanee karaloukta jee shiale weeʼiyatüin namüin wanee video suluʼu jw.org, waküjeerü namüin waleʼejeenain wachikuaʼa. Anashii waleʼejamaatüle wachikuaʼa nanainmüin. Sukuwaʼipa tü eeʼiyatünajatkat sünain tü outkajawaakat otta tü nekirajüinjatkalü aka na ekirajaashiikana, ayuʼnneerü sünainjee tü karalouktakat What Can the Bible Teach Us? Wanee jeketü sukuwaʼipa tü karalouktakat ¿Kasa shikirajaka maʼin tü Wiwüliakat? suluʼu mapüleein shia. Süka nnojoyülüin eein tia karalouktakat wayuunaikiruʼu, shieerü ekirajünaka aka ¿Kasa shikirajaka maʼin tü Wiwüliakat?, jalouijeerü wamüin süpüla wouyantüin wachikuaʼa otta süpüla wekirajüin wayuu sünain tü Wiwüliakat.

Waneesia neʼe tü wopu sünainmüinkat kataa oʼu waneepia (Mt 7:13, 14). Süka naatawalin sukuwaʼipa wayuu otta naatawalin tü sunoujakalü anain, anainjatü maʼin sukuwaʼipa tü pütchikat watuma süpüla naapaain sümaa (1Ti 2:4). Atüjeena maʼin waya aküjaa pütchi otta ekirajaa wayuu süka tü Wiwüliakat jülüjale waaʼin tü jeketkat sukuwaʼipa süpüla aküjaa pütchi (2Ti 2:15).

Choʼujaasü sümüin wayuu maʼleekalia sümüliajünüin aaʼin (Ec 4:1). Anashii waʼyataale maʼin settienpüroʼu sünain eitajaa tü rewiisütakat Aapiria Wayuu ojuʼiteetkat soʼu kashikat tia, aashajaainjatü süchiki tü amüliajaakat saaʼin wayuu. Weitajeerü maʼin tia rewiisütakat. Waapüinjatü tia karalouktakat namüin na wayuukana süka wamüliajeein naaʼin. Müsüjeseʼe nnojoleerüin wapütüin shia suluʼu wanee miichi eekai yüütüüin wapüla.

TÜ SUKUWAʼIPAINJATKAT WATUMA

«Eesü choʼujaale wamüin wapüshuaʼa wamüliajünüin aaʼin. ¿Kasache amüliajeenaka waya? [Paashajeʼera 2 Corinto 1:3, 4]. Rewiisütakat tüü, aashajaasü süchiki nümüliajüin waya Maleiwa».

Kamalainre sümüin wayuu tü pütchikat otta saapaale tü rewiisütakat:

PIIʼIYATA TÜ VIDEOKOT ¿JAMÜSHII WEKIRAJAAINJANAKA SÜNAIN TÜ WIWÜLIAKAT?

Püküja nümüin pikirajeein nia sünain tü Wiwüliakat.

PÜKÜJA PUUYANTÜINJACHIN PÜCHIKUAʼA

Püsakira nia sünain wanee kasa, püküjeetka shia nümüin wanee pukueena, eeshi süpüla pümüin: ¿Jamüsü nuuʼulaaka Maleiwa müliain wayuu?