Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
TISIENPÜROʼU 4-10
KOROLO KOJUTUSÜ SULUʼUKA TÜ WIWÜLIAKAT SOFONÍAS 1-AGEO 2
«Jüchajaa nüchiki Jeʼwaa süpülapünaa tü nükalia jashichinjachikalü oʼu nia»
(Sofonías 2:2, 3). Süpülapünaa süwasajaain tü aikat, süpülapünaa sülatamaatüin tü kaʼikai maʼaka saaʼin süsawala wanee kasa, süpülapünaa naashichijaain maʼin Jeʼwaa jooʼomüin, süpülapünaa süntüin jünainmüin tü nükalia Jeʼwaa jashichinjachikalü oʼu nia, 3 jüchajaa nüchiki Jeʼwaa, jiakana anamiakana sainküinjee tü mmakat, jiakana aaʼinrakana tü nuluwataakalü anain. Jüchajaa süchiki lotoo akuwaʼipaa, jüchajaa süchiki anamiaa. Eeshiijaʼa juujunneenüle soʼu tü nükalia Jeʼwaa jashichinjachikalü oʼu nia.
w01-S 15/2 süp. 18, 19 püt. 5-7
Jüchajaa nüchiki Jeʼwaa süpülapünaa tü nükalia jashichinjachikalü oʼu nia
5 Eesüjaʼa müle wanüiki: «Woutiisashi taya jee taapüin taaʼin nümüin Jeʼwaa, aküjai taya pütchi nüchiki. Taainjaitpa süpüshuaʼa tü achuntunakat tamüin». Nnojotsü shiain neʼe choʼujaain naapüin naaʼin wanee wayuu nümüin Jeʼwaa. Soʼu nükalia Sofonías nnojoishii oonooin na chajanakana Judá sümaa nünüiki Jeʼwaa mayaapejeʼe naapüin naaʼin nümüin. Makalaka niyoutuin naya Jeʼwaa mapa. Wachajaain Jeʼwaa sükajee ayatüin aleewain waya nümaa otta suluʼuin waya tü nupueulose eekat mmapaʼa. Watüjaainjatü aaʼu kasain jülüjain naaʼin otta jamüin naaʼin. Wachajaain nüchiki Jeʼwaa wanaa sümaa wekirajaain sünain tü Wiwüliakat, wasakirüin waaʼin sünain jee weʼitaain sünain wakuwaʼipa tü watüjakat sünainjee. Aleewajiraashii maʼin waya nümaa Jeʼwaa otta aʼyataweeshii maʼin waya nümüin süka süpüshuaʼa waaʼin wanaa sümaa wachuntashaatain nümüin nuʼunirüin wakuwaʼipa jee wooʼulaain niain oʼunirüin waya chi naaʼinkai (Deuteronomio 6:5; Galacia 5:22-25; Filipos 4:6, 7; Alateetkat Mapeena 4:11).
6 Tü wanee kasa waaʼinrajatkat saashin Sofonías 2:3, shia wachajaain süchiki «lotoo akuwaʼipaa». Eesü tü kasa wanoutaka sünain wakuwaʼipa süpüla woutiisain waya, ayatajatpejeʼe woonooin amaa tü nuluwataakalü anain Maleiwa. Eeshii na anoujashii anakana anoula noʼttaiwaʼaya, amojujaapejeʼe nakuwaʼipa natuma na manoujainsaliikana. Kapüleesü wamüin lotuinjatüin wakuwaʼipa süka pasanain waya sünain wayuu anashiika amüin tü amaʼüjirawaakalü akuwaʼipaa, tü alawaakat jee waneirua kasa eekai mojuin. Wayamüleerü tü kasa mojusü jee mamalainjeerü wamüin waaʼinrüin shia müleka shiale anashiin maʼin wamüin talatüin naaʼin Jeʼwaa watuma. Niyoutuin Jeʼwaa na chajanakana Judá süka nashatüin nakuwaʼipa na wayuu kepiakana naʼütpünaa. Anashi niale washatüin akuwaʼipa Jeʼwaa noulialeʼeya na manoujainsaliikana, weʼitaa sünain wakuwaʼipa tü akuwaʼipaa niʼitaakat Maleiwa wapüleerua (Éfeso 4:24; 5:1).
7 Eesü wanee kasaʼaya waaʼinrajatka saashin Sofonías 2:3 süpüla wounjunnüin soʼu tü nükaliakat Jeʼwaa, achajaainjana waya «anamiaa». Antiraʼawaishii waya weinshi namaa wayuu nnojoliikana anamiain. Mojusü naashin anamiale wanee wayuu, malasü wayuu eekai jüüjüüin naashin. Watta neʼe saalii kasa nachuntaka, jülüjasü naaʼin nakuwaʼipa namüiwaʼa, shia neʼe aaʼinnajatka tü namakat naashin, jee shiainjatü namaʼanaka wanee kasa eekai suchuntaain naaʼin naashin. ¡Mojushaatasü maʼin washatüle nakuwaʼipa naya wayuukana! Shia anaka aluʼu anamiale waya. ¿Jamüsü süpüla wountuin tia? Jüüjüüinjana waya nümüin Maleiwa, nnojotsü yaletüinjatüin waaʼin wachiaanapa jee waainjainjatü tü nümakat.
Püchajaa süchiki kaaʼürüi suluʼu tü Wiwüliakat
(Sofonías 1:8). Soʼu tü takaliakat tayakai, Jeʼwaa, süsaleena tatuma naainjala na aluwataashiikana, jee nüchonnii chi aluwataashikai jee napüshuaʼa na ashatakana naʼanaaya na wayuu naatakana oumain noulia.
w07-S 15/11 süp. 11 püt. 3
Pütchi anaka maʼin sünainjee tü karaloʼutakat Nahúm, Habacuc otta Sofonías
1:8. Eeshii waneinnua judío soʼu nükalia Sofonías, achajaaka sukuwaʼipa süpüla nachekünüin natuma na wanee wayuukana, nashatüin naʼanaaya na wayuu naatakana oumain noulia. Mojushaatasü maʼin maaʼulu, müleka nüshateere wanee anoujashi nakuwaʼipa na manoujainsaliikana.
(Ageo 2:9). »‹Alanaʼaleeinjatü saʼanasiain piichikat tüü suulia saʼanasiain tü piichi eejatkat paala›, müsü nünüiki Jeʼwaa chi wainmakai asurulaatse. »‹Eejeerü jimataa aaʼin yaʼayaa tatuma›, müsü nünüiki Jeʼwaa chi wainmakai asurulaatse.»
w07-S 1/12 süp. 9 püt. 3
Pütchi anaka maʼin sünainjee tü karaloʼutakat Ageo otta Zacarías
2:9 ¿Jamaluʼulu sülanaʼaleʼeinya saʼanasia tü aʼwaajülee nukumajakat Zorobabel suulia tü nukumajakat Salomón? Alanaʼaleesia shia sünainjee apünüinsü kasa: kakaliasü maʼin shia suulia tü nukumajalakat Salomón, chajachi ekirajüin Jesuu suluʼu otta müsia, wainmaleʼeya wayuu aʼwaajaka Jeʼwaa suluʼu tia aʼwaajüleekat. Tü aʼwaajülee nukumajakat Salomón eejatü shia soʼu 420 juya (1027-607 Sü.W.), akaajasaʼa tü süchikumüinkat, alatüsü suulia 580 juya eejatka oʼu shia, soʼujeʼereʼeya tü juyakat 515 Sü.W., sünainmüinreʼeya tü juyakat 70 So.W. Chapuʼushi ekirajüin Jesukürisüto suluʼu otta wattaleʼeya maʼin naalii na wayuu aʼwaajakana Jeʼwaa suluʼu tü aʼwaajülee chiiruaajatkat (Aluwataaushikana 2:1-11).
Wetsiikulo aashajeʼennajatka
(Ageo 2:1-14). Soʼu tü akaratshikat kaʼi, soʼu 21 sükalia kashikat, aashajaashi Jeʼwaa nümüin Ageo chi nünüikimaajachikai, müshi nia nümüin: 2 «Paashajaa maa nümüin Zorobabel chi nüchonkai Sealtiel, chi aluwataakai saaʼu Judá otta nümüin Josué chi nüchonkai Jehozadaq, chi laülaashikai napüleerua na sacerdootekana jee namüin na wayuu apütaakana, müinjatü pünüiki: 3 ‹¿Eeshi wanee jaʼakajee eekai eʼrüin paala saʼanasiain tü piichikat? ¿Jama jooluʼu? Nnojotsü antapünaain saʼanasiain sünainpünaa tü eejatkat, mojutusat neʼe›. 4 »‹Anuu nünüiki Jeʼwaa: Yalayala paaʼin Zorobabel. Otta yalayala paaʼin piakai Josué chi nüchonkai Jehozadaq, chi laülaashikai napüleerua na sacerdootekana.› »‹Yalayala jaaʼin jiakana wayuu sainküinkana mma, anashii jiʼyataale, müsü nünüiki Jeʼwaa.› »‹Eeshi taya jümaa, müsü nünüiki Jeʼwaa chi wainmakai asurulaatse. 5 Soto jaaʼin tü pütchi tapansaajakat jümaa wanaa sümaa jujuintüin Egiptojee, wanaa sümaa eejachin chi taaʼinkai jaʼaka. Nnojo mmoluin jia›». 6 Anuu nünüiki Jeʼwaa chi wainmakai asurulaatse: soʼu paliʼirü kaʼi, tayuunaleerü süchikuaʼa tü sirumatuʼukat jee tü mmakat otta tü mma eekai josoin›. 7 »‹Tayuunaleerü süpüshuaʼa tü pueulokalüirua otta ekeroteerü tü kasa keejiakalü amüinyuu otta alanaʼaleejeeria saʼanasiain piichikat tüü›, müsü nünüiki Jeʼwaa chi wainmakai asurulaatse. 8 »‹Taya laülaakai saaʼu tü pülaatakat otta tü oorokot, müsü nünüiki Jeʼwaa chi wainmakai asurulaatse. 9 »‹Alanaʼaleeinjatü saʼanasiain piichikat tüü suulia saʼanasiain tü piichi eejatkat paala›, müsü nünüiki Jeʼwaa chi wainmakai asurulaatse. »‹Eejeerü jimataa aaʼin yaʼayaa tatuma›, müsü nünüiki Jeʼwaa chi wainmakai asurulaatse.» 10 Soʼu tü kashikat mekietsat, soʼu 24 sükalia kashikat, wanaa sümaa piamain juya Darío sünain aluwatawaa aashajaashi Jeʼwaa nümüin Ageo, chi nünüikimaajachikai, müshi nia nümüin: 11 «Anuu nünüiki Jeʼwaa chi wainmakai asurulaatse: ‹Püsakira maa na sacerdootekana süchiki tü taluwataakalü anain, püma namüin: 12 «Eere wanee wayuu alüʼüjakai asalaa wulesü suluʼu nüsheʼin jee nipettüle süka sot nüsheʼin pan, kisaawa, wiino, seita jee wanee eküülü eekai eein, ¿ayateetche wulein tia sünainjee?»›». «¡Nnojo!», namakalaka na sacerdootekana nümüin. 13 Jee nümakalaka Ageo: «Eetaale wanee wayuu yarüttakai saaliijee nipettüin wayuu outusü, ¿yarütteetche tia kasakalüirua nipettüle shia?». «Yarütteerü», namakalaka na sacerdootekana nümüin. 14 Nusoutakalaka Ageo sünain maa: «‹Müsia sukuwaʼipa pueulokot tüü, otta müsia neʼe nakuwaʼipa na wayuu kepiakana suluʼu tü pueulokot, akaataʼaya neʼe sukuwaʼipa tü kasa jaaʼinrakat jee wanee kasa eekai jiʼitaain yala. Yarüttüsü tia›, müsü nünüiki Jeʼwaa.
TISIENPÜROʼU 11-17
KOROLO KOJUTUSÜ SULUʼUKA TÜ WIWÜLIAKAT ZACARÍAS 1-8
«Naapaainjatü sot nüsheʼin wanee wayuu judío»
(Zacarías 8:20-22). »Anuu nünüiki Jeʼwaa chi wainmakai asurulaatse: ‹Anteerü tü pueulokalüirua otta müshiʼiya na wayuu kepiakana suluʼu; 21 otta na wayuu kepiakana suluʼu wanee pueulo oʼuneena nanainmüin na suluʼukana wane otta meena naya: «Anashii woʼunüle nünainmüin Jeʼwaa süpüla wachuntuin kaaliinwaa nümüin otta wachajaa nüchiki Jeʼwaa chi wainmakai asurulaatse. Otta müshia tayakai, oʼuneechi taya». 22 Wainmeerü pueulo antaka chaa Jerusalén süpüla achajawaa nüchiki Jeʼwaa chi wainmakai asurulaatse, anteena shiiʼiree achuntaa kaaliinwaa nümüin Jeʼwaa›.
(Zacarías 8:23). Anuu nünüiki Jeʼwaa chi wainmakai asurulaatse: ‹Soʼu kaʼikat tia eejeena polooshii wayuu saʼakajee anüikiikat süpüshuaʼa, naapaajeerü sot nüsheʼin wanee wayuu judío, shiimainshaata naainjeerüin tia otta meena naya: «Oʼuneeshii waya jümaa süka waapüin jüchiki sünain eein chi Maleiwakai jümaa»›».
w09-S 15/2 süp. 27 püt. 14
Namaashii naya chi anneetchonkai
14 Müsü nünüiki Jesuu: «Jaaʼinrüle wanee kasa anasü napüleerua na tawalayuukana, müshi tayakai aaʼin jaainjain amüin tia» (paashajeʼera Mateo 25:40, TNM). ¿Kasa eeka süpüla naaʼinrüin na anoujashii kepiainjanakana saaʼu tü mmakat süpüla nakaaliinjain na chainjanakana iipünaa? Nakaaliinjain maʼin naya naʼyataajiraale namaa sünain aküjaa pütchi (Mat. 24:14; Juan 14:12). Maaʼutpünaaya, naya kooʼomüinkana maʼin na yaainjanakana kepiain mmapaʼa. Akaaliinjünüshii na nuwalayuukana Kürisüto natuma na wattakana naalii anoujashii yaainjanakana kepiain mmapaʼa. Eeshii na aneekaka naʼyataainjanain waneepia sünain aküjaa pütchi, naaʼinrüin tia süpüla nakaaliinjain wayuu süpüla nanoujainjanain nünain Jesuu (Mat. 28:19, 20). Soto waaʼin eein süpüla wakaaliinjain müleka wasülajüle süpüshi wanneetse süpüla tü aküjaakat pütchi sainküin mma.
Püchajaa süchiki kaaʼürüi suluʼu tü Wiwüliakat
(Zacarías 5:6-11). Tamakalaka nümüin: «¿Kasa wayu tia?». Nümakalaka tamüin: «Shia tü shimeeriijiakat wanee efá tia». Jee nümakalaka: «Shia nakuwaʼipaka tia sainküin tü mmakat». 7 ¡Kaatei! Ayalennüsü tü shirouse lakayaasükat, aainjuushika süka plomo; eekalaka wanee jierü pasanain sünain tü efaakat. 8 Jee nümakalaka: «Shia tü mojulawaakat tia». Otta nujutaka shia süchikuaʼa suluʼumüin tü efaakat, shiasaʼa süchikijee tia, nujutaka tü pesa aainjuushikat süka plomo saaʼumüin tü efaakat. 9 Shiasaʼa tayaletka tekii jee teʼrakalaka piamasü jieyuu ojuʼitaasü, kawawalasü maʼin tü natünakat, otta tü natünakat müsü aka saaʼin sütüna tü wüchii kanüliakat cigüeña. Jee süchikijee tia nayaletka tü efaakat chaa iipünaamüin. 10 Jee tamakalaka nümüin chi aapiee aashajaakai tamaa: «¿Jalainjatü alüʼüjünüin tia efaakat?». 11 Jee nusoutaka tamüin: «Süpülajatü sukumajünüin wanee shipia suluʼu tü mmakat Sinar, anainjatü maʼin sukumajia otta eʼitaanajatü shia suluʼu tü mma eeinjatkalü aluʼu shia».
(Zacarías 6:1). Tayaletkalaka tekii tachikuaʼa, jee teʼrakalaka pienchisü kareeta ojuʼitaaka pasanainjee sünain piamasü uuchi otta müsia tü uuchikalüirua aainjuushi shia süka cobre.
Wetsiikulo aashajeʼennajatka
(Zacarías 8:14-23). »Anuu nünüiki Jeʼwaa chi wainmakai asurulaatse: ‹«Maʼaka sümaiwa paala jashichin taya namüin na jutuushinuukana jee tajaʼttirüin naya sümaa nnojoluin alin tamüin namüliala, müsü nünüiki Jeʼwaa chi wainmakai asurulaatse, 15 akaajasaʼa tü jülüjakat maaʼulu shia tantirüin kasa anasü nanainmüin na chajanakana Jerusalén jee namüin na chajanakana Judá. Nnojo mmoluin jia»›. 16 »‹Anuu tü kasa jaaʼinrajatkat: jüküjiraainjatü tü shiimainkat otta loto jukuwaʼipa sünain süpüshuaʼa tü kasa jaaʼinrakat jipialuʼu. 17 Nnojo jukumajiraain wanee kasa mojusü nikiira wanee wayuu otta jiyoutaa tü kasa nnojotkat lotuin akuwaʼipa, süka üttüin taaʼin sooʼomüin tia. Müsü nünüiki Jeʼwaa.» 18 Ayatakalaka müin nünüiki Jeʼwaa chi wainmakai asurulaatse: 19 «Anuu nünüiki Jeʼwaa chi wainmakai asurulaatse: ‹Talateerü maʼin naaʼin na chajanakana Judá sutuma naamajüin soʼu tü pienchikat kashi otta sutuma naamajüin soʼu tü jaʼraikat kashi otta sutuma naamajüin soʼu tü akaratshikat kashi otta soʼu tü polookat kashi, eeweerü miʼiraa shikiira tia makalaka anain kojutule maʼin jümüin tü shiimainkat›. 20 »Anuu nünüiki Jeʼwaa chi wainmakai asurulaatse: ‹Anteerü tü pueulokalüirua otta müshiʼiya na wayuu kepiakana suluʼu; 21 otta na wayuu kepiakana suluʼu wanee pueulo oʼuneena nanainmüin na suluʼukana wane otta meena naya: «Anashii woʼunüle nünainmüin Jeʼwaa süpüla wachuntuin kaaliinwaa nümüin otta wachajaa nüchiki Jeʼwaa chi wainmakai asurulaatse. Otta müshia tayakai, oʼuneechi taya». 22 Wainmeerü pueulo antaka chaa Jerusalén süpüla achajawaa nüchiki Jeʼwaa chi wainmakai asurulaatse, anteena shiiʼiree achuntaa kaaliinwaa nümüin Jeʼwaa›. 23 »Anuu nünüiki Jeʼwaa chi wainmakai asurulaatse: ‹Soʼu kaʼikat tia eejeena polooshii wayuu saʼakajee anüikiikat süpüshuaʼa, naapaajeerü sot nüsheʼin wanee wayuu judío, shiimainshaata naainjeerüin tia otta meena naya: «Oʼuneeshii waya jümaa süka waapüin jüchiki sünain eein chi Maleiwakai jümaa»›».
TISIENPÜROʼU 18-24
KOROLO KOJUTUSÜ SULUʼUKA TÜ WIWÜLIAKAT ZACARÍAS 9-14
«Ayataʼaya pia suluʼu ‹tü nasapüshii süʼütpaʼakat tü uuchikat›»
(Zacarías 14:3, 4). »Otta müshia nia oʼuneechi sünain atkawaa sümaa tia pueulokalüirua maʼaka soʼu tü kaʼi nütkaainjachikai oʼu. 4 Jee shaʼwateechi nia soʼu tia kaʼikat saaʼu tü utaikat olivos, tü chakat soʼuluʼu Jerusalén, palaajeeruʼu sünain otta müsia tia utaikat awakajaweerü shiatapünaapünaa, wanaapünaa sümaa eere nujuʼituin chi kaʼikai sünainmüinreʼeya wopumüin. Eejeerü wanee nasapüshii miyoʼu maʼin otta müsia eʼitaaneerü wanee shiʼipa tü utaikat chaa palaajeeruʼu otta tü wane shiʼipakat chaa uuchijeeruʼu.
(Zacarías 14:5). Otta müshiʼiya jiakana, aʼluwataweena saaʼumüin tü nasapüshii süʼütpaʼakat tü taʼuuchisekat, süka süntaleʼeinya tia nasapüshiikat sünainmüinreʼeya Azel. Jee müshiʼiya jiakana aʼluwataweena jia maʼaka juʼluwataain wanaa sümaa sukutkujaain tü mmakat soʼu nükalia Uzías, chi aluwataakai saaʼu Judá. Jee shiimain nünteechin Jeʼwaa, chi Tamaleiwasekai, otta eejeena napüshuaʼa na wulekana akuwaʼipa nümaa.
(Zacarías 14:6, 7). Jee soʼu kaʼikat tia, nnojoleerü luusa eekai anain... meerü aka saaʼin yeelo tü kasakalüirua. 7 Otta tia kaʼikat, atüjaanajatü aaʼu shiain nükalia Jeʼwaa. Nnojoleerü soʼukalin, jee nnojoleerü shia saʼwalin, jee wanaa sümaa aliikain, ajutajaweerü kaʼikat.
(Zacarías 14:12). Anuu tü alatajatkat sutuma tü naaʼinrajatkat Jeʼwaa sümüin süpüshuaʼa tü pueulokalüirua aluwataakat susurulaatse sooʼomüin Jerusalén: Itteerü nata sümaʼainruʼu shaʼwatüin naya otta itteerü tü noʼukot jee müsia tü nayeekat, itteerü neʼe suluʼu naanükü.
(Zacarías 14:15). »Jee meerü sukuwaʼipa tü alatajatkat nümüin chi amakai, sümüin muula, sümüin kameeya jee sümüin püliiki otta sümüin mürüt eekai saʼakain tia piichikalüirua, meeria tü alatakat sümüin.
Püchajaa süchiki kaaʼürüi suluʼu tü Wiwüliakat
(Zacarías 12:3). Otta soʼu kaʼikat tia, meerü aka saaʼin wanee ipa jawatüsü Jerusalén tatuma sümüin süpüshuaʼa tü pueulokalüirua. Shiimain neeshituujeenain napüshuaʼa na apataakana shia otta müsia, akotchojüneerü süpüshuaʼa tü pueulokalüirua sooʼomüin.
w07-S 15/12 süp. 23 püt. 9, 10
Nnojoleena jamajüin waya sutuma tü aainjünakat waka
9 Eesü wanee kasa nüküjaka wamüin Zacarías aashajaaka süchiki jamüin makaʼa mojulaain suluwataaya wayuu namüin na anoujashii shiimainshiikana. Jülüjataa waaʼin tü sümakat Zacarías 12:3, TNM: «Otta soʼu kaʼikat tia meerü aka saaʼin wanee ipa jawatüsü Jerusalén tatuma sümüin süpüshuaʼa tü pueulokalüirua». ¿Jarat tü Jerusalén aashajaanakalü achiki? Shia tü Nuluwataaya Maleiwa chakat iipünaa, tü noʼunajatkalü anainmüin na anoujashii chainjanakana iipünaa (Hebreokana 12:22). Anaayülii saaʼu Mmaka napüshi naya anoujashiikana. Aküjiraashii naya pütchi namaa na anoujashii yaainjanakana kepiain mmapaʼa süpüla süneeküin wayuu tü Nuluwataayakat Maleiwa nnojoliiwaʼaya süntüin sükalia süpüla sajaʼttüin kasa mojusü (Juan 10:16; Alateetkat Mapeena 11:15, TNM). ¿Kasa naainjaka na wayuukana shiʼipajee tia? ¿Kasa naainjaka Jeʼwaa süpüla nükaaliinjain na aʼyataakana nümüin? Anashii wekirajaale sünain jamaluʼuluin tü sümakat Zacarías kapiitulo 12. Sükajee tia shiimainjeerü wamüin nnojoleenain jamajüin na anoujashii chainjanakana iipünaa namaa na anoujashii yaainjanakana kepiain mmapaʼa, jaʼitasü kasain aainjünüin naka.
10 Saashin Zacarías 12:3 eeshituuinjatü tü pueulokalüirua. ¿Jamüsü sukuwaʼipa tia? Nuluwataain Maleiwa süküjünajatüin tü pütchikat süchiki Nuluwataaya otta aküjünüsü shia natuma na Aküjaliikana pütchi nüchiki Jeʼwaa. Tia pütchikat shia anainjatka atuma sukuwaʼipa wayuu, otta müsü aka shia «wanee ipa» eekai jawatüin sümüin tü pueulokalüirua. Müsüjeseʼe nnojoluin naapajeein tia pütchikat jee wainma kasa naainjaka namüin na Aküjaliikana pütchi süpüla nnojoluin saapajünüin süchiki Nuluwataaya Maleiwa. Sünainjee tia, müshii neeshituukai aaʼin jee müshii neʼikaajakai aaʼin. Japüishii neʼe naya saaliijee mojuin sukuwaʼipa tü naaʼinrakat jee mojusü pütchi nachiki. Isasü nachiki nooʼuleʼerüin tü aküjaakat pütchi. Kojutusü maʼin namüin na aküjaliikana pütchi naashajaain süchiki tü pütchi anasükat süchiki Nuluwataaya Maleiwa süpülapünaa sajaʼttüin kasa mojusü (Alateetkat Mapeena 14:6). Anuu nünüiki wanee waaria suluʼu wanee kaatset chaa África: «Amüla neʼe napüleeruaanüin aaʼin naya wayuukana, matüjainsalii ojolowaa suulia aküjaa pütchi na Aküjaliikana pütchi nüchiki Jeʼwaa. Otta kooʼomüinshii maʼin naya».
(Zacarías 12:7). »Otta Müshia Jeʼwaa nuʼtteʼereena palajana na chajanakana Judá, na kipiayaakana loona, tia süpülajatü nnojoluin sülanaʼaleein chaa Judá saʼanasiain nipia David otta naʼanasiain na chajanakana Jerusalén.
w07-S 15/12 süp. 25 püt. 13
Nnojoleena jamajüin waya sutuma tü aainjünakat waka
13 Paashajeʼera Zacarías 12:7, 8. Kepiayaashii loona na arüleejüliikana otta na apünajüliikana chaa Israel. Makalaka nayain jooin süpüla jamajüin atumawaa sushutünüle saaʼu Jerusalén. Tü pütchikat na «kepiayaakana loona chaa Judá», shia süküjeeka achiki nnojoliin suluʼuin piichi miyoʼu na wawalayuu chainjanakana iipünaa. Müshii anooipaʼakai neʼe naaʼin süka naʼyataain maʼin sünain tü aküjaakat pütchi süchiki Nuluwataaya Maleiwa otta naaʼinrüin shia suʼupala wayuu süpüshuaʼa. Nuʼtteʼereena palajana Jeʼwaa na «kepiayaakana loona», süka jooin naya nüpüla Satanaa.
Wetsiikulo aashajeʼennajatka
(Zacarías 12:1-14). Anuu wanee pütchi alatajatka: Anuu nünüiki Jeʼwaa, Chi eʼitaakai shikii tü mmakat, müsü nuwayatkai saaʼin tü sirumatuʼukat jee wayuushi wanee wayuu nutuma: «Müsü nünüiki Jeʼwaa süchiki Israel. 2 Meerü Jerusalén tatuma maʼaka saaʼin wanee iita liantaka atuma tü pueuloirua eekat süʼütpaʼa otta nuutkajeerü Judá sümaa Jerusalén. 3 Otta soʼu kaʼikat tia meerü aka saaʼin wanee ipa jawatüsü Jerusalén tatuma sümüin süpüshuaʼa tü pueulokalüirua. Shiimain neeshituujeenain napüshuaʼa na apataakana shia otta müsia, akotchojüneerü süpüshuaʼa tü pueulokalüirua sooʼomüin. 4 Jee soʼu kaʼikat tia, moʼoojeerü tatuma tü amakalüirua jee mamainneechi tatuma chi naajuchikai, teirakaweena amüin na chajanakana Judá otta nnojoleerü kasain shiʼrüin tatuma tü amakalüirua suluʼujutkat tü wanee pueulokalüirua. 5 Otta meerü nanüiki naleʼeruʼu nekiipüʼü na chajanakana Judá: ‹Katchinshii waya natuma na chajanakana Jerusalén naaʼujee Jeʼwaa chi Namaleiwasekai, chi wainmakai asurulaatse›. 6 Soʼu kaʼikat tia, na nekiipüʼükana na chajanakana Judá, meena aka saaʼin tatuma wanee iita kaluʼusü siki saʼaka wunuʼulia jee maʼaka saaʼin wanee sikoʼu saʼaka wanee pünajüt eiwaʼatkat ashottünaa. Otta ajaʼtteerü tü najapü nekiakat jee tü nepeʼekat na wayuu kepiakana suluʼu tü pueulo eekat naʼütpaʼa. Eejeerü wayuu kepiaka suluʼu Jerusalén, suluʼu tü mma neʼitaanakalü aluʼu, suluʼu Jerusalén. 7 »Otta Müshia Jeʼwaa nuʼtteʼereena palajana na chajanakana Judá, na kipiayaakana loona, tia süpülajatü nnojoluin sülanaʼaleein chaa Judá saʼanasiain nipia David otta naʼanasiain na chajanakana Jerusalén. 8 Jee müsia soʼu tia, nieechi aaʼinmajaka Jeʼwaa na chajanakana Jerusalén, otta müshia chi eekai ashanaain naʼakajee, meechi aka naaʼin David, otta na nüpüshikana David meena aka naaʼin Maleiwa, meena aka naaʼin chi aapiee nümaʼanajeejachikai Jeʼwaa napüleerua. 9 Otta soʼu kaʼikat tia, tajaʼttireerü süpüshuaʼa tü pueuloirua ashutaka saaʼu Jerusalén. 10 »Shiimain takaaliinjeenain otta nachunteenain tamüin na nüpüshikana David otta na chakana kepiain Jerusalén. Shiimain neirakaweechi nümüin Chi asotunakai jee aʼyalajeena naya naalii Chia maʼaka niʼyalajünüin achiirua wanee joʼuu eekai waneeshiain neʼe sümüin nii, otta mojeerü maʼin naalii nüchiirua maʼaka niʼyalajünüin achiirua chi eʼirumaakai. 11 Aʼyalajashaateena maʼin na chajanakana Jerusalén soʼu tia, meerü neʼira maʼaka neʼira na chajanakana Hadadrimón süpaʼa tü nasapüshii eejatkat Meguidó. 12 Müliatuuijeerü saaʼin tü mmakat, aʼyalajayaa meena na wayuukana sümaa napüshi, aʼyalajeena na nüpüshikana David namüiwaʼa jee aʼyalajeena na jieyuu napüshikana namüiwaʼaya; aʼyalajeena na nüpüshikana Natán namüiwaʼa, akaataajaʼa na jieyuukana, aʼyalajeena namüiwaʼa; 13 aʼyalajeena na nüpüshikana Leví namüiwaʼa jee aʼyalajeena na jieyuu napüshikana namüiwaʼaya; aʼyalajeena na nüpüshikana Simeí namüiwaʼa otta aʼyalajeena na jieyuu napüshikana namüiwaʼaya; 14 aʼyalajeena napüshuaʼa na wayuu apütaakana sümaa napüshi otta na jieyuu saʼakajanakana napüshi, aʼyalajeena namüiwaʼa.
TISIENPÜROʼU 25-31
KOROLO KOJUTUSÜ SULUʼUKA TÜ WIWÜLIAKAT MALAQUÍAS 1-4
«¿Talatüshiche Jeʼwaa sutuma pukuwaʼipa sümaa puʼwayuuse?»
(Malaquías 2:13, 14). «Anuuka tü wane kasa jaaʼinrakat, tü piratakalü atuma suʼwüira wayuu tü aʼajüleekat mürüt nümüin Jeʼwaa, tü shiʼyalajakalü atuma wayuu, tü müliakalü atuma saaʼin, müsüjeseʼe nnojoluitpain jamajatüin nümüin Maleiwa tü aapünakat nümüin otta nnojotsü talatüin naaʼin saaʼu wanee kasa eekai jaapüin nümüin. 14 Jee müsü jünüiki mayaa: ‹¿Kasanainjeesü makaʼa shia?›. Shia sünainjee tüü: Shia sünainjee niʼrüin Jeʼwaa tü pukuwaʼipakat sümaa tü puʼwayuusetüjütkat jimaʼaliiwaʼaya pia, tü kawalaʼatakat putuma, mayaapejeʼe shiain aʼyataajiraain pümaa jee tü paapakat amüin pünüiki.
jd-S süp. 125, 126 püt. 4, 5
Kojuta wamüin wapüshi nuʼupala Jeʼwaa
4 Soʼu nükalia Malaquías (siglo V Sü.W.), ooʼulaajiraashii maʼin na judíokana suulia naʼwayuuse. Müshijeseʼe nümüin Malaquías namüin na wayuu ooʼulaakana naʼwayuuse: «Niʼrüin Jeʼwaa tü pukuwaʼipakat sümaa tü puʼwayuusetüjütkat jimaʼaliiwaʼaya pia, tü kawalaʼatakat putuma». Piratüsü tü aʼajüleekat mürüt nümüin Jeʼwaa sutuma naʼwüira na jieyuukana jee sutuma mojuin naaʼin saaliijee nooʼulaanüin. Jaʼitakajeʼe na sacerdootekana, amojujaasü nakuwaʼipa sutuma anain saaʼin namüin tia aaʼinnakat (Malaquías 2:13, 14, TNM).
5 ¿Jamüsü saaʼin nümüin Jeʼwaa kawalaʼatain nuʼwayuuse wanee wayuu nutuma soʼu nükalia Malaquías? Müsü nünüiki Malaquías nüchiki Jeʼwaa: «Mojushiishaatasü maʼin nümüin tü ooʼulaajirawaakat». Jee nüküjaka mapa matüjain «aʼwanajawaa nukuwaʼipa Jeʼwaa» (Malaquías 2:16; 3:6, TNM). ¿Jiyaawata aaʼu jamüin nünüiki Jeʼwaa? Nüküjatüjülia Jeʼwaa sümaiwa paala mojushaatain nümüin tü ooʼulaajirawaakat (Génesis 2:18, 24). Akaʼaya soʼu nükalia Malaquías ayatüsia mojuin nümüin shia, akaʼaya maaʼulu, mojusü nümüin. Eeshii wayuu ooʼulaajiraweeka suulia naʼwayuuse sutuma nnojoluin talatüin naya. Nütüjaapejeʼe saaʼu Jeʼwaa kasain suluʼuin naaʼin naya wayuukana otta müleka kawalaʼatale nuʼwayuuse wanee wayuu nutuma (Jeremías 17:9,10). Nütüja aaʼu Jeʼwaa müleka nukumajüle sukuwaʼipa wanee wayuu süpüla nuuʼulaain suulia nuʼwayuuse jaʼitasü jamüin nünüiki süchiki. «Nnojotsü eein saʼaka tü nukumajalakat chi Maleiwakai eekai sunujulaain nuulia. Otta wayakana, wasouktüinjatü aaʼu nümüin süpüshua tü waaʼinrakat» (Hebreokana 4:13).
(Malaquías 2:15, 16). Eekalaka wanee nnojoikai aainjain tia süka eein chi naaʼinkai Maleiwa nünain. ¿Kasa kachiiruaka naaʼin chia? Shia tü nuuʼuliwoʼukat Maleiwa. Otta ayatajachia chi naaʼinkai Maleiwa jünain jee nnojoishi eeinjachin wanee wayuu kawalaʼatakai atuma nuʼwayuuse. 16 Anuu nünüiki Jeʼwaa chi Sümaleiwasekai Israel: Mojushiishaatasü maʼin nümüin tü ooʼulaajirawaakat otta nnojoishi nücheküin chi kaainjalakai sümaa nuunjulajüin süchiki, müsü nünüiki Jeʼwaa chi wainmakai amaajachi. Otta ayatajachia chi naaʼinkai Maleiwa nanain otta nnojotsü kawalaʼatainjatüin nuʼwayuuse nutuma.
w02-S 1/5 süp. 18 püt. 19
Mojushiishaatasü nümüin Jeʼwaa kawalaʼatale nuʼwayuuse wanee wayuu nutuma
19 Nüküjain Malaquías eein waneinnua wayuu nnojoliikana kawalaʼatain atuma naʼwayuuse. Naaʼinrüin tia sutuma eein chi naaʼinkai Maleiwa nanain (wetsiikulo 15). Eeshii anoujashii nünain Jeʼwaa maaʼulu yaa kojutukana atuma naʼwayuuse (1 Pedro 3:7). Nnojotsü airuʼuluin nanüiki sümüin jee nnojotsü naʼyaatüin, jee nnojotsü naainjirüin shia kasa yarüttüsü wanaa sümaa nüinkaain sümaa; nnojoishii naya aʼalaajaain suʼupalapünaa waneirua jieyuu otta nnojoishii naya anajüin shiyaakua wayuu maichesat jee amaʼüjiraasü sukuwaʼipa. Otta müsia eeshii jieyuu kaʼwayuuseshii waneepiakana nümaa Maleiwa otta oonooshii sümaa nünüiki. Natüjaa aaʼu naya anoujashiikana, kasain mojuin maʼin nümüin Maleiwa otta nnojoishii naya sünainpünaa wanee kasa eekai müin aka saaʼin tia. Anashii ayatüle washatüin nakuwaʼipa. «Alanaʼaleesüjaʼa sünain niainjachin woonooin amaa anüikü Maleiwakai». Waaʼinrüle tia, naapeechi chi naaʼinkai wamüin (Aluwataaushikana 5:29).
Püchajaa süchiki kaaʼürüi suluʼu tü Wiwüliakat
(Malaquías 1:10). «¿Jarai chi asürülüinjachikai soʼu tü aʼwaajüleekat jaʼakajee jiakana? Otta nnojoleena jia aʼajüin wanee kasa saaʼu tü aʼajüleekat. Nnojoishi talatüin taya jümaa otta nnojotsü anain saaʼin tamüin tü jüsülajakat», müsü nünüiki Jeʼwaa chi wainmakai asurulaatse.
w07-S 15/12 süp. 27 püt. 1
Pütchi anaka maʼin sünainjee tü karaloʼutakat Malaquías
1:10. Nnojotsü anain nümüin Jeʼwaa tü nasülajakat na sacerdoote kachiiruakana aaʼin wainma kasa, naya sacerdootekana achekajüshii naya saaʼu nasürülüin soʼu tü aʼwaajüleekat otta saaʼu nachuwajaain siki saaʼu tü aʼajüleekat. Makalaka choʼujaain maʼin waʼwaajüinjachin Jeʼwaa otta waküjainjanain pütchi sükajee alin wapüla Jeʼwaa otta alin wapüla na wayuukana. ¡Nnojo waaʼinrüin tia shiiʼiree saapünüin nneerü wamüin saaʼu! (Mateo 22:37-39; 2 Corinto 11:7).
(Malaquías 3:1). ¡Kaatei! Anii taluwataain chi eʼikajaakai tanüiki otta nojutalüinjatü wanee wopu tapüleerua. Otta anta meechi chi Senyot shiimainshikai suluʼumüin tü aʼwaajülee Nuʼwaajünakalü aluʼu, nia chi jüchajaakai achiki otta chi eʼikajakai nünüiki, chi anashiikai saaʼin jümüin. ¡Kaatei! shiimain nünteechin», müsü nünüiki Jeʼwaa chi wainmakai asurulaatse.
Wetsiikulo aashajeʼennajatka
(Malaquías 1:1-10). Anuu wanee pütchi alatajatka: Nünüiki Jeʼwaa sümüin Israel nükajee Malaquías: 2 «Aishii jia tapüla», müsü nünüiki Jeʼwaa. Jee jümakalaka tamüin: «¿Kasa aika aluʼu püpüla waya?». Anuuka joo nünüiki Jeʼwaa: «¿Aashin niain Esaú nuwala Jacob? Aipejeʼe tapüla Jacob, 3 niaka maalin tapüla Esaú; müsüjeseʼe nnojoluin kasain eein suluʼu nuumain tatuma jee taapüin tü kasa nümaʼanajatkat sümüin tü wüchii kanüliakat chacal chaa isashiiapaʼa.» 4 Süka müin nanüiki na chajanakana Edóm: ‹Ajaʼttinnüshii waya, aleʼejeenapejeʼe waya otta wakumajeerü süchikuaʼa tü ojuttinnakat paala›, anuu nünüiki Jeʼwaa, chi wainmakai asurulaatse: ‹Akumajeena naya, tajuttireetpejeʼe süchikuaʼa tü kasa nakumajakat. Otta «tü mma kaluʼukat mojulawaa», meerü pütchi nachiki, otta müneena naya: «na wayuu ajaʼttinnüinjanakana süpüla kaʼi süpüshuaʼa naashin Jeʼwaa». 5 Jiʼreerü tia otta meena jia: «Anashi nuʼwaajünüle Jeʼwaa suluʼupünaa suumain Israel»›.» 6 «‹Kojutushi wanee wayuu nutuma nüchon otta kojutushi nülaamain wanee wayuu nutuma. Tayalejeʼe jüshin, ¿jamakaʼa mojutka taya jutuma? Tayalejeʼe jülaamain ¿jamakaʼa nnojoliika mmoluwaain jia teema?›, müsü nünüiki Jeʼwaa chi wainmakai asurulaatse jümüin jiakana sacerdootekana, mojutukana amüin nünülia. »Otta müshii jia: «¿Kasa mojutukana aluʼu watuma tü pünüliakat?».› 7 »‹Shia sükajee jiʼitaain saaʼu tü aʼajüleekat wanee pan eekai yarüttüin.› »‹Otta jümaka tamüin: «¿Kasa yarüttaka aluʼu pia watuma?».› »‹Shia sükajee müin jünüiki mayaa: «Mojutuinjatü watuma tü nimeesainkat Jeʼwaa». 8 Otta wanaa sümaa jaapüin tamüin wanee mürüt eekai moʼuin: «Nnojotsü mojuin», müshii jia. Otta wanaa sümaa jaapüin tamüin wanee mürüt eekai masaʼain jee eekai ayuulin: «Nnojotsü mojuin», müshii jia.›» «Pürütkeʼera nia nünainmüin chi aluwataakai paaʼu. ¿Talateechiche nia pümaa? ¿Kamaneweechiche nia pümüin püntapa nümaʼanamüin?», müsü nünüiki Jeʼwaa chi wainmakai asurulaatse. 9 «Anashi talatüle Maleiwa jutuma süpüla nükaaliinjai jia. Jia kasitka tia. ¿Kamaneweechiche nia jümüin jürütkaale nünainmüin?» müsü nünüiki Jeʼwaa chi wainmakai asurulaatse. 10 «¿Jarai chi asürülüinjachikai soʼu tü aʼwaajüleekat jaʼakajee jiakana? Otta nnojoleena jia aʼajüin wanee kasa saaʼu tü aʼajüleekat. Nnojoishi talatüin taya jümaa otta nnojotsü anain saaʼin tamüin tü jüsülajakat», müsü nünüiki Jeʼwaa chi wainmakai asurulaatse.