EKIRAJAAYA 6

¿Asoʼiraajeetche naaʼin na ouktüshiikana?

1. ¿Weʼreena nachikuaʼa na ouktüshiikana?

Talatsü saaʼin Marta sümaa María süka nüsoʼiraain aaʼin Lázaro

Wanaa sümaa yaajachin Jesuu saaʼu tü Mmakat, ouktüshi Lázaro, chi naʼaleewainkai. Kepiapuʼushi nia Betania süʼütpaʼa Jerusalén. Wanaa sümaa nüntüin Jesuu, alatüirü pienchi kaʼi süchikijee ouktüin Lázaro. Oʼunüshi Jesuu amuuyuupaʼamüin sümaa Marta otta Mariia, na nuwalayuukana Lázaro. Nantapaataka wainma wayuu nanainmüin. Talatüsü maʼin saaʼin Marta sümaa Mariia süsoʼiraapa naaʼin Lázaro nutuma Jesuu. Püleeja Juan 11:21-24, 38-44.

Süpüshi tü pütchi anasü aküjünakat, shia süsoʼiraainjatüin naaʼin na ouktüshiikana. Sütüja aaʼu Marta tü nümakat Jeʼwaa katüinjatüin noʼu nachikuaʼa na ouktüshiikana yaa saaʼu tü Mmakat. Püleeja Job 14:14, 15.

2. ¿Kasa alataka namüin na ouktüshiikana?

Akumajünüshi Adán, ouktapa nia — Müshi Maleiwa nümüin Adán: ‹Mmainjachi pia püchikua süka aainjuushin pia sünainjee› (GÉNESIS 3:19)

Nukumajüin waya Maleiwa süka pootshi (Génesis 2:7; 3:19). Nnojotsü kasain ojuʼitüin wanainjee ouktapa waya, nnojotsü kasain jülüjüin waaʼin otta nnojoishii müliain waya. Nnojotsü kasain nüküjüin achiki Lázaro süsoʼiraapa naaʼin. Püleeja Eclesiastés 9:5, 6, 10.

Eeshii wayuu anoujaka sünain müliain saʼaka siki na ouktüshiikana. Alawaa neʼe tia. Watüjaaitpa aaʼu nnojoluin kasain natüjaain aaʼu na ouktüshiikana. Tü ekirajünakat süchiki müliain wayuu saʼaka siki, alawaa, yarüttüsü nünülia Jeʼwaa sutuma otta mojushaatasü shia nümüin. Püleeja Jeremías 7:31.

Pünaja tü videokot ¿Kasa alataka namüin na outushiikana?

3. ¿Eesü süpüla naainjüin wanee kasa?

Nnojoishii süpüla yootuin jee naapüin wanüiki na ouktüshiikana (Salmo 115:17). Eeshii na yolujaa eeʼiyataakana sümüin wayuu otta nayayaashii na wayuu ouktakana (Judas 6). Makalaka mojuin nümüin Jeʼwaa wanoujüle sünain tia. Püleeja Deuteronomio 18:10, 11.

4. ¿Jaralii na kateenakana oʼu nachikuaʼa?

Ekirajünüshi wanee wayuu asoʼiraaka aaʼin suluʼu tü paʼaraiisükat. Süchikijee, nikirajüin waneeinnua asoʼiraakana aaʼin.

Wainma maʼin wayuu katüinjanaka oʼu nachikuaʼa süpüla kepiainjanain naya saaʼu tü Mmakat. Asoʼiraajeerü naaʼin na wayuu nnojoliikana aapüin nüchiki Maleiwa otta na aainjapuʼukana kasa mojusü. Püleeja Aluwataaushikana 24:15.

Ekirajüneena nüchiki Maleiwa na asoʼiraainjanakana aaʼin otta süpüla nanoujüin nünain Jesuu jee süpüla kacheʼein naya nümüin (Alateetkat Mapeena 20:11-13, TNM). Naaʼinrüle tia, kateena oʼu waneepia yaa saaʼu tü Mmakat. Püleeja Juan 5:21.

5. ¿Jamüsü süsoʼiraainjatka naaʼin na ouktüshiikana?

Shia süka alin nüpüla Jeʼwaa na wayuukana. Eesü süpüla katüin woʼu wachikuaʼa süka nuluwataain chi Nüchonkai süpüla ouktüin nia waaʼu. ¿Jara piʼreeka amüin süsoʼiraapa naaʼin na ouktüshiikana? Püleeja Juan 3:16, TNM otta Roma 6:23, TNM.

Pütüjeere sooʼomüin, püleeja tü karalouktakat ¿Kasa shikirajaka maʼin tü Wiwüliakat? Ekirajaaya 6, 7 otta 10.