¿Kasa nukumajaka apüla waya Maleiwa?

1. ¿Kasa keeʼireeka naaʼin Maleiwa süpüleerua wayuu?

KEEʼIREESÜ naaʼin Maleiwa kepiainjachin Adán sümaa Eva suluʼu wanee paʼaraiisü, kachoinjanain naya, anachoinjatü tü Mmakat natuma otta nepijainjatü tü mürütkalüirua. Ayatayülia keeʼireein naaʼin Maleiwa tia süpüleerua wayuu (Génesis 1:28; 2:8, 9, 15). (Paashajeʼera noota 6).

2. (1) ¿Jamüsü watüjaaka saaʼu nikeraajeerüin Maleiwa tü nünüikikat? (2) ¿Jaralii na kepiainjanakana suluʼu tü Mmakat otta jeʼrainjana juya katüin noʼu?

² Nüküjain Jeʼwaa kepiainjatüin wayuu mapeena suluʼu wanee mma anasü. Anuu nünüiki: «Tü tanüiki tojuʼitirakat, tekeraajeerü shia» (Isaías 46:9-11; 55:11). Shiimain nikeraajüinjatüin Maleiwa tü nümakat, nnojotsü jaralüin amalajeʼerüinjatüin shia. Nukumajüin Maleiwa tü Mmakat süpüla kepiainjatüin wayuu suluʼu (Isaías 45:18). Keeʼireesü naaʼin Maleiwa jouluinjatüin wayuu saaʼu tü Mmakat. ¿Jaralii na kepiainjanakana saaʼu tü Mmakat? Saashin tü Wiwüliakat, nayainjana na wayuu anamiakana jee oonookana sümaa nünüiki Maleiwa. ¿Jeʼrainjana juya katüin noʼu? Katüinjatü noʼu waneepia saaʼu tü Mmakat (Salmo 37:29; Alateetkat Mapeena [Apocalipsis] 21:3, 4).

3. ¿Kasa eeka süpüla jülüjain waaʼin sutuma weʼrüin ayuulin jee outuin wayuu?

³ Ayatapejeʼe ayuulin wayuu maaʼulu jee outuin shia. Suluʼu waneirua mma, atkaajiraasü jee outiraasü wayuu. Nnojotpejeʼe keeʼireein naaʼin Maleiwa tia. Eesüjaʼa süpüla jülüjain waaʼin jamüin sülataka kasa mojusü otta jamüsüche nnojoyütka nikeraajüin Maleiwa tü nünüikikat. Shia neʼe tü Wiwüliakat aküjaka wamüin tia.

CHI NÜʼÜNÜÜKAI MALEIWA

4, 5. (1) ¿Jara kanüikika atuma wanee wüi sümüin Eva? (2) ¿Jamakuwaʼipai wanee wayuu süpüla kaʼrüwaraijaain nia?

⁴ Süküjain tü Wiwüliakat kaʼünüüin Maleiwa, «Yolujaa otta Satanaa» münüshi chi nüʼünüükai. Kanüisü wanee wüi nutuma Satanaa chaa suluʼu tü apain kanüliakat Edén (Alateetkat Mapeena 12:9; Génesis 3:1). Emeejünüsü Eva nutuma Satanaa sükajee kanüikiyaain nutuma tü wüikat. (Paashajeʼera noota 7).

⁵ ¿Jamüshi mojulaaka Satanaa? ¿Alejaiche nia nutuma Maleiwa? Nnojo. Wanaa sümaa nukumajüin Maleiwa tü Mmakat nüpüla Adán sümaa Eva, watta naalii na aapiee chajanakana iipünaa. Shiasaʼa mapa, eʼrüijaashi wayumüin wanee aapiee naʼakajee, «Yolujaa» nümünaka (Job 38:4, 7). ¿Jamakuwaʼipai süpüla niʼrüijaain wayumüin Satanaa? Müsü aka saaʼin nukuwaʼipa wanee wayuu eekai kaʼrüwaraijaain. Nnojoishi joʼuujiraain nia sümaa kaʼruwaralin. Keeʼireesü naaʼin palajana nümaʼaneein wanee kasa nnojotka nükoroloin, shiasaʼa sutuma jülüjain maʼin naaʼin tia suchuntaain naaʼin jee aʼluwajaa müshia nia (paashajeʼera Santiago 1:13-15). (Paashajeʼera noota 8).

6. ¿Jamakuwaʼipai süpüla nüʼünüüinjachin Maleiwa Satanaa?

⁶ Majatü nukuwaʼipa chia aapieekai. Wanaa sümaa nukumajüin Jeʼwaa Adán sümaa Eva, nüküjain namüin kachoinjanain naya jee jouluinjatüin nooʼuliwoʼu sainküin Mmaka süpüshuaʼa (Génesis 1:27, 28). Eesüjaʼa müle naaʼin nüleʼeruʼu chia aapieekai: «Eeshi süpüla naʼwaajüin taya na wayuukana nuulia Jeʼwaa». Süka ayatüin jülüjain naaʼin tia, suchuntaain maʼin naaʼin nuʼwaajünüin nuulia Jeʼwaa. Müshijeseʼe nüküjain alawaa sümüin Eva süpüla nimeejüin shia (paashajeʼera Génesis 3:1-5). Sutuma müin naainjala, «Satanaa» otta «Yolujaa» münüshi nia. Nüʼünüüichipaka nia Maleiwa yalejeechiki.

7. (1) ¿Kasanainjeeshi outaka Adán sümaa Eva? (2) ¿Jamakuwaʼipat süpüla sülataain tü kaainjalaakat? Püküja wanee shiyaawase.

⁷ Nüpülajüin Maleiwa nuulia Adán sümaa Eva neküin süchon wanee wunuʼu suluʼujatka tü apainkat. Nüküjain Jeʼwaa namüin outajanain naya neküle süchon tia wunuʼukot. Nnojoliika jaa namüin jee nekaka shia (Génesis 2:17; 3:6). Kaainjalaka Adán sümaa Eva jee outaka naya mapa maʼaka nüküjain shia paala Jeʼwaa (Génesis 3:17-19). Nülatirüin Adán sümaa Eva tü kaainjalaakat nanainmüin na nachonniikana, müshiijeseʼe kaainjalain jee outuin naya (paashajeʼera Roma 5:12). ¿Jamakuwaʼipat süpüla sülataain tü kaainjalaakat? Tia müsü aka saaʼin saainjünüle keesü suluʼu wanee iita eeka sumoʼolotuuin, ayateeria kamojulain süpüshuaʼa tü keesükat. Wanaa sümaa nnojoluin jaa nümüin Adán nümüin Maleiwa, kaainjalashi nia. Sükajee kaainjalain Adán oʼttüsü wayuu ütamüinreʼeya sünain kaainjalaa. Müsüjeseʼe laülaain jee outuin wayuu maʼleekalia (Roma 3:23). (Paashajeʼera noota 9).

8, 9. (1) ¿Kasa nunoujireeka anain Satanaa Adán sümaa Eva? (2) ¿Jamüshii nnojoliika nuʼutuin naaʼin Jeʼwaa uatuwoʼushi na eʼrüliijaakana wayumüin?

⁸ Eʼrüijaashi wayumüin Satanaa nümüin Maleiwa wanaa sümaa nimeejüin Adán sümaa Eva süpüla moonooloin naya sümaa nünüiki Maleiwa. Nüküjain Satanaa namüin alaain Maleiwa otta nnojoishi anain nia süpüla aluwatawaa süka maalin naya nüpüla. Naashin Satanaa, nnojotsü choʼujaain nüküjain Maleiwa sümüin wayuu tü saaʼinrajatkat otta nüküjain eein süpüla nüneeküin Adán sümaa Eva kasain wayu tü anakat otta tü mojukat. Eeshiijaʼa süpüla nuʼutuin naaʼin Maleiwa uatuwoʼushi Adán sümaa Eva otta Satanaa. Naaʼinrüleje tia Maleiwa nnojotsüje atüjaanüin aaʼu alawaain tü nümakat Satanaa.

⁹ Nnojoishii nuʼutuin naaʼin Jeʼwaa na eʼrüliijaakana wayumüin soʼu tia. Nuuʼulaain na wayuukana naluwanaajiraain naaʼu. Naaʼinrüin tia Jeʼwaa süpüla sütüjaanüin saaʼu niain neʼe niakai atüjaaka saaʼu tü anainjatkalü atuma sukuwaʼipa wayuu otta süpüla sütüjaanüin saaʼu alawaain tü nümakat Satanaa. Wekirajaajeerü anain sooʼomüin süchiki tia suluʼu ekirajaaya 11. ¿Jamüsüche mojuka tü naaʼinrakat Adán sümaa Eva? ¿Anasüche tü naaʼinrakat saaʼu noonooin sümaa nünüiki Satanaa jee neʼrüin wayumüin nümüin Maleiwa? Naapüin Jeʼwaa namüin kataa oʼuu waneepia, wanee mma anasü, naapüin aʼyatawaa namüin otta nnojotsü kasain choʼujaain namüin. Nnojotpejeʼe kasain naapüin Satanaa namüin. ¿Kasaje paainjaka piale alatüin amüin tia?

10. ¿Kasa waneeküinjatka waneʼewai wakua?

¹⁰ Nüneeküin Adán sümaa Eva wanee kasa outaka atuma naya, akanasaʼa wayakana eeshii süpüla waneeküin tü katüinjatkalü atuma woʼu. Waneeküinjatü waneʼewai wakua jaralinjachin aluwataain waaʼu, niale Satanaa niataapa Jeʼwaa. Waneeküle nümaain waya Jeʼwaa, weeʼiyateerü sünain alawaain tü nümakat Satanaa (Salmo 73:28; paashajeʼera Proverbios 27:11). Palitchon na wayuu oonookana sümaa nünüiki Maleiwa maaʼulu. Otta müshia joo chi Maleiwakai, nnojoishi niain aluwataain naaʼu naya wayuukana. Nnojoireje niain aluwataain, ¿jaraika aluwataain naaʼu?

¿JARAI CHI ALUWATAAKAI SAAʼU WAYUU SAINKÜIN MMAKAT?

11, 12. (1) ¿Kasa wayaawataka sünainjee tü nümakat Satanaa nümüin Jesuu? (2) ¿Jarat tü wetsiikulo aküjakat süchiki nuluwataain Satanaa saaʼu wayuu manoujainsat?

¹¹ Nütüjaa aaʼu Jesuu jaralin chi aluwataakai saaʼu tü manoujainsatkalüirua. Soʼu wanee kaʼi, niiʼiyatüin Satanaa nümüin Jesuu «tü suumainkalüirua wayuu süpüshuaʼale sünain anashaatain maʼi shia». Anuu nünüiki nümüin: «Müleka püsapainyoʼukale pia yaa tamülatuʼu sünain puʼwaajüin taya, taapeerü pümüin tü suumainkalüirua [wayuu] süpüshuaʼale» (Mateo 4:8, 9; Lucas 4:5, 6). ¿Kasa wayaawataka sünainjee tia? Niain Satanaa laülaain saaʼu süpüshuaʼa tü suumainkalüirua wayuu. Müshijeseʼe «taapeerü pümüin» nümüin nümüin Jesuu.

¹² Watüjaa aaʼuchi niain Jeʼwaa chi Pülashikai maʼin, Kakumajalakai kasakat süpüshuaʼa (Alateetkat Mapeena 4:11). Nnojoipejeʼe aluwataain nia saaʼu wayuu süpüshuaʼa. Pansaasü nünüiki Jesuu wanaa sümaa nüküjain niain Satanaa chi aluwataakai saaʼu wayuu (Juan 12:31; 14:30; 16:11). Müshi Pablo nüchiki chi Yolujaakai: «Satanás, chi aluwataakai saʼaka wayuu manoujainsat» (2 Corinto 4:3, 4). Naashin chi aluwataaushikai Juan, nia chi Yolujaakai aluwataaka saaʼu wayuu suluʼu mmakat süpüshuaʼa (1 Juan 5:19).

AJAʼTTAJATÜ TÜ NULUWATAAKALÜ AAʼU SATANAA

13. ¿Jamüsü choʼujaaka sunouteʼennüin sukuwaʼipa tü mmapaʼakat?

¹³ Amojujaasü maʼin sukuwaʼipa tü mmapaʼakat maaʼulu. Joutsü maʼin atkawaa, aʼluwajaa, piama akuwaʼipachii na wayuukana otta aainjashii maʼin kasa mojusü. Isasü nachiki na wayuukana nanouteʼerüin sukuwaʼipa tü mmapaʼakat jaʼitairü nachajaain maʼin sukuwaʼipa süpüla nanouteʼerüin shia. Najaʼttireenapejeʼe Maleiwa na mojulaashiikana soʼu Armagedón otta aneerü maʼin nutuma sukuwaʼipa tü mmapaʼakat (Alateetkat Mapeena 16:14-16). (Paashajeʼera noota 10).

14. (1) ¿Jarai nüneekaka Maleiwa süpüla aluwatawaa? (2) ¿Kasa süküjatüjütkalia tü Wiwüliakat nüchiki Jesuu?

¹⁴ Aneekünüshi Jesuu nutuma Jeʼwaa süpüla nuluwataainjachin saaʼu tü Mmakat sirumatuʼujee. Süküjatüjülia tü Wiwüliakat niainjachin Jesuu wanee «aluwataai eeinjachika atuma jimataa aaʼin» otta waneepiainjatü tü nuluwataayakat (Isaías 9:6, 7). Naashin Jesuu oʼuraajüinjana na nikirajüinkana süpüleerua tia aluwataayakat, anuu nünüiki: «Wachuntuin pümüin puluwataainjachin chaa iipünaajee. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma cha iipünaa» (Mateo 6:10, TNM). Wekirajaajeerü anain suluʼu ekirajaaya 8 najaʼttirüinjatüin Maleiwa süpüshuaʼa sukuwaʼipa aluwatawaa sutuma wayuu otta niainjachin aluwataain saaʼu tü Mmakat (paashajeʼera Daniel 2:44). Süchikijee tia, paʼaraiiseerü tü Mmakat nutuma. (Paashajeʼera noota 11).

KEPIEENA WAYA SULUʼU WANEE MMA JEKETÜ

15. ¿Jaralii na kepiainjanakana suluʼu tü mma jeketüinjatkat?

¹⁵ Anuu sünüiki tü Wiwüliakat süchiki tü mma jeketüinjatkat: «Eeinjatü wanee sirumatuʼu jeketü jee müsia wanee mma jeketü waʼatapajaka maʼin. Otta müsia aainjüneerü tü kasa anasükat waneepia» (2 Pedro 3:13, TNM; Isaías 65:17). Wanaa sümaa «mma» sümüin tü Wiwüliakat, eeshii nayale saashajaain achiki na wayuu kepiakana saaʼu tü Mmakat (Génesis 11:1). Tü «mma jeketü» sümakat tü Wiwüliakat naya na wayuu anakana nakuwaʼipa noʼuluʼu Maleiwa süka noonooin sümaa nünüiki. Napüshuaʼa naya wayuukana kepiainjana saaʼu tü Mmakat Paʼaraiisüpa shia.

16. (1) ¿Kasa naapeetka Maleiwa namüin na kepiainjanakana suluʼu tü mma jeketüinjatkat? (2) ¿Kasa waaʼinrajatka süpüla katüinjatüin woʼu waneepia nutuma Maleiwa?

¹⁶ Naashin Jesuu, kateerü noʼu waneepia nutuma Maleiwa na kepiainjanakana suluʼu tü mma jeketüinjatkat (Marcos 10:30, TNM). ¿Kasa waaʼinrajatka süpüla katüinjatüin woʼu waneepia? Aküjünüsü tia suluʼu Juan 3:16, TNM otta Juan 17:3, TNM (paashajeʼera). Wekirajaa sünain tü sümakat tü Wiwüliakat süchiki tü wakuwaʼipainjatkat suluʼu tü Paʼaraiisükat.

17, 18. ¿Jamüsü watüjaaka saaʼu nnojoleerüin shapaain waaʼin suluʼu tü Paʼaraiisükat?

¹⁷ Nnojoleerü kasachiki, oʼutaa saaʼin wayuu, atkawaa otta nnojoleerü eein kasa mojusü. Nnojoleerü eein wayuu mojulaasü saaʼu tü Mmakat (Salmo 37:10, 11). Nayainjana kepiaka saaʼu tü Mmakat na wayuu oonookana sümaa nünüiki Maleiwa saaʼu alin nia napüla. Eejeerü jimataa aaʼin waneepia (Salmo 72:7). Najaʼttireerü Maleiwa süpüshuaʼa tü kasachikikat (Salmo 46:9; Isaías 2:4).

¹⁸ Aneerü naaʼin na wayuu suluʼukana tü nupueulosekat Jeʼwaa. Wanaa sümaa noonooin na israeliitakana sümaa nünüiki Maleiwa, naaʼinmajüin naya otta nnojotsü kasain shapaain atuma naaʼin (Levítico 25:18, 19). Nnojoleena waya mmoluin sutuma kasa mojusü jee natuma na mojulaashiikana. Jimateerü waaʼin waneepia suluʼu tü Paʼaraiisükat (paashajeʼera Isaías 32:18; Miqueas 4:4).

19. ¿Jamüsü watüjaaka saaʼu jouleerüin eküülü sümüin wayuu süpüshuaʼa?

¹⁹ Jouleerü eküülü sümüin wayuu süpüshuaʼa. «Wainmeerü süchon pünajut saaʼu tü mmakat; wainmaleejeeria shia saaʼupünaa tü uuchikalüirua» (Salmo 72:16). «Wainmeerü eküülü saaʼu tü mmakat nutuma» chi Wamaleiwasekai, «aneerü wakuwaʼipa nutuma» (Salmo 67:6).

20. ¿Jamüsü watüjaaka saaʼu paʼaraiisüinjatüin tü Mmakat?

²⁰ Paʼaraiiseerü süpüshuaʼa tü Mmakat. Aneerü maʼin wepia otta wüituuijeerü tü mmapaʼakat (paashajeʼera Isaías 65:21-24; Alateetkat Mapeena 11:18). Aneerü maʼin süpüshuaʼa tü Mmakat, meerü aka saaʼin tü apain chajatkat Edén. Naapeerü wamüin Jeʼwaa süpüshuaʼa tü kasa choʼujaakat wamüin. Anuu sünüiki tü Wiwüliakat nüchiki Maleiwa: «Pujutalüin tü pajapükat otta paapüin tü keeʼireekat saaʼin kasa süpüshuaʼa» (Salmo 145:16).

21. ¿Jamüsü watüjaaka saaʼu maüseerüin sümüin wayuu tü wüchii jashichikat?

²¹ Maüseerü sümüin wayuu tü wüchii jashichikat. Nnojoleena jamajüin na wayuukana sutuma wüchii jashichi wünaʼapüjatü. Akaʼaya na tepichikana, nnojoleena jamajüin naya sutuma (paashajeʼera Isaías 11:6-9; 65:25).

22. ¿Kaseerü naainjaka Jesuu napüleerua na ayuuikana?

²² Nnojoleerü ayuulii. Wainma wayuu niiyajaka Jesuu suulia ayuulii wanaa sümaa yaajachin nia Mmapaʼa (Mateo 9:35; Marcos 1:40-42; Juan 5:5-9). Süka niainjachin Aluwataain Jesuu nutuma Maleiwa, niiyajeerü wayuu süpüshuaʼa suulia ayuulii. «Ayuuishi taya», nnojoleechi jaralin müin (Isaías 33:24; 35:5, 6).

23. ¿Kaseerü naainjaka Maleiwa napüleerua na outushiikana?

²³ Kateerü noʼu nachikuaʼa na outushiikana. Nüküjain Maleiwa nüsoʼireʼerüinjatüin saaʼin watta saalii wayuu. Asoʼiraajeerü saaʼin «tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (Aluwataaushikana [Hechos] 24:15; paashajeʼera Juan 5:28, 29).

24. ¿Jamüsü saaʼin pümüin kepiaa suluʼu tü Paʼaraiisükat?

²⁴ Wekirajaale nüchiki Jeʼwaa, woonoole sümaa nünüiki otta nnojorüle waaʼinrüin tü keeʼireekat waaʼin wamüiwaʼa, aneerü wakuwaʼipa süpüla kaʼikat süpüshuaʼa. Anuu nünüiki Jesuu nümüin wanee wayuu akachennakai nüʼütpaʼa: «Eejeechi pia tamaa suluʼu tü Paʼaraiisükat» (Lucas 23:43, TNM). Wekirajaa sooʼomüin nüchiki Jesukürisüto otta süchiki tü naaʼinrajatkat süpüla shikeraajüinjatüin tü nümakat Maleiwa.