Niaiwaʼaya aluwataain Maleiwa saaʼu tü Mmakat anapuʼusü maʼin sukuwaʼipa süpüshuaʼa tü kasakalüirua.

¿Jamüsü choʼujaaka nuluwataain Maleiwa waaʼu?

Sümaʼleiwaʼaya paala niapuʼushi aluwataakai saaʼu kasakat süpüshuaʼa chi Kakumalakai waya, chi kanüliakai Jeʼwaa otta aishii nüpüla na nuluwataakana aaʼu. Nukumajüinjeseʼe wanee apain anashaatasü maʼin napüla, Edén sünülia otta jooutpuʼusü maʼin eküülü suluʼu. Jee müsia naapüin Maleiwa wanee aʼyatawaa anashaatasü maʼin namüin (Génesis 1:28, 29; 2:8, 15). Nnojoireje nayoutuin Maleiwa süpüla niain aluwataain naaʼu, anasüje maʼin wakuwaʼipa maaʼulu.

Saapüin Eva nümüin Adán tü süchonkot wunuʼu apülajünaka noulia. — Adán sümaa Eva nayoutuin Maleiwa süpüla niain aluwataain naaʼu.

Saashin tü Wiwüliakat eejachi wanee aapiee eʼrüijaakai wayumüin, Satanaa otta Yolujaa, münüshi. Naashin niakai nnojotsü lotuin sukuwaʼipa aluwatawaa nutuma Maleiwa otta aneerüin sukuwaʼipa wayuu nnojoireje niain Maleiwa aluwataain naaʼu. Niasaʼa Adán sümaa Eva oonooshii sümaa nünüiki Satanaa otta eʼrüliijaashii naya wayumüin nümüin Maleiwa (Génesis 3:1-6; Alateetkat Mapeena [Apocalipsis] 12:9).

Sünainjee niyoutuin Adán sümaa Eva niain aluwataain Jeʼwaa naaʼu, nnojoliinnapa naya kepiain suluʼu tü Paʼaraiisükat otta nnojoluitpa süpüla katüin noʼu süpüla kaʼikat süpüshuaʼa sümaa anain naya (Génesis 3:17-19). Nnojoliipejeʼe nayain neʼe amojujaain akuwaʼipa. Amojujaasü nakuwaʼipa na nachonniikanaʼaya. Saashin tü Wiwüliakat kaainjalashi Adán jee sükajee tia «oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Eesü sooʼomüin kasa mojusü sünainjee kaainjalain Adán, saashin tü Wiwüliakat: «Chi wayuukai aluwataashi naaʼu na wayuukana süpüla numojujain nakuwaʼipa» (Eclesiastés 8:9). Sükajee tia, wayaawata aaʼu mojuin sukuwaʼipa wayuu naluwanaajiraale saaʼu nakuwaʼipa namüiwaʼa.

OʼTTÜSÜ WAYUU SÜNAIN ALUWATAWAA

Yaletashaatasü naaʼin Nemrod, eekalaka waneinnua wayuu nüchiiruajee sünain akumajaa wanee miichi miyoʼu. — Eʼrüijaashi wayumüin Nemrod nümüin Jeʼwaa.

Chi palajaikai wayuu aluwataakai saaʼu wayuu saashin tü Wiwüliakat, nia Nemrod. Eʼrüijaashi nia wayumüin nümüin Maleiwa. Soʼujeʼereʼeya tia wattainna naalii na aluwataalii müliakana atuma wayuu. Alatüirü suulia 3.000 juya süchikijee nümüin chi aluwataaikai Salomón: «Teʼrüin naʼyalajüin maʼin na wayuu müliakana maʼin atumawaa, otta nnojotsü jaralüin amülialaain naalii. Naya aluwataakana na müliakana atuma naya» (Eclesiastés 4:1).

Ayatüsia müliain wayuu maaʼulu natuma na aluwataaliikana. Soʼu 2009 süküjain Naciones Unidas nawainmalaain na wayuu jülüjakana aaʼin nayain kasirüin tü kasa mojusükat na aluwataaliikana saaʼu tü Mmakat.

KERAAITPA SÜKALIA

Shia choʼujaaka sümüin wayuu lotuin nakuwaʼipa na aluwataaliikana otta anain sukuwaʼipa aluwatawaa natuma. Shiaʼaya naaʼinrajatka tia chi Kakumalakai waya.

Kojuyasü ayaakua: Tü kasa mojusü eekat sutuma naluwataain na wayuukana saaʼu wayuu. 1. Wanee wayuu joyotusü mmoluʼu kaayeruʼu, aʼyalajüshi maʼin chi süchonkai. 2. Wanee laülaa ayuuishi pitaaraluʼu. 3. Waneinnua surulaat ashanajiraashii. 4. Wayuu jashichikana sünain aainjaa protesta, alüʼüjüshii naya karaloʼuta pütchimaajatü. 5. Wanee wayuu sümaa tü süchonkot neʼrüin yülaʼawain soʼuluʼu nepia sutuma tü mojulaasükalüirua. 6. Wanee pueulo yarüttüshiikat maʼin sutuma sümüsain konpainyiia. — Jaʼitakajaʼa na aluwataalii akaalinjeekana wayuu, isasia neʼe nachiki nanouteʼerüin tü kasa mojusü alatakat mmapaʼa.

Nüikaleʼerüitpa Maleiwa Sukuwaʼipa tü Nuluwataayakat otta najaʼttireerü süpüshuaʼa sukuwaʼipa suluwataaya wayuu «shieetkalaka eein waneepia tü nuluwataayakat» (Daniel 2:44). Tia Nuluwataayakat Maleiwa, shia tü suchuntawaikat watta saalii wayuu suʼuraajapa nümüin (Mateo 6:9, 10, TNM). Chi nüneekakai Maleiwa süpüla aluwatawaa, yaapuʼushi kepiain saʼaka wayuu nümaiwa. ¿Jaraiche maʼin nia?