¿Jarai chi aneekünakai süpüla aluwatawaa?

• Aneekünüshi nia nutuma Maleiwa. «Taneeküichipa chi Aluwataainjachikai tatuma [...], taapeerü pümüin tü pueuloirua puluwataainjatkalü aaʼu otta taapeerü pümüin mmakat süpüshuaʼa süpüla piain laülaain saaʼu» (Salmo 2:6, 8).

• Aluwataajeechi nia suluʼu nuluwataaya David. «Jemeichipa wanee joʼuu, aapünüichipa wamüin wanee joʼuu [...]. Waneepieechi nia aluwataain otta waneepieerü nutuma tü jimataakalü aaʼin. Aluwataajeechi nia saaʼu nuluwataaya David. Aluwataajeechi süka tü lotookalü akuwaʼipaa süpüla kaʼikat süpüshuaʼa» (Isaías 9:6, 7).

• Joʼuushi nia Belén. «Belén [...], tojuʼitireechi yalejeechiki chi aluwataainjachikai saaʼu Israel [...], eʼnnaajüneechi nia sainküinpünaa mmakat süpüshuaʼa» (Miqueas 5:2, 4).

• Mojutusai nia sutuma wayuu jee oʼutuna aaʼinchi. «Mojutusai nia atumawaa otta nnojoishi jamajachin sümüin wayuu [...]. Asotunushi nia saaʼujee tü waainjalakat; müliashi nia atumaa saaʼujee tü mojukat watuma» (Isaías 53:3, 5).

• Asoʼiraasü naaʼin otta kojutushi nia nutuma Maleiwa. «Püsoʼireʼereechi aaʼin taya jaʼitashi outuin taya. Nnojoleechi puuʼulaain suluʼu tü ishikat chi waneepiakai pümaa [...]. Talatüsü paaʼin waneepia nümaa wanee wayuu eekai yalain pikialuʼujee» (Salmo 16:10, 11).

Aneekünüshi Jesukürisüto süpüla aluwatawaa

Niaʼala neʼe Jesukürisüto ekeraajakai atuma tia pütchikalüirua. Anuujeseʼe nünüiki wanee aapiee sümüin María, tü niikat: «Aneekuushi chi joʼuukai nutuma Maleiwa süpüla nuluwataainjatüin tü wayuu judíokalüirua, [...] maʼaka nuluwataapuʼuin paala sümaiwa chi putuushikai David. Müichia nnojolin ooʼulaain suulia aluwatawaa» (Lucas 1:31-33).

Nnojoishi aluwataain Jesuu soʼu yaajachin nia yaa mmapaʼa. Aluwataainjachipajaʼa nia saaʼu wayuu chaa iipünaajee nutuma Maleiwa. ¿Jamüshi niaka anain süpüla aluwatawaa? Wekirajaa sünain tü naaʼinrakat soʼu yaajachin nia yaa mmapaʼa.

• Kojutusü wayuu nümüin Jesuu. Nükaalinjain wayuu tooloyuu, jieyuu, jimaʼalii, majayünnüü otta wayuu miyoʼuyuu. Kojutusü wayuu nümüin jaʼitairü washirüin, maʼletsein otta jalejeʼewaliin naya (Mateo 9:36; Marcos 10:16). Soʼu wanee kaʼi, müshi wanee wayuu ajaʼtta atachi nümüin: «Müinka pücheküle, piiyaja taya». Amülialaasü naaʼin Jesuu naalin chia wayuukai otta niiyajüin nia (Marcos 1:40-42).

• Nikirajüin waya Jesuu süpüla talatüinjachin Maleiwa wamaa. Naashin Jesuu nnojoishii süpüla waʼyataainjanain nümüin Maleiwa sümaa kachiiruain waaʼin tü washirüükat. Wanee kasa nümaka Jesuu shia waaʼinrüinjatüin tü anasükat sümüin wayuu maʼaka wacheküin saaʼinreein tü anasükat wamüin. Akaʼaya nia, nikirajüin waya sünain jülüjain naaʼin Maleiwa tü kasa waaʼinrakat, tü jülüjakat waaʼin otta tü suluʼukat waaʼin. Müsüjeseʼe jülüjainjatüin waaʼin kasa anasü süpüla talatüinjachin Maleiwa wamaa (Mateo 5:28; 6:24; 7:12). Jee müsia, nikirajüin Jesuu tü waaʼinrajatkat süpüla talatüinjatüin maʼin waaʼin. Watüjaainjatü aaʼu tü keeʼireekat naaʼin Maleiwa wapüleerua otta waaʼinrüinjatüin shia (Lucas 11:28).

• Niiʼiyatüin Jesuu tü sukuwaʼipainjatkat saaliin wayuu wapüla. Nütanalüin saaʼin wayuu Jesuu sükajee tü nümakat jee tü naaʼinrakat. Anuu sünüiki tü Wiwüliakat: «Ponusü maʼi naaʼin na wayuukana tü nünüikikat, süka shiyaawatüin saaʼinyaka naaʼu sünain niʼitaaushin nütüma Maleiwa süpüla ekirajaa nünüiki» (Mateo 7:28, 29). Jamüshijaʼa nia, nuluwataain na nikirajüinkana sünain alinjanain napüla na naʼünüükana. Jee müshia nia, oʼuraajüshi naaʼu waneinnua wayuu oonookana nikiira, müshi nia: «Taataa, anashi müleka pülatirüle naainjala noulia na aaʼinrakana tamüin tüü, süka nnojoliin natüjaain saaʼu tü naaʼinrakat taka» (Mateo 5:44; Lucas 23:34).

Niaʼaya maʼin Jesuu chi anakai süpüla aluwatawaa. Atüjashi maʼin nia, aishii waya nüpüla otta nükaalinjeein waya. ¿Joujeechikaʼa nuʼttüin sünain aluwatawaa?