Atüjainjachi pia aküjaa pütchi: Püküja pütchi süka teleepono

¿JAMÜSÜ CHOʼUJAAKA? Waküjapa pütchi süka teleepono, shia wanee sukuwaʼipa süpüla shiʼraajünüinjatüin tü pütchi anasükat (Alu 20:24).a Otta müsia eeshii süpüla waküjain pütchi nümüin wanee wayuu mayaapejeʼe kapüleein wantüin nipialuʼumüin.

ANUU SUKUWAʼIPAINJATKA:

• 

  Yapa pia. Püneeka wanee kasa kamalainjeetka namüin na wayuukana. Püshaja sünain wanee karaloʼuta tü püküjainjatkat. Süpülapünaa piyamaajüin, yapainjatü putuma tü pünüikinjatkat. Süka jamüin, shialeereʼe joo asoutuin pümüin tü contestador automático münakat. Anasü eere pümaʼana saaʼu tü meesakat tü karaloʼuta pünüikimaajatkat otta müsia waneirua kasa choʼujaajeetka pümüin maʼaka saaʼin tü serulaat eere putuma JW Library^® jee shiale jw.org^®.

• 

  Nnojo mmoluin pia. Yooto pia maʼakaajüle yootuin pia sümaa wayuu shipiajatü otta akulemeraainjachi pia. Nnojo koʼuttapünaʼawalin pia waneepia. Anashi nnojoire pümüiwaʼain sünain aküjaa pütchi. Püsakinnüle nutuma chia wayuukai sünain wanee kasa, püküja shia süchikuaʼa süpüla naapüin shia chi aküjakai pütchi pümaa süpüla nükaalinjain pia sünain nüchajaain wanee susoutia.

• 

  Süpüla puuyantüin püchikuaʼa. Kamalainre nümüin chi wayuukai tü pütchikat, püsakira nia sünain wanee kasa pusouteetka eʼipajee wanee sukueena. Eesü süpüla pümüin nümüin chi wayuukai puluwataajeerüin nümüin wanee karaloʼuta suluʼupünaa correo, suluʼupünaa Internet jee piʼikajaale shia nipialuʼumüin. Eesü süpüla puluwataain wanee video nümüin jee shiale wanee karaloʼuta suluʼupünaa mensaaje jee shiale wanee correo. Müleka anashiijeerüle nümüin chi wayuukai, eesü süpüla püküjain nümüin nünaʼlaaiwa jw.org^®.