Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa

AAʼURIIROʼU 1-7

KOROLO KOJUTUSÜ SULUʼUKA TÜ WIWÜLIAKAT | 1 CORINTO 7-9

«Tü kasa anasü eekat sutuma maʼwayuusein wanee wayuu»

w11-S 15/1 18 püt. 3

Tü eekat süpüla paaʼinrüin maiwaʼaya pia maʼwayuusein

³ Na maʼwayuusekana eesü süpüla naaʼinrüin wainma kasa süka eein kaʼi napüla. Eeshii süpüla nakooʼomüinrüin naʼyataain nümüin Jeʼwaa, wainmain naʼaleewainyuu otta narütkaain maʼin nünainmüin Jeʼwaa (1 Cor. 7:32-35). Sutuma wainmain tü kasa anasü eekat sünainjee tia, wainma na wawalayuu aneekakana maʼwayuusein naya. Otta eeshii na nnojoliikana jülüjain naaʼin paala maʼwayuusein naya. Shiasaʼa süka müitpain nakuwaʼipa, oʼuraajüshii nümüin Jeʼwaa jee jülüjasü naaʼin nakuwaʼipa, nayaawataka aaʼu eein süpüla anain naya sümaa tü alatakat namüin nutuma Jeʼwaa. Müshiijeseʼe nachecherüin naaʼin sümaa maʼwayuusee (1 Cor. 7:37, 38).

w08-S 15/7 27 püt. 1

Pütchi anaka maʼin sünainjee tü piamasükat karaloʼuta Corinto

1 Corinto 7:33, 34. ¿Kasa wayu tü jülüjakat naaʼin waneepia chi anoujashi kaʼwayuusekai? Shia jülüjaka naaʼin tü kasa choʼujaakat namüin kaʼiwai, maʼaka saaʼin tü neküinjatkat, tü nasheʼinjatkat jee tü nepiainjatkat. Nnojotsü shiain jülüjain naaʼin tü kasa mojusü naainjakat na manoujainsaliikana, tü wayoutuinjatkat (1 Juan 2:15-17).

w96-S 15/10 12 püt. 14

Chi maʼwayuusekai eesü süpüla wainmain niʼyataain

¹⁴ Chi anoujashi eekai naaʼinrüin tü keeʼireekat naaʼin nümüiwaʼa mojuleesia nukuwaʼipa nuulia chi kaʼwayuusekai, süka nnojoluin müin nukuwaʼipa süpüleerua aʼyatawaa nümüin Maleiwa (Mateo 19:12). Chi anoujashi eekai maʼwayuusein, jülüjainjatü naaʼin waneepia tü nüchekakat chi Senyotkai nüpüleerua otta naaʼinrüinjatü tü nuluwataakalü anain nia jee tü nüchekakat nüpüleerua. Sutuma tia, kojutuleeinjatü nutuma tü niʼyataainkat nümüin Jeʼwaa otta Jesuu. Naaʼinrüle tia, anaʼleejeeria nukuwaʼipa nuulia chi kaʼwayuusekai.

Püchajaa süchiki kaaʼürüi suluʼu tü Wiwüliakat

w00-S 15/7 31 püt. 2

Eesü süpüla wulein wakuwaʼipa maaʼutpünaa

Nnojolinjachi kasaalüin wanee jimaʼai jee shiale wanee majayüt sutuma nashapajaain aaʼin shiiʼiree kaʼwayuusee. Choʼujaasü kojutuin nümüin wanee wayuu tü nuʼwayuusekat, süpüla tia laülaainjatü naaʼin palajana (Génesis 2:24). Anasü naʼatapajüle kettaain nuuyase wanee wayuu süpülapünaa kaʼwayuusein nia. Süka mojeerüin nukuwaʼipa nnojoire naʼatapajüin (1 Corinto 7:36). Chi wayuu miyoʼu keeʼireekai aaʼin kasaalüü, nnojotsü anain nümaʼüjiraale nukuwaʼipa sümaa wanee wayuu sutuma neʼe nnojoluin nuusütüin tü wayuu nuʼwayuuseinjatkat, nnojotsü laülaain naaʼin naaʼinrüle tia otta kaainjalashi nia.

AAʼURIIROʼU 8-14

KOROLO KOJUTUSÜ SULUʼUKA TÜ WIWÜLIAKAT | 1 CORINTO 10-13

«Pansaasü nünüiki Jeʼwaa wamüin»

(1 Corinto 10:13, TNM) Ooʼulakünüsü jaaʼin süka tü alatakat sümüin wayuu süpüshuaʼa. Pansaapejeʼe nünüiki Maleiwa wamüin, nnojoleerü nuuʼulaain suuʼulakünüin waaʼin sükajee wanee kasa iseetka wachiki, niiʼiyateerü wamüin jamüinjatüin wojuʼitia saʼakajee müliaa süpüla wountüin wachecherüin waaʼin.

Püchajaa süchiki kaaʼürüi suluʼu tü Wiwüliakat

w04-S 1/4 29

Süsakiraka anain wayuu

Süküjain pütchikat tüü outuin 23.000 israeliita sutuma naʼluwajiraain nakuwaʼipa, ¿jamaka süküjaka Números 25:9 outuin 24.000?

Wainma kasa aküjünaka süchiki jamüin maka tia. Wanee kasa aküjünaka, shia nalatüin suulia 23.000 na outakana jee nnojoluin sülatüin suulia 24.000.

Anuu wanee sukuwaʼipaya. Nüküjain Pablo süchiki tü naainjakat na Israeliitakana chaa Sitim namüin na chejeʼewaliikana Corinto süpüla eejüin naaʼin sünain nakuwaʼipa. Eʼraajünüsü tia mmakat sünainjee neʼrüliin wayumüin na kepiakana suluʼu. Müsü tü nüshajakat: «Je anakaja nnojoliire waʼluwajiraain wakuaippa sümaa wayuu jierü otta wane jierü nümaa wane toolo, maa aka tü naaʼinrakat na watuushinuukana. Saaliijee tia, ouktüshii naʼakajee maa aka 23.000 wayuu soʼuleʼeya wane kaʼi». Naya naashajaakana achiki Pablo outuin nutuma Jeʼwaa na aʼluwajiraakana nakuwaʼipa otta 23.000 naya napüshuaʼa naashin (1 Corinto 10:8).

Aküjünüsü suluʼu Números kapiitulo 25 noʼttüin na israeliitakana sünain naʼwaajüin Baal chi chajachikai Peor, jashichika Jeʼwaa namüin saaliijee tia, jee nuluwataaka Moisés süpüla noʼutunüin aaʼin ‹na laülaashii› eejakana chaa Israel. Nuluwataain Moisés nekiipüʼü na israeliitakana süpüla naaʼinrüin tia. Ojoʼlooleesia tia wanaa sümaa outuin wanee israeliita nutuma Finehás; chia israeliitakai nikerotirüin wanee madianiita naʼakamüin na israeliitakana. «24.000 na wayuu outaka soʼu tia», müsü sajaʼttiamüin tü pütchikat (Números 25:1-9).

Tü süküjakat karaloʼutaka Números, eesü shiale süküjain jeʼrashiin napüshuaʼa na outakana nutuma Jeʼwaa otta natuma nekiipüʼü na israeliitakana. Eeshii süpüla miit na laülaashii oʼutakana natuma nekiipüʼü na israeliitakana. Makalaka süsaʼwatüin 24.000 na outakana. Naya kasitka na laülaashiikana naʼwaajüin na israeliitakana Baal chi chajachikai Peor, jaʼitaina nayain na amaʼüjiraakana nakuwaʼipa, sünainpünaain naya aʼwaajaa Baal jee shiale nooʼulaain saainjünüin tia.

Saashin wanee karaloʼuta, tü pütchi «amawaa» makat, shia sükacheraale naaʼin wanee wayuu nünain waneʼeya. Nüneekala Jeʼwaa na israeliitakana süpüla nupueulosein naya, akanasaʼa nayakana akatalaashii nuulia sutuma naʼwaajüin Baal chi chajachikai Peor. 700 juya süchikijee sülatüin tia, müshi Jeʼwaa namüin na israeliitakana nükajee Oseas: «Otta nayakana naʼwaajüin Baal chi chajachikai Peor otta yarüttüsü maʼin nakuwaʼipa toʼuluʼu maʼaka naaʼin chi naʼwaajakai» (Oseas 9:10). Na wayuu makana akuwaʼipa süsalashii naya tü naainjalakat. Müshi Moisés namüin na nooʼuliwoʼukana na israeliitakana: «Jiʼrüin jiakana tü naainjakat Jeʼwaa naka na wayuu aʼwaajakana Baal chi chajachikai Peor, soʼu tia, chi eekai nükatalaain nümaa Baal outushi nia nutuma Jeʼwaa chi pümaleiwasekai» (Deuteronomio 4:3).

w15-S 15/2 30

Süsakiraka anain wayuu

¿Kekiyaalajüinjatche wanee wawala shikirajüle wayuu sünain tü Wiwüliakat nuʼupala wanee wawala?

▪ Suluʼu Aapiria Wayuu ojuʼitaka juulioʼu 15 soʼu 2002 süka alijunaiki, sünain tü pütchi «Süsakiraka anain wayuu» makat, aküjünüsü kekiyaalajüinjatüin wanee wawala shikirajüle wayuu sünain tü Wiwüliakat nuʼupala wanee wawala, jaʼitaichi nnojoluin woutiisain nia. Süchikijee shikirajaanüin maʼin anain tia, anoutunüsü tü wamakat paala.

Kekiyaalajüinjatü wanee wawala shikirajüle wayuu sünain tü Wiwüliakat nuʼupala wanee wawala woutiisakai. ¿Jamüsü saaʼinrüinjatka tia? Shia süka shikirajüin wayuu, tia naainjainjatü neʼe wanee wayuu toolo. Akaajasaʼa kekiyaalajale shia, shiiʼiyatüin kojutuin sümüin tü sukuwaʼipakat nutuma Jeʼwaa napüleerua na anoujashiikana (1 Cor. 11:5, 6, 10). Eesüjaʼa süpüla suchuntuin tü wawalakat nümüin chi wawalakai niain ekirajüin, müleka yapale nia süpüla tia.

Niale wanee wawala nnojoiyüikai woutiisain chi sümaakai tü wawalakat sünain ekirajaa wayuu otta nnojoikai niain chi suʼwayuusekai, nnojotsü süküjain tü Wiwüliakat choʼujaain kekiyaalajüin shia. Eepejeʼe wawalayuu jieyuu eekana kekiyaalajüin sünain ekirajaa sutuma mojuin saaʼin namüin nnojorüle naaʼinrüin tia.

AAʼURIIROʼU 22-28

KOROLO KOJUTUSÜ SULUʼUKA TÜ WIWÜLIAKAT | 1 CORINTO 14-16

«Nieechi laülaaka Maleiwa ‹saaʼu kasakat süpüshuaʼale›»

(1 Corinto 15:24, 25, TNM) Süchikijee tia, anteerü sükalia sajaʼttaleeinjatka oʼu kasa mojusü, nüleʼejirapa süchikuaʼa tü Aluwataaya aapünakat nümüin nutuma chi Nüshikai, najaʼttirapa süpüshuaʼa tü aluwataayakalüirua saaʼujee tü mmakat. ²⁵ Aluwataainjachi nia, waneʼereʼeya nuuʼulaain suulia aluwatawaa niyamütpa Maleiwa tü nüʼünüükalüirua.

w98-S 1/7 21 püt. 10

«Nüsünneʼerüinjatü tü outaakat»

¹⁰ Sükajee tü pütchi «anteerü sükalia sajaʼttaleeinjatka oʼu kasa mojusü» makat, shia saashajaaka achiki tü kaʼi nüleʼejirüinjatkat oʼu Jesuu süchikuaʼa nümüin chi Nüshikai tü Aluwataaya naapakat nümüin (Alateetkat Mapeena 20:4). Tia shia kettaapa shikeraajüin tü nüküjakat achiki paala Maleiwa sünain «nükotchajeerüin kasakat süpüshua tü chasükat iipünaa otta yaasükat saaʼu mmakat, süpüla niainjachin Cristo chi Nüneekajalakai aluwataain saaʼu» (Éfeso 1:9, 10). Süpülapünaa tia, najaʼttireena Jesuu na ayoutakana tü keeʼireekat naaʼin Maleiwa maʼaka na aluwataashiikana jee na laülaakana saaʼu mma. Alanaʼaleejeerü tüü suulia tü alatüinjatkat soʼunnaa Armagedón (Alateetkat Mapeena 16:16; 19:11-21). Müshi Pablo: «Aluwataainjachi [Kürisüto], waneʼereʼeya nuuʼulaain suulia aluwatawaa niyamütpa Maleiwa tü nüʼünüükalüirua. Shiasaʼa süchikijee tia, nüsünneʼerüinjatü tü outaakat» (1 Corinto 15:25, 26, TNM). Süpüshuaʼa tü kasa mojusü eekat sünainjee kaainjalain Adán wapüleerua jee tü outaakat, ajaʼlajaweerü. Soʼu tia, nnojoleena apütaain suluʼu tü woowirakalüirua na wayuu outakana paala süka nüchijireʼerüinjanain naya Jeʼwaa (Juan 5:28).

(1 Corinto 15:26, TNM) Shiasaʼa süchikijee tia, nüsünneʼerüinjatü tü outaakat.

kr-S 237 püt. 21

Nikeraajeerü Maleiwa tü keeʼireekat naaʼin sükajee tü Nuluwataayakat

²¹ Outusü maʼin wayuu sutuma tü ayuuliikat jee tü kaainjalaakat, ¿jameetche mapa sukuwaʼipa tü outaakat? Tia müsü aka saaʼin waʼünüü ayamülaka waya waneepia (1 Cor. 15:26). ¿Iseetche nüchiki Jeʼwaa niyamülüin tü outaakat? Jülüja paaʼin tü nümakat Isaías: «Müiria nnojoluin eein outaa. Müiria nnojoluin eein aʼyalajaa, najaʼttireerü tia Jeʼwaa, chi Laülaakai saaʼu kasa süpüshuaʼa» (Is. 25:8). Anakatche maʼin. Nnojoleerü eein alapajaa, nnojoleerü woowira otta nnojoleerü aʼyalajüin wayuu. Aʼyalajeena neʼe waya sutuma weʼrüin nikeraajüin Maleiwa tü nümakat sünain nüsoʼirüin naaʼin na outushiikana (paashajeʼera Isaías 26:19). Aneerü waaʼin shikeraajapa tia pütchikat.

w12-S 15/9 12 püt. 17

Jimateerü waaʼin soʼu miit juya jee waneepia

¹⁷ Nüküjain Pablo süchiki tü alateetkat mapeena süka nümüin: «Nieechikalaka Maleiwa laülaain saaʼu kasakat süpüshuaʼale». ¿Jamaluʼutche tü nümakat Pablo? Süpülapünaa kaainjalain Adán sümaa Eva, naʼakapuʼushii naya na nüpüshikana Maleiwa jee anapuʼushii maʼin naya namaa. Jeʼwaa, chi Aluwataakai saaʼu kasa süpüshuaʼa, niapuʼushi laülaaka nümüiwaʼa saaʼu süpüshuaʼa tü kasa nukumajakat, maʼaka naaʼu na aapieekana jee naaʼu na wayuukana. Naʼwaajüin nia jee eepuʼushii süpüla yootuin naya nümaa otta anasü nakuwaʼipa nutuma Jeʼwaa. Wanaa sümaa tia, niashi chi laülaakai saaʼu kasaka süpüshuaʼa.

Püchajaa süchiki kaaʼürüi suluʼu tü Wiwüliakat

(1 Corinto 14:34, 35, TNM) Anasü koʼutule wanee wawala wekirajaapa sünain tü outkajawaakat, nnojoishii naya aashajaainjanain, shia anaka jüüjüüle naya maʼaka süküjain tü pütchi aapünakat nümüin Moisés. ³⁵ Müleka sütüjaweerü sooʼomüin, anasü süsakirüle chi suʼwayuusekai chaa shipialuʼumüin süka nnojoluin anain saashajaale wanee jierü sünain tü outkajawaakat.

w12-S 1/9 9, pütchi süttaka

¿Nüpülajüinche Pablo nasoutuinjanain na jieyuukana?

«Anasü koʼutule wanee wawala wekirajaapa sünain tü outkajawaakat», müshi Pablo (1 Corinto 14:34, TNM) ¿Jamaluʼutche tü nümakat? ¿Shiache nüküjaka Pablo matüjain na jieyuukana ekirajaa? Nnojotsü shiain nüküjain tia, süka wainmatuain nüküjain kojutuin nümüin tü naainjakat na jieyuukana sünain aküjaa pütchi (2 Timoteo 1:5; Tito 2:3-5). Nüküjain Pablo sünain tü karaloʼuta nüshajakat namüin na chejeʼewaliikana Corinto sünain koʼutuinjanain na anoujashiikana naashajaale wanee nawala, nnojotsü shiainjatüin neʼe koʼutuin wanee wawala jierü müshiʼiya neʼe na atüjakana süpüleerua aküjaa nünüiki Maleiwa jee na atüjakana wainma anüikii (1 Corinto 14:26-30, 33). Eepuʼushii jieyuu asakirakana nnojoluiwaʼaya najaʼttüin wanee anoujashi sünain ashajawaa süka ponuin maʼin naaʼin tü ekirajünakalü anain naya, süka mapuʼuin sukuwaʼipa wayuu suluʼu tia mmakat. Süpüla anain sukuwaʼipa tü outkajawaakat, «anasü süsakirüle chi suʼwayuusekai chaa shipialuʼumüin», müshi Pablo (1 Corinto 14:35, TNM).

it-1-S 1221

Taashisü nakuwaʼipa suulia ajaʼlajawaa

Wanaawashii naya nümaa Jesuu sünain asoʼirawaa aaʼin süpüla meʼrujuinjanain naya, nnojoliin outuin naya piantua otta süpüla taashin nakuwaʼipa suulia ajaʼlajawaa. Katoʼuchii paala naya saaʼu tü mmakat ,aʼyataashii waneepia nümüin Jeʼwaa jee süchikijee outuin naya, meʼrujusalii naya nutuma Jeʼwaa otta taashisü nutuma nakuwaʼipa suulia ajaʼlajawaa, maʼaka nüküjain shia Pablo suluʼu 1 Corinto 15:42-54. Nnojoleena naya outuin piantua süka eejeenain naya waneepia sümaa anain maʼin nakuwaʼipa otta nnojoishii süpüla najaʼttinnüin. Taasheerü tü nakuwaʼipakat suulia ajaʼlajawaa süka naapeerüin Maleiwa namüin wanee eʼiruku nnojotka müin aka saaʼin niʼiruku wanee wayuu jooka süpüla ajaʼlajawaa. Sükajee tia, katatüsü nakuwaʼipa nutuma Maleiwa süka nnojoluin choʼujaain niainjachin Maleiwa aapaka kataa oʼu namüin, naatasü nakuwaʼipa noulia na wayuukana, na aapieekana jee na mürütkana. Shiiʼiyatüin wamüin tia niʼitaain maʼin naaʼin Jeʼwaa nanain. Nnojoliipejeʼe naya laülaain saaʼu nakuwaʼipa namüiwaʼa, ayatshi niain Maleiwa aluwataain naaʼu. Ayatüinjana naya jüüjüüin jee oonooin sümüin tü nümakat Maleiwa maʼaka naaʼinrüin shia Jesuu, chii nekiipüʼükai (1Co 15:23-28; paashajeʼera alma; inmortalidad).

AAʼURIIROʼU 29–MAAYOʼU 5

KOROLO KOJUTUSÜ SULUʼUKA TÜ WIWÜLIAKAT | 2 CORINTO 1-3

«Nia Jeʼwaa chi amüliajüikai waaʼin»

Püchajaa süchiki kaaʼürüi suluʼu tü Wiwüliakat

(2 Corinto 1:22, TNM) Niʼitaain wanain wanee sello otta naapüin wamüin wane prenda shiyaakuaka tü naapüinjatkat wamüin mapeena, tia shia nütsüin chi naaʼinkai Maleiwa suluʼu waaʼin.

w16.04-S 32

Süsakiraka anain wayuu

¿Kasa wayu tü «sello» otta tü «prenda» naapakat Maleiwa namüin na chainjanakana iipünaa? (2 Cor. 1:21, 22, TNM; noota).

▪ Prenda. Saashin wanee karaloʼuta, tü pütchi griego alatinnakalü anainjee «prenda» suluʼu 2 Corinto 1:22, achuntünüsü shia saashajaanapa süchiki sukuwaʼipa oikawaa jee ayaʼlajaa kasa otta wanaa sümaa süpansaajünüin wanee pütchi eʼitaanaka suluʼu wanee karaloʼuta. Tia müsü aka saaʼin awalaajaa süpüshi sülia wanee kasa nümüin chi wayaʼlajüinjachikai oulia. Sükajee tia, müsü wakoroloitpakai saaʼin tü kasa wayaʼlajakat. Müsia neʼe nüneekünapa wanee anoujashi nutuma chi naaʼinkai Maleiwa süpüla chainjachin nia iipünaa, aapünüsü nümüin wane «prenda». Saashin 2 Corinto 5:1-5, taashisü nakuwaʼipa naya anoujashiikana suulia ajaʼlajawaa wanaa sümaa nasoʼiraain aaʼin nutuma Jeʼwaa chaa iipünaa. Otta müsia wanee kasa aapünaka namüin shia nnojoluitpain süpüla outuin naya piantua (1 Cor. 15:48-54).

Wanaawasü tia pütchikat sümaa tü namakat na griegokana maaʼulu süchiki tü süttiija naʼataka sünain najapü chi wayuu kasaalüinjachikai. Pansaasü maʼin tia shiyaawasekat napüla na chainjanakana iipünaa, süka müinjatüin nakuwaʼipa maʼaka saaʼin wanee jierü nuʼwayuuseinjatka Kürisüto (2 Cor. 11:2; Alat. Map. 21:2, 9).

▪ Sello. Sümaiwa paala eʼitaanüsü sello sünain wanee karaloʼuta aashajaaka süchiki jaralüin kakoroloin wanee kasa otta süpüla kojutuin wanee karaloʼuta kaluʼuka wanee pütchi apansaajünaka. Niʼitaapa Maleiwa wanee sello nanain na anoujashii chainjanakana iipünaa, niashi joo nalaülajanaka (Éf. 1:13, 14, TNM). Na wawalayuu chainjanakana iipünaa waneepiakana nümaa Jeʼwaa eʼitaaneerü nanain wanee sello süpülapünaa outuin naya jee shiale süpülapünaa süntüin tü müliaa miyoʼukat (Éf. 4:30; Alat. Map. 7:1-4).

(2 Corinto 2:14-16, TNM) Waapüin analuʼut nümüin chi Maleiwakai sükajee nuʼunirüin wakuwaʼipa sünain tü miʼiraa aainjünakat shikiira akanajaa nümaa Kürisüto. Eʼraajünüshi Maleiwa sutuma wayuu wainma sutuma weʼikajüin tü pütchikat nüchiki ¹⁵ Müshii waya maʼaka saaʼin tü wunuʼu jemetakat eejuu aʼajünaka nümüin Maleiwa nükajee Kürisüto, tia sümüsainkat antüsü shia nanainmüin na katüinjanakana oʼu jee na outajanakana. ¹⁶ Na aapakana tü pütchikat kateena oʼu jee na nnojoliikana aapajeein shia outeena. ¿Jaraiche kettaaka süpüla eʼikajaa pütchi nüchiki Maleiwa?

w10-S 1/8 23

¿Pütüjaa aaʼu?

¿Jamaluʼulu tü nümakat Pablo wanaa sümaa nümüin: «Tü miʼiraa aainjünakat shikiira akanajaa»?

▪ Müshi Pablo suluʼu 2 Corinto 2:14-16, TNM: «Nuʼunirüin wakuwaʼipa [Maleiwa] sünain tü miʼiraa aainjünakat shikiira akanajaa nümaa Kürisüto. Eʼraajünüshi Maleiwa sutuma wayuu wainma sutuma weʼikajüin tü pütchikat nüchiki». Otta nümaka süchikijee: «Müshii waya maʼaka saaʼin tü wunuʼu jemetakat eejuu aʼajünaka nümüin Maleiwa nükajee Kürisüto, tia sümüsainkat antüsü shia nanainmüin na katüinjanakana oʼu jee na outajanakana. Na aapakana tü pütchikat kateena oʼu jee na nnojoliikana aapajeein shia outeena».

¿Kasa wayu «tü miʼiraa aainjünakat shikiira akanajaa»? Shia naashajaaka achiki Pablo tü miʼiraa naainjapuʼukat na chejeʼewaliikana Roma süchikijee nakanajüin wanee atkawaa, tü miʼiraakat namüinjatü shia nekiipüʼü na surulaatkana. Sünain tia, eeʼiyatünüsü suʼupala wayuu tü kasa nasütakat noulia na naʼünüükana otta eeʼiyatünüshii na wayuu nataʼülakana. Otta aʼwaajünüshii na shikiipüʼükana surulaat jee müshiʼiya na surulaatkana natuma na wayuukana. Ekeraajüsü tü miʼiraakat sükajee suʼutunuin aaʼin paaʼa sümaa saʼajünüin otta noʼutunüin aaʼin wainma wayuu ataʼüluushiikana.

Naashin Pablo, eeshii waneinnua wayuu katakana oʼu jee waneinnua outushii sutuma seejuu tü wunuʼu «aʼajünakat nümüin Maleiwa nükajee Kürisüto». ¿Jamaluʼutche tü nüküjakat? Saashin wanee karaloʼuta, «eesü süpüla sünainjeejatüin tia pütchikat tü wunuʼu jemetakat eejuu aʼajünapuʼuka chaa Roma soʼunnaa tü miʼiraakat». «Sutuma tü seejuukat sotusü naaʼin na romaanokana nakanajüin otta namüin na ataʼüluushiikana shiyaawasesü outaa» (The International Standard Bible Encyclopedia).