EKIRAJAAYA 7

Pansaa pünüiki otta punoujira wayuu sünain

Lucas 1:3, TNM

PÜTÜJAINJATKA APÜLEERUA: Paashajaa süchiki wanee kasa eekai shiimain, apansaajaka tü pütchikat namüin na wayuukana.

Pikirajaa sünain pütchi eekai shiimain. Püküja sünüiki tü Bibliakat, anasü paashajeʼerüle sünüiki. Pikirajaa sünain wanee pütchi palajana süpüla pütüjaain saaʼu shiimain shia, maʼaka saaʼin tü namakat na científicokana, wanee kasa ojuʼitaka suluʼu noticiero, wanee kasa alataka nümüin wanee wayuu otta wanee kasa paashajaweeka achiki.
Ana putuma tü pikirajakalü akajee. Pikiraja wanaapünaa sümaa tü pütchi eekat süpülapünaa wanee wetsiikulo jee tü eekat süchikijee, tü saashajaakat maʼin achiki otta tü karaloʼuta naapakat «chi achepchiee oonookai jee kekiikai maʼin» (Mateo 24:45, TNM). Püküja sünüiki waneirua karaloʼuta nnojotka sünainpünaain tü Bibliakat wanaapünaa sümaa tü aküjüneekalü achiki.

Nnojo pukooʼomüinrüin wanee kasa eekai alatüin otta wanee nuumero. «Eeshii waneinnua wayuu», pümüinjachire, nnojo «wainma wayuu», pümüin. «Eesü müle shia», pümüinjachire, «maʼwaisü waneepia», nnojoishi müinjachin pia.
Püküja jamüin shiimainka wanee kasa. Süchikijee paashajeʼerüin wanee wetsiikulo jee paashajaain süchiki wanee kasa nüküjaka wanee wayuu, anashi püsakirüle otta kayaawasere putuma tü pünüikikat süpüla natüjaain saaʼu na wayuukana tü püküjeekalü achiki.