Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
JUULIOʼU 1-7
KOROLO KOJUTUSÜ SULUʼUKA TÜ WIWÜLIAKAT | COLOSAS 1-4
«Wayouta tü kasa mojusü keejiapuʼukat wamüin jee shia waaʼinra tü keeʼireekat naaʼin Maleiwa»
w11-S 15/3 9, 10 püt. 12, 13
Waaʼinra tü nüchekakat Maleiwa otta eejiraa waya sümaa tü nakuwaʼipakat na manoujainsaliikana
12 ¿Jaʼyasüche saaʼu takuwaʼipa taaʼinrüin tü keeʼireekat naaʼin Maleiwa shiataapa tashatüin nakuwaʼipa na manoujainsaliikana? (Paashajeʼera Colosas 3:8-10, 13). Wayaawateerü aaʼu tia, jülüjale waaʼin kasain waaʼinrüin nnojotpa anain watuma wanee kasa. Sülatapa wamüin tia, ¿müsüche wakuwaʼipa maʼaka nukuwaʼipa wanee manoujainsai? (Gal. 5:19-21). ¿Kasajaʼa waaʼinraka nnojorüle kapülain waya naaʼin wanee wawala? ¿Jama mojule nünüiki wamüin jee naaʼinrüle wanee kasa mojusü wamüin? Wanee kasa jülüjainjatka waaʼin shia tü wakuwaʼipakat wepialuʼu, eesü süpüla jayain maʼin waaʼu chayaa jaralüin tü akuwaʼipa eekat wanain. Jülüja paaʼin tüü: «Soʼu tü aipirua kashi alatüitpakat, ¿shiache eeʼiyataaka maʼin sünain takuwaʼipa tü nuluwataakalü anain Jeʼwaa shiataapa tashatüin tü naaʼinrakat na manoujainsaliikana sünain tü nanüikipalakat jee tü nakuwaʼipakat?».
13 Nükaalinjain waya chi naaʼinkai Maleiwa süpüla woonooin sümaa pütchikat tüü: «Juuʼulaa jümata suulia süpüshua tü kasa mojusü keejiapüʼükat paala jümüin [...]. Anakaja jaashajiraale pütchi shiimüin, süka shiiʼiranajaaitpain jukuaippa nütüma Maleiwa». Müle wakuwaʼipa, kamaneejeena maʼin waya, aijeerü maʼin wayuu wapüla otta moteerü waaʼin naainjala na waneinnua jaʼitaina nnojoluin wayain kaainjalain. Müleka naainjüle wamüin kasa mojusü wanee wawala saaʼin wamüin, nnojoleerü ülüʼüttüin waaʼin, nnojoleena waya aʼülüjaain jee nnojoleena waya awoorolooin süka pütchi mojuluʼut. Shia weeʼiyateetka aijiraain maʼin waya namaa na wawalayuukana (Éfe. 4:31, 32).
Püchajaa süchiki kaaʼürüi suluʼu tü Wiwüliakat
it-2-S 819 püt. 4-6
Sukuwaʼipa Nuluwataaya Maleiwa
«Chi Nüchonkai Maleiwa aishikai nüpüla süpüla niain aluwataain». Poloo kaʼi süchikijee nuʼunuin Jesuu chaa iipünaamüin soʼu tü juyakat 33 So. W. nayaawata aaʼu na nikirajüinkana sünain niʼitaaichipain nia Maleiwa «süpüla aluwatawaa chaa nikialuʼujee» sükajee nüntüin chi naaʼinkai Maleiwa naaʼu nayakana (Alu 1:8, 9; 2:1-4, 29-33). Oʼttüsü yalejee tü pütchi «jeket eʼitaanakat nütüma Maleiwa» otta aneekünüshii na nikirajüinkana Jesuu süpüla naluwataainjanain chaa iipünaa (Heb 12:22-24; 1Pe 2:9, 10; Gal 6:16).
Aluwataashi Jesuu nikialuʼujee chi Nüshikai otta niashi chi Nikiipüʼükai na anoujashiikana (Éf 5:23; Heb 1:3; Flp 2:9-11). Soʼujee tü juyakat 33 So. W., süküjain tü Wiwüliakat süikaleʼennüin sukuwaʼipa wanee aluwatawaa nutuma Maleiwa eere naluwataainjanain na nikirajüinkana Jesuu. Sünain tü nüshajakat Pablo namüin na anoujashii chakana Colosas, nüküjain nuʼttüichipain Jesuu sünain aluwatawaa, müshi nia: «Ayuʼnnüshii nütüma chi Maleiwakai saʼakajee tü piyuushikat [...], süpüla woʼuninnüin nünainmüin Jesucristo chi Nüchonkai Maleiwa aishikai nüpüla süpüla niain aluwataain waya» (Col 1:13; anasü paashajeʼerüle Alu 17:6, 7).
Soʼujee tü juyakat 33 So. W., aluwataashi Jesuu chaa iipünaajee naaʼu na anoujashii aneekünakana nutuma chi naaʼinkai Maleiwa süpüla Nüchoinjanain naya Maleiwa, nayakana naya na anoujashii aluwataainjanakana chaa iipünaa (Jn 3:3, 5, 6). Oʼunüshii naya chaa iipünaamüin süpüla aluwatawaa nümaa Kürisüto süchikijee kettaain natuma tü naʼyataainkat yaa Mmapaʼa (Alat 5:9, 10).
w08-S 15/8 28 püt. 9
Pütchi anaka maʼin sünainjee tü karaloʼutakat Galacia, Éfeso, Filipos otta Colosas
Colosas 2:8. ¿Kasa wayu tü pütchi «naleʼeruʼujeejatü neʼe» nümakat Pablo waaʼinmajiraainjanaka oulia? Tia, shia tü nakuwaʼipakat na nuluwataakana aaʼu Satanaa otta tü kasa oʼunirakat nakuwaʼipa, maʼaka saaʼin tü alawaa shikirajakalü anain wayuu, kachiirua aaʼin kamaʼanaa wainma korolo, tü iküleesia nnojotka shiimain otta waneirua kasa (1 Juan 2:16).
JUULIOʼU 8-14
KOROLO KOJUTUSÜ SULUʼUKA TÜ WIWÜLIAKAT | 1 TESALÓNICA 1-5
«Ayata ‹jütütüjüin na juwalayuukana sünain anoujaa süpüla laülaajiraainjatüin jaaʼin›»
w11-S 15/6 26 püt. 12
Kojutu jutuma na laülaayuukana jüpüleerua
12 Na laülaakana napüleerua na wawalayuukana, nnojoishii ekirajüinjanain neʼe naya, eesü wanee kasa naaʼinrajatkaya. Nüküjain Pablo süchiki tia suluʼu 1 Timoteo 3:4, anuu nünüiki nüchiki chi laülaashinjachikai: «Niainjachi chi eekai laülaain süpüleerua nüpüshi kepiakat nümaa. Je müleka kachonle nia, kojutüinjatü nünüiki sütüma nüchonnii». Saashin pütchikat tüü, chi eekai laülaain süpüleerua nüpüshi nnojoishii neʼe nikirajüin naya, kojutusü nünüiki natuma na nüchonniikanaya otta nuʼunirüin sukuwaʼipa nüpüshi. Müinjatia neʼe nakuwaʼipa na laülaashiikana suluʼu tü outkajaaleekat, noʼunirajatü nakuwaʼipa na wawalayuukana jee nakaalinjainjana naya süpüla kojutuin namüin nünüiki Jeʼwaa (1 Tim. 3:5).
w11-S 15/6 28 püt. 19
Kojutu jutuma na laülaayuukana jüpüleerua
19 Süsülajünüle wamüin wanee kasa nutuma wanee wayuu, ¿kasa waaʼinrüinjatka süpüla waapüin analuʼutka nümüin? Kojutuinjatü shia wamüin. Naapüin Jeʼwaa wamüin nükajee Jesuu «tooloyuu jülüjainjanakana aaʼin wanoula», naya na laülaashiikana suluʼu tü outkajaaleekat. ¿Kasa waaʼinrüinjatka süpüla kojutuin naya wamüin? Jülüjainjatü maʼin waaʼin nanüiki nekirajapa sünain tü outkajawaakat otta weʼitaainjatü suluʼu wakuwaʼipa tü nekirajakalü anain. Nekirajapa, ayalerüinjana waya wajapü süpüla wasoutuin shiʼipajee tü nasakirakalü anain. Otta wakaalinjainjana naya sünain tü aʼyatawaakat nümüin Maleiwa, maʼaka saaʼin sukuwaʼipa tü aküjaakat pütchi süchiki Nuluwataaya. Waküjain namüinya jamüin anaka wakuwaʼipa sutuma wanee pütchi naküjakat wamüin. Otta müsia waapüin analuʼut namüin na napüshikana sutuma wanaawain naaʼin namaa sünain akaalinjaa na wawalayuukana.
Püchajaa süchiki kaaʼürüi suluʼu tü Wiwüliakat
it-1-S 963 püt. 7
Aʼluwajirawaa akuwaʼipaa
Mojusü maʼin tü naainjakat wanee anoujashi nuʼluwajiraale nukuwaʼipa sümaa wanee wayuu jierü otta eeshi süpüla nujuʼitinnüin naʼakajee na anoujashiikana (1Co 5:9-13; Heb 12:15, 16). Naashin Pablo, chi anoujashi eekai nuʼluwajiraain nukuwaʼipa sümaa wanee wayuu jierü, shiimüin sünain kachajaaleerüin niʼiruku sutuma. Suluʼujee tia naainjalakat, mojusü nunoula sutuma, eeshi süpüla naapaain ayuulii sünainjee otta mojusü pütchi nachiki na wawalayuukana nutuma (1Co 6:18, 19). Mojusü nümaʼüjiraale nukuwaʼipa wanee anoujashi sümaa nuʼwayuuse wanee nuwala sünain anoujaa (1Te 4:3-7), süka jamüin: 1) mojuin nakuwaʼipa na wawalayuukana sutuma tü kasa mojusü naainjakat otta mojutsalii naya nutuma (Heb 12:15, 16); 2) nnojoluitpa wulein sukuwaʼipa nutuma tü wayuu nümaʼüjiraakalü amaa jee maʼwayuusere shia nnojoluitpa wulein sukuwaʼipa süpüla kasaalüü; 3) eʼrüshii japülii na nüpüshikana sutuma tü naainjalakat otta müsia, 4) mojusü nakuwaʼipa na kachooinkana tü wayuu nümaʼüjiraakalü amaa, chi suʼwayuusekai jee niale chi kasaalüinjachikai amaa shia. Chi anoujashi aaʼinrakai tia, nia nujuyaajaka Maleiwa nooʼomüin otta süsaleechi nia nutuma, nnojoishii nayain na sülaülashiikana mma nujuyaajaka nooʼomüin (1Te 4:8).
JUULIOʼU 15-21
KOROLO KOJUTUSÜ SULUʼUKA TÜ WIWÜLIAKAT | 2 TESALÓNICA 1-3
«Eeʼiyatünüshi jaralin chi eʼrüikai wayumüin»
it-1-S 676 püt. 1
Waʼwaajüinjachi Maleiwa otta waneepiainjana waya nümaa
Nnojotsü wanaawain «tü naaʼinrakat chi eʼrüikai wayumüin» sümaa «tü pütchi nnojotkalü ayaawatünüin aaʼu» nümaʼanajeejatka Jeʼwaa. Chi eʼrüikai wayumüin nnojoipuʼushi atüjaanüin aaʼu jaralin nia natuma na anoujashii shiimainkana otta nnojotsü natüjaain aaʼu sünain kojuyain naya. Soʼu nükalia Pablo, nnojotsü ayaawatünüin aaʼu jaralin maʼin nia. Nnojoishi ayaawatünüin aaʼu nia natuma na wayuukana süka nuʼwaajüin Maleiwa naashin sümaa naaʼinrüin kasa mojusü, ayuʼlaashi nia naʼakajee na anoujashii shiimainkana. Nüküjain Pablo süchiki tü akuwaʼipaa ayaawatünüinjachika akajee chi eʼrüikai wayumüin otta nüküjain kooʼomüin kaainjalaa maaʼulu yaa sutuma tü naaʼinrakat. Soʼu tü kaʼi nüntajachikalü oʼu Jesuu, outa meechijaʼa nia nutuma. Süpülapünaa tia, «eʼrüijeechi maʼi wayumüin [...] sümüin tü sümaleiwaseyaasükalüirua wayuu» süka naaʼinreerüin tü mojusükat nüchekakat Satanaa nüpüleerua (gr. sé·ba·sma). Sutuma niain Satanaa oʼunirakai nukuwaʼipa, atüjashi maʼin nia süpüla naʼalain otta ajaʼttinneena na wayuu oushikajaakana nüchiirua. Nuunjulajüin tü kasa mojusü naaʼinrakat sutuma nuʼwaajüin Maleiwa naashin otta anouja müsia wayuu sümaa nünüiki (2Te 2:3-12; anasü paashajeʼerüle Mt 7:15, 21-23).
it-2-S 368 püt. 7
Alawaa
Na wayuu kamalainkana amüin tü alawaakat, nuuʼulaain naya Jeʼwaa süpüla ayatüin müin nakuwaʼipa jee nnojoluin nanoujain sünain tü pütchi anasükat nüchiki Jesuu (2Te 2:9-12). Majatüinka tü alatakat nümüin chi aluwataaikai Acab. Aküjünüsü nümüin Acab natuma na nünüikimaajanayaakana Maleiwa nükanajüinjanain na chejeʼewaliikana Ramot-galaad, eepejeʼe wanee nünüikimaajachi Jeʼwaa Micaya nünülia, nüküjain nümüin Acab nükanajuujeechin nuʼunüle sünain atkawaa nooʼomüin naya wayuukana. Niʼrüin Micaya wanee meʼrujusai nümaʼanajeejachikai Jeʼwaa sünain nootuin na nünüikimaajanayaakana Maleiwa süpüla naküjain alawaa nümüin Acab, süpüla naküjain neʼe tü keeʼireekat naaʼin jee tü naapajeekalü amüin Acab. Mayaapejeʼe süküjünüin nümüin Acab tü alatüinjatkat nuʼunüle sünain atkawaa, nnojoishi jaa müin nia jee outushi nia (1Re 22:1-38; 2Cr 18).
Püchajaa süchiki kaaʼürüi suluʼu tü Wiwüliakat
it-1-S 972 püt. 4
Siki
Nüshajüin Pedro sajaʼttinnüinjatüin «süka siki soʼu kaʼikat tia tü mmakat [...] ooʼulaka tü kasakalüirua süpüshua chakat iipünaa». Tü süküjeekat pütchikat tüü jee müsia waneirua pütchi suluʼujee tü Wiwüliakat, shia sajaʼttinnüinjatüin wanee kasa süpüla kaʼikat süpüshuaʼa, nnojotsü süküjeein sajaʼttinnajatüin tü Mmakat jee tü sirumatuʼukat süka siki. Soʼu nükalia Noé, nnojotsü ajaʼttüin tü sirumatuʼukat jee tü Mmakat sutuma tü Juya miyoʼukat, naya ajaʼttaka na wayuu mojulaakana. Müsia neʼe tü aküjünakat süchiki tü kaʼi niiʼiyataajeechikalü oʼu Jesuu namaa na aapieekana sünain meenain naya aka saaʼin suwarala siki chuwatsü maʼin süka najaʼttireenain na mojulaashiikana otta süpüshuaʼa tü kasa mojusü eeka yaa saaʼu tü Mmakat (2Pe 3:5-7, 10-13; 2Te 1:6-10; anasü paashajeʼerüle Isa 66:15, 16, 22, 24).
w86-S 15/7 19 püt. 19
Ayata nüchoin waya Maleiwa
Nüküjain Juan mapa tü waaʼinrüinjatkat süpüla eejüin waaʼin (paashajeʼera 1 Juan 4:1). Nnojoluinjatü wanoujain süpüshuaʼa «tü nikirajeekat anain wane wayuu», shia jülüjainjatka waaʼin palajana tü pütchikat süpüla wayaawatüin saaʼu «müleka shiimüinre sünain nünüikin Maleiwa tü nikirajakat anain». ¿Jamüsü müinjatka shia watuma? Shia süka wainmain «na nünüikimaajanayaakana Maleiwa sainküin mmakat». Naya ekirajüliikana sünain alawaa, sainküinshii naya mma jee waraittüshii naya sainküin tü outkajaaleekalüirua «shiiʼiree noushikajaainjanain na anoujashiikana» nachiirua (Aluwataaushikana 20:29, 30; 2 Juan 7). Müshiijeseʼe eejüinjatüin maʼin naaʼin na waneepiakana nümaa Jeʼwaa.
JUULIOʼU 22-28
KOROLO KOJUTUSÜ SULUʼUKA TÜ WIWÜLIAKAT | 1 TIMOTEO 1-3
«Jüsaʼwata tü aʼyatawaa anakat maʼin»
km-S 11/78 4 püt. 7
Na asaʼwateekana tü aʼyatawaa anakat maʼin
7 Eesü süpüla wayaawatüin saaʼu tü nümakat Pablo nachiki na wayuu kojutukana natuma na wawalayuukana sünainjee tü naʼyataainkat. Nnojotsü aapünüin namüin wanee aʼyatawaa anaʼleeka maʼin suulia tü naaʼinrakat na waneinnua maʼaka saaʼinnüin suluʼu tü wane iküleesiakalüirua. Na wawalayuu aʼyataakana neʼipajee na laülaashiikana anasü maʼin natuma tü naʼyataainkat jee natüja aaʼu aneerüin nakuwaʼipa nutuma Jeʼwaa otta Jesuu. Kojutushii naya namüin napüshuaʼa na wawalayuukana. Nnojoishii naya «mmolüin seema aküjaa sümüin wayuu nüchiki Jesucristo chi nünoujakai anain». Süka waneepiain naya sünain tü naʼyataainkat, kojutushii naya namüin na wawalayuukana, ichesü nanoula otta naküjain süchiki tü nanoujakalü anain sümaa yalayalain naaʼin jee nnojoishi naya mmoluin seema mojuin pütchi nachiki.
Püchajaa süchiki kaaʼürüi suluʼu tü Wiwüliakat
it-1-S 1007 püt. 3
Neʼiruku na natuushinuukana
Nnojotsü kasain saamüin namüin nasakirüin otta nekirajaain maʼin süchiirua neʼiruku na natuushinuukana. Wanaa sümaa nüshajüin tia Pablo nümüin Timoteo, nnojoluitpa choʼujaain maʼin tü aküjünakat süchiki tia. Nnojoluitpa choʼujaain tia süka wanaawainapain noʼuluʼu Jeʼwaa napüshuaʼa na judíokana otta na gentiile anoujakana nünain Kürisüto (Gal 3:28). Otta aküjünüsü paala suluʼu tü karaloʼuta süchikimaajatkat neʼiruku natuushi na judíokana jaralin kooʼuliwoʼuinjachin Kürisüto, nuuʼuliwoʼuinjachi nia David. Akaʼaya joo ajaʼttinnajatü Jerusalén soʼu palitchon kaʼi sümaʼaleʼeya süpüshuaʼa tü karaloʼutairua nashajakat na judíokana. Nnojoluitpa naaʼinmajüin shia Maleiwa suulia sajaʼttinnüin. Nnojotsüjeseʼe nücheküin Pablo nüpüleerua Timoteo otta na anoujashiikana amülain kaʼi natuma sünain asakiijaa süchiirua neʼiruku na natuushinuukana waneʼewai nakua süka nnojoluin kasain saamüin tia namüin süpüla katchin nanoula. Süpüla sütüjaanüin aaʼu niain Kürisüto chi Mesíaskai, kettaasü süka tü eʼiruku eʼitaanaka suluʼu tü Wiwüliakat otta tia shia tü kapülainjatka waaʼin waya anoujashiikana. Tü waneirua kasa ashajünakat süchiki neʼiruku natuushi na judíokana suluʼuka tü Wiwüliakat, yalasü shia süpüla shiyaawatünüin aaʼu kakaliairüin maʼin tü Wiwüliakat otta pansaain maʼin tü sümakat.
cl-S 11 püt. 15
«¡Kaatei! Anii chi Wamaleiwasekai»
15 «Chi aluwataashikai [...] süpüla kaʼikat süpüshua», nünüliayaasü tia Maleiwa nümüiwaʼa (1 Timoteo 1:17; Alateetkat Mapeena 15:3). ¿Jamaluʼulu tia? Matüjainsai outaa Jeʼwaa, eetüjüiya nia paala otta eejeechi nia süpüla kaʼikat süpüshuaʼa. Eesü süpüla kapüleein wamüin waʼyaatüin saaʼu tia. Müsü sünüiki Salmo 90:2 nüchiki: «Eetüjüiya pia ooʼulaka eejeechi pia süpüla kaʼika süpüshuaʼa». Shiiʼiyatüin tia, eetüjülinya nia, nnojoishi jaralin akumajalain nia. Müshijeseʼe «chi Laülaa Eetüjüikaʼaya nümaiwa» nümünüin amüin süka eetüjülinya nia kakalia süpülapünaa sukumajünüin kasa süpüshuaʼa (Daniel 7:9, 13, 22). ¿Eeshiche eera wanee wayuu eekai süpüla niiʼiyatüin nnojoluin niain Jeʼwaa chi Miyoʼushikai saaʼu kasa süpüshuaʼa?
JUULIOʼU 29–AKOOSÜTOʼU 4
KOROLO KOJUTUSÜ SULUʼUKA TÜ WIWÜLIAKAT | 1 TIMOTEO 4-6
«¿Anasüche kachiiruale waaʼin washirüü shiataapa keisalain waya sümüin wakuwaʼipa nuʼupala Maleiwa?»
w03-S 1/6 9 püt. 1, 2
Wachajaa sukuwaʼipa süpüla talatüin waya sümaa tü kasa eekat wamaʼana
Wanee kasa talataka atuma naaʼin Pablo jee anaka atuma naaʼin shia eein nümaʼana tü nüchekakat Maleiwa nüpüleerua. ¿Kasa naaʼinrüinjatka wanee wayuu süpüla müin nukuwaʼipa? Talatüinjachi nia sutuma eein nümaʼana tü choʼujaakat neʼe nümüin. Ashajüshi Pablo nümüin Timoteo süchiki tia, chi waneepiakai sünain aʼyatawaa nümaa, müshi nia nümüin: «Eekai keisalain sümüin nukuaippa nuʼupala Maleiwa, müleka talatüle naaʼin sümaa tü nüchekakat Maleiwa nüpüleerua, anashaatasü maʼi tia. Jemeishii waya sümaa makoroloin. Je ouktapa waya, nnojoleerü kasain walüʼüjain. Je maaʼulu yaa, müleka eere tü wekakat, eere washeʼin, talatüinjana waya sümaa tia» (1 Timoteo 6:6-8).
Wanaawasü nutuma Pablo eein wamaʼana tü nüchekakat Maleiwa wapüleerua sümaa tü wakuwaʼipakat nuʼupala. Otta nüküjain talateerüin waaʼin palajanale watuma tü aʼyatawaakat nümüin Maleiwa suulia achajawaa kamaʼanaa wainma korolo, tia sünainpünaasü tü wakuwaʼipakat nuʼupala Maleiwa. Shia neʼe choʼujaaka wamüin tü weküinjatkat jee tü washeʼinjatkat süpüla ayatüin anain wakuwaʼipa nuʼupala Jeʼwaa. Süpüla talatüin naaʼin Pablo sümaa tü kasa eekat nümaʼana, niʼitaain naaʼin nünain chi Kakumajalakai kasa süpüshuaʼa, jaʼitairüin jamüin nukuwaʼipa.
g-S 6/07 6 püt. 3
¿Jameerü wakuwaʼipa kachiiruale waaʼin washirüü?
Shiimain nnojoliin outuin napüshuaʼa na wayuukana sutuma nachajaain maʼin washirüin naya, nnojoliipejeʼe talatüin naya sutuma müin nakuwaʼipa. Eeshii süpüla ayuulin naya sünainjee shapaain maʼin naaʼin sutuma tü naʼyataainkat jee shapaain naaʼin saaʼu tü nneetkat. Eeshii süpüla müin jalapaʼakai naaʼin, matunkeein naya, alin nekii waneepia otta ayuulin naya sutuma úlceras. Sutuma tia, nnojotsü anain tü nakuwaʼipakat jee eeshii süpüla outamaatüin naya. Shiasaʼa niyaawatapa chi wayuukai saaʼu nunoutuinjatüin nukuwaʼipa, kapüleesü nüpüleerua. Nnojoleerü joo sunoujain tü nuʼwayuusekat nünüiki, mojusü joo naaʼin na nüchonniikana sutuma nnojolin nia namaa otta ayuulichipa neʼe nia. Eesüjaʼa nuuntule nunoutuin waneirua kasa, choʼujaapejeʼe niʼyataain maʼin süchiirua. Na wayuu kachiiruakana aaʼin washirü «mojushaatasü maʼi naaʼin» sünainjee tü nakuwaʼipakat (1 Timoteo 6:10).
g-S 11/08 6 püt. 4-6
Aipiruasü kasa aneetkalü maʼin atuma pukuwaʼipa
Maʼaka süküjünüin wamüin sünain tü palajatkat pütchi, chi wayuu kachiiruakai aaʼin washirüü shiiʼiree talatüin nia sutuma, müsü aka saaʼin nuwataale süchiirua joutai. Amüleerü neʼe tü naaʼinrakat otta wainmeerü kasa mojusü alataka nümüin. Jamüshijaʼa chi wayuu eekai nüchajaain maʼin washirüin nia, eeshi süpüla nükayalaain suulia nüpüshi jee naʼaleewainyuu. Naaʼaya chi eekai matunküin sutuma jülüjain maʼin naaʼin tü niʼyataainkat jee shapaain maʼin naaʼin sutuma. «Atunküshi süka anaka aluʼu chi wayuu aʼyataaikai, jaʼitairü wainmain niküin jee palirüle shia. Akaajasaʼa chi wayuu washitkai, matunküinsai nia sutuma wainmain korolo nümaʼana», müsü sünüiki Eclesiastés 5:12 (Nueva Versión Internacional).
Tü nneetkat müsü aka nukuwaʼipa wanee laama mojulaakai otta emeejüikai. Nüküjatüjülia Jesuu nnojoleerüin talatüin naaʼin wanee wayuu kachiiruale maʼin naaʼin washirüin nia (Marcos 4:19). Talateechi wanee wayuu saaʼin nümüin wainmale nneerü nümaʼana, nnojotpejeʼe müin tia. Shia neʼe kooʼomüin kooʼomüin meein nutuma tü nuwashirüinkat. Süküjatüjülia tia Eclesiastés 5:10: «Chi wayuu eekai washireein, ayateechia nia achajaain sooʼomüin» (Nueva Versión Internacional).
Mülieena neʼe waya shiale weʼitaain anain waaʼin tü nneetkat, weʼreerü amülain neʼe tü kasa waaʼinrakat shiiʼiree, nnojoleerü anain wakuwaʼipa otta eeshii süpüla waainjain kasa mojusü sutuma (Proverbios 28:20). Akaajasaʼa müleka wasülajüliire, motule waaʼin naainjala na waneinnua wamüin, wulere tü wakuwaʼipakat, aire wapüla wayuu otta wanoujale, talateena waya otta aneerü maʼin wakuwaʼipa.
Püchajaa süchiki kaaʼürüi suluʼu tü Wiwüliakat
(1 Timoteo 4:2, TNM) natuma na wayuu piamaka oʼupünaa ekirajüliikana sünain alawaa, tü naaʼinkat nnojoluitpa kasain saamüin namüin, müitpa shia maʼaka saaʼin süta mürüt asijünaka süka kachueera jaʼisü, outusü tü shiʼirukukat.
it-2-S 198
Aashajeʼeraa namüin na jutkatüshiikana
Sünain tü outkajawaakat. Na wayuu eejanakana soʼu nakalia na nikirajüinkana Jesuu, nnojotpuʼusü namaʼana tü rooyoirua sümaajatkat tü pütchi suluʼukat tü Wiwüliakat, müsüjeseʼe saashajeʼennawalin sümüin wayuu. Nuluwataain Pablo saashajeʼennüinjatüin namüin na anoujashiikana tü karaloʼutairua nüshajakat otta nüküjain naʼanapajiraainjanain tia karaloʼutakat süpüla saashajeʼennüin suluʼu tü wane outkajaaleekalüirua (Col 4:16; 1Te 5:27). Nüküjain Pablo nümüin Timoteo ayatüinjachin nia «sünain aashajeʼeraa tü karaloukta nüchikimaajatkat Maleiwa suluʼu tü outkajaaleekat [...] sünain ekirajaa wayuu sünain nünüiki Maleiwa [...] sünain emeʼejaa naaʼin shiiʼiree noonoweein sümaa» (1Ti 4:13).
Anainjatü maʼin sukuwaʼipa nutuma wanee wayuu tü naashajeʼerakat (Hab 2:2). Niyaawatüinjatü aaʼu chi wawalakai tü pütchi naashajeʼerüinjatka otta nütüjaainjatü aaʼu kasapülajatüin süshajünaka tia pütchikat, anainjatü saashajeʼeria nutuma tü pütchikat suulia nüküjain wanee kasa naata namüin na aapajakana shia. Naainjain tia, süka natüjain na wawalayuukana sünainjee tü pütchi naashajeʼerakat. Anataʼaleeshiijaʼa na wayuu aashajeʼerakana tü Wiwüliakat otta na wayuu oonookana sümaa tü pütchi naapakat saashin Alateetkat Mapeena 1:3.