Eejachi wanee wayuu José münüshi, nüchon Jacob, joʼuu nia noulia na waneinnua. Natüjaa aaʼu na nuwalayuukana alin maʼin José nüpüla Jacob. Naʼürülashi José süka nachunjain. Soʼu wanee kaʼi, aʼlapüjaashi José, nüküjaka shia namüin na nuwalayuukana. Shiasaʼa naaʼinruʼu nayakana, laülaainjachiaa José naaʼu sutuma müin nüʼlapüin.

Soʼu wanee kaʼi, chajana na nuwalayuukana José arüleejüin anneerü süʼütpaʼa wanee mma kanüliasü Siquem. Nüjütünaka José nutuma Jacob süpüla nünaʼlaain namüin na nuwalayuukana. «Iseeichi chi aʼlapüjaaikai. ¡Jooʼu woʼutai naaʼin!», namaka neʼraiwaʼaya nia. Nataʼülaka nia sümaa nojutuin nia suluʼu wanee ishi oʼutusü. «Nnojo juʼutuin naaʼin, anashi woiküle nia», nümaka Judá, wanee nuwala José. Noikaka nia saaʼu 20 nneerü pülaata namüin waneinnua wayuuinnua sejena Madiánjee otta chainjana Egiptomüin.

Süchikijee tia, naʼyarülajüin nüsheʼin José süka nüsha wanee kaaʼulachon, neʼikajaaka shia nümüin chi nashikai, sümaa namüin nümüin: «¿Aashimüin shiain nüsheʼin José tüü? Shiküin saaʼin tamüin José wanee wüchii jashichi», nümakalaka Jacob sümaa mojuin maʼin naaʼin.

Nüntinnapa José Egiptomüin, oikünüshi nia nümüin Potifar, wanee süʼlaüla waaria, nüchepchiaka nia. Eejachi Jehová nümaa José soʼu tia. Niyaawata aaʼu Potifar tütüin maʼin José sünain aʼyatawaa otta eein süpüla saapünüin laülawaa nümüin. Niʼitaaka nia süʼlaülain süpüshuaʼa tü kasa eejatkat nümaʼana.

Shiʼrüin nuʼwayuuse Potifar wayuuin anashi aaʼinchi José, suchuntawaika nümüin nüinkaainjachin sümaa. ¿Kasakaʼa naainjain José? Niyoutuin tü sümakat. «Nnojo, mojusü tia, wainma kasa niʼitaaka chi talaamainkai tajapuluʼu, nuʼwayuuse pia. Tainkaale pümaa, kaainjaleechi taya nuʼupala Maleiwa», müshi José sümüin.

Süpüleerua aaʼinchi José tü nuʼwayuusekat Potifar. «Anashii wainkaale», müsü nümüin. Saapaakalaka nia süka nüsheʼin, nüpantajaaka José sümaʼanajee. Shiasaʼa nüntapa Potifar nipialuʼumüin, süküjaka saʼalain nümüin. «Nütaüjaweein taya José», sümakalaka nümüin. Naashichijaaka Potifar otta nüpüreesajitka nia. Ayatüshi eein Jehová nümaa José.

Soʼu chajachin püreesain José, aʼlapüjaashi faraón, chi laülaashikai saaʼu Egipto. Nnojotsü jaralüin atüjaain saaʼu jamaluʼuluin tü nüʼlapüinkat. Eeka wanee nüchepchia aküjaka nümüin niain José atüjaakai saaʼu jamaluʼuluin tia lapükat. Nüsaajinnamaataka José nutuma faraón.

«¿Eesü süpüla püküjain tamüin jamaluʼuluin tü taʼlapüinkat?», nümaka faraón nümüin José. «Wainmeerü eküülü soʼu akaratshi juya otta süchikijee aijeerü maʼin jamü soʼu akaratshi juya. Püneeka wanee wayuu eekai kekiin süpüla nünaajaain eküülü, nnojoleenaka outuin naya sutuma jamü», nümaka José nümüin faraón. «¡Pieechi taneekaka! Aluwataweechi pia tamaa, pieechi aluwataaka tachikumüin», nümaka faraón nümüin José. ¿Jamüsü nütüjaaka saaʼu José jamaluʼuluin nüʼlapüin faraón? Shia süka nüküjain Jehová nümüin.

Nünaajirüin José tü eküütkat soʼu akaratshi juya. Süchikijee tia, aisü maʼin jamü sainküin mma, maʼaka nüküjain shia paala José. Antüsü joo wayuu sünain ayaʼlajaa eküülü Egiptomüin. Naapa achikirü Jacob, chi nüshikai José, suikaanüin eküülü Egipto, nuluwataaka polooshii nüchonnii sünain ayaʼlajaa eküülü.

Nantakalaka nünainmüin José na nüchonniikana Jacob, niyaawatamaataka José naya. Nnojoipejeʼe nia nayaawatüin na nuwalayuukana. Nasapainkaka naya nümülatuʼu José, maʼaka nasapainkain naya nüʼlapüinruʼu jintüliiwaʼaya nia. Nütüjawee aaʼu José ayatüle naʼürülain nia. «Wayuu ajayajülii jia, shia jüntaka eeʼiree woumain», nümakalaka namüin. Nasoutakalaka niʼipajee: «¡Nnojoishii waya ajayajüliin! Chejeʼewalii waya Canaán, 12 waya paala. Outushi wanee otta chi emülieekai ichaa nümaa chi washikai», namaka nümüin. «Jümaainjachi tamüin chi jimüliakai süpüla tanoujain jünüiki», nümaka José namüin. Neitaaka nachikuaʼa nipialuʼumüin chi nashikai.

Sajaʼlajaaka tü eküütkat süchikuaʼa nümaʼanajee Jacob, nüjütaka na nüchonniikana nachikuaʼa Egiptomüin. Namaaka Benjamín, chi emülieekai. Nuuʼulakaka José naaʼin na nuwalayuukana, nuunjulaka suluʼu naaʼawalia Benjamín tü niitain aainjuushikat süka pülaata otta nülirajaka nia. Nantapa sünain tü iitakat na aʼyataashiikana nümüin José, müshii jalapaʼakai naaʼin na nuwalayuukana. «Anashii wayale süsalain putuma», namakalaka nümüin José suulia jamajüin Benjamín nutuma.

Niyaawataka saaʼu José shiiʼiratüin nakuwaʼipa na nuwalayuukana. Nnojotka nüchecherüin naaʼin, niʼyalajakalaka sümaa nümüin: «Taya José chi jimüliakai, ¿katayüiya oʼu chi tashikai?». Ainkuusü naaʼin na nuwalayuukana. Nümaka José namüin: «Nnojo mojuin jaaʼin saalinjee tü jaainjakat tamüin. Antüshi taya yaamüin nutuma Jehová süpüla katüin joʼu. Juʼuna jümaala jüsaajai tamüin chi tashikai».

Oʼuna müshiijaʼa na nuwalayuukana José süpüla naküjain nümüin chi nashikai tü alatakat otta namaaka nia Egiptomüin. Nümaaichipa José chi nüshikai.