Tü polookat kasa mojusü

Nüküjain Moisés nümüin faraón nnojoluinjachin nüleʼejüin nüchikuaʼa. Apütaashi nia süka pütchikat tüü: «Soʼu kaʼikat tüü, süseʼeruʼupünaa aikat, outajana neʼiruma na egipciokana. Outajachi niʼiruma faraón jee shiʼiruma wayuu eekai achepchieein».

Nümaka Jehová namüin na israelitakana: «Eeinjatü wanee ekawaa jutuma, juʼutuinjachi naaʼin wanee anneetchon jee niale wanee kaaʼulachon eekai waneeichin juya. Jushulejüinjatü nüsha sotpünaa soʼu tü jipiakat, jüsijaa tü asalaakat jikaiwa shia sümaa pan maʼakasat soolojia. Yapaja jia, jaʼata jüsheʼin otta jüsapaatse juʼunaiwa Egiptojee. Taasheena jia tatuma soʼu aikat tüü». Talatakajasaʼa maʼin naaʼin na israelitakana ¿aashimüin?

Süseʼeruʼupünaa aikat, antüshi Egiptomüin chi aapiee nümaʼanajeejachikai Jehová. Nuʼutakalaka naaʼin neʼiruma na wayuu nnojoliikana ashulejüin isha sünain sotpünaa soʼu nepia. Nnojoliipajaʼa jamajüin neʼiruma na wayuu ashulejakana isha sünain sotpünaa soʼu nepia. Nnojoishii outuin nachonnii na israelitakana.

Outushi niʼiruma faraón. Jashichishaatashi maʼin nia sünainjee tia. Nümakalaka nümüin Moisés: «¡Juʼuna yaajee! ¡Juʼuna, juʼwaajai chi Jümaleiwasekai, jümaa tü mürütkalüirua, juʼunaata jümaala!».

Siraasü kashikat soʼu aikat tia. Kottushii napüshuaʼa na israelitakana wanaa sümaa noʼunuin Egiptojee. Eejana maʼaka 600.000 tooloyuu ojuʼitaka Egiptojee jee müsia watta saalii jieyuu otta tepichi. Watta naalii na nnojoliikana israelitain, na oʼunakana namaa süpüla naʼwaajüinjachin Jehová. ¡Nnojoliinnapa achepchieein na israelitakana soʼu kaʼikat tia!

Süpüla sotuinjatüin naaʼin tü naaʼinrakat Jehová napüleerua wanaa sümaa nojuʼitüin Egiptojee, naaʼinrüinjatü juyawai wanee ekawaa. Pascua sünülia tia natuma.