¿Jamüsü nanüiki na aküjaliikana pütchi nüchiki Jehová süchiki tü aainjünakat outapa wanee wayuu?
Tü jülüjakat waaʼin süchiki alapajaa otta tü waaʼinrakat wanaa sümaa outuin wanee wapüshi, pansaasü sümaa tü sümakat tü Bibliakat. Anuu süpüshi tü kasa waaʼinrakat:
Mojusia neʼe waaʼin wanaa sümaa nünaajaain wanee kasa wanain. Jamüshiijaʼa na nikirajüinkana Jesús, aʼyalajüshii naya wanaa sümaa outuin wanee napüshi (Juan 11:33-35, 38; Aluwataaushikana [Hechos] 8:2; 9:39). Nnojotsü müin aka saaʼin miʼiraa wamüin outule wanee wayuu (Eclesiastés 3:1, 4; 7:1-4). Otta amülialaasü waaʼin naaliijee na wayuu kaamakashiikana (Roma 12:15).
Nnojotsü kasain natüjaain aaʼu na outushiikana. Wainma tü kasa aainjünakat nekiira na outushiikana süka sunoujain wayuu ayatayülüin katüin soʼu tü naaʼinkat otta eein süpüla sükaalinjain wayuu. Nnojotpejeʼe shiain shikirajüin anain tia tü Bibliakat, müshiijeseʼe nnojoliin sünainpünaain waya tia saaʼinrakat wayuu nekiira na outushiikana. Nnojoishii waya sünainpünaain tia jaʼitairü naatain wakuwaʼipa otta woumain (Eclesiastés 9:5, 6, 10). Nnojoishii waya asülajüin kasa namüin na outushiikana, nnojoishii waya aashajaain namaa jee achuntuin kaalinwaa namüin. Otta nnojoishii waya akataajüin wainma nneerü sünain aaʼinraa wanee kasa anaka maʼin nekiira na outushiikana, nnojoishii sünainpünaain waya nueve noches, ekeraajaa wanee kashi jee wanee juya. Anuu tü sümakat tü Bibliakat: «Jükatala suulia, nnojo jipettüin tü kasa yarüttüsükat». Woonoo amaalü tia pütchikat otta nnojoishii waya sünainpünaain tü kasa mojukat saashin tü Bibliakat (2 Corinto 6:17, TNM).
Eesü süpüla katüin noʼu nachikuaʼa na outushiikana. Saashin tü Bibliakat, eeshi süpüla nüsoʼireʼennüin aaʼin wanee wayuu nutuma Maleiwa otta eejeerü wanee kaʼi nnojoleetkalü oʼu outuin wayuu (Aluwataaushikana 24:15; Alateetkat Mapeena [Apocalipsis] 21:4). Amülialaasü naaʼin na anoujashii namaiwajanakana sutuma natüjaain saaʼu tia otta amülialaasü waaʼinya sutuma, müsüjeseʼe nnojoluin mamülialuuin waaʼin nünaajaale wanee wapüshi (1 Tesalónica 4:13, TNM).
Nnojoliinjana waya aʼwaataain suluʼu wakuwaʼipa (Proverbios 11:2). Nünaajaale wanee wapüshi, nnojotsü wachajaain sukuwaʼipa süpüla shiʼrüinjatüin wayuu sünain washirüin jee wayuuin kapülainshii waya (1 Juan 2:16). Jamüshiijaʼa waya, nnojotsü wainmain kasa waaʼinraka shiiʼiree anainjatüin pütchi wachiki natuma na alapajaashiikana, nnojotsü anashaatain otta kojutuin maʼin nüta müliashii otta anashaatain maʼin washeʼin süpüla «wayuu washirü» wamünüin.
Nnojotsü wapüleeruain saaʼin wayuu süpüla sunoujain tü wanoujakalü anain. Jülüjasü waaʼin tü pütchi makat suluʼu tü Bibliakat: «Asouktinneena waya nümüin waneʼewaʼire wakua saaʼu tü waaʼinrapüʼükat» (Roma 14:12). Akatsaʼa eere süpüla waküjain sümüin wayuu süchiki tü wanoujakalü anain, waküjain shia sümaa weeʼiyatüin sujutu sümüin sümaa kamaneein waya (1 Pedro 3:15).
¿Kasa naaʼinraka na aküjaliikana pütchi nüchiki Jehová outule wanee kasa nanain?
Jalainjatüin shia: Nayainjana aneekaka na kaamakashiikana süküjünüinjatüle wanee pütchi otta jalainjatüin shia aküjünüin. Shiale suluʼu wanee Piichi Outkajaalee, suluʼu wanee funeraria, nepialuʼu jee shiale amuuyuupaʼa.
Tü pütchi aküjünakat: Amüliannüsü naaʼin nüpüshi müliashii sükajee wanee pütchi eere süküjünüin tü sümakat tü Bibliakat nachiki na outushiikana otta süchiki nüsoʼireʼerüinjanain aaʼin Maleiwa mapeena na outushiikana (Juan 11:25; Roma 5:12; 2 Pedro 3:13, TNM). Sünain tia pütchikat, eesü süpüla nüküjain chi wawalakai tü anapuʼukat sünain nukuwaʼipa müliashii otta eesü süpüla nüküjain tü watüjakat sünainjee nukuwaʼipa müliashii süka waneepiain nia nümaa Jehová (2 Samuel 1:17-27).
Eesü süpüla shiiʼirajünüin wanee jayeechi suluʼujeejatü tü Bibliakat (Colosas 3:16). Sujutaapa tü pütchikat, oʼuraajeechi wanee wawala süpüla nümülialüin naaʼin na jutkatüshiikana (Filipos 4:6, 7).
Jeʼrain sülia: Nnojoishii achekajüin na Aküjaliikana Pütchi saaʼu tü pütchi aküjünakat sümüin nüpüshi müliashii otta saaʼu tü naʼyataainkat nümüin Maleiwa, müsia sünain tü outkajawaakat, nnojoishii waya achuntuin nneerü (Mateo 10:8).
Na oʼunakana sünain: Eesü süpüla suʼunuin wayuu süpüshuaʼa sünain tü outkajawaa aainjünakat suluʼu tü Piichi Outkajaaleekat. Müsüjeseʼe eein süpüla suʼunuin wayuu eekai eein sünain aapajaa tü pütchi aküjünakat sümüin nüpüshi müliashii.
¿Oʼunushiiche na Aküjaliikana Pütchi sünain tü saainjakat waneirua iküleesia outapa wanee wayuu?
Naya atüjaaka saaʼu tia na wawalayuukana waneʼewai nakua, naneeküin tia wanaapünaa sümaa tü nekirajaakalü anain suluʼu tü Bibliakat (1 Timoteo 1:19). Nnojoliipejeʼe waya sünainpünaain wanee kasa nnojotka pansaain sümaa tü sümakat tü Bibliakat (2 Corinto 6:14-17, 18).