3 ¿Jamüshiiche müliaka na wayuu anamiakana?
¿Jamüsü watüjaainjatka saaʼu tia?
Mojushaatasü maʼin müliale wanee wayuu eekai anamiain. «Nnojottaasü kasain saamüin wamüin waaʼinrüin kasa anasü», meerü neʼe sünüiki wayuu.
Jülüjataa paaʼin tüü
Eeshii eekai nanoujain sünain wayuuin wanee wayuu nüchikuaʼa süchikijee outuin nia paala. Naashin nayakana, waaʼinrüle kasa anasü maaʼutpünaa aneerü maʼin wakuwaʼipa joʼuupa waya wachikuaʼa, eekajasaʼa waaʼinrüle kasa mojusü, mojeerü wakuwaʼipa joʼuupa waya wachikuaʼa. Püsakireʼera paaʼin sünain pütchikat tüü:
¿Kasache anaka aluʼu müliain waya sünainjee tü kasa waaʼinrapuʼukat paala sümaa nnojoluin sotuin shia waaʼin?
Aleinjatüle tü wakuwaʼipakat, ¿kasakaʼa saamüin wamüin anain wakuwaʼipa otta nnojoluin sünainpünaain waya kasa mojusü?
PÜTÜJEERE SOOʼOMÜIN
Pünaja suluʼu jw.org tü videokot ¿Jamüsü nuuʼulaaka Maleiwa eein kasa mojusü otta müliaa?
Tü sümakat tü Wiwüliakat
Nnojoishi niain Maleiwa müliain atuma wayuu süpüla süsalain naya naainjala
Eeshii müliale na wayuukana saaʼu eejanain naya wanaa sümaa sülatalaʼa sümüin wanee kasa.
«Chi eekai kawachirain, akanajuushi nia sünain ayoujirawaa. Chi eekai katchin, ayamünnüshi nia nutuma chi niʼipolokai. Chi eekai kekiin maʼin, alatitshi jamü. Chi eekai laülaain aaʼin, mawashirüinsai nia. Chi eekai nütüjain maʼin, nnojotsü jaralüin jaa müin nümüin. Süka jamüin, alatalaʼa müsü kasa mojusü sümüin wayuu süpüshuaʼa» (ECLESIASTÉS 9:11).
Eʼrüshii waya müliaa saaʼujee joʼuuin waya sümaa kaainjalaa
«Kaainjalaa» müsü wayuu sümüin tü kasa mojusü saaʼinrakat wayuu. Aküjünapejeʼe suluʼu tü Wiwüliakat shiain niʼipünaalain tia wapüla Adán sümaa Eva. Nnojotsü lotuin sukuwaʼipa wayuu süpüshuaʼa, jaʼitakajeʼe chi eekai anamiain jee chi eekai mojulaain.
«Kaatei, joʼuujiraashi taya sümaa tü kaainjalakat, kaainjalatüjüiya taya takumajaaiwaʼaya süleʼeruʼu tü teikat» (SALMO 51:5, noota).
Mojushaatasü maʼin sukuwaʼipa wayuu süpüshuaʼa sutuma tü kaainjalaakat
Nnojotsü neʼe amojujaain wakuwaʼipa nümaa chi Maleiwakai sutuma tü kaainjalaakat. Mojusiaʼaya wakuwaʼipa sümaa wayuu otta wamojujüin tü nukumalakat Maleiwa yaa mmapaʼa. Sünainjee tia, eʼrüsü sümüliala wayuu süpüshuaʼa.
«Mayaainje tacheküin taaʼinreein kasa anasü, ayatsia neʼe taneeküin aaʼinraa tü kasa mojusükat» (ROMA 7:21).
«Watüjaa aaʼulu sünain müliayülüinya süpüshua tü kasa akumajuushikalüirua» (ROMA 8:22).