¿Jamaluʼulu tü pütchikat Seol otta Hades?

ALATÜSÜ suulia 70 süshajünüin suluʼu tü Wiwüliakat tü pütchikat hebreo scheʼóhl otta tü pütchikat griego háides, tia sünainpünaasü shia tü ouktaakat. Suluʼu waneeirua Wiwülia alatinnüsü süka «woowira», «siki eere müliain wayuu», «ishi» otta waneeirua. Akatsaʼa wainmain wayuu nnojotka suluʼu nanüiki tü pütchikat hebreo scheʼóhl otta tü pütchikat griego háides. Makalaka süshajünüin suluʼu Traducción del Nuevo Mundo süka tü pütchikat «Seol» otta «Hades». ¿Jamaluʼulu pütchikat tia? Wekirajaa sünain sukuwaʼipa sutuma tü Wiwüliakat.

Müsü Eclesiastés 9:10, TNM: «Nnojotsü kasain naʼyataain anain, nnojotsü kasain natüjaain aaʼu otta nnojotsü kasain natüjain apüleerua suluʼu tü Seolkat». ¿Shiache eere wojoitüin na wapüshi ouktakana tü Seolkat? Nnojo. Tia ashajünüsü suluʼu tü Wiwüliakat süka waneeirua pütchi hebreo otta griego, nnojotsü ashajünüin süka tü pütchikat scheʼóhl otta háides (Génesis 23:7-9; Mateo 28:1). Akaʼaya tü «Seolkat» nnojotsü shiain tü woowira otta ishi eʼitaanakalü aluʼu wainma wayuu ouktüsü (Génesis 49:30, 31).

Wanaa sümaa «Seol» otta «Hades» sümüin tü Nünüikikat Maleiwa, ¿jamaluʼulu tia? Shia wanee kasa jerutsü maʼin suulia wanee ishi. Tü Seolkat saashin tü karalouktakat Isaías 5:14 ‹jerutsü otta sujutalüin maʼin tü saanükükat›. Wainma maʼin ouktüsü suluʼu tü Seolkat otta nnojotsü epirajaain shia (Proverbios 30:15, 16). ‹Nnojotsü epirajaain tü Seolkat› maʼaka shipirajaain tü amuuyuukat (Proverbios 27:20). Sutuma tia, tü Seolkat otta tü Hadeskat matüjainsat epirajawaa. Tü Seolkat otta tü Hadeskat nnojotsü shiain tü amuuyuukat shia eere na ouktüshiikana.

Watüjaapa saaʼu tü shikirajakat tü Wiwüliakat süchiki tü asoʼirawaakalü aaʼin, watüjaa aaʼu jamaluʼuluin tü pütchikat Seol otta Hades. Pütchikat tia, nanainpünaasü shia na ouktüshii asoʼiraainjanakana aaʼin saashin tü Wiwüliakat (Job 14:13; Aluwataaushikana 2:31; Alateetkat Mapeena 20:13).a Suluʼu tü Seolkat yalashii napüshuaʼa na aʼyataapuʼukana nümüin Jeʼwaa otta na nnojoliikana aʼyataapuʼuin nümüin (Génesis 37:35; Salmo 55:15).Saashin tü Wiwüliakat‹ asoʼiraainjatü naaʼin eekai naaʼinrüin tü anasükat otta eekai naaʼinrüin tü mojusükat› (Aluwataaushikana 24:15).