Eeshii kepiale naya pejepünaa pünain, naʼyataajiraale otta koleejiajiraale naya pümaa. Eeshii naashajaainnale pümaa süchiki tü sümakat tü Wiwüliakat. ¿Kasa naaʼinraka otta jamüshii naashajaaka namaa na wayuukana süchiki tü nanoujakalü anain?

Müshii aka saaʼin wayuu eeka eein. Napüshuaʼa na wayuu naʼakakana, naatawai neʼiruku. Eeshii eeka washirüin otta nnojoliin washirüin. Otta waneeinnua, eeshii eeka noʼunapuʼuin suluʼu wanee iküleesia otta eeshii na manoulapuʼukana. Akatsaʼa nekirajaain joo sünain tü Wiwüliakat süpüla naküjüliinjanain pütchi nüchiki Jeʼwaa (Aluwataaushikana 17:11). Sutuma kamalain namüin tü nekirajaakalü anain, naneeküin naʼwaajüinjachin Jeʼwaa.

Talatsü naaʼin sutuma nekirajaain sünain tü Wiwüliakat. Alatsü kasa mojusü namüin maʼaka sülatüin sümüin wayuu süpüshuaʼa otta eesia tü kasa mojukat natuma. Akatsaʼa anain nakuwaʼipa sutuma noonooin sümaa sünüiki tü Wiwüliakat (Salmo 128:1, 2). Müsüjeseʼe keeʼireein naaʼin naashajaain sümaa wayuu süchiki tü nekirajaakalü anain suluʼu tü Wiwüliakat.

Oonooshii naya sümaa sünüiki tü Wiwüliakat. Anasü naaʼin sutuma tü nekirajaakalü anain suluʼu tü Wiwüliakat. Kojutshii na wayuukana namüin, lotusü nakuwaʼipa otta kamaneeshii naya. Anasü naaʼin, aʼyataalii naya, paaʼinwashii sümaa napüshi otta wulesü nakuwaʼipa. Natüjaa aaʼu nnojolin «kachekalaʼatalüin wayuu Maleiwa», müshiijeseʼe pawalaawain naya sainküin tü mmakat. Mayaainjeʼe müin waya maʼaka saaʼin wayuu eeka eein, naata maʼin tü wakuwaʼipakat (Aluwataaushikana 4:13; 10:34, 35, TNM).

• ¿Jamüshii maka aka saaʼin wayuu eeka eein na aküjüliikana pütchi?

• ¿Kasa shikirajaka anain naya tü Wiwüliakat?

Naashin waneeinnua wayuu, jekena akumajaain na aküjüliikana pütchi nüchiki Jeʼwaa. Alatüirü maʼaka 2.700 juya neʼraajünüin na aʼyataashiikana nümüin Maleiwa sükajee tü anülieekat: ‹aküjülii pütchi› (Isaías 43:10-12, TNM). Süpülapünaa tü juyakat 1931, eʼraajünüshii naya sükajee tü anülieekat Ekirajaalii sünain tü Wiwüliakat. ¿Jamüshii aküjülii pütchi nüchiki Jeʼwaa namünaka?

Süka nütüjaanüin aaʼu jaralin Maleiwa. Wainmatua süshajünüin nünülia Maleiwa suluʼu tü Wiwüliakat maʼaka süküjüin waneeirua karaloukta sümaiwajatü. Suluʼu waneeirua Wiwülia, aʼwanajaanüsü tü nünüliakat süka Senyotkai jee Maleiwa. Müshinka Jeʼwaa nümüin Moisés: «Shia tanüliakaʼaya tüü süpüla kaʼika süpüshuaʼa» (Éxodo 3:15, TNM). Sutuma tia, nüküjüin naatain nia noulia na maleiwayaashiikana. Makalaka talatüin maʼin na aküjüliikana pütchi süka neʼraajünüin süka nünülia Maleiwa.

Süka sütüjaanüin aaʼu tü naainjakat. Wainma na wayuu aküjakana pütchi nüchiki Jeʼwaa, nia palajachikai Abel. Mapa, eejana waneeinnua wayuu maʼaka naaʼin Noé, Abraham, Sara, Moisés nümaa David (Hebreokana 11:4–12:1). Na aküjüliikana pütchi, aküjüshii süchiki tü shiimainkat nüchiki Maleiwa maʼaka naaʼin wanee wayuu oʼunakai laülaapialuʼumüin süpüla nüküjüin tü shiimainkat süchiki wanee kasa.

Süka nashatüin nukuwaʼipa Jesuu. Saashin tü Wiwüliakat, nia Jesuu «chi lotokai akuaippa sünain aküjaa tü shiimainkat nüchiki Maleiwa» (Alateetkat Mapeena 3:14). Nüküjüin sümüin wayuu nünülia chi Nüshikai otta naashin niakai, ‹antüshi saʼakamüin wayuu süpüla niiʼiyatüinjatüin tü shiimüinkat sümüin› (Juan 17:26, TNM; 18:37). Müsüjeseʼe neʼraajünüin na nikirajüinkana Jesuu süka nünülia Maleiwa otta naküjüin shia sümüin wayuu. Shiaʼaya naainjaka tia na aküjüliikana pütchi nüchiki Jeʼwaa.

• ¿Jamüshii aküjülii pütchi nüchiki Jeʼwaa wamünaka sümaa Ekirajaalii sünain tü Wiwüliakat wamünapuʼuin?

• ¿Jaralii na aküjapuʼukana pütchi nüchiki Jeʼwaa sümaiwa?

• ¿Jarai «chi lotokai akuaippa sünain aküjaa tü shiimainkat nüchiki Maleiwa»?

Süchikijee ouktüin Jesuu, ayuʼlaainjana waneeinnua wayuu naʼakajee na anoujüshiikana süpüla nekirajüin alawaa süchiki Nünüiki Maleiwa saashin tü Wiwüliakat (Aluwataaushikana 20:29, 30). Alatsü tia süka eein wayuu nnojoliikana pansaain atuma tü nikirajakalü anain Jesuu otta anoujayaashii naya (2 Timoteo 4:3, 4). Mayaainjeʼe sülatüin tia, ¿jamüsü watüjaaka saaʼu shiimain tü shikirajakalü anain tü Wiwüliakat?

Atüjaana aaʼu tü shiimainkat nutuma Jeʼwaa. Nüküjatüjülia Maleiwa ‹sütüjaanüinjatüin maʼin aaʼu tü shiimainkat› maaʼutpünaa (Daniel 12:4). Soʼu 1870, eeshii palitchon wawalayuu atüjaweeka saaʼu tü shiimainkat sutuma neʼrüin shikirajünüin alawaa suluʼu tü iküleesiakalüirua. Nekirajaaka sünain tü shikirajakat tü Wiwüliakat jee nakaaliinjünaka nutuma Maleiwa süpüla nayaawatüin saaʼu tü shiimainkat.

Ekirajaana anainrü tü Wiwüliakat. Na eʼraajünapuʼukana süka tü anülieekat Ekirajaalii sünain tü Wiwüliakat, nekirajaapuʼu anainrü wanee pütchi suluʼujeejatü tü Wiwüliakat maʼaka maaʼulu. Nantüle sünain wanee pütchi kapüleeka namüin, nachajaain wanee wersiikulo akaaliinjaka naya süpüla nayaawatüin saaʼu. Nashaja namüsia shia pansaapa sümaa süpüshuaʼa sünüiki tü Wiwüliakat. Süka shiain aküjüin namüin tü Wiwüliakat tü natüjaweekalü aaʼu, natüjaa aaʼu tü shiimainkat süchiki nünülia Maleiwa, tü Nuluwataayakat, tü nukumajakat apüla tü Mmakat namaa na wayuukana, tü alatakat namüin na ouktüshiikana jee tü asoʼirawaakalü aaʼin. Nnojoliinnapa süchepchiain naya tü alawaa shikirajakat jee sunoujakalü anain wayuu (Juan 8:31, 32).

Soʼu tü juyakat 1879, nayaawata aaʼu naküjüinjatüin tü shiimainkat sainküinpünaa tü mmakat. Soʼujee tia, neitajaka tü rewiisütakat Aapiria Wayuu. Aküjüsü süchiki Nuluwataaya Jeʼwaa, ayatayülia neitajüin shia na aküjüliikana pütchi. Aküjünüsü maaʼulu tü shiimainkat sainküinpünaa 239 mma suluʼu 700 anüikii. ¡Atüjaanüitpa aaʼu tü shiimainkat sainküinpünaa tü mmakat!

• ¿Kasa alataka süchikijee ouktüin Jesuu?

• ¿Kasa naainjaka na aküjüliikana pütchi süpüla natüjaain saaʼu tü shiimainkat?

Na aküjüliikana pütchi, kakaliainna neʼinprimiijüin, naashajeʼerüin jee neitajüin waneeirua Wiwülia. Shiasaʼa mapa, nayaawata aaʼu choʼujaain wanee Wiwülia pansaainjatka atuma tü shiimainkat otta shia nüchekaka Maleiwa tia süpüleerua wayuu süpüshuaʼa (1 Timoteo 2:3, 4, TNM). Soʼujee 1950, ojuʼitüsü suluʼu inkülee süpüshi tü pütchi suluʼukat Traducción del Nuevo Mundo. Alatinnüirü suluʼu 120 anüikii sümaa pansaain maʼin tü süküjakat.

Süka choʼujaain wanee Wiwülia eekai mapüleein. Eeʼiratüsü sünüikipala wayuu otta eesü waneeirua Wiwülia mayaawatujuka aaʼu sünüiki. Antüna anainrü waneeirua karaloukta sümaiwajatü pansaaka ashajia. Makalaka shiyaawatünüin aaʼu sünüiki tü Wiwülia ashajünakat süka hebreo, arameo sümaa griego.

Süka choʼujaain wanee Wiwülia pansaaka atuma nünüiki Maleiwa. Nnojotsü nasünneʼerüinjatüin wanee pütchi suluʼujee tü Wiwüliakat na alatirüliikana pütchi, ayatüinjatü natuma tü sümakat tü ashajuushikat. Kojuya tü Wiwülia asünneʼennakalü aluʼujee nünülia Jeʼwaa.

Süka choʼujaain wanee Wiwülia kojutka atuma Maleiwa (2 Samuel 23:2). Ashajünüsü nünülia Jeʼwaa maʼaka sietemiittua suluʼu Traducción del Nuevo Mundo, maʼaka jaʼyain shia sünain tü karaloukta yalakat wünaapünaa (Salmo 83:18). Wainma juya aʼyataanaka oʼu sünain tia Wiwüliakat otta anasü maʼin aashajeʼeraa shia süka mapüleein nünüiki Maleiwa sutuma. Paashajeʼera weinshi tü Wiwüliakat, jaʼitairü nnojoluin pümaʼanain tü Wiwüliakat Traducción del Nuevo Mundo (Josué 1:8; Salmo 1:2, 3).

• ¿Jamüsü choʼujaaka wamüin wanee Wiwülia eekai mapüleein?

• ¿Kasa naaʼinrajatka weinshi chi eekai naainjeein tü nüchekakat Maleiwa?