1-3. (1) ¿Kasa eeka süpüla jülüjain waaʼin nünaajaale wanee wapüshi? (2) ¿Kasa shikirajaka anain tü iküleesiakalüirua nachiki na outushiikana?

SAASHIN tü Wiwüliakat «müiria nnojolüin ouktaa» (Alateetkat Mapeena [Apocalipsis] 21:4). Sünain ekirajaaya 5, wekirajaa anainrü eein süpüla katüin woʼu waneepia süka taashin waya nutuma Jesuu. Ayatapejeʼe outuin wayuu (Eclesiastés 9:5). Eesüjaʼa wasakirüle maʼin waaʼin sünain tüü: «¿Jalamüinsüche oʼunuin naaʼin wanee wayuu outapa nia?».

² Anasü watüjaale saaʼu tia, shialeekajaʼa nünaajaale wanee wayuu aikai maʼin wapüla. Nünaajaale wanee wayuu eesü jülüjale waaʼin tüü: «¿Jalamüinsüche oʼunuin tü naaʼinkat? ¿Niʼrüinche waya? ¿Müliashiche nia? ¿Eeshiche süpüla nükaaliijain waya? ¿Müichia maleʼejüin nia?».

³ Nnojotsü pansaain tü ekirajünakalü anain suluʼu tü iküleesiakalüirua süchiki tia. Eeshii na ekirajakana sujuʼitüin naaʼin na anamiakana otta suʼunuin iipünaamüin jee müliain na mojulaashiikana saʼaka siki naashin. Eeshii eekai namüin suʼunuin naaʼin chi outushikai eere saaʼinpülee tü outusükalüirua namaʼanamüin nüpüshi outuinapakana. Eeshii eekai namüin süsalain naainjala wanee wayuu outapa nia, jee mapa, jemeishi nüchikuaʼa süpüla wayuuin jee mürüʼlüin nia.

4. ¿Jamüsü nanüiki na suluʼukana tü iküleesiakalüirua nüchiki wanee wayuu outapa nia?

⁴ Naashin na suluʼukana tü iküleesiakalüirua, ojuʼitüsü naaʼin wanee wayuu outapa nia. ¿Shiimainchejeʼe tü namakat?

¿JALAMÜINSÜCHE OʼUNUIN NAAʼIN WANEE WAYUU OUTAPA NIA?

5, 6. ¿Kasa nüküjaka Jeʼwaa nachiki na outushiikana?

⁵ Nütüjaa aaʼu Jeʼwaa nnojoluin ojuʼitüin naaʼin wanee wayuu outapa nia. Nüküjain suluʼu tü Wiwüliakat, amülouilin wanee wayuu outapa nia. Nnojotsü kasain niʼrüin, nnojotsü kasain naapüin jee nnojotsü kasain jülüjain naaʼin. Makalaka nnojoluin jalamüin oʼunuin tü naaʼinkat.a

⁶ Naashin chi aluwataaikai Salomón «nnojorüleesia kasain natüjaain aaʼu» na outushiikana. Makalaka nnojoluin alin wayuu napüla jee üttüin naaʼin süka outuinapain naya, nnojotsü kasain naʼyataain anain na outushiikana, nnojotsü kasain natüjaain aaʼu otta nnojoluitpa kasain natüjain apüleerua eere nojoʼitunüin (paashajeʼera Eclesiastés 9:5, 6, 10). Süküjain Salmo 146:4 nnojoluin «kasain jülüjain naaʼin» wanee wayuu outapa nia.

¿JAMÜSÜ NUKUWAʼIPA WANEE WAYUU OUTAPA NIA NAASHIN JESUU?

7. ¿Jamüsü nukuwaʼipa wanee wayuu outapa nia naashin Jesuu?

⁷ Anuu nünüiki Jesuu namüin na nikirajüinkana wanaa sümaa outuin Lázaro: «Chi watünajutkai Lázaro, atunküshi nia». ¿Kasa nüküjeeka achiki Jesuu? Anuu nünüiki mapa: «Ouktüichipa Lázaro» (Juan 11:11-14). Naashin Jesuu, wanaa sümaa outuin wanee wayuu müshi nutunkakai maʼin aaʼin. Nüküjain Jesuu müin nutunkakai aaʼin Lázaro wanaa sümaa outuin nia. Nnojoishi chajachin Lázaro iipünaa, nnojoishi nümaajachin nia na nüpüshi outuinnapakana, nnojoishi müliain nia saʼaka siki otta nnojoishi jemelin nia nüchikuaʼa süpüla wayuuinjachin jee mürüʼlüin nia. Saashin waneirua wetsiikulo müshi nutunkakai aaʼin wanee wayuu outapa nia. Süküjain tü Wiwüliakat müin nutunkakai aaʼin Esteban süchikijee nuʼutunuin aaʼin (Aluwataaushikana [Hechos] 7:60, TNM). Jee müshia chi aluwataaushikai Pablo nüküjain müin natunkakai aaʼin na anoujashii outakana (1 Corinto 15:6, TNM).

8. ¿Jamüsü watüjaaka saaʼu nnojoluin nukumalain waya Jeʼwaa süpüla outajanain waya?

⁸ ¿Nukumajüinche Maleiwa na wayuukana süpüla outajanain naya? Nnojo. Nukumajüin Jeʼwaa Adán sümaa Eva süpüla katüinjatüin noʼu waneepia süma nnojoluin ayuulin naya otta niʼitaain suluʼu naaʼin kateein noʼu waneepia (Eclesiastés 3:11). Mojusü naaʼin wanee wayuu ayuuire jee outule nüchon. Akaʼaya neʼe Jeʼwaa chi Washikai, mojusü naaʼin wanaa sümaa niʼrüin ayuulin jee outuin wayuu. Shiimainreje nukumajüin Maleiwa na wayuukana süpüla katüinjatüin noʼu waneepia, ¿jamakaʼa outaka naya?

¿JAMAKUWAʼIPAT TÜ OUTAAKAT?

9. ¿Jamüsü nnojotka kapüleein tü nuchuntakat Jeʼwaa nümüin Adán sümaa Eva?

⁹ Suluʼu tü apainkat Edén, müshi Jeʼwaa nümüin Adán: «Kaatei, anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia» (Génesis 2:9, 16, 17). Tü nuluwataakalü anain Jeʼwaa, nnojotsü kapüleein süpüla noonooin amaa Adán sümaa Eva. Süka nukumajalain naya Jeʼwaa, eeshi süpüla nüküjain namüin kasain anain jee kasain mojuin. Kojutule nümüin Adán sümaa Eva laülaain Jeʼwaa naaʼu otta kojutule namüin süpüshuaʼa tü naapakat namüin, nnojoishiije eʼrülin naya wayumüin nümüin.

10, 11. (1) ¿Kasa nüküjaka Satanaa süpüla nimeejüin Adán sümaa Eva? (2) ¿Jamüsü mojuka maʼin tü naaʼinrakat Adán sümaa Eva?

¹⁰ Eʼrüijaapejeʼe wayumüin Adán sümaa Eva nümüin Maleiwa. Anuu nünüiki Satanaa sümüin Eva: «¿Jamüsü taaʼin nünüiki Maleiwa jümüin? ¿Shiimuinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat?». Susoutakalaka Eva: «Nnojo, eesü süpüla weküin süchon tü wunuʼuliakat süpüshua yaakat suluʼu tü apainkat. Shia neʼe apülajünaka woulia, tü wunuʼu yaa pasanainkat sünain tü apainkat süpüla nnojolüinjatüin weküin süchon. ‹Müleka jiküle shia, jaʼitakaje neʼe jipettüle shia, shiimüinshaana ouktajanain jia sütüma›» (Génesis 3:1-3).

¹¹ Nümakalaka Satanaa sümüin Eva: «Nnojoleena jia ouktüin. Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat» (Génesis 3:4-6). Nunoujireein Satanaa Eva eein süpüla suluwanaajiraain saaʼu sukuwaʼipa sümüiwaʼa. Nnojotpejeʼe nüküjain Satanaa sümüin Eva tü alateetkat sümüin moonooinre shia nümaa Maleiwa. Nüküjain sümüin Eva nnojoleerüin outuin shia, müsüjeseʼe shiküin süchon tü wunuʼukat. Süchikijee tia, shikiraka Adán süchon tü wunuʼukat. Nütüjaa aaʼu Adán sümaa Eva nnojoluinjatüin neküin süchon tü wunuʼu nüpülajakat Jeʼwaa noulia. Wanaa sümaa neküin süchoin tia wunuʼukot, nnojoishii jaa müin naya sümüin tü nuluwataakalü anain Maleiwa. Sükajee tü naaʼinrakat, mojutusai namüin chi Maleiwakai. ¡Mojukatche maʼin tü naaʼinrakat!

12. ¿Jamüsü mojuka naaʼin Jeʼwaa nutuma Adán sümaa Eva?

¹² Mojukajasaʼa naaʼin Jeʼwaa sutuma tü naaʼinrakat Adán sümaa Eva. Mojutusai namüin chi Nashikai. Jülüjataa paaʼin kachonle pia jee wattain saalii tü kasa paaʼinrakat süpüla pipijain naya. Shiasaʼa mapa, eʼrüijaashii naya wayumüin pümüin sümaa naaʼinrüin tü naaʼinreekalü amüin, ¿aashin mojeerüin maʼin paaʼin sutuma tia?

13. ¿Kasa nüküjeeka achiki Jeʼwaa wanaa sümaa «mmainjachi pia püchikuaʼa» nümüin nümüin Adán?

¹³ Süka niʼrüijaain wayumüin Adán sümaa Eva, nnojoliinnapa süpüla katüin noʼu waneepia. Müshi Jeʼwaa nümüin Adán: «Shiimüin sünain mmainjachin pia püchikua, süka aainjuushin pia sünainjee» (paashajeʼera Génesis 3:19). Tü nüküjeekalü achiki Jeʼwaa nümüin Adán shia outajachin nia jee mmainjachin nia nüchikuaʼa, makalaka nnojoluinjatüin katüin noʼu (Génesis 2:7). Süchikijee outuin Adán nnojoluichipa eein nia.

14. ¿Jamakuwaʼipat tü outaakat?

¹⁴ Ayatayüliije katüin noʼu Adán sümaa Eva nnojoireje neʼrüin wayumüin nümüin Maleiwa. Wanaa sümaa neʼrüliijaain wayumüin, kaainjalashii naya jee outushii naya mapa. Tü kaainjalaakat müsü aka saaʼin wanee ayuulii mepisat niʼipünaaka wapüla Adán sümaa Eva, müsüjeseʼe outuin wayuu süpüshuaʼa süka joʼuujiraain naya sümaa kaainjalaa (Roma 5:12). Nnojotpejeʼe shiain keeʼireein naaʼin Jeʼwaa outajatüin wayuu. Müsüjeseʼe müin aka saaʼin waʼünüü tü outaakat saashin tü Wiwüliakat (1 Corinto 15:26, TNM).

NNOJOLEENA WAYA EMEEJÜNÜIN

15. Süka watüjaaitpain saaʼu kasain alatüin namüin na outushiikana, ¿kasa alawaa nnojoluitpaka wanoujain anain?

¹⁵ Naashin na suluʼukana tü iküleesiakalüirua, oʼunusü tü naaʼinkat wanee wayuu outapa nia. Eeshii süpüla wakaaliijain na outushiikana naashin, müshiijeseʼe eein na aapakana nneerü namüin na shikiipüʼükana iküleesia süpüla naainjain misa otta naresaajüin naaʼu müliashii. Saashin tü Wiwüliakat, nnojoishii müliain na outushiikana otta nnojotsü süpüla mojuin naaʼin süka outuinnapain naya. Nnojoishii süpüla yootuin waya namaa jee nnojoishii süpüla wakaalinjain naya. Akaʼaya na outushiikana nnojoishii süpüla naaʼinrüin tia otta nnojoishii süpüla jamajüin waya natuma. Süka watüjaaitpain saaʼu tia, nnojoluinjana waya mmoluin neema otta nnojoluitpa wanoujain tü alawaa ekirajünakalü anain.

16. ¿Kasa shikirajaka anain tü iküleesiakalüirua nachiki na outushiikana?

¹⁶ Nimeejeein waya Satanaa sükajee tü shikirajakalü anain tü iküleesia ekirajakalü alawaa. Keeʼireesü naaʼin wanoujain suʼunuin naaʼin wanee wayuu outapa nia. Naashin na shikiipüʼükana tü iküleesiakalüirua, ojuʼitüsü naaʼin wanee wayuu outapa nia. ¿Shiache shikirajaka anain tia tü iküleesia puʼunakalü aluʼu? ¿Nekirajüinche sünain tü sümakat tü Wiwüliakat? Süpüla nükayaleʼerüin Satanaa na wayuukana nuulia Maleiwa, nunoujireein naya sünain tia alawaakat.

17. ¿Jamüshi mojutkai Jeʼwaa sutuma tü ekirajünakat sünain müliain na mojulaashiikana saʼaka siki?

¹⁷ Mojutusai Jeʼwaa sutuma tü alawaa ekirajünakat nachiki na outushiikana suluʼu tü iküleesiakalüirua. Eesü shikirajüle sünain müliainjanain waneepia na mojulaashiikana saʼaka siki. Alawaapejeʼe tia, nnojotsü süpüla müinjatüin wayuu nutuma Jeʼwaa (paashajeʼera 1 Juan 4:8). ¿Jameerü pünüiki nüchiki wanee wayuu eekai nüsijüin najapü nüchon sutuma naainjain kasa mojusü? Jülüjeerü paaʼin wayuuin mojulaashin nia otta nnojoleechi pia aleeweein nümaa. Keeʼireesü naaʼin Satanaa jülüjain waaʼin tia nüchiki Jeʼwaa.

18. ¿Jamüshii nnojoliinjanaka mmoluin waya neema na outushiikana?

¹⁸ Naashin na suluʼukana waneirua iküleesia, outapa wanee wayuu müshi aka naaʼin wanee aapiee suluʼu meʼrujuin jee pülain nia. Kojutuinjana wamüin naya meʼrujusaliikana jee mmoluinjana waya neema suulia jashichijaain naya wamüin naashin. Wainma wayuu anoujaka sünain tia alawaakat. Müshiijeseʼe mmoluin naya neema na outushiikana. Shiimain kojutuinjanain wamüin na outushiikana. Eepejeʼe wayuu alanaʼaleekana amüin nojutü na outushiikana nuulialeʼeya Maleiwa. Jülüja paaʼin nnojoluin kasain natüjaain aaʼu na outushiikana jee nnojoluin kasain naaʼinrüin. Müshiijeseʼe nnojoluinjanain waya mmoluin neema. Nia Jeʼwaa chi Kakumalakai waya jee chi Maleiwa pülashikai maʼin. Makalaka niainjachin neʼe waʼwaajüinjachin nümüiwaʼa (Alateetkat Mapeena 4:11).

19. ¿Kasa anasü weʼraka sutuma watüjaaitpain saaʼu kasain maʼin alatüin namüin na outushiikana?

¹⁹ Süka watüjaaitpain saaʼu kasain maʼin alatüin namüin na outushiikana, nnojoluitpa wanoujain sünain tü alawaa ekirajünakalü anain. Makalaka wayaawateerüin saaʼu tü kasa anasü naaʼinreetkat Jeʼwaa mapeena süpüleerua wayuu.

20. ¿Kasa wekirajaainjatka anain sünain tü wane ekirajaayakat?

²⁰ Sümaiwa paala, eejachi wanee wayuu aʼyataai nümüin Maleiwa, Job nünülia. Müshi nia: «Outule wanee wayuu, ¿kateetche noʼu nüchikuaʼa?» (Job 14:14). Sünain tü wane ekirajaayakat, wekirajaajeerü anain tü sümakat tü Wiwüliakat süchiki tia.

1-3. (1) ¿Jamüshii maka püreesakai waaʼin? (2) ¿Kasa naaʼinrajatka Jeʼwaa süpüla nükaaliijain waya suulia outaa?

JÜLÜJATAA paaʼin süsalain pia wanee kasa nnojotka paaʼinrüin. Apüreesajinnüshi pia saaliijee otta müichia mojuʼitüin pia. Eesüjaʼa mojule paaʼin sutuma nnojoluin pütüjaain saaʼu tü paaʼinrajatkat. Paapaka nüchiki wanee wayuu eekai süpüla nujuʼitirüin pia suluʼujee tü kaatsetkat sümaa nüküjain pümüin nükaaliijainjachin pia. ¿Aashin talateechin maʼin pia sutuma tia?

² Wapüshuaʼa wayakana müshii püreesakai waaʼin sutuma tü outaakat. Nnojoliishii isain waya süchiki. Niapejeʼe neʼe Jeʼwaa ountaka akaaliijain waya suulia outaa. ¿Jameetche sukuwaʼipa nutuma? Nüküjain Jeʼwaa ooʼulaa meeriain tü outaakat nutuma (1 Corinto 15:26, TNM).

³ ¿Jülüjasüche paaʼin talateerüin waaʼin nnojotpa jaralüin outuin? Yüüʼülaa meeria tü outaakat nutuma Jeʼwaa jee nüsoʼireʼerüinjatü naaʼin na outushiikana. Naapüitpa nünüiki Jeʼwaa sünain müinjatüin shia nutuma (Isaías 26:19). ¿Jamüsü talateetka paaʼin shikeraajapa tü nümakat Jeʼwaa?

NÜNAAJAALE WANEE WAYUU AIKAI WAPÜLA

4. (1) ¿Kasa amülialeetka waaʼin outule wanee wapüshi jee niale wanee waʼaleewain? (2) ¿Jaralii na naʼaleewainkana maʼin Jesuu?

⁴ Mojushaatasü maʼin waaʼin outule wanee wapüshi jee niale wanee waʼaleewain. Nnojoishii kasakainjanain naya watuma, isasü wachiki wasoʼireʼerüin naaʼin nachikuaʼa. Amülialaapejeʼe waaʼin sutuma tü sümakat tü Wiwüliakat (paashajeʼera 2 Corinto 1:3, 4). Wekirajaa süchiki wanee kasa alataka sümaiwa wayaawataka anainjee keeʼireein naaʼin Jeʼwaa nümaa Jesuu nasoʼireʼerüin naaʼin wapüshi jee waʼaleewainyuu. Wanaa sümaa yaajachin Jesuu Mmapaʼa, oʼunapuʼushi weinshi eemüin Lázaro, Marta otta María. Naʼaleewainyuu maʼin naya Jesuu. Süküjain tü Wiwüliakat «alin maʼi nüpüla Marta je tü shimiiruakat je müshijaʼa Lázaro» (Juan 11:3-5). Shiasaʼa soʼu wanee kaʼi, outushi Lázaro.

5, 6. (1) ¿Jamüsü naaʼin Jesuu wanaa sümaa niʼrüin naʼyalajüin na nüpüshikana Lázaro namaa na naʼaleewainkana? (2) ¿Jamüsü sümülialaaka waaʼin sutuma mojuin maʼin naaʼin Jesuu outapa Lázaro?

⁵ Nuʼunaka joo Jesuu sünain amüliajaa saaʼin Marta sümaa María. Wanaa sümaa saapüin Marta nülüʼülaain Jesuu pueulopaʼamüin, oʼunusü shia sünain apanapajaa nia. Anasü saaʼin süka shiʼrüin Jesuu nüchikuaʼa. Sümakalaka nümüin: «Müleka yaajachireje pia, nnojoishije ouktüin chi tawalakai». Mepitchipa Lázaro saaʼinruʼu Marta süka outuichipain nia. Niʼraka joo Jesuu shiʼyalajüin María. Mojushaatasü naaʼin Jesuu süka niʼrüin naʼyalajüin na nüpüshikana Lázaro namaa na naʼaleewainkana. Niʼyalajakalaka Jesuu sutuma tia (Juan 11:21, 33, 35). Nütüjaa aaʼu Jesuu mojushaatain maʼin waaʼin nünaajaale wanee wapüshi.

⁶ Amülialaasü waaʼin süka nütüjaain saaʼu Jesuu jamüin waaʼin nünaajaale wanee wapüshi. Mojushaatasü maʼin nümüin Jesuu outuin wayuu maʼaka mojuin shia nümüin Jeʼwaa (Juan 14:9). Süka pülashaatain Jeʼwaa, ooʼulaa meeria tü outaakat nutuma. Naaʼinreerü tia soʼu palitchon kaʼi.

«LÁZARO, PUJUITTAA YALAJEE YAA ANOOIPAʼAMÜIN»

7, 8. (1) ¿Jamüsü nnojotka keeʼireein saaʼin Marta süsünneʼennüin tü shirousekat eejachire niʼitaanüin Lázaro? (2) ¿Kasa pülasü naaʼinraka Jesuu?

⁷ Nuʼunaka joo Jesuu amuuyuupaʼamüin eejachire niʼikünüin Lázaro. Keʼipolosü atumawaa wanee ipa miyoʼu maʼin eejachire müliashii. Nümakalaka joo Jesuu: «Jüsünneʼera türa shirousekat». Nnojotpejeʼe keeʼireein saaʼin Marta süsünneʼennüin tü shirousekat süka pienchitchin kaʼi outuin Lázaro (Juan 11:39). Eetaayaai sütüjaain saaʼu Marta tü kasa anasü naaʼinrajatkat Jesuu nüpüleerua Lázaro.

⁸ Süsünneʼennapa tü shirousekat, «Lázaro, pujuittaa yalajee yaa anooipaʼamüin» müshi Jesuu sümaa emetuluin nünüiki. Shiʼrakalaka Marta sümaa María nujuʼitaain «chi ouktüshikai paala sünain koʼoin süka kuluulu najapü, nuuʼui ooʼulaka nuʼupünaa» (Juan 11:43, 44). ¡Asoʼiraasü naaʼin Lázaro! Talatakajasaʼa naaʼin na nüpüshikana otta na naʼaleewainkana süka neʼrüin nia nüchikuaʼa, süka eein süpüla yootuin naya nümaa jee najuupajiraain nümaa. Anashaatasü maʼin tü naaʼinrakat Jesuu süka nüsoʼireʼerüin naaʼin Lázaro.

«TACHEE, PÜCHIJIRAA MAALA»

9, 10. (1) ¿Jarai chi pülashikai atuma Jesuu süpüla nüsoʼireʼerüin naaʼin na outushiikana? (2) ¿Kasa watüjaka sünainjee süsoʼireʼennüin saaʼin wayuu saashin tü Wiwüliakat?

⁹ ¿Jarai chi pülashikai atuma Jesuu süpüla nüsoʼireʼerüin naaʼin na outushiikana? Nia Jeʼwaa chi pülashikai atuma Jesuu süpüla nuuntuin tia, müshijeseʼe nuʼuraajüin Jesuu nümüin Jeʼwaa süpülapünaa nüsoʼireʼerüin naaʼin Lázaro (paashajeʼera Juan 11:41, 42). Nnojoipejeʼe niain neʼe Lázaro asoʼireʼennaka aaʼin nutuma Jesuu.a Ashajünüsü suluʼu tü Wiwüliakat süchiki wanee jintut mayeinka, 12 suuyase. Jairo nünülia chi süshikai, waneesüchon shia nümüin. Shapaasü maʼin naaʼin Jairo, müsüjeseʼe nuchuntuin maʼin nümüin Jesuu süpüla anainjatüin tü nüchonkot. Wanaa sümaa yalajachin nia nümaa Jesuu, antüshii waneinnua wayuu sünain aapiraa nia, namaka nümüin: «Ouktüitpa tü püchonkot. Puuʼulaa suulia peenajaain chi Ekirajüikai». Nümaka Jesuu nümüin Jairo: «Nnojo piyoʼujaain aaʼin. Pünouja neʼe tanain süpüla anainjatüin tü püchonkot». Nuʼunaka Jesuu nipialuʼumüin Jairo. Pejepa nia sünain nipia Jairo, naapajüin na wayuukana sünain aʼyalajaa saaʼu tü jintutkat. Nümaka Jesuu namüin: «Nnojo jiʼyalajüin. Tü jintutkot, nnojotsü ouktüin, atunküsü neʼe». Eesüjaʼa nnojorüle niyaawatüin saaʼu Jairo sümaa nuʼwayuuse kasain nüküjeekalü achiki Jesuu. «Jujuʼita paülüʼüjee», nümaka Jesuu namüin na yalajanakana. Makatüshi Jesuu nümaa Jairo jee tü nuʼwayuusekat Jairo eejatüle tü jintutkat. Naapaaka joo Jesuu sajapü tü jintutkat sünain nümüin sümüin: «Tachee, püchijiraa maala». Talatakajasaʼa naaʼin Jairo sümaa nuʼwayuuse süka neʼrüin süshaʼwalaain tü nachonkot sümaa suwaraijaain. Nüsoʼireʼerüin Jesuu saaʼin tü jintutkot (Marcos 5:22-24, 35-42; Lucas 8:49-56). Sotowaikajasaʼa naaʼin Jairo sümaa nuʼwayuuse tü naaʼinrakat Jeʼwaa napüleerua nükajee Jesuu, jama neʼrüin katüin soʼu tü nachonkot.

¹⁰ Outushii mapa na wayuu nüsoʼireʼeraka aaʼin Jesuu. ¿Amülatche neʼe tü naaʼinrakat Jesuu napüleerua? Nnojo. Süka süküjünüin tia suluʼu tü Wiwüliakat, watüjaa aaʼu keeʼireein maʼin naaʼin Jeʼwaa nüsoʼireʼerüin naaʼin na outushiikana otta naaʼinreerü shia.

TÜ WATÜJAKAT SÜNAINJEE SÜSOʼIREʼENNÜIN SAAʼIN WAYUU

11. ¿Jamüsü nukuwaʼipa Lázaro outapa nia saashin Eclesiastés 9:5?

¹¹ Saashin tü Wiwüliakat, «nnojorüleesia kasain natüjaain aaʼu» na outushiikana (Eclesiastés 9:5). Majatia nukuwaʼipa Lázaro. Wanaa sümaa suluʼujachin nia woowirakat, nnojorüleesia kasain nütüjaain aaʼu, müshi nutunkakai maʼin aaʼin maʼaka nüküjain shia Jesuu (Juan 11:11).

12. ¿Jamüsü sütüjaanaka aaʼu shiimain nüsoʼiraain aaʼin Lázaro?

¹² Wainma wayuu eʼrakana nüsoʼireʼennüin aaʼin Lázaro nutuma Jesuu. Jaʼitakajeʼe na nüʼünüükana Jesuu, natüjaa aaʼu nüsoʼireʼennüin aaʼin Lázaro nutuma Jesuu. Nnojotsü eein wanee wayuu eekai süpüla suunjulajüin süchiki nüsoʼireʼennüin aaʼin Lázaro (Juan 11:47). Jee müsia, wainma na wayuu analaakana nümüin Lázaro otta anoujaka sünain nuluwataaushin Jesuu nutuma Maleiwa. Mojushiisü maʼin tia namüin na nüʼünüükana Jesuu, müshiijeseʼe naashajaajiraain nikiira Jesuu otta Lázaro süpüla noʼutirüin naaʼin (Juan 11:53; 12:9-11).

13. ¿Jamüshi niaka neʼe Jeʼwaa eekai süpüla nüsoʼireʼerüin saaʼin wayuu?

¹³ Naashin Jesuu, asoʼiraajeerü saaʼin süpüshuaʼa tü wayuu outusükalüirua (Juan 5:28). Naya nüsoʼireʼerüinjanaka aaʼin Jeʼwaa na wayuu nüneekakana süpüla katüin noʼu nachikuaʼa. Süpüla naaʼinrüin tia, sotuinjatü naaʼin jamapuʼuin maʼin nakuwaʼipa paala. ¿Eesüche süpüla nuuntuin tia Jeʼwaa? Jülüjataa paaʼin tüü: watta maʼin saalii tü shüliwaikalüirua chaa iipünaa otta kanüliayaa müsü shia nutuma Jeʼwaa (paashajeʼera Isaías 40:26). Sotusü naaʼin Jeʼwaa sünülia süpüshuaʼa tü shüliwaikalüirua, shialeekajaʼa moteematüin naaʼin jamapuʼuin nakuwaʼipa na wayuu nüsoʼireʼerüinjanakana aaʼin. Pülashi maʼin Jeʼwaa süka niain chi Kakumalakai kasa süpüshuaʼa. Müshijeseʼe eein süpüla nüsoʼireʼerüin naaʼin na outushiikana.

14, 15. ¿Kasa watüjaka sünainjee tü nümakat Job süchiki süsoʼiraainjatüin naaʼin na outushiikana?

¹⁴ Eejachi wanee wayuu nümaiwa anoujaka maʼin sünain süsoʼiraainjatüin saaʼin tü wayuu outusükalüirua, Job nünülia. Müshi nia: «Outule wanee wayuu, ¿kateetche noʼu nüchikuaʼa?». Anuu sooʼomüin nünüiki Job nümüin Jeʼwaa: «Puunejeechi taya otta asouteechi taya. Keeʼireesü maʼin paaʼin paainjain shia süka pukumajalain taya». Tü watüjakat sünainjee tia, shia keeʼireein maʼin naaʼin Jeʼwaa nüsoʼireʼerüin naaʼin na outushiikana (Job 14:13-15).

¹⁵ ¿Jamüsü paaʼin sutuma pütüjaain saaʼu nasoʼiraainjanain aaʼin na outushiikana? Amülialaasü waaʼin sutuma watüjaain saaʼu keeʼireein maʼin naaʼin Jeʼwaa nüsoʼireʼerüin naaʼin na outushiikana. Eepajaʼa süpüla püsakirüin paaʼin sünain tüü: «¿Jameetche nakuwaʼipa na tapüshi jee taʼaleewainyuu outuinnapakana? ¿Asoʼiraajeetche naaʼin?». Wekirajaa sünain tü sümakat tü Wiwüliakat nachiki na asoʼiraainjanakana aaʼin otta jalainjanain kepiain naya.

SAAPEERÜ NÜNÜIKI TÜ WAYUU OUTUSÜKALÜIRUA

16. ¿Jamüsü anaʼleejeetka maʼin nakuwaʼipa na asoʼiraainjanakana aaʼin?

¹⁶ Süchikijee nasoʼiraain aaʼin na wayuu namaiwajanakana, kottiraashii naya sümaa napüshi jee naʼaleewainyuu. Meeria sukuwaʼipa tü asoʼirawaakalü aaʼin mapeena, anaʼleejeetpejeʼe maʼin shia. ¿Jamüsü anaʼleejeetka maʼin? Shia süka eein süpüla katüin noʼu waneepia saaʼu tü Mmakat na wayuu asoʼiraainjanakana aaʼin. Otta aneerü sukuwaʼipa tü mmapaʼakat süka nnojoleerüin eein atkawaa, mojulawaa otta ayuulii.

17. ¿Jaralii na asoʼireʼennüinjanakana aaʼin?

¹⁷ ¿Jaralii na asoʼireʼennüinjanakana aaʼin? Naashin Jesuu antajatü wanee kaʼi saapüinjatka oʼu nünüiki süpüshuaʼa tü wayuu outusükalüirua sümaa sujuʼiteerüin mmapüjee. Wayuukana naainnua naya na nüneekakana Maleiwa süpüla katüin noʼu nachikuaʼa (Juan 5:28, 29). Anuu sooʼomüin sünüiki tü Wiwüliakat: «Na wayuu outakana shiroku tü palaakat otta na suluʼukana tü süpüleekat tü outusükalüirua, ojuʼitüshii naya» (Alateetkat Mapeena [Apocalipsis] 20:13, TNM). Watteena naalii na wayuu asoʼiraainjanakana aaʼin. Naashin chi aluwataaushikai Pablo, asoʼiraainjatü saaʼin «tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (paashajeʼera Aluwataaushikana 24:15).

18. ¿Jaralii na wayuu aaʼinrakana «tü anasükat» asoʼiraainjanaka aaʼin?

¹⁸ ¿Jaralii na wayuu aaʼinrakana «tü anasükat»? Noʼutku naya wayuukana naya na waneepiapuʼukana nümaa Jeʼwaa sümaiwa eejanaka süpülapünaa nüntüin Jesuu mmapaʼamüin. Asoʼiraainjatü naaʼin napüshuaʼa süpüla kepiain naya saaʼu tü Mmakat. Anuu nanülia noʼutku: Noé, Abraham, Sara, Moisés, Rut otta Ester. Aküjünüsü suluʼu Hebreokana kapiitulo 11 tü süchikimaajatkat nakuwaʼipa naya wayuukana. ¿Kaseetka alatüin namüin na waneepiakana nümaa Maleiwa outaka maaʼulu? Asoʼiraainjatü naaʼin süka nayaʼleeinya napüshi na wayuu aaʼinrakana «tü anasükat».

19. (1) ¿Jaralii na wayuu aaʼinrakana «tü mojusükat»? (2) ¿Kasa eeka süpüla naneeküin nasoʼiraapa aaʼin?

¹⁹ ¿Jaralii na wayuu aaʼinrakana «tü mojusükat»? Naya na wayuu wattakana naalii nnojoliika aküjünüin amüin nüchiki Jeʼwaa. Mayaainjeʼe outuin naya, ayatüshii sotuin naya naaʼin Jeʼwaa. Nüsoʼireʼerüinjatü Jeʼwaa naaʼin süpüla nekirajünüin nüchiki otta süpüla naneeküin naʼyataainjanale nümüin.

20. ¿Jaralii na nnojoliinjanakana asoʼiraain aaʼin?

²⁰ ¿Asoʼiraajeetche naaʼin napüshuaʼa na outushiikana? Nnojo. Naashin Jesuu, eejeena waneinnua wayuu nnojoleenaka asoʼiraain naaʼin (Lucas 12:5, TNM). ¿Jaralii na nnojoliinjanakana asoʼiraain aaʼin? Naya na wayuu mojulaakana nnojoliika anouteʼereein nakuwaʼipa. Nia neʼe Jeʼwaa aneeküinjachikai jaralüinjatüin asoʼiraain aaʼin süka niain chi kasalajanainjachikai atuma saainjala wayuu. Naapapejeʼe Jeʼwaa shikii nümüin Jesuu süpüla süsalainjatüin saainjala wayuu nutuma «türa eekai katayülüin soʼu je maa aka türa eekai ouktüirüin» (Aluwataaushikana 10:42). (Paashajeʼera noota 18).

NA CHAINJANAKANA IIPÜNAA

21, 22. (1) ¿Jamüinjatü natapaʼa na asoʼiraainjanakana aaʼin chaa iipünaa? (2) ¿Jarai chi palajachikai asoʼiraain aaʼin süpüla chainjachin iipünaa?

²¹ Saashin tü Wiwüliakat, eejeena waneinnua wayuu asoʼiraainjanaka aaʼin süpüla chain naya iipünaa. Süsoʼiraapa naaʼin naya wayuukana, meʼrujuinjana naya maʼaka naaʼin na aapieekana.

²² Nia Jesuu chi palajachikai wayuu asoʼiraakai aaʼin süpüla chain nia iipünaa (Juan 3:13). Asoʼireʼennüsü naaʼin Jesuu nutuma Jeʼwaa apünüin kaʼi süchikijee nuʼutunuin aaʼin. Nnojotpejeʼe asoʼiraain naaʼin Jesuu sünain müin aka naaʼin sütapaʼa wayuu (Salmo 16:10; Aluwataaushikana 13:34, 35). Mayaainjeʼe nuʼutunuin aaʼin Jesuu suluʼu keʼirukuin nia, naashin Pedro, asoʼireʼennüsü naaʼin nutuma chi Nüshikai suluʼu meʼrujuin nia (1 Pedro 3:18, TNM). Asoʼiraasü naaʼin Jesuu sümaa pülashaatain maʼin nia (1 Corinto 15:3-6). Süküjapejeʼe tü Wiwüliakat, eejeenain waneinnua wayuu asoʼiraainjanakana aaʼin chaa iipünaa.

23, 24. ¿Jaralii na palitchonkana anneerü naashin Jesuu? ¿Jeʼrashii naya napüshuaʼa?

²³ Wanaa sümaa sülüʼülaain nükalia Jesuu süpüla outaa, müshi nia: «Oʼuneechi taya [...] süpüla yapainjatüin tatüma tü paükalüirua jüpüla» (Juan 14:2). Sükajee tia nümakat Jesuu, wayaawata aaʼu süsoʼiraajeerüin naaʼin noʼutku na anoujashiikana süpüla chainjanain iipünaa wanaa nümaa. Naya «na palitchonkana anneerü» nümakana (Lucas 12:32, TNM). Niiʼiyatüin Maleiwa nümüin Juan jeʼrainjanain na chainjanakana iipünaa. Naashin Juan niʼrüin Jesuu «shaʼwatüin chaʼaya saaʼu tü wutai kanüliakat Sion sümaa wayuu watta saalii, maa aka 144.000 wayuu» (Alateetkat Mapeena 14:1).

²⁴ ¿Joujatü oʼttüin tü asoʼirawaakalü aaʼin napüla na 144.000? Saashin tü Wiwüliakat, oʼttüsü tü asoʼirawaakalü aaʼin napüla naya anoujashiikana soʼujeʼereʼeya nuʼttüin Jesuu sünain aluwatawaa chaa iipünaa (1 Corinto 15:23). Aluwataaichipa Jesuu maaʼutpünaa chaa iipünaa otta wainmainna noʼutku na 144.000 asoʼiraainnapakana aaʼin chaka nümaa. Eeyüliipejeʼe waneinnua yaayüliikana mmapaʼa. Outapa naya, asoʼireʼennamaateerü naaʼin süpüla chain naya iipünaa. Watteenapejeʼe naalii na wayuu asoʼiraainjanakana aaʼin süpüla katüin noʼu paʼaraiisüpa tü Mmakat.

25. ¿Kasa wekirajaajeetka anain sünain tü wane ekirajaayakat?

²⁵ Alüʼütsü süpüla taashin wayuu nutuma Jeʼwaa suulia outaa, müiria nnojoluin eein outaa (paashajeʼera Isaías 25:8). ¿Kaseerü naaʼinraka na 144.000 chainjanakana chaa iipünaa? Saashin tü Wiwüliakat, aluwataainjana naya nümaa Jesuu. Sünain tü wane ekirajaayakat, wekirajaajeerü anain sooʼomüin süchiki tü sukuwaʼipainjatkat aluwatawaa nutuma Jesuu.