Paaʼinrajatka süpüla anain pukuwaʼipa sünainjee tü sümakat tü Bibliakat

Jamüshijaʼa piʼyataainjachire sünain wanee kasa eekai miyoʼuin maʼin, nnojotsü paaʼinrüin shia uwatuwoʼushi, paainjain shia shiʼipawai. Müinjatia sukuwaʼipa watuma woʼttapa sünain aashajeʼeraa tü Bibliakat. «¿Kasache taashajeʼerüinjatka palajana?», eesüjaʼa müle pünüiki. Sünain ekirajaayakat tüü, pikirajaajeerü anain tü paaʼinrajatkat süpüla kamalainjatüin pümüin aashajeʼeraa jee ekirajawaa sünain tü Bibliakat.

1. ¿Kasa anasü piʼreetka paashajeʼerüle tü Bibliakat soʼukaiwai?

Chi wayuu aashajeʼerakai «tü nünüikikat Jehová» soʼukaiwai, talateerü naaʼin jee aneerü nukuwaʼipa (paashajeʼera Salmo 1:1-3). Süpüla pikiʼralaain sünain aashajeʼeraa tü Bibliakat, paashajeʼera shia soʼu jeʼra minuuto soʼukaiwai. Müle shia putuma, kamalainjeerü pümüin paashajeʼerüin shia.

2. ¿Kasa paaʼinrajatka süpüla anain pukuwaʼipa sünainjee tü paashajeʼerakat?

Süpüla anain pukuwaʼipa sünainjee tü sümakat tü Bibliakat, jülüja paaʼin tü paashajeʼerakat, nnojotsü paashajeʼerüinjatüin shia süpaʼa mma (Josué 1:8). Paashajeʼerapa shia, jülüja paaʼin tüü: «¿Kasa süküjaka tamüin wetsiikulokot tüü süchiki nukuwaʼipa Jehová? ¿Kasache taaʼinrajatka süpüla wanaawain takuwaʼipa sümaa tü sümakat? ¿Kasa taaʼinrüinjatka süpüla takaalinjain na waneinnua sükajee tia pütchikat?».

3. ¿Kasa paaʼinrajatka süpüla paashajeʼerüin tü Bibliakat soʼukaiwai?

¿Kapüleʼewaisüche pümüin paashajeʼerüin tü Bibliakat süka nnojoluin pia jimatüin? Maʼleesia wakuwaʼipa, müsüjeseʼe wajayatüinjatüin kaʼi süpüla waashajeʼerüin shia (Éfeso 5:16, TNM). Puunteerü tia, paashajeʼerüle shia soʼukaiwai soʼu tü oora anakalü oʼu pümüin. Eeshii na aashajeʼerakana shia wattaʼa maalü, kaleʼu jee aipaʼa süpülapünaa neisalaain. ¿Jaralüjaʼa tü oora anakalü oʼu pümüin paashajeʼerüin tü Bibliakat?

WEKIRAJAA SOOʼOMÜIN

4. Tü paaʼinrajatkat süpüla kamalain pümüin aashajeʼeraa tü Bibliakat

Eesüjaʼa mamalainre pümüin aashajeʼeraa tü Bibliakat. Jamüsüjaʼa nnojorüle pikaajüin wanee eküülü, nnojotsü pikeein sümüin. Shiasaʼa puuʼulakawaire seʼejü, pikeejeerü amüin. Müsia neʼe sukuwaʼipa waashajeʼerawaire tü Bibliakat, keeʼireejeerü waaʼin waashajeʼerüin shia. Jaashajeʼera 1 Pedro 2:2 otta yooto jia süchiki tüü:

• ¿Keeʼireejeetche paaʼin paashajeʼerüin tü Bibliakat paashajeʼerawaire shia weinshi?

Jünaja tü VIDEOKOT süpüla jütüjaain saaʼu tü naaʼinrakat waneinnua wayuu süpüla kamalain namüin aashajeʼeraa tü Bibliakat. Süchikijee, yooto jia süchiki tüü:

VIDEO: Jimaʼalii jee majayünnüü kamalainkana amüin aashajeʼeraa tü Bibliakat (5:33)

• ¿Jamüsü kapüleʼewaika namüin na wayuu suluʼukana tü videokot naashajeʼerawalin tü Bibliakat?

• ¿Kasa naaʼinraka süpüla nnojoluin nooʼulaain suulia aashajeʼeraa tü Bibliakat?

• ¿Kasa naaʼinraka süpüla kamalain namüin naashajeʼerawalin tü Bibliakat?

Paaʼinrajatka süpüla puʼttuin sünain aashajeʼeraa tü Bibliakat:

• Paashajeʼera wanee Biblia eekai pansaain jee mapüleein sünüiki. Eesü süpüla paashajeʼerüin Traducción del Nuevo Mundo.

• Paashajeʼera süchiki tü pütüjaweekalü aaʼu jee kamalainka pümüin. Pünaʼla tü pütchikat «Paashajeʼera palajana süchiki tü kamalainkat pümüin», suʼttianainjee karaloʼutakat tüü.

• Pejeetta tü kapiitulo paashajeʼerüitpakat. Pünaʼla tü pütchikat «Pejeetta tü kapiitulo paashajeʼerüitpakat», sajaʼttiamüin karaloʼutakat tüü.

• Püdescargaaja tü aplicaciónkot JW Library^®. Pülatira shia suluʼu püserulaatse jee shiale suluʼu wanee computador. Paaʼinrüle tia, paashajeʼereerü jee paapajeerü tü Bibliakat eepünaale pia.

• Pikirajaa sünain tü pütchi eekat suʼttiajee jee sajaʼttiamüin Traducción del Nuevo Mundo. Pünteerü anain maapa, pütchi süttaka otta jamaluʼuluin waneirua pütchi. Pikirajaale sünain tia, kamalainjeerü pümüin tü sümakat tü Bibliakat.

5. Pikirajaa süpülapünaa pikirajünüin sünain tü Bibliakat

Jaashajeʼera Salmo 119:34 otta yooto jia süchiki tüü:

• ¿Jamüsü anaka puchuntüle nümüin Maleiwa süpülapünaa paashajeʼerüin tü Bibliakat jee pikirajaain pümüiwaʼa sünain karaloʼutakat tüü?

¿Kasa paaʼinrajatka süpüla piyaawatüin saaʼu tü pikirajaajeetkalü anain pikirajünapa? Anuu tü paaʼinrajatkat süpülapünaa pikirajünüin sünain wanee ekirajaaya:

1. 1. Paashajeʼera süpüshuaʼa tü pütchikat jee tü asakinnakalü anain suʼttianainjee tü ekirajaayakat.

2. 2. Paashajeʼera süpüshuaʼa tü wetsiikulokalüirua otta jülüja paaʼin jamüin pansaaka shia sümaa tü pikirajaakalü anain.

3. 3. Pejeetta tü pütchi pansaakat sümaa tü asakinnakalü anain. Paaʼinrüle tia, piyaawateerü aaʼu tü pikirajaakalü anain pikirajünapa.

¿Pütüjaa aaʼu tüü?

Wayakana aküjaliikana pütchi nüchiki Jehová, eepuʼusü wamaʼana waneirua Biblia süpüla wekirajaain, shiasaʼa maaʼulu yaa shiaitpa eeka wamaʼana Traducción del Nuevo Mundo. Wamaʼanasü shia süka pansaain tü sümakat jee mapüleein ayaawataa saaʼu otta ashajünüsü nünülia Maleiwa suluʼu (paashajeʼera tü pütchi suluʼukat jw.org: «¿Nakumajalache neʼe na aküjaliikana pütchi nüchiki Jehová tü Biblia namaʼanakat?»).

WATÜJAAITPAKA AAʼU

Süpüla anain pukuwaʼipa sünainjee tü sümakat tü Bibliakat, püneeka jalapüshinjatüin paashajeʼerüin shia soʼukaiwai. Puchunta nümüin Maleiwa süpüla piyaawatüin saaʼu tü paashajeʼerakat otta pikirajaa palajana süpülapünaa pikirajünüin.

Pusouta shiʼipajee

• ¿Kasa paaʼinrajatka süpüla anain pukuwaʼipa sünainjee tü sümakat Bibliakat?

• ¿Jalapüshi anakalü oʼu pümüin paashajeʼerüin otta pikirajaain sünain tü Bibliakat?

• ¿Jamüsü anaka pikirajaale palajana süpülapünaa pikirajünüin?

PÜNAʼLA SOOʼOMÜIN

Pikirajaa sünain waneirua pütchi kamalainjeetka atuma pümüin paashajeʼerüin tü Bibliakat.

«¿Kamalainsü pümüin aashajeʼeraa tü Bibliakat?» (Aapiria Wayuu, nuum. 1, 2017)

Anuu süchiki apünüinsü kasa aneetka atuma pukuwaʼipa sünainjee tü sümakat tü Bibliakat.

«¿Kasa anasü teʼreetka taashajeʼerüle tü Bibliakat? Shiʼipa 1: Püchajaa süchiki korolo kojutusü suluʼu tü Bibliakat» (Pütchi suluʼuka jw.org)

Paashajeʼera süchiki tü paaʼinrajatkat süpüla kamalain pümüin aashajeʼeraa tü Bibliakat.

«¿Kasa anasü teʼreetka taashajeʼerüle tü Bibliakat? Shiʼipa 2: Paaʼinrajatka süpüla kamalain pümüin aashajeʼeraa tü Bibliakat» (Pütchi suluʼuka jw.org)

Pünaja süchiki tü naaʼinrakat waneinnua wawalayuu süpüla naashajeʼerüinjatüin tü Bibliakat, kakaliainna naya sünain aaʼinraa tia.

Sukuwaʼipainjatka watuma wekirajaapa sünain tü Bibliakat (2:06)